EBRENƐ́N 2 - Ebrié New Testament 1996

Yankan swá aswa lo, áli ábhwe khóo

¹ Lóhɛ́nthé, ábhwe mímí lókɔn lo ye, áyɔn salé lo hɔn pɛ kpɛ́ɛ́n, ló ochɛ́sé ábhwe lókɔn ole phiá lo mɔ́n, khɛ́n ochɛ́ lo liá.

² Ábhwe khɛ́n Yankan-mranchɛ́mán bho bha se lo, áli ábhwe mímí. Ló kasé lephan ɛle hɔn ábhwe lókɔn pɛ kpɛ́ɛ́n, lókhɛ́n ɛle ji ábhwe lókɔn, hɛ yí khɛ́n wo bhá tɛ́ dri hɛ phɔ, átɛsa ɛgɛ lópɛnsɔ́n phu.

³ Ló Yankan swá lókɔn aswa lo, kasé lóbhwe le jan lo thɛ́n, áyíkhúphɔ lókɔn khɛ́n atre ébo lo ɔn, kalósi lo bhá khɔ́ chán lóhrómɛn féne e? Lo Hwánthe bɛn nbrɛn nɔn aphrɛ tɔ lo swa bhwe se néphan ye, ló néphan khɛ́n aye ábhwe lo Hwánthe tɔ, wo kranman lo lée ábhwe lókɔn áli ábhwe mímí.

⁴ Lóka yábhɛ lókɔn, Yankan nbrɛn ya wo bhwetɔ́ tho li ndalefɛ. Ńtɛ áphɔgóyí khónkhó le hɛ́nmɛntányí yábhɛ yábhɛ, ló mɛ́n thɛ́npɔ́ hrómɛn, ńmo Nánnánmi Créncré se néphan.

Lephan khɛ́n éswa néphan yɛn ńne hrómɛn

⁵ Áthéji lókɔn abha hɛ́nmɛn ebhá, lókhɛ́n lo étɔ lóbhwe sé hɔ́n yé, Yankan le se Yankan-mranchɛ́mán mɔ́nsi obhó mɔ́n tré lótho.

⁶ Lóhɛ́nthé Yankan hrɔ́ hrómɛn, lephan bɛn étɔlé: “O Yankan, lephan le li yíɛkɛ, lókhɛ́n ɛ́bha bhú hɛ́nphe ló mɛ́n tho, Saji lephanmi le li yíɛkɛ, lókhɛ́n ɛ́bha bhó mɛ́n bhwe tɛ́ bhwe.

⁷ Ácí kpɛ́bɛn hromɛn, lephan lókɔn ɛtɛ, hɛ nɔn ɛchɛ ńtɛ mrií brɛn Yankan-mranchɛ́mán, ló ɛbho nguhá le lephan jí ɔ́nmɔn se.

⁸ Ɛkhwɛn áyí khúnbrɛn ha mɛ́n nta thé, ló mɛ́n mɔ́n tre lótho.” Lóka wo étɔlé Yankan “Khwɛn áyí khúnbrɛn ha mɛ́n mɔ́n mɛn”, lóthé nɔn ali salé álepɛ áyíbɛn Yankan yɔ ka. Lókhɛ́n thénthé lósi adi, lo lé cu wú lósi lephan mɔ́n khɔ ka áyí khúnbrɛn tho.

⁹ Lóhɛ́nthé lo yɛn salé ácí kpɛ́bɛn hromɛn, Yankan tɛ Jezwi tɛ mrií brɛn Yankan-mranchɛ́mán, ochɛ́sé Yankan pɔ́ apɔ lo, lóhɛ́nthé Jezwi okhú sé néphan khúnbrɛn. Mɛ́n yí akhui phɔ mɛ́n khú hrómɛn, lóhɛ́nthé Yankan bho nguhá le ájí ɔ́nmɔn se.

¹⁰ Ló mímí nbrɛn, yankan khɛ́n – atɛ áyí khúnbrɛn, lókhɛ́n áyí khúnbrɛn bha mɛ́n mɔ́n mɛn, – áyɔn salé ankhɔ́ áyíkhúphɔ hromɛn chɛ́ Jezwi olí mɛ́n júmán osímɛ́n, ochɛ́sé Yankan miɔn búdúbúdú oká Yankan nguhá hrómɛn. Átɛsalé Jezwi nɔn ali lephan éswa wo yɛn ńne hrómɛn.

¹¹ Jezwi nɔn echó ne yɛn néphan phɔ, ló néphan khɛ́n ńcho wo ne yɛn wo phɔ, mɛ́n le wo ɔ́nmɔn thénthé wo pɛ Nthe míbrɛ. Lóhɛ́nthé nɔn lóka Jezwi éche nkɔn mɛ́n hɔnsɛ́nhɔn, ále tɛ hɛ́ndɛ.

¹² Ló ántɔlé: “O Yankan, hɛ yí ɛtɛ, mɛn mán tɔ lóbhwe sé mɛn hɔnsɛ́nhɔn oyé, ló mɛn mán ya wo thethé nri hɛ hwa, lóka wo bhá bhurɛhɛ́n!”

¹³ Ló ńcu ántɔlé: “Mɛn mán mó mɛn mwasrui tré Yankan tho.” Lómánji ántɔlé: “Nɛn mɛn le ńmiɔ́ khɛ́n Yankan se mɛn.”

¹⁴ Ńmiɔ́ lókɔn khɛ́n wo étɔ wo bhwe, wo li néphan bɛn wo ho ńnánmí le ńká ɔ́nmɔn hrómɛn. Jezwi nbrɛn lɔ li lephanmi, ńtɛ yí sa wo a. Ló ńkhɔ mɛ́n khú hrómɛn wɔyɔ logbo khɛ́n ali lephan ákhú sɛ́npɛ́ bha mɔ́n mɛn.

¹⁵ Jezwi nɔn ali lephan ábha swa ńgangánmán khúnbrɛn lóka wo bha wo théji mɛpɔ́bhá hrómɛn. Wo li gangánmán, átɛsalé wo khú wo bhá khú, lóbhwe éjan wo thɛ́n ákakhúnbrɛn.

¹⁶ Átɛsalé Jezwi le bha édɔnmán Yankan-mranchɛ́mán mɔ́n, lókhɛ́n Ábrahámɛn jímiɔn nɔn ńma ándɔnmán mɔ́n.

¹⁷ Lóhɛ́nthé, áyɔn salé mɛ́n yítɛ́ khúnbrɛn hrómɛn, antɛ́ yí sa mɛ́n hɔnsɛ́nhɔn, ochɛ́sé anní wo nphaháwo bhrɔ́khó agɛlé ya Yankan phɔ, anní lephan apɛ nfɛkhuwú se néphan mɛ́n Yankan júmánlí hrómɛn, ochɛ́sé Yankan oyɔ́ ne phɔ́ mɛ́n gbemán.

¹⁸ Ló thénthé néphan khɛ́n abha ásúwú hrómɛn, andɔnmán wo mɔ́n, átɛsalé mɛ́n nbrɛn lɔ ńphrɛ gɛ ásúwú le áyíkhúphɔ.