EBRENƐ́N 11 - Ebrié New Testament 1996

Mímíbhú

¹ Mímíbhú lóthé nɔn ali salé áyí khɛ́n lo bho lo mwasrui tre lótho, áyí lókɔn tɛmɛ lo hɔ́n pɛ kpɛ́ɛ́n, ló áyí khɛ́n lo lé wú, tɛmɛ lo yɛ́n lóyí lókɔn odianthé.

² Átɛsalé godonɛ́n bhu Yankan mímí, lóhɛ́nthé Yankan dɛn do wo bhwe.

³ Mímíbhú hrómɛn nɔn lo khɔ yɛn salé ábhwetɔ́ nɔn Yankan bho tɛ átho le áthé ɔ́nmɔn, ló ochɛ́sé lo yɛ́n salé áyí khɛ́n wo ewú áli áyíbɛn achan áyí khɛ́n óle gɛ wú hrómɛn.

⁴ Mímíbhú nɔn achɛ Abɛ nphaha yɔn brɛn Kaɛn ékɛ. Abɛ bhu mímí, lóhɛ́nthé Yankan krɛnmɛn lée ńni lephan apriman, átɛsalé Yankan dɛn do mɛ́n yí ńmo ma ánha npha. Mímíbhú hrómɛn nɔn Abɛ khɔ étɔ bhwe ntɔ́nyán lótɛ khɛ́n njɛ ńkhu.

⁵ Enɔ́khi bhu Yankan mímí, lóhɛ́nthé ńma mɛpɔ́ lótɛ khɛ́n wo hɔn-ɛn lo átho, ló álepɛ lephan awu mɛ́n si ńma, átɛsalé Yankan hɔn-ɛn lo tho. Yankan hrɔ́ étɔlé lóka wo ka hɔn Enɔ́khi lo tho, achan lóka lókɔn nɔn mɛ́n yítɛ́ ápɔ Yankan mɛ.

⁶ Kasé lephan ɛle pɛ mímíbhú, ɛ́le gɛ tɛ́ yí pɔ́ Yankan mɛ. Lephan khɛ́n ebhá Yankan phɔ, tɛmɛ anmú mímí salé Yankan bháne, ló tɛmɛ anmú mímí salé néphan khɛ́n énɛn Yankan, Yankan sɔ́n wo pɛn.

⁷ Mímíbhú nɔn achɛ Noe hamwanhɛ́n Yankan bhwetɔ́ phɔ, lóka Yankan étɔ áyí abha hɛ́nmɛn ebhá tɛ́ bhwe se anyé, khɛ́n ali áyí ánnɛn gɛ wú. Noe ji Yankan bhwe, ńchɛ ahran bɛn, ló ahran lókɔn, lónɔn Yankan bho swa mɛ́n le mɛ́n bháthónɛ́n ɔ́nmɔn. Ló Noe yí lókɔn atɛ mímíbhú hrómɛn lónɔn abhɔ áthéjinɛ́n khúnbrɛn pɔn, wo mímíbhú wo le pɛ hɛ́nthé. Noe bhu mímí, lóhɛ́nthé nɔn Yankan tɔlé ńni lephan apriman.

⁸ Mímíbhú nɔn achɛ Ábrahámɛn ji Yankan bhwe lóka Yankan chɛ nkɛ lée, anchán mɛ́n khúbhɛ́ hrómɛn thándi nó ákhúbhɛ́ si khɛ́n mɛ́n tɔ lóbhwe tre nkɛ lé. Ńchan mɛ́n khúbhɛ́ hrómɛn thandi, lókhɛ́n ńnɛn yɛn lósi brɛ ánno.

⁹ Mímíbhú nɔn achɛ Ábrahámɛn lo chre ákhúbhɛ́ si Yankan tɔ lóbhwe tre, ali ńthekhunɛ́n hrómɛn. Ńthan ádɛgɔn-nkhú ló ńma lóhrómɛn. Ló Izakhi le Jakɔ́phu ɔ́nmɔn ali néphan abha mɛ́n mánji, wo lɔ wo tɛ lóyábhɛ brɛ, átɛsalé wo li ábhwetɔ́ lókɔn ja.

