GALÁTHI KHÚBHƐ́NƐ́N 4 - Ebrié New Testament 1996

¹ Ló ábhwe mɛɛ́n nɛn mɛn cu tɔ, lónɔn ali lée: nmi khɛ́n ali nthe jalíwo, mímí áyí khúnbrɛn khɛ́n mɛ́n the pɛ, áli mɛ́n ékɛ. Lókhɛ́n kasé ńka di lephan, yípɔ lókɔn, ńtɛsa gangánwo a.

² Mɛ́n ka ńka di lephan ɔn, ńma néphan mɔ́n mɛn nkɔn égbɛ, ló wo ewú mɛ́n yí tre lé, kábrɛ kábrɛ ábha di nthe cí aha tre.

³ Lóbrɛ nɔn ali lo lɔ, lócí lo li miɔ́ chɛ́-nchɛ́, lo tɛsa ńgangánmán, lo bha áthéji sɛ́npɛ́mánhɔn mɔ́n mɛn.

⁴ Khɛ́n ácí oha tre ka asi, Yankan chɛ mɛ́n Bhi bha: bhie bɛn nɔn aho nkɛ, ló ńma Jwifunɛ́n bidí mɔ́n mɛn,

⁵ ochɛ́sé answa néphan yɛn ábidí mɔ́n mɛn, ló lo jrɛn Yankan miɔn.

⁶ Yankan énɛn achɛ́ ɔ́n yɛ́n sa, mímí nbrɛn ɔ́n ni mɛ́n miɔn, lóhɛ́nthé ńchɛ mɛ́n Bhi Nánnánmi bha ka lo thɛ́n hrómɛn, Nánnánmi khɛ́n elúkhwɛ́ tɔlé: “Mɛn Nthe!”

⁷ Ló thénthé ɛli nmi, ɛle cu li gangánwo npɔhɔ́n, lónian mɛn khɛ́n ɛli nmi ɔn, lóhɛ́nthé ajayí khɛ́n Yankan bho tre mɛ́n miɔn lé, ánman mó sé hɛ lɔ.

Galáthi khúbhɛ́nɛ́n bhwe eká Phɔ́lu phɔ

⁸ Lócí ɔ́n ne yɛn Yankan, ló ɔ́n ni gangánmán bha ńmohɔn mɔ́n mɛn, ńmohɔn lókɔn khɛ́n aleli yankan mímí.

⁹ Ló thénthé ka lókɔn khɛ́n ɔ́n yɛn Yankan – saji ócu gɛ tɔlé: thénthé ka lókɔn khɛ́n Yankan yɛn hɔ́n -, wú áyɔn sa ɔ́n cu khwɛ́n hɔ́n nbrɛn há ńmohɔn mɔ́n mɛn? Ńmohɔn lókɔn khɛ́n ali yí wrɛ́, ali yí alepɛ sɛ́npɛ́? Ńthé kalósi akhɔ tɛ khɛ́n hɔ́n énɛn ɔ́n cu jrɛn wo gangánmán e?

¹⁰ Ápɛ ácíhɔn, pɛhɔn, ákahɔn le ápáhɔn ali hɔ́n yí ɔ́n ji!

¹¹ Hɔ́n bhwe eká mɛn phɔ: mɛn júmán mɛn ni se hɔ́n, wú ábha lí yí wrɛ́?

¹² Hɔnsɛ́nhɔn, ɔ́n tɛ́sa mɛn a, ló mɛn lɔ, mɛn mo mɛɛ́n nbrɛn tɛ́sa hɔ́n a. Ɔ́n ne tɛ mɛn yíléle bɛn.

¹³ Ɔ́n yɛn lóyí achɛ khɛ́n, ásithwá cí, mɛn man tɔ Ábhwe Bhwábhwá bhwe se hɔ́n ye: lóka lókɔn, álɔ́ ehɔ́n mɛn.

¹⁴ Mɛn lɔ́ lókɔn ahɔn mɛn ɔn, átɛsa ásúwú bɛn mɛn gɛ hɔ́n hɛ́nthé. Lótɛ khɛ́n ɔ́n ne yan mɛn bhrɔ́ɔ́, saji ɔ́n ne tranman mɛn lɔ. Lókhɛ́n ɔ́n do mɛn sa lósi okhɔ́ do Yankan-mranchɛ́wo, ɔ́n do mɛn sa Jezwi-Krisi nbrɛn hɔ́n édo.

¹⁵ Áphɔhá khóo gɛ hɔ́n! Ńthé bíyí cu etɛ́ hɔ́n npɔ ɛ? Ábhwe mɛɛ́n gɛ tɔ hɔ́n phɔ nɔn ali sa: kasé áli yíbɛn ógɛ tɛ́ ka ɔ́n san hɔ́n mɛbhí thrwa mɛn mɛbhí!

¹⁶ Ábhwe mímí lókɔn mɛn tɔ se hɔ́n ye ɔn, wú lóhɛ́nthé nɔn thénthé mɛn jrɛn hɔ́n mɛsawo?

¹⁷ Néphan lókɔn etɛ́ yí lie hɔ́n salé hɔ́n bhwe ekhwá wo hɛ́nmɛnlé, khɛ́n wo thɛ́n hrómɛn bhwe abháne, áleyɔn. Wo énɛn lée ɔ́n chán mɛn phɔ féne, ló wo bhwe opɔ́ hɔ́n mɛ.

