EBRENƐ́N 13 - Ebrié New Testament 1996

Lósi okhɔ́ tɛ́ yí pɔ́ Yankan mɛ

¹ Ákakhúnbrɛn tɛmɛ ɔ́n pɔ́ hɔ́n bɛn nbrɛn, sa néphan ali hɔnsɛ́n Krisi hɛ́n hrómɛn.

² Ábhwe mɛn tɛ́ di hɔ́n mwanhɛ́n, lónɔn ali salé ńthekhunɛ́n khɛ́n elɛ́ hɔ́n hwan, tɛmɛ ɔ́n do wo mwámwá. Átɛsalé néphan fe lóka wo édo ńthekhunɛ́n yábhɛ nɛn, wo do Yankan-mranchɛ́mán lókhɛ́n wo le wu lóbrɛ.

³ Néphan abha ákhúthéká gɔn, kasé wo bhwe édi hɔ́n mwanhɛ́n, ábha tɛ́ salé hɔ́n lɔ ɔ́n ma ákhúthéká gɔn sa wo a. Ló néphan khɛ́n wo etɛ́ yí dri phɔ, kasé wo bhwe édi hɔ́n mwanhɛ́n, ábha tɛ́ salé hɔ́n lɔ wo etɛ́ yí dri hɔ́n phɔ sa wo a.

⁴ Tɛmɛ lephan khúnbrɛn oji áphɛ́n bidí, ló bhie le sɛ ɔ́nmɔn khɛ́n alɛ bháthó, tɛmɛ wo lí mɛ́nbrɛ wo yítɛ́ hrómɛn. Néphan khɛ́n elí gbakhre, saji ńsɛ khɛ́n éche mie le ńmie khɛ́n éche nsɛ, Yankan bha bhɔ́ wo kwa.

⁵ Hɔ́n yítɛ́ hrómɛn, ɔ́n ne bhó hɔ́n thɛ́n tré jɛtɛn tho, hɔ́n yí bhri ɔ́n pɛ tɛmɛ ɔ́n mó hɔ́n thɛ́n tré lótho. Átɛsalé Yankan phrɛ tɔlé: “Man nɛ́n yɔ́ hɛ nkálé, mɛn man nɛ́n sa mánji khrui hɛ.”

⁶ Lóhɛ́nthé ógɛ tɔ mímí nbrɛn salé: “Lo Hwánthe nɔn ali mɛn mɔ́ndɔ́nmánwo mɛn man nɛ́n só yíɛkɛ. Ló bí lephanmi bha gɛ tɛ́ mɛn?”

⁷ Néphan khɛ́n aphrɛ li hɔ́n yíliemán, lókhɛ́n aphrɛ tɔ Yankan bhwe se hɔ́n ye, tɛmɛ wo bhwe odi hɔ́n mwanhɛ́n. Wo si wo khɔ li júmán, wo si wo khɔ khu, tɛmɛ ɔ́n mú lóphɔ hɛ́nphe, ló wo mímíbhú wo pɛ tɛmɛ hɔ́n lɔ ɔ́n pɛ lómímíbhú yábhɛ brɛ.

⁸ Jezwi-Krisi li lephan abha lé jrɛn. Npi cí abha hɛn lɔ ńnɛn jrɛn, ncɛ́n lɔ anman nɛ́n jrɛn, ló npi cí ebhá lɔ anman nɛ́n jrɛn ábha sé godo.

⁹ Ɔ́n ne dɛn khɛ́n áyílie yábhɛ yábhɛ achan ńthekhunɛ́n hrómɛn ochɛ́ hɔ́n niábu. Áyɔn salé Yankan phɔlíman ase lo ochɛ́ lo thɛ́n gɛlé. Ló léli salé ɔ́n ma ji ábidí ali áyíji dɔndɔn ńnɛnlí hrómɛn, néphan khɛ́n éji ábidí yábhɛ lókɔn, wo le gɛ yíɛkɛ lóhrómɛn.

¹⁰ Lo pɛ ńphaha túprán bɛn, ló ńphaha túprán lókɔn, Jwifunɛ́n nphahamán khɛ́n abha ási atɛ créncré elí júmán, wo le gɛ mɔ́nsi wo lí nɛn okhwɛn ha npha tre lótho.

¹¹ Jwifunɛ́n nphaháwo bhrɔ́khó, lóka annó ási atɛ créncré brɛn ási khúnbrɛn ápasá ne hɛ́nthé, bran nká nɔn anhɔ́n no ha npha. Ló ńbranmán lókɔn wo wɛn, wo khwɛ́n wo chán ápasá hrómɛn féne, ló wo khwɛ́n wo ló njɛ lo hátɛn khóliɛ́.

¹² Lóyábhɛ brɛ, Jezwi lɔ le khu ka ákhúbhɛ́ hrómɛn, ńkhu ka njɛ, ochɛ́sé anmó mɛ́n nká chó ápasá ne yɛn wo phɔ.

