EBRENƐ́N 12 - Ebrié New Testament 1996

Yankan ali lo The

¹ Lo ékɛ, lo ndalefɛlímán lo pɛ, wo nɔn wo li ápasá khúnbrɛn lókɔn khɛ́n ajekhali lo. Ló áyí khúnbrɛn lókɔn khɛ́n ékhrɛ lo nta, le ńne lókɔn khɛ́n ali áyíbɛn abhlɛgɛ lo phɔ, lóyí khúnbrɛn lókɔn tɛmɛ lo khwɛ́n yɛn lo phɔ, ló lo wá lókɔn lo ewá, tɛmɛ lo khɔnmán phɔ wá.

² Tɛmɛ lo mɛbhí ogɛlé tré Jezwi phɔ, achan lóka áyí khúnbrɛn bhɔhɛ́n alo di lósi aphu, mɛ́n tho nɔn lo bho lo mímíbhú tre. Mɛ́n nbrɛn ńdɛn salé ankhú áyábhletre phɔ, ló ńnɛn granman hɛ́ndɛ khɛ́n abha ákhú yábhɛ lókɔn hromɛn. Átɛsalé mɛ́n yí ńhamwanhɛ́n ánnɛn, lónɔn ali áphɔhá Yankan bho tre lé. Ló thénthé mɛ́n nɔn ńchre Yankan liémɔn si.

³ Tɛmɛ ɔ́n wú lósi áyí khɔ khui phɔ, tɛmɛ ɔ́n wú lósi ńkhɔ do nemán mɛsa ha mɛ́n tho, lóhɛ́nthé hɔ́n lɔ hɔ́n phɔ olé gbɔn.

⁴ Átɛsalé átha lókɔn ɔ́n gɛ ńne ɔ́nmɔn hɔ́n ekú, tɛmɛ ɔ́n kú kábrɛ kábrɛ ɔ́n khú lóhrómɛn.

⁵ Ńthɛ́nkhwálé bhwe lókɔn Yankan tɔ se hɔ́n lóka ánche hɔ́n mɛ́n miɔn, wú ábhwe lókɔn áliali hɔ́n? “Mɛn bhi, lóka lo Hwánthe etí hɛ njɛ tɛmɛ ɛhámwanhɛ́n, ló hɛ phɔ olé gbɔn, lóka ángbrɛ hɛ.

⁶ Átɛsalé lo Hwánthe, kasé lephan ńpɔ hɛ, lónɔn antí hɛ njɛ, ló lephan kasé ńdɛn do hɛ sa mɛ́n bhi, lónɔn antɛ́ yí dri hɛ phɔ.”

⁷ Áyíkhúphɔ lókɔn ɔ́n gɛ, tɛmɛ ɔ́n dɛn do, hɔ́n yí lókɔn ekhú hɔ́n phɔ, átɛsa yípɔ bɛn atɛ yí yan, lókhɛ́n mɛ́n the échrwɛ. Wú ápɛ yípɔ bɛn mɛ́n the le chrwɛ?

⁸ Ló kasé ánnɛn chrwa hɔ́n sa mɛ́n miɔn khúnbrɛn, élie salé ɔ́n ne li mɛ́n hrómɛn miɔ́, lókhɛ́n ɔ́n ni ábháca miɔ́.

⁹ Tɛmɛ ɔ́n gbɛnɛ́n wú lo themánhɔn ali áthéjinɛ́n: wó chrwa lo, lótɛ khɛ́n ló ji wo. Ló kasé áli lóyábhɛ nɛn, áyɔn salé lo ji lo The abha átho, ló lo bhá mɛpɔ́.

¹⁰ Lo themánhɔn ali áthéjinɛ́n, lo miɔ́ mɛn, wó chrwa lo sa lósi wo khɔ pɔ, khɛ́n ále mɔ́n, lókhɛ́n kasé Yankan échrwa lo, lo ébɛn nbrɛn mwá hɛ́nthé nɔn ánchrwa lo, ochɛ́sé lo tɛ́ créncré sa mɛ́n bɛn nbrɛn.

