EBRENƐ́N 10 - Ebrié New Testament 1996

¹ Jwifunɛ́n bidí léli áyí mímí bɛn apriman khɛ́n ógɛ wú tɛ́, lókhɛ́n áli áyí bhwábhwá abha hɛ́nmɛn ebhá lónánphɔ. Jwifunɛ́n nphaha lókɔn khɛ́n ápá bhá otɛ́ lóyí, ápá bhá otɛ́ lóyí, áli áyíbɛn atre lóne élo ákakhúnbrɛn. Ló kasé áli lóyábhɛ nɛn, ábidí li áyíbɛn ále gɛ chɛ́ néphan ebhá Yankan phɔ yɔ́n dianthé.

² Ló kasé mímí nbrɛn néphan éla Yankan wo gɛ chó wo ne yɛn wo phɔ, wo li néphan bɛn wo ne hɛ́nthé wo bha lé cu lí pɔn npɔhɔ́n, ló wo bha lé cu ha npha sé Yankan npɔhɔ́n.

³ Lóbhwe abha lóhrómɛn ógɛ tɔ, lónɔn ali salé ńphaha lókɔn khɛ́n ápá bhá otɛ́ lóyí, ápá bhá otɛ́ lóyí, áli áyíbɛn echɛ́ ńne bhwe di néphan mwanhɛ́n ákakhúnbrɛn.

⁴ Átɛsalé ndwa nká le ciɛ nká áli áyíbɛn ále gɛ hɔ́n ne yɛn néphan tho.

⁵ Lóhɛ́nthé, lóka Krisi ebhá bhá áthéji, ńkránman Yankan lée: “Hɛ yí ɛ́nɛn, áleli ńphaha, saji áleli ńphaha yí, lókhɛ́n hɛ yí ɛse mɛn, lónɔn ali áphɔ nánmí.

⁶ Hɛ yí élimán hɛ, áleli bran gbugbru brɛn ohɔ́n hátɛn khóliɛ́ ńphaha túprán tho, saji hɛ yí élimán hɛ, áleli ńphaha yítɛ́ dɔndɔn khɛ́n ahɔ́n ne yɛn néphan tho.

⁷ Ló Krisi kranman Yankan lée: ‘Mɛn thandi nya mɛɛ́n nɛn mɛn tɛ́ hɛ thɛ́n yí apɔ, sa lósi wo khɔ tɔ mɛn phɔ bhwe ábidí hrɔ́ hrómɛn.’ ”

⁸ Hɛ yí ɛle pɔ: “Lónɔn ali ńphaha, ńphaha yí, bran gbugbru brɛn ohɔ́n hátɛn khóliɛ́ ńphaha túprán tho, saji hɛ yí ɛle pɔ, lónɔn ali ńphaha yítɛ́ dɔndɔn khɛ́n ahɔ́n ne yɛn néphan tho, ló áyí khúnbrɛn lókɔn, áli áyíbɛn ɛle pɔ.” Lókhɛ́n ńphaha yí khúnbrɛn lókɔn wo étɔ lóbhwe, áli áyíbɛn achan ábidí hrómɛn.

⁹ Ló Krisi kranman Yankan lée: “Mɛn thandi nya mɛɛ́n nɛn mɛn tɛ́ hɛ thɛ́n yí apɔ.” Lóhɛ́nthé Yankan khwɛn ńphaha yítɛ́ nɔ́nɔ́ khúnbrɛn yɛn, ló áyí ńmo tre lóphɛ́nmɛ́n, lónɔn ali Krisi nphaha.

¹⁰ Jezwi-Krisi nɔn ali lephan agɛ tɛ áyí Yankan pɔ salé antɛ́. Lóhɛ́nthé, wo cho lo ne khúnbrɛn yɛn lo phɔ, lóka ńmo mɛ́n phɔ nánmí ha npha se Yankan dɔnbrɛ lópán áphu.

¹¹ Jwifunɛ́n nphahamán hrómɛn, ácí brɛ brɛ khúnbrɛn, lephan brɛ pɛ mɛ́n júmán anní, ló ńphaha yí míbrɛ lókɔn, áli áyíbɛn atre lóne wo etɛ́ ákakhúnbrɛn, khɛ́n ále gɛ hɔ́n ne yɛn néphan tho.

¹² Lókhɛ́n Krisi mɛ́n ékɛ, ńhɔn mɛ́n nbrɛn ha npha dɔnbrɛ lo ne hɛ́nthé, ló mɛ́n nphaha yí lókɔn ńmo ma, áli áyíbɛn apɛ sɛ́npɛ́, ló átre lóne godo, ló lómánji ńno chre Yankan liémɔn si.