¹³ Ló thénthé tɛmɛ lo chán ápasá thethé thándi, lo ló njɛ lo gɛ, ló mɛ́n hɛ́ndɛ lókɔn ńgɛ, lo lɔ tɛmɛ lo gɛ lóhɛ́ndɛ yábhɛ brɛ.

¹⁴ Áthéji krɛn lókɔn lo bha, álepɛ ákhúbhɛ́ bɛn ábha tré lóne godo, lókhɛ́n ákhúbhɛ́ lo énɛn lo chré lóhrómɛn nɔn ali ákhúbhɛ́ bɛn abha hɛ́nmɛn ebhá.

¹⁵ Ló ácí khúnbrɛn, tɛmɛ lo bhó áhwalri sé Yankan, áhwalri lókɔn khɛ́n ali lo nphaha lo sakhɔ Jezwi phɔ lo ebhó sé Yankan. Lo mɛ́n bhwetɔ́ lókɔn nɔn ali áyí lo bho lo éha npha sé Yankan, lóka lo étɔlé Yankan li lo Hwánthe.

¹⁶ Tɛmɛ áyíbhwátɛ́ bhwe olé lialí hɔ́n, ló ɔ́n dɔnmán hɔ́n bɛn nbrɛn mɔ́n. Átɛsalé áyí yábhɛ lókɔn, lónɔn ali ńphaha élimán Yankan.

¹⁷ Tɛmɛ ɔ́n ji hɔ́n yíliemán, ló wo bhwe wo tɔ tɛmɛ ɔ́n tɛ́ lóyí, wo nɔn wo li néphan ehámwanhɛ́n lí júmán sé hɔ́n ákakhúnbrɛn, ló wo lé fikhwá. Ló wo júmán wo elí, áyɔn salé wo tɔ lóphɔ bhwe sé Yankan oyé. Kasé hɔ́n éji wo, wo bhá lí wo júmán áphɔhá mɛn, lókhɛ́n kasé ɔ́n ne ji wo, wo bhá lí wo júmán áphɔgbɔ́n hrómɛn. Ló kasé wo elí wo júmán áphɔgbɔ́n hrómɛn, abha lé tɛ́ yíɛkɛ sé hɔ́n.

¹⁸ Hɔ́n Yankan hɔ́n éla sé lo, ɔ́n ne yɔ́ kálé. Lo yɛn lo thɛ́n hrómɛn salé lo le li pɔn. Átɛsalé áyí khúnbrɛn hrómɛn, lo énɛn lo tɛ́ yíbhwá.

¹⁹ Mɛɛ́n na hɔ́n mɛn thɛ́n khúnbrɛn hrómɛn salé tɛmɛ ɔ́n na Yankan, ole mɔ́n khɛ́n Yankan ochɛ́ mɛn sáji man gɛ hɔ́n.

Yankanla

²⁰ Yankan chɛ lo Hwánthe Jezwi chan khúnɔn mɛn fe. Ló Jezwi lókɔn, mɛ́n nɔn ńni gbankhran-bówo khóo ébo mɛ́n gbankhran. Mɛ́n khú hrómɛn nɔn ńkhɔ si akprɔbha lókɔn ali áyíbɛn ábha tré lóne godo.

²¹ Tɛmɛ Yankan apɛ ńthɛ́nkhwálé osé hɔ́n sɛ́npɛ́ ɔ́n tɛ́ áyíbhwá, ochɛ́sé ɔ́n gɛ tɛ́ mɛ́n thɛ́n yí apɔ. Ló tɛmɛ anká lo thɛ́n hrómɛn, ló ankhɔ́ Jezwi-Krisi phɔ tɛ́ mɛ́n yí élimɛn. Ló tɛmɛ ńguhá ogɛ Jezwi-Krisi osé godo! Amɛn.

Ábhwetɔ́ aphuji, néphan wo ébhi aphuji

²² Mɛn hɔnsɛ́nhɔn, mɛɛ́n na hɔ́n, tɛmɛ ɔ́n nɔ́nthɛ́n yé ábhwe mɛɛ́n tɔ ha hɔ́n áhrɔ́ lókɔn hromɛn, átɛsalé áhrɔ́ lókɔn mɛn tɛ, ábhwe mɛn tɔ lóhrómɛn ále thubhɔ.

²³ Mɛɛ́n nɛn mɛn chɛ́ hɔ́n yɛ́n salé wo diman lo hɔnsɛ́n Thimote. Kasé ńphrɛ di mɛn ntakhú, lóka mɛn mán má hɔ́n yé, mɛn mán do-e ká phɔ ɔ́nmɔn má.

²⁴ Tɛmɛ ɔ́n mi hɔ́n néphan ali athemánhɔn le Yankan-gbemán khúnbrɛn. Lo hɔnsɛ́nhɔn abha Itali gotho ébhi hɔ́n.

²⁵ Tɛmɛ Yankan phɔlíman obhá hɔ́n khúnbrɛn phɔ.