¹¹ Lóka khɛ́n wo échrwa lo, lo hɛ́nmɛn átɛsa áyíbɛn esé lo áphɔgbɔ́n, khɛ́n áleli áphɔhá. Lókhɛ́n lómánji, néphan wo khɔ áchrwa hromɛn gbɛ, wo pɛnsɔ́n wo gɛ lóhrómɛn lónɔn ali: ńthɛ́nkhwálé le áyíbhwátɛ́ wo mɛpɔ́bhá hrómɛn.

Áha bhwe, le áyí wo énɛn salé néphan otɛ́

¹² Lóhɛ́nthé hɔ́n mɔ́n lókɔn abugɛ, tɛmɛ ɔ́n tɛ́ otia, ló hɔ́n ntráhɛ́n lókɔn ephé hɔ́n, tɛmɛ ɔ́n tɛ́ ogɛlé!

¹³ Ló ásitó lókɔn khɛ́n akhraman, tɛmɛ ɔ́n tɛ́ oyali, ochɛ́sé lephan khɛ́n ńta ephé, mɛ́n ntráhɛ́n olé sa, lókhɛ́n tɛmɛ mɛ́n phɔ ojan.

¹⁴ Tɛmɛ ɔ́n tɛ́ khékhremɛn, ló hɔ́n le lephan khúnbrɛn ɔ́nmɔn thethé onɔ́n. Ló tɛmɛ ɔ́n tɛ́ khékhremɛn tɛ́ yí sa néphan abho wo nbrɛn se Yankan: Átɛsalé lephan kasé ɛle bho hɛ nbrɛn se Yankan, ɛbha lé wú lo Hwánthe.

¹⁵ Tɛmɛ ɔ́n hámwanhɛ́n, ló olépɛ lephan Yankan phɔlíman lókɔn khɛ́n ase lo, anchán lóphɔ wá féne. Hɔ́n hrómɛn, olépɛ lephan otɛ́sa ńbi bɛn enɔ́nkpó khɛ́n áwɛ́n lephan.

¹⁶ Hɔ́n hrómɛn, olépɛ lephan olí gbakhre, olépɛ lephan khɛ́n Yankan bhwe olé jɛn thɛ́n sa Esahu yí atɛ, lóka ńnɛn hɛ́nthé, ńhɔn mɛ́n sithwáwo nguhá phɛ́ní.

¹⁷ Lómánji, ɔ́n yɛn salé ńnɛn lósi ankhɔ́ gɛ mɛ́n the ndubhɔ́ lókhɛ́n ále se si, átɛsalé ánnɛn yɛ́n lósi ankhɔ́ jrɛn mɛ́n yí lókɔn ńtɛ, ló anthɔ́n hɛ́ndu, lókhɛ́n ńnɛn gɛ lóyí lókɔn.

¹⁸ Ɔ́n ka tigbali ábhóbhó bɛn ógɛ pápɛ khɛ́n ɔ́n wú lóyí etɛ́ lóne sa Izraɛ khúbhɛ́nɛ́n yí awu Sinayi bhóbhó phɔ, lóka Yankan ebhó ábidí sé wo, lónɔn ali ábhóbhó bɛn ethɔ́ntɛn kranmɛn, ábhóbhó bɛn dubhlékhu mrwɛn, ali ábhóbhó bɛn lóne mɔngú mɔngú éjan, ali ábhóbhó bɛn lóne ádúgran éjan,

¹⁹ ali ábhóbhó bɛn lóne mrakáta édɛn, lóne átɔ́ bɛn édɛn. Lóka Izraɛ khúbhɛ́nɛ́n ye átɔ́ lókɔn, ló wo nkɛé olépɛ ábhwe nankhɛ wo cu tɔ káne.

²⁰ Átɛsalé ábidí bhwe étɔ, áli áyíbɛn wo le gɛ tɛ́, lónɔn ali sa: “Lephan khɛ́n ábha hwelí ábhóbhó lókɔn áyɔn salé odiɛ mú wɛ́n, ló kasé bran khɛ́n ahweli ábhóbhó lókɔn lɔ, wo bhá diɛ mú wɛ́n.”