¹⁰ Áyí khɛ́n Ábrahámɛn chre ébo lónɔn ali ákhúbhɛ́ bɛn wo lɛ agɛlé tre ákakhúnbrɛn. Yankan nbrɛn nɔn ali mɛnanwo api ákhúbhɛ́ lókɔn se wo lɛ, ló Yankan nbrɛn nɔn ali lephan athan ńkhú khúnbrɛn abha lóhrómɛn.

¹¹ Ábrahámɛn thi, lótɛ khɛ́n mɛ́n mímíbhú hɛ́nthé, ńgɛ ho yípɔ. Lóka lókɔn, mɛ́n si ńthi di, ánnɛn gɛ hó yípɔ. Lóka lókɔn Sara nbrɛn lɔ bhuri áhó mɛ́n. Ábrahámɛn bhu mímí salé Yankan bhwe atɔ, nkɛ bhá hɔ́n pɛ.

¹² Lóka lókɔn Ábrahámɛn thi bhuri lómɛ́n, lótɛ khɛ́n mɛ́n míbrɛ phɔ mɛ́n jímiɔn achan thandi, wo thubhɔ sa pɛmwe abha tho, wo thubhɔ sa gwemɛ́n nánchɛ óle gɛ kán.

¹³ Néphan khúnbrɛn lókɔn khɛ́n abhu Yankan mímí wo khu. Lókhɛ́n wo le gɛ áyí Yankan bho tre wo lé, lókhɛ́n áyí lókɔn, áli áyíbɛn abha thwethwemɛn wo ewú ló áphɔ ehá wo, lóhɛ́nthé wo étɔlé wo li nthékhunɛ́n, wo li néphan achranmanlé pi áthéji.

¹⁴ Kasé néphan étɔ bhwe yábhɛ nɛn, élie salé wo énɛn ákhúbhɛ́ bɛn ali wo nbrɛn ékɛ.

¹⁵ Ákhúbhɛ́ lókɔn wo yɔ kalé lo, kasé lóbhwe édi wo mwanhɛ́n, ka wo saji bha.

¹⁶ Lókhɛ́n léliló. Wo khúbhɛ́ lókɔn khɛ́n wo énɛn, áli ákhúbhɛ́ bɛn ayɔn brɛn lókɔn, lónɔn ali átho khúbhɛ́. Lóhɛ́nthé wo phɔ hɛ́ndɛ le hɔn Yankan, lóka Yankan éche wo mɛ́n néphan, átɛsalé ńphrɛ nɛ ákhúbhɛ́ bɛn tre wo lé.

¹⁷ Ábrahámɛn bhu Yankan mímí, lóhɛ́nthé nɔn ńhɔn mɛ́n bhi Izakhi ha npha lóka Yankan sui wu. Ábrahámɛn lókɔn, mɛ́n nɔn ńni lephan Yankan bho yíbɛn tre lé, lótɛ khɛ́n mɛ́n-ɛ ńmraya salé anhɔ́n mɛ́n bhi logro brɛ ha npha sé Yankan.

¹⁸ Ló Yankan phrɛ krɛnmɛn lée: “Izakhi phɔ nɔn ɛ́bha khɔ́ pɛ hɛ jímiɔn khɛ́n mɛn tɔ wo bhwe tre.”

¹⁹ Ábrahámɛn bhu hɛ́nphe salé, Yankan li lephan ágɛ chɛ́ Izakhi chán khúnɔn mɛn fe; ló áli mímí salé, Ábrahámɛn cu do Izakhi ali lephan achan khúnɔn mɛn fe.

²⁰ Izakhi bhu mímí, lóhɛ́nthé nɔn ńmɔ Jakɔ́phu le Esahu ɔ́nmɔn ndu. Ló áyí lókɔn ńtɛ, átre ébo ácí abha hɛ́nmɛn ebhá.

