FILEMƆN 1 - Ebrié New Testament 1996

Phɔ́lu ébhi néphan

¹ Mɛn hɛ́n li Phɔ́lu, mɛn nɔn mɛn tɛ