¹³ Achan ncɛ́n élo, ńchre lóne ánbo lóka Yankan bha khwɛ́n mɛ́n nta tré mɛ́n mɛsamán tho, sa áyákhru bɛn mɛ́n nta tre lótho.

¹⁴ Lóka Krisi hɔn mɛ́n nbrɛn ha npha dɔnbrɛ, lóphɔ nɔn ńkhɔ yɔ ne phɔ néphan, ló wo néphan lókɔn ɔn, wo nɔn wo li néphan áphɔ chan godo.

¹⁵ Ló Nánnánmi Créncré lɔ elí ndalefɛ sé lo. Ló athwasi ánkranmán lo lée:

¹⁶ “Ló thénthé akprɔbha khɛ́n mɛn le Izraɛ khúbhɛ́nɛ́n ɔ́nmɔn lo ebhá sí lónɔn ali lókɔn. Hwánthe étɔlé: Ácí khɛ́n abha hɛ́nmɛn ebhá, mɛn mán mó mɛn bidí ká wo thɛ́n hrómɛn, mɛn mán nrɛ mɛn bidí há wo hɛ́nphebhú hrómɛn.”

¹⁷ Ló Hwánthe étɔlé: “Mɛn mán yɔ́ wo ne phɔ́ wo, ló wo yíléletɛ́ bhwe bha lé cu di wo mwanhɛ́n.”

¹⁸ Lóhɛ́nthé, lóka Yankan yɔ ne phɔ néphan, áleyɔn salé nphahamán ocu ha npha bɛn khɛ́n wo bhú salé lónɔn ebhá hɔ́n ne yɛn néphan tho.

Tɛmɛ otígbalí Yankan

¹⁹ Lóyábhɛ brɛ, mɛn hɔnsɛ́nhɔn Jezwi khú akhu se lo hɛ́nthé, thénthé lo gɛ mɔ́nsi lo ká ási atɛ créncré brɛn ási khúnbrɛn.

²⁰ Ádɛgɔn lókɔn wo bu tre Yankan-khúthé, lónɔn ali Jezwi phɔ nánmí ali áyíbɛn ńkhɔ lóphɔ phwan Yankan sitó kalé sé lo, ló mɛ́n nɔn ńni ásitó, átɛsalé ńni lephan abha mɛpɔ́.

²¹ Yankan-khúthé, lo pɛ nphaháwo bhrɔ́khó bɛn aya lo hɛ́nmɛn elí júmán sé lo.

²² Tɛmɛ lo bhó lo phɔ nánmí wo bho ńdu chánchan cho, lo thɛ́n wo cho áyíléle yɛn lóhrómɛn, lo mímíbhú agɛlé tre Yankan tho le lo thɛ́n lo bho tre Yankan tho ɔ́nmɔn tígbalí Yankan.

²³ Áyí khɛ́n lo bho lo mwasrui tre lótho, tɛmɛ lo hɔ́n pɛ kpɛ́ɛ́n, ló tɛmɛ lo bhú mímí salé kasé Yankan tɔ bhwe, ánman tɛ́ lóyí.

²⁴ Lóka lo ehá lo bɛn nbrɛn mwanhɛ́n, áyɔn salé lo há lo jɔn lɔ mwanhɛ́n, lo dɔnmán wo mɔ́n wo pɔ́ néphan, ló wo tɛ́ áyíbhwá.

²⁵ Áleyɔn salé lo yɔ́ lo hɛ́nbhúrɛ kálé, sa néphan fe yí abháne etɛ́, lókhɛ́n tɛmɛ lo tɔ bhwe ha lo jɔn ló wo ló hɛ́nbhúrɛ gɔn, átɛsalé thénthé lo Hwánthe cí ebhá bhá ágbali phɔ.

²⁶ Átɛsalé thénthé ále cu pɛ ńphaha bɛn khɛ́n ábha gɛ hɔ́n ne yɛn lo tho, kasé lo bháne lo ewú bibi tɛ́ ne ɔ́nmɔn lo, lóka wo bho ábhwe mímí lie lo.

²⁷ Ló thénthé, lo yí lo bhá gɛ tɛ́ lónɔn ali salé lo bhá chré bo Yankan kwabhɔ́ abha hɛ́nmɛn ebhá, ló lo bhá chré bo átɛn khóo lókɔn aha didi khɛ́n ebhá lɔ néphan agɛ Yankan ɔ́nmɔn éswan.

