GALÁTHI KHÚBHƐ́NƐ́N 3 - Ebrié New Testament 1996

Ábidí lée nka mímíbhú nɔn ali bhwe

¹ Galáthi khúbhɛ́nɛ́n gbwɛmán! Abɛn nɔn akhrɛ hɔ́n yábhɛ nɛn ɛ? Jezwi khú akhu áyábhletre phɔ ɔn, nkɛé hɔ́n nɔn olɛ lóthé se hɔ́n ye.

² Mɛn mán mi hɔ́n bhwe bɛn, ló hɔ́n ékɛ ɔ́n gɛ, ɔ́n tɔ sé mɛn yé, lóbhwe nɔn ali sa: Wú ábidí yítɛ́ hrómɛn nɔn ɔ́n khɔ gɛ Yankan Nánnánmi, lée nka Ábhwe Bhwábhwá lókɔn wo étɔ ɔ́n ye, ɔ́n mu mímí, lóphɔ nɔn ɔ́n khɔ gɛ Yankan Nánnánmi?

³ Bítɛ ɔ́n ni gbwɛmán yábhɛ nɛn ɛ? Lóka ɔ́n níli bhɔhɛ́n, nkɛé Yankan Nánnánmi tho ɔ́n mo hɔ́n thɛ́n tre? Ńthé kalósi akhɔ tɛ khɛ́n thénthé hɔ́n ebhó hɔ́n mwasrui tré hɔ́n nbrɛn sɛ́npɛ́ tho e?

⁴ Ábhweyɛ́n ɔ́n gɛ lóphɔ, wú áli áphɛ́phrɛ yí? Ále gɛ lí áphɛ́phrɛ yí a.

⁵ Yankan ka abho mɛ́n Nánnánmi se hɔ́n, khɛ́n atɛ hɛ́nmɛntányí hɔ́n thethé ɔn, wú ábidí yí énɛn ɔ́n tɛ nɔn achɛ ńtɛ áyí lókɔn, lée nka Ábhwe Bhwábhwá ɔ́n ye, khɛ́n ɔ́n mu mímí hɛ́nthé?

⁶ Lóhɛ́nthé nɔn Ábrahámɛn phɔ, Yankan hrɔ́ étɔ sa: “Ábrahámɛn bhu Yankan mímí, ló Yankan bho nkɛ tɛsa lephan apriman, nkɛ mímíbhú nkɛ pɛ hɛ́nthé.

⁷ Lóhɛ́nthé nɔn ɔ́n yɛ́n salé néphan apɛ mímíbhú, wo nɔn wo li Ábrahámɛn jímiɔn líhɛ.”

⁸ Yankan hrɔ́ étɔ sa, néphan aleli Jwifunɛ́n, Yankan bha chɛ́ wo jrɛn néphan apriman mɛ́n hɛ́nmɛn, wo mímíbhú wo pɛ hɛ́nthé. Lóhɛ́nthé nɔn Yankan hrɔ́ phrɛ tɔ Ábhwe Bhwábhwá lókɔn se Ábrahámɛn sa: “Yankan bha khɔ́ hɛ phɔ bhɔ́ áthéji féchwe khúnbrɛn ndu.”

⁹ Ábrahámɛn bhu mímí, ló Yankan bhɔ-ɛ ndu, ló néphan khúnbrɛn khɛ́n ebhú mímí, Yankan bhɔ wo ndu sa Ábrahámɛn si ńkhɔ mɔ ndu.

¹⁰ Ló néphan abho wo mwasrui tre ábidí óji tho ɔn, átɛsalé muswe gɛ wo. Lóhɛ́nthé nɔn Yankan hrɔ́ étɔ sa: “Muswe gɛ lephan khɛ́n, ákakhúnbrɛn, ále ji ábhwe olrɛ ha ábidí hrɔ́ hrómɛn.”