²¹ Jakɔ́phu bhu mímí, lóhɛ́nthé nɔn ńmɔ Jozɛfu miɔn brɛ brɛ khúnbrɛn ndu lómánji khɛ́n ńkhu; lóka ńmo mɛ́n yágrɛ dilé nya, ló ánna Yankan.

²² Jozɛfu bhu mímí, lóhɛ́nthé nɔn lóka anmán khú, ńnie néphan lósi Izraɛ khúbhɛ́nɛ́n bhá khɔ́ chán Ejiphithi khúbhɛ́ thándi, ló ńnie néphan lósi wo bhá khɔ́ tɛ́ mɛ́n nkwá phɔ yí.

²³ Moyízi mɛ́n the le mɛ́n man ɔ́nmɔn bhu mímí, lóhɛ́nthé lóka wo ho-e, wo hɔn-ɛn hrɔman tre áli pɛ bhwaliá. Lóka wo wu salé ńni yípɔ bɛn ayɔn, lóhɛ́nthé wo le dɛn ji bhringbi bidí, ló wo yítɛ́ lókɔn hromɛn wo le sokhú.

²⁴ Moyízi bhu mímí, lókhɛ́n lóka ńtɛ nkhó, ńyɛn salé bhringbi Faraɔn mi bhie nɔn agbɛ, lókhɛ́n ábhwe lókɔn, ńnɛn pɔ salé néphan otɔ.

²⁵ Ńpɔ salé wo tɛ́ yí dri mɛ́n le Yankan néphan ɔ́nmɔn phɔ, lóyábhɛ nɛn áyɔn brɛn ló ánman má áthéji neyítɛ́ hrómɛn, áthéji neyítɛ́ lókɔn khɛ́n ali áyíbɛn ále mɔ́n.

²⁶ Ńyɛn salé kasé ángɛ ńmɛsa sa Mesi, lóyábhɛ nɛn áyɔn brɛn ajayí khúnbrɛn abha Ejiphithi. Átɛsalé ápɛnsɔ́n abha hɛ́nmɛn ebhá, mɛ́n mɛbhí tre lótho.

²⁷ Moyízi bhu mímí, lóhɛ́nthé ńnɛn so bhringbi thɛ́nyan édo, ló ńchan Ejiphithi khúbhɛ́ féne! Lóka ńwu Yankan ali lephan óle gɛ wú mɛbhí mɛn, ńnɛn dɛn salé ansáji má mánji.

²⁸ Moyízi bhu mímí, lóhɛ́nthé ńse mɔ́nsi salé opɛ fɛ́thi bɛn oche Phákhe, ló ńcu kranman néphan lée tɛmɛ wo bhó ńká fɔn agbo khúnbrɛn phɔ, ochɛ́sé Yankan-mranchɛ́wo khɛ́n ewɛ́n néphan, annɛn wɛ́n Izraɛ miɔ́ khɛ́n ali ńsɛ wo ho thwasi ábháthó brɛ brɛ hromɛn.

²⁹ Izraɛ khúbhɛ́nɛ́n bhu mímí, lóhɛ́nthé wo gɛ bhuri gwe Nannan sa néphan asakhɔ áyítathé élo; lókhɛ́n lóka Ejiphithi khúbhɛ́nɛ́n lɔ lo etɛ́ lóyábhɛ brɛ, ńdu mrwɛn wo, ló wo khu.

³⁰ Izraɛ khúbhɛ́nɛ́n bhu mímí, lóhɛ́nthé nɔn achɛ ńphá wo ha jekhali Jerikho khúbhɛ́ áca khwalé, lóka wo nɛnsi jekhali ákhúbhɛ́ lókɔn ńcíbhí ákhwache.

³¹ Bhie gbakhreya óche Rahabe bhu mímí, lóhɛ́nthé lóka wo ewɛ́n néphan ale ji Yankan, mɛ́n, wo le wɛn, átɛsalé Izraɛ miɔ́ khɛ́n alo ékprasi sé wo kútha, ńdo wo mwámwá.

