GALÁTHI KHÚBHƐ́NƐ́N 2 - Ebrié New Testament 1996

Phɔ́lu le Krisi-mranchɛ́mán nánkhɛ

¹ Ámɔn ɔɔ, áli npá áwɔ́-bhwelí, khɛ́n mɛn saji no Jeruzalɛ́mɛn, mɛn le Banabási ɔ́nmɔn, ló mɛn do Thite lɔ ka phɔ ɔ́nmɔn no.

² Mɛn nó mɛɛ́n no, Yankan nɔn achɛ mɛn lée mɛn no. Lóne mɛn le athemánhɔn ɔ́nmɔn ánchán obhurɛhɛ́n. Ló Ábhwe Bhwábhwá khɛ́n mɛɛ́n tɔ sé néphan aleli Jwifunɛ́n, mɛn nɛ lóthé mwámwá se wo ye. Mɛn nɛn pɔ sa mɛn júmán lócí mɛn ni, le ló thénthé mɛn ní ɔ́nmɔn olí yí wrɛ́.

³ Thite abha mɛn phɔ, ńni Grɛkhi sɛ. Lókhɛ́n ole si nkɛ ha sa ojan mɛ́n khɛn,

⁴ hɔnsɛ́nmánhɔn kpakprámán khɛ́n akhrɛ lo hromɛn ɔn, wo-ɛ, wo pɔ salé sáán ojan nkɛ khɛn. Wo néphan lókɔn, wo hrɔman bha hɛn lo gbe hrómɛn, ló lo ká lo ka lo nbrɛn lé lo le Jezwi-Krisi ɔ́nmɔn brɛ lo li hɛ́nthé: wo ékpra lo, ló wo énɛn wo khwɛ́n lo jrɛn gangánmán.

⁵ Khɛ́n lo le dɛn se wo lóphɔ mɔ́nsi bhrií, ochɛ́sé ábhwe mímí abha Ábhwe Bhwábhwá lókɔn hromɛn ɔn, ogɛlé tré hɔ́n thethé ákakhúnbrɛn.

⁶ Wo hromɛn ápɛ néphan ebhú salé wo li athemánhɔn – áyɔn, lókhɛ́n wo néphan khónkhó wo li, mɛn, áleli mɛn bhwe, átɛsalé lephan, hɛ lephan yábhɛ ɛli, léli lóphɔ nɔn Yankan khɔ́ bhɔ́ hɛ kwa, – khɛ́n mɛɛ́n tɔ sa athemánhɔn lókɔn, wo le se mɛn ábidí pɔ́pɔ́ nánkhɛ.

⁷ Lókhɛ́n wo wu sa, Yankan chɛ mɛn lée, mɛn tɔ Ábhwe Bhwábhwá sé néphan aleli Jwifunɛ́n, sa lósi ńkhɔ chɛ Piɛ lɔ étɔ lóbhwe lókɔn sé Jwifunɛ́n a.

⁸ Lókhɛ́n Yankan chɛ mɛn ni Krisi-mranchɛ́wo se néphan aleli Jwifunɛ́n, sa lósi ńkhɔ chɛ Piɛ lɔ li Krisi-mranchɛ́wo se Jwifunɛ́n a.

⁹ Jakhi, Piɛ le Jan, khɛ́n obhu sa ali athemánhɔn ɔn, wo lɔ, wo yɛn sa Yankan hɔn lójúmán phɛ́nta lókɔn ha mɛn mɔ́n mɛn. Lóhɛ́nthé wo dɔn mɛn le Banabási ɔ́nmɔn mɔ́n, lo bhɔ́ lo bhɔha sibrɛ hɛ́nthé. Lo khúnbrɛn lo mɛ́n si, ló lo tɔ sa, lo-ɛ, lo bhá lo lí júmán néphan aleli Jwifunɛ́n thethé, lókhɛ́n wo-ɛ, tɛmɛ wo lo lí júmán Jwifunɛ́n thethé.

¹⁰ Wo bhwe tɛɛ wo kranman lo nɔn ali salé, gbremán abha Jeruzalɛ́mɛn Yankan-gbemán hrómɛn ɔn, tɛmɛ lo dɔnmán nkɔn mɔ́n, ló mɛn khwa thɛ́n lé tɛ lóyí lókɔn simɛ́n.

Phɔ́lu égbrɛ Piɛ Anthiɔ́su khúbhɛ́

¹¹ Lóka Piɛ bha Anthiɔ́su khúbhɛ́, mɛ́n yíbɛn ńtɛ yan hɛ́nthé, mɛn gbrɛ ápasá hɛ́nmɛn.