¹¹ Saji ácu li mímí sa, álepɛ lephan ábha khɔ́ ábidí phɔ lí lephan apriman Yankan hɛ́nmɛn, lóhɛ́nthé Yankan hrɔ́ étɔ sa: “Lephan akhɔ mímíbhú hrómɛn priman Yankan hɛ́nmɛn ɔn, mɛ́n lephan lókɔn ánman má mɛpɔ́.”

¹² Khɛ́n ábidí lé bha mímíbhú yítɛ́ hrómɛn. Lóbɛn Yankan hrɔ́ cu étɔ, nɔn ali lée: “Lephan khɛ́n éji ábidí bhwe étɔ ɔn, lephan lókɔn ánman khɔ́ ábidí phɔ má mɛpɔ́.”

¹³ Krisi ka ado lo muswe ha mɛ́n tho, ńkhɔ lóhrómɛn swa lo yɛn ábidí muswe hrómɛn. Mímí nbrɛn, Yankan hrɔ́ tɔ gbée salé: “Lephan tɛɛ odi bhɛ́ bhwa áyá phɔ, lephan lókɔn muswe gɛ.”

¹⁴ Lónɔn achɛ ńdubhɔ́ khɛ́n Yankan bho tre Ábrahámɛn lé, néphan aleli Jwifunɛ́n, wo lɔ wo khɔ Jezwi-Krisi phɔ gɛ ńdubhɔ́ lókɔn, ló ochɛ́sé lo lɔ, lo khɔ́ mímíbhú hrómɛn gɛ Nánnánmi khɛ́n Yankan tɔ mɛ́n bhwe tre lo lé.

Ábidí le ábhwe Yankan tɔtre lo lé

¹⁵ Hɔnsɛ́nhɔn, áyí obháne otɛ́ ákakhúnbrɛn áthéji krɛn yé, mɛn mán mó lóbɛn thwelí bhwe tɔ sé hɔ́n: lónɔn ali sa, kasé lephan tɛ aja hrɔ́ bɛn tre, álepɛ lephan ágɛ tɛ́ áhrɔ́ lókɔn lɔ, ló saji álepɛ lephan khɛ́n ágɛ bhó ábhwe nankhɛ bɛn káne.

¹⁶ Lóbrɛ nɔn ali Yankan kɛ! Yankan tɔ bhwe tre Ábrahámɛn le mɛ́n jibhi ɔ́nmɔn lé. Yankan hrɔ́ le tɔlé: “Ábrahámɛn le mɛ́n jímiɔn ɔ́nmɔn”, sa yí wo étɔ néphan búdúbúdú bhwe a. Khɛ́n ábhwe Yankan hrɔ́ tɔ lónɔn ali sa: “Ábrahámɛn le mɛ́n jibhi ɔ́nmɔn”, lóthé nɔn ali lée lephan míbrɛ bhwe nɔn wo étɔ, ló lephan lókɔn, mɛ́n nɔn ńni Krisi.

¹⁷ Ló ábhwe mɛɛ́n nɛn mɛn tɔ, lónɔn ali sa: Yankan si akprɔbha bɛn tre, ló ńtɔ sa mɛ́n man hɔ́n lóbhwe pɛ. Ámɔn ɔɔ áli npá ya bhwelí le áphɛn áwɔ́, lómánji khɛ́n wo bho ábidí bha, lókhɛ́n ábidí bha lé gɛ bhɔ́ akprɔbha lókɔn, saji áyí khɛ́n Yankan tɔlé mɛ́n man tɛ́, lólɔ ábidí bha lé gɛ tɛ́ lɔ.

¹⁸ Kasé Yankan jayí lókɔn asé lephan, áchán ábidí hrómɛn, ló kasé áli nɛn, ajayí lókɔn lé gɛ cu chán ábhwe Yankan tɔtre hrómɛn npɔhɔ́n. Khɛ́n ábhwe Yankan tɔtre, lóhrómɛn nɔn ńko mo ajayí lókɔn se Ábrahámɛn.