²⁸ Lephan kasé ɛle ji Moyízi bidí wo bhá wɛ́n hɛ, ló wo bha lé wú hɛ nfɛkhu, kasé wo bhɔ hɛ kwa khɛ́n ɛli pɔn ndalefɛlímán mɔn le bhwaliá ɔ́nmɔn hɛ́nmɛn.

²⁹ Ló lephan khɛ́n ésa Yankan Mi mɛ, lephan lókɔn ébí yábhɛ ógɛ tɛ? Ló Yankan kprɔbha nká lókɔn ali áyíbɛn wo bho cho hɛ ne yɛn hɛ phɔ, ló ńká lókɔn kasé lephan ɛbhú lóbhwe wɛ́-nwɛ́, hɛ lephan lókɔn bí ógɛ tɛ́ hɛ? Ló lephan khɛ́n étɔ bhwe phromɛn phromɛn sé Nánnánmi apɛ áphɔlíman, lephan lókɔn, ébí ógɛ tɛ́ hɛ? Áyɔn salé otɛ́ yí dri phɔ!

³⁰ Lo yɛn lephan atɔlé: “Mɛn mán mó wo ne sɔ́n wo pɛn, saji wo yíléle wo tɛ, mɛɛ́n nbrɛn nɔn mɛn mán wrɔ lókhúnbrɛn sé wo”, lómánji lo yɛn lephan atɔlé: “Lo Hwánthe bha bhɔ́ mɛ́n hwannɛ́n kwa.”

³¹ Yankan lókɔn ali lephan abha mɛpɔ́, kasé ɛka mɛ́n mɔ́n mɛn, áli muswe se hɛ!

³² Lócí áyí khɛ́n atɛ bha hɛn, tɛmɛ lóbhwe odi hɔ́n mwanhɛ́n. Lócí lókɔn lóka Yankan yéfí lili ka hɔ́n phɔ, áyí akhu hɔ́n phɔ, áthúbhɔ, lókhɛ́n achan lócí lókɔn, áyíkhúphɔ khúnbrɛn lókɔn hromɛn, ɔ́n khɔnman phɔ ádi ncɛ́n.

³³ Ákáfe wo étɔ bhwe phromɛn phromɛn sé hɔ́n, ló wo etɛ́ hɔ́n yí phromɛn phromɛn ápasá hɛ́nmɛn, ló ákáfe, ɔ́n mraya salé néphan nankhɛ khɛ́n wo élri gbre, ɔ́n dɔnmán wo mɔ́n.

³⁴ Khúthékámán yíkhúphɔ lókɔn, hɔ́n lɔ ɔ́n ma lóhrómɛn, ló hɔ́n yí khúnbrɛn ɔ́n pɛ, lóka wo khwɛn yɛn, lólɔ ále tɛ hɔ́n yíɛkɛ, lótɛ khɛ́n áphɔ ehá hɔ́n. Átɛsalé ɔ́n pɛ yíbɛn ayɔn brɛn lókɔn. Ló ɔ́n yɛn salé áyí lókɔn, áli áyíbɛn ábha tré lóne godo.

³⁵ Áphɔ olé gbɔn hɔ́n, átɛsalé kasé hɔ́n ékhɔnmán phɔ tɛ́ yí, ɔ́n ma gɛ ápɛnsɔ́n khóo bɛn.

³⁶ Áyɔn salé ɔ́n pɛ ńthɛ́nnɔ́n, lónɔn ábha chɛ́ hɔ́n tɛ́ Yankan yí apɔ, ló ɔ́n ma khɔ́ lóphɔ gɛ áyí ńmo tre hɔ́n lé.

³⁷ Sa ló Yankan hrɔ́ étɔ a: “Ákhakpɛɛ́ tɛɛ, abha lé mɔ́n lɔ, ló lephan khɛ́n ebhá, ánman má, lókhɛ́n abha lé mɔ́n.

³⁸ Lephan khɛ́n apriman mɛn hɛ́nmɛn, ánman má mɛpɔ́ mímíbhú hrómɛn, lókhɛ́n kasé ánsáji má mánji, lephan lókɔn, mɛ́n bhwe bha lé limán mɛn.”

³⁹ Néphan ésáji bhá mánji khɛ́n eliá, lo le bha wo hromɛn. Lókhɛ́n lo bhu mímí, lóhɛ́nthé Yankan swa lo.