GALÁTHI KHÚBHƐ́NƐ́N 6 - Ebrié New Testament 1996

Opɛ mɔ́ndɔ́nman bhá lo le lo jɔn ɔ́nmɔn thethé

¹ Hɔnsɛ́nhɔn, kasé ɔ́n ka lephan tho ya etɛ́ yíléle bɛn, hɔ́n khɛ́n ɔ́n ni néphan apɛ Yankan Nánnánmi, tɛmɛ ɔ́n do-e yɛn áyíléletɛ́ lókɔn hromɛn; ló tɛmɛ ɔ́n tɛ́ lóyí lókɔn ńthɛ́n pɛ́tɛ mɛn se. Ló ábhwe mɛɛ́n tɔ káne sé lephan brɛ brɛ nɔn ali salé: lephan brɛ, tɛmɛ ɛhá hɛ nbrɛn mwanhɛ́n, ló hɛ lɔ, ásúwú lókɔn ole ká hɛ tho.

² Hɔ́n hrómɛn, ɔ́n dɔnmán hɔ́n bɛn nbrɛn mɔ́n: kasé hɔ́n etɛ́ lóyábhɛ nɛn, átɛsalé Krisi bidí nɔn hɔ́n éji.

³ Kasé lephan ali lephan wrɛ́, ebhú sa mɛ́n ni lephan khóo bɛn, lephan lókɔn, ánkhrɛ mɛ́n bɛn nbrɛn.

⁴ Lephan tɛmɛ ɛwɛsɛ́ hɛ nbrɛn yítɛ́ wú. Kasé lóhrómɛn ɛ́gɛ di mɔ́n thɛ́n tɔ bhwe, ló hɛ mɔ́n thɛ́n lókɔn ɛ́di, olí hɛ míbrɛ phɔ bhwe, khɛ́n áleli salé ɛbhó hɛ nbrɛn thwelí hɛ jɔn wo néphan yábhɛ wo li.

⁵ Átɛsa lephan brɛ bha hɔ́n mɛ́n nbrɛn nɔnkwá the.

⁶ Lephan, hɛ khɛ́n wo élie hɛ Ábhwe Bhwábhwá, lephan khɛ́n élie hɛ Ábhwe Bhwábhwá lókɔn, hɛ yí khúnbrɛn tɛɛ ɛpɛ, áyɔn sa hɛ le mɛ́n ɔ́nmɔn ɔ́n nwa lóyí lókɔn.

⁷ Ɔ́n ne khrɛ phɔ: saji ɔ́n ne ha Yankan lia, átɛsalé lephan hɛ yí ɛha ɔn, lónɔn ɛ́bwan.

⁸ Kasé ɛha áyí álimán hɛ nbrɛn nánmí, lómí ɛ́bha bwan nɔn ali ákhú. Lókhɛ́n kasé ɛha áyí álimán Nánnánmi, Nánnánmi bha chɛ́ hɛ gɛ ńmɛpɔ́bhá álephú.

⁹ Áyíbhwátɛ́ olé nanlí lo. Kasé lo nangɛ áyíbhwátɛ́ phɔ, lóka ácí bha sí, lo bhá bwan lómí.

¹⁰ Lóhɛ́nthé, kasé ákakhúnbrɛn tɛɛ lo gɛ mɔ́nsi lo gɛ tɛ́ áyíbhwá, tɛmɛ lo tɛ́ áyíbhwá sé néphan khúnbrɛn. Khɛ́n néphan ali lo hɔnsɛ́nhɔn mímíbhú hrómɛn ɔn, wo nɔn ohá wo mwanhɛ́n brɛn néphan nankhɛ khúnbrɛn.

Áha bhwetɔ́ aphuji, Phɔ́lu ébhi mɛ́n jɔn

¹¹ Thénthé ɔ́n wu áhrɔ́ mɛbhí tɛ́ atɛ khónkhó, lónɔn élie salé mɛɛ́n nbrɛn mɔ́n nɔn mɛn mo nrɛ áhrɔ́ lókɔn mɛɛ́n thu hɔ́n.

¹² Néphan khɛ́n énɛn achɛ́ áthéjinɛ́n yɛ́n salé wo li néphan mímí, wo nɔn wo esí hɔ́n ha ló ɔ́n jan khɛn. Wo le pɔ sa néphan olri wo gbre, Krisi yábhletre hɛ́nthé, lónɔn achɛ wo etɛ́ áyí yábhɛ lókɔn.

¹³ Néphan khɛ́n echɛ́ wo jan hɔ́n khɛn, wo nbrɛn-ɛ, wo lé ji ábidí. Wo énɛn sa ɔ́n jan khɛn, ló wo khɔ́ lóphɔ fúmɛ́n; wo esí wo si hɔ́n ha khɛ́n ɔ́n trɛ hɔ́n nbrɛn nánmí tre hɛ́nthé.

¹⁴ Khɛ́n mɛn-ɛ, lo Hwánthe Jezwi-Krisi yábhletre phɔ mɛ́n nɔn mɛn mán fú, lóthé nɔn ali salé áthéjinɛ́n khu se mɛn, Krisi yábhletre phɔ, ló mɛn lɔ mɛn khu se wo Krisi yábhletre phɔ.

¹⁵ Lephan ákhɛn ɛjan o, ákhɛn ɛle jan o, áleli lónɔn akhɔnman. Lóyí akhɔnman nɔn ali salé, lephan ɛcu jrɛn lephan pɔ́pɔ́ otɛ.

¹⁶ Néphan khúnbrɛn khɛ́n ahɔn ábidí lókɔn pɛ, lóbhwe mɛɛ́n tɔ sé wo nɔn ali salé: tɛmɛ Yankan thɛ́nkhwálé le mɛ́n yíbhwátɛ́ ɔ́nmɔn obhá wo khúnbrɛn phɔ – wo khúnbrɛn, wo le Yankan-gbemán npasá khúnbrɛn ɔ́nmɔn.

¹⁷ Adɔn thénthé élo, lephan brɛ olé cu lri mɛn gbre npɔhɔ́n, átɛsalé áyremɛ́n ngbro khúnbrɛn akhwa mɛn phɔ élie salé mɛn ni Jezwi gangánwo.

¹⁸ Hɔnsɛ́nhɔn, tɛmɛ lo Hwánthe Jezwi-Krisi phɔlíman obha hɔ́n khúnbrɛn phɔ. Amɛn.