¹⁸ Áyɔn sa otɛ́ yí opɔ́ lephan mɛ, khɛ́n olí áyíbhwá hɛ́nthé, ló áyíbhwá lókɔn otré lóne ácí khúnbrɛn, khɛ́n ole lí lóka mɛn ma hɔ́n thethé pán.

¹⁹ Mɛn miɔn, mɛn pɔ́ mɛn pɔ hɔ́n hɛ́nthé áyí ekhú mɛn phɔ. Ló mɛn yíkhúphɔ lókɔn, átɛsa bhie ka ehó yí si ákhɔ́ dri phɔ, ló ábha tɛ́ nɛn kábrɛ kábrɛ, ábha di lóka Krisi bha chethé hɔ́n hrómɛn.

²⁰ Kasé mɛɛ́n gɛ ká hɔ́n thethé áka yábhɛ lókɔn, khɛ́n mɛɛ́n tɔ bhwe nankhɛ bɛn ká njɛ sé hɔ́n, ábha limán mɛn. Átɛsalé hɔ́n bhwe elí mɛn thɛ́n hɛ́nthé.

Ábhwe obho thweli Aga le Sara ɔ́nmɔn bhwe

²¹ Hɔ́n khɛ́n ɔ́n pɔ sa ɔ́n má ábidí mɔ́n mɛn ɔn, mɛn bhwe mɛɛ́n mi hɔ́n nɔn ali lée: wú ɔ́n ne yé ábidí bhwe étɔ sé hɔ́n?

²² Ábidí bhwe étɔ nɔn ali lée Ábrahámɛn ho miɔ́ mɔn. Bɛn li gangánya mi, ló gangánya lókɔn, mɛ́n hɛ́n li Aga. Lójɔ li líhɛ bhie mi, ló líhɛ bhie lókɔn, mɛ́n hɛ́n li Sara.

²³ Ábrahámɛn le gangánya ɔ́nmɔn yípɔ aho ɔn, wo ho nkɛ sa lephan khúnbrɛn si okhɔ́ hó, khɛ́n mɛ́n le líhɛ bhie ɔ́nmɔn yípɔ wo ho ɔn, yípɔ lókɔn, mɛ́n-ɛ Yankan phrɛ tɔ nkɛ phɔ bhwe tre.

²⁴ Ábhwe lókɔn ákhɔ yandran: ńmie mɔn lókɔn wo tɛsa akprɔbha mɔn. Ló akprɔbha mɔn lókɔn, (lóbɛn nɔn ali Aga), ali Sinayi bhóbhó khɛ́n ehó miɔ́ ali gangánmán.

²⁵ Ló Arabi gotho, Aga nɔn ali Sinayi bhóbhó abha lóne, khɛ́n ncɛ́n óche Jeruzalɛ́mɛn khúbhɛ́. Ló Jeruzalɛ́mɛn khúbhɛ́ lókɔn, mɛ́n le mɛ́n khúbhɛ́nɛ́n khúnbrɛn ɔ́nmɔn, wo jrɛn gangánmán.

²⁶ Khɛ́n Jeruzalɛ́mɛn ali átho khúbhɛ́, aka mɛ́n nbrɛn lé, mɛ́n nɔn ńni lo man.

²⁷ Ló mímí nbrɛn Yankan hrɔ́ bhwe étɔ nɔn ali sa: “Chranya khɛ́n ale ho yípɔ, áphɔ ohá hɛ! Hɛ khɛ́n ɛli bhie aka wu áhó yíkhúphɔ mɛbhí, tɛmɛ ɛlú áphɔhá khwɛ́! Átɛsalé bhie khɛ́n mɛ́n ca sa mánji khrui ɔn mɛ́n miɔn bha thúbhɔ brɛn bhie aphɛn sɛ miɔn.”

²⁸ Hɔnsɛ́nhɔn, hɔ́n-ɛ nɔn ɔ́n ni ńmiɔ́ Yankan tɔ wo bhwe tre, khɛ́n oho wo sa Izakhi si okhɔ ho.

²⁹ Lócí, yípɔ khɛ́n wo ho sa lephan khúnbrɛn si okhɔ́ hó, yípɔ khɛ́n thénthé okhɔ Yankan Nánnánmi mɛn ho ɔn, yípɔ lókɔn ńphrɛ nri nkɛ gbre, ló ncɛ́n nbrɛn lɔ lógbre yábhɛ brɛ tɛɛ ánnri nkɛ e.

³⁰ Ńthé bí bhwe nɔn Yankan hrɔ́ étɔ ɛ? Yankan hrɔ́ étɔ sa: “Tɛmɛ ɛtranmán gangánya le mɛ́n bhi sɛ ɔ́nmɔn, átɛsalé gangánya mi le gɛ mɔ́nsi khɛ́n mɛ́n le líhɛ bhie mi ɔ́nmɔn wo lí nthe ja brɛ.”

³¹ Hɔnsɛ́nhɔn, lóhɛ́nthé nɔn lo, lo le li gangánya miɔn, khɛ́n lo li bhie ali líhɛ miɔn.