²¹ Áyí lókɔn wo ewú áli yíbɛn aha didi, lóhɛ́nthé Moyízi étɔlé: “Ákhwíthá ka mɛn hromɛn ló mɛn phɔ éfa!”

²² Lókhɛ́n thénthé lósi lókɔn adi, ɔ́n tigbali ábhóbhó óche Ziɔn, ɔ́n tigbali ákhúbhɛ́ ali Yankan abha mɛpɔ́ mɛ́n khúbhɛ́, ali Jeruzalɛ́mɛn abha átho, ali ákhúbhɛ́ bɛn Yankan-mranchɛ́mán akpɛn akpɛn bha lóhrómɛn.

²³ Lókhɛ́n thénthé ábhúrɛ́hɛ́n lókɔn ɔ́n tigbali ali Yankan mɛ́n miɔn wo ho thwasi wo hɛ́nbhúrɛ, ló wo lókɔn, wo nɔn wo li néphan wo lrɛ wo hɛ́n tre átho. Ló ábhúrɛ́hɛ́n lókɔn, áli ási bɛn lóne wo elí phɔhá. Thénthé ɔ́n tigbali Yankan ali áthéjinɛ́n khúnbrɛn wo kwabhɔ́wo. Ló thénthé ɔ́n tigbali néphan khɛ́n akhu, lókhɛ́n ali néphan Yankan tɛ ayɔn dianthé.

²⁴ Thénthé ɔ́n ni néphan bɛn ɔ́n tigbali Jezwi, ló Jezwi lókɔn, mɛ́n nɔn ńya Yankan le áthéjinɛ́n ɔ́nmɔn thethé, ló mɛ́n nɔn ńsránman akprɔbha pɔ́pɔ́ le ńká wo bhó chó néphan phɔ chán, ńká lókɔn khɛ́n étɔ bhwe kranmɛn brɛn Abɛ nká bhwe atɔ.

²⁵ Tɛmɛ ɔ́n hámwanhɛ́n, ló kasé lephan étɔ bhwe sé hɔ́n yé, ɔ́n ne ba njɛ pɛ. Áthéji lókɔn, néphan khɛ́n ále dɛn yé Yankan bhwe wo étɔ, Yankan yí atɔlé mɛ́n man tɛ́ dri wo phɔ, wo gɛ lópɛnsɔ́n. Lóyábhɛ brɛ, lo lɔ kasé lephan abha átho étɔ bhwe sé lo yé, lókhɛ́n lo echán mɛ́n phɔ wá féne, áyí Yankan ebhá tɛ́ dri lo phɔ, abha lé bhuri lo.

²⁶ Lóka lókɔn, Yankan tɔ́ chɛ áyíta jika, lókhɛ́n thénthé ábhwe ńtɔ se lo áhrɔ́ hrómɛn, lónɔn ali sa: “Mɛn mán cu hɔ́n áyíta jika, lókhɛ́n áleli áyíta brɛ, átho lɔ mɛn mán hɔ́n jika.”

²⁷ Ló ábhwe lókɔn Yankan tɔlé “Mɛn mán cu hɔ́n áyíta jika” ábhwe lókɔn élie salé áyí khúnbrɛn khɛ́n Yankan tɛ, wo bhá hɔ́n jika, ló wo bhá khwɛ́n yɛn, ochɛ́sé áyí khɛ́n óle gɛ hɔ́n jika, ló-ɛ otré.

²⁸ Tɛmɛ lo lá Yankan nansi, átɛsalé ńse lo bhringbi khúbhɛ́ bɛn óle gɛ hɔ́n jika. Tɛmɛ lo lá Yankan nansi ló lo la Yankan sa lósi ánnɛn salé lo khɔ́ lɛ, ájí le ákhúsó ɔ́nmɔn hrómɛn.

²⁹ Átɛsalé lo Yankan nɔn ali átɛn áthɔ́n yí khóliɛ́.