¹² Lóyí ńtɛ nɔn ali sa, Jakhi chɛ néphan dɔnbɛn ebhá. Lóka nkɔn le ka di bháthó-áan, khɛ́n mɛ́n-ɛ ńgɛ néphan aleli Jwifunɛ́n ɔ́nmɔn anní nɛn. Lóka néphan lókɔn di bháthó, Jwifunɛ́n khɛ́n apɔ sa ojan néphan khɛn ansó hɛ́nthé, ńchan nɛn mɛ́n fe.

¹³ Hɔnsɛ́nhɔn nankhɛ ali Jwifunɛ́n, ákhúsó mɛn, wo lɔ wo éhrɔman tɛ́ Piɛ yí yábhɛ atɛ. Ló Banabási bhwá nbrɛn lɔ gɛ nkɔn ɔ́nmɔn éhrɔman tɛ́ lóyí yábhɛ brɛ lókɔn.

¹⁴ Lóka mɛn wu sa, wo yí si wo khɔ wo etɛ́, ále yali, ále khɔ́ ábhwe mímí abha Ábhwe Bhwábhwá hrómɛn ɔn, lóhɛ́nthé néphan khúnbrɛn hɛ́nmɛn, mɛn kranman Piɛ salé: “Hɛ ɛli Jwifu, khɛ́n hɛ yí si ɛkhɔ tɛ krɛn yéne ɔn, ákhɔ́ lephan aleli Jwifu yí átɛ́, ále khɔ Jwifunɛ́n yítɛ́ sitó. Hɛ khɔ́ ɛtɛ nɛn, ńthé kalósi akhɔ tɛ khɛ́n ɛ́nɛn ɛchɛ́ néphan aleli Jwifunɛ́n salé wo tɛ́ yí sa Jwifunɛ́n e?”

Okhɔ mímíbhú hrómɛn swa Jwifunɛ́n le néphan aleli Jwifunɛ́n

¹⁵ Lo-ɛ lo li Jwifunɛ́n líhɛ, lo le tɛsa nemán lókɔn khɛ́n ále la Yankan.

¹⁶ Lókhɛ́n lo yɛn sa lephan, kasé ɛbhu Jezwi-Krisi mímí pán, Yankan bhó hɛ tɛ́sa lephan apriman mɛ́n hɛ́nmɛn, lókhɛ́n áleli Moyízi bidí yí énɛn, ɛtɛ hɛ́nthé. Lóhɛ́nthé lo lɔ, lo bhu Jezwi-Krisi mímí, ló ochɛ́sé Yankan obhó lo tɛ́sa néphan apriman, Jezwi-Krisi lo bhu mímí hɛ́nthé, lókhɛ́n áleli sa ábidí yí énɛn lo tɛ hɛ́nthé. Átɛsalé álepɛ lephan, ábidí yí énɛn ńtɛ hɛ́nthé, óbha tɔlé ńni lephan apriman Yankan hɛ́nmɛn.

¹⁷ Ló, kasé lo énɛn lo tɛ́sa néphan apriman Krisi lo bhu mímí hɛ́nthé, ló kasé lóhɛ́nthé wo étɔlé lo li nemán sa néphan aleli Jwifunɛ́n, wú élie salé Krisi chɛ ńne mɔ́n dipha? Léliló a!

¹⁸ Ábidí khɛ́n mɛɛ́n nbrɛn mɛn ca khwalé, kasé mɛn cu mɛn tɛ́ lóyí npɔ, élie salé mɛn ni lephan ále ji ábidí.

¹⁹ Ábidí le pɛ sɛ́npɛ́ mɛn tho, átɛsalé mɛn khu ábidí hɛ́nthé, ló ochɛ́sé mɛn má mɛpɔ́ sé Yankan. Wo grɛ wɛn mɛn le Krisi ɔ́nmɔn áyábhletre phɔ,

²⁰ áchɛ́se mɛɛ́n nbrɛn mɛn nɛn cu ma mɛpɔ́ npɔhɔ́n, lókhɛ́n Krisi nɔn abha mɛpɔ́ chre mɛn hromɛn. Thénthé mɛn ma mɛpɔ́ ńnánmí mɛn chre-ɛ, khɛ́n Yankan Mi mɛn mu mímí nɔn achɛ mɛn ma mɛpɔ́, ló Yankan Mi lókɔn, ńpɔ mɛn, ló ákhú hrómɛn ńmo mɛ́n mɛpɔ́bhá sé mɛn.

²¹ Mɛn nɛ́n mú salé Yankan phɔlíman ase mɛn, áli yí wrɛ́. Kasé áli ábidí yítɛ́ phɔ nɔn okhɔ́ chɛ́ lephan primán Yankan hɛ́nmɛn, ló Krisi khú akhu, áli áyí wrɛ́.