³² Ló bí bhwe nɔn mɛɛ́n gɛ tɔ ɛ? Néphan khúnbrɛn lókɔn khɛ́n óche Jedeɔn, Barakhi, Samisɔn, Jefe, Davi, Sanmiɛ le bhwetɔ́trémán khúnbrɛn, kasé mɛn nkɛé wo mímíbhú wo pɛ mɛɛ́n tɔ lóbhwe, ábha mɔ́n bánban.

³³ Néphan khúnbrɛn lókɔn khɛ́n wo étɔ wo bhwe, wo bhu mímí, lóhɛ́nthé ákhúbhɛ́nɛ́n khúnbrɛn lókɔn khɛ́n ali nthékhunɛ́n, lóka wo le nkɔn ɔ́nmɔn wo ekútha, wo mɔ́n dipha. Wo li néphan atɛ́ yí priman, lóhɛ́nthé áyí Yankan bho tre wo lé, wo gɛ. Wo le dɛn gbangɔsɔ́bhrɛ phwan mɛ́n,

³⁴ átɛn khɛ́n ethɔ́n kránmɛn wo nrwɛn lókhúnbrɛn, wo le waka khókhríyan mɛ́n khɛ́n khókhríyan wɛ́n wo. Wo li néphan enán, lókhɛ́n njɛ wo pɛ sɛ́npɛ́, wo li néphan wo lí dwasan átha hromɛn, ló wo mɔ́n cɛn ńthekhunɛ́n thamán khúnbrɛn.

³⁵ Ńmie bhu mímí, lóhɛ́nthé, wo néphan khɛ́n akhu, lóka wo chan ákhúnɔn mɛn fe, wo cu do nkɔn. Ló néphan lókɔn khɛ́n akhu, wo hromɛn néphan fe étɔlé; lo, lo le nɛn áfíkhwá, ochɛ́sé lóka wo chɛ wo chan ákhúnɔn mɛn fe, wo gɛ ńmɛpɔ́bhá bɛn ayɔn brɛn lókɔn; abhúrɛyí néphan tɛ wo khɛ́n wo khu hɛ́nthé.

³⁶ Ló néphan khɛ́n akhu, wo hromɛn, ápɛ néphan fe bháne wo ha wo lia, wo bhra wo mɛ́, wo di wo wraká, ló wo khwɛn wo ha khúthé.

³⁷ Fe, wo kumú dia wo ló wo khu, fe wo bho suku jan wo bhuri mɔn, fe wo wɛn wo khókhríyan mɛn. Wo khwɛn gbankhran hrɔ́ sɔ, wo khwɛn ciɛ hrɔ́ sɔ, wo bha ámián hrómɛn, wo bha ágbrelí hrómɛn, wo bho yíléle tɛ wo, ló ncɛ́n wo hɛ́n krɛn, npi wo hɛ́n krɛn.

³⁸ Néphan lókɔn wo li néphan bɛn ayɔn banban, ló áthéji le priman wo! Wo li néphan wo bha ánánkhuthé wo éjekhali, wo bha ńmóbhó tho wo éjekhali, wo si wo bha lónɔn ali ńnɔn abha ńmú hrómɛn le ńnɔn abha áyíta hromɛn.

³⁹ Néphan khúnbrɛn lókɔn, wo bhu mímí, lóhɛ́nthé Yankan li wo phɔ ndalefɛ, lókhɛ́n áyí Yankan bho tre wo lé, wo le gɛ.

⁴⁰ Ló mímí, Yankan hɛ́nphe abhu tre lo lé áli yíbɛn ayɔn se lo, lónɔn ali salé lóka Yankan ebhá tɛ́ wo yɔ́n dianthé, anman nɛ́n yɔ́ lo kálé, lókhɛ́n lo lɔ, lo bhá bhá wo hromɛn.