¹⁹ Ló bí hɛ́nthé khɛ́n obho ábidí bha ɛ? Obho ábidí bha, ochɛ́sé lo yɛ́n áyíléle khɛ́n Yankan le pɔ salé lo tɛ́: ló ábidí lókɔn, ábha tré kábrɛ kábrɛ ábha di lócí Ábrahámɛn njibhi khɛ́n otɔ mɛ́n bhwe tre bha bhá. Yankan-mranchɛ́mán nɔn abho ábidí lókɔn bha, ló lephan brɛ nɔn aya lóthethé.

²⁰ Khɛ́n Yankan brɛ khókhó nɔn ali mɛ́n bhwe, lóhɛ́nthé, ábhwe lókɔn ále cu nɛn lée lephan nankhɛ bɛn oya lóthethé npɔhɔ́n.

Lóyí hɛ́nthé khɛ́n oha ábidí

²¹ Wú lóthé nɔn ali salé ábidí lɔ ká njɛ, khɛ́n Yankan bhwe atɔtre lɔ ká njɛ? Léliló! Ló kasé ápɛ ábidí bɛn khɛ́n néphan gɛ khɔ́ lóphɔ bhá mɛpɔ́, ka okhɔ ábidí phɔ chɛ lephan priman Yankan hɛ́nmɛn.

²² Lókhɛ́n Yankan hrɔ́ étɔ gbée salé ńne sɛ́npɛ́ srɛn áthéji khúnbrɛn, ló ochɛ́sé áyí khɛ́n Yankan tɔtre salé mɛ́n man sé néphan, obhó lóyí lókɔn sé néphan khúnbrɛn khɛ́n ebhú mímí, wo mímíbhú wo pɛ bha Jezwi-Krisi tho hɛ́nthé.

²³ Lóka lo ka pɛ mímíbhú, lo bha ábidí mɔ́n mɛn sa khúthékámán, ló lo ébo lóka wo bhá tɔ mímíbhú bhwe sé lo yé.

²⁴ Lóhɛ́nthé, ábidí nɔn ébo lo kábrɛ kábrɛ, odi Krisi ka ábha bhá, ló okhɔ́ mímíbhú hrómɛn bhó lo tɛ́sa néphan apriman Yankan hɛ́nmɛn.

²⁵ Thénthé ka lókɔn khɛ́n mímíbhú bháne, lo le cu bha ábidí mɔ́n mɛn npɔhɔ́n.

²⁶ Lée mímíbhú hrómɛn nɔn ɔ́n khɔ li Yankan miɔn, hɔ́n le Jezwi-Krisi ɔ́nmɔn brɛ ɔ́n ni hɛ́nthé.

²⁷ Mímí nbrɛn wo ha hɔ́n khúnbrɛn nduhɛ́n sa, hɔ́n le Krisi ɔ́nmɔn ɔ́n ní brɛ, ló Krisi hromɛn lephan pɔ́pɔ́ olí, thénthé hɔ́n lɔ ɔ́n ní néphan pɔ́-npɔ́.

²⁸ Lóhɛ́nthé Jwifunɛ́n lɔ le ká njɛ, khɛ́n néphan aleli Jwifunɛ́n lɔ ká njɛ, ńgangánmán lɔ le ká njɛ, khɛ́n néphan ali líhɛ lɔ ká njɛ, ńsɛ lɔ le ká njɛ, khɛ́n ńmie lɔ ká njɛ. Khɛ́n hɔ́n khúnbrɛn ɔ́n ni brɛ, Jezwi-Krisi phɔ ɔ́n ma hɛ́nthé.

²⁹ Kasé ɔ́n ni Krisi néphan, ló-ɛ ɔ́n ni Ábrahámɛn jímiɔn, ló ajayí khɛ́n Yankan tɔ lóbhwe tre ɔn, ábha lí hɔ́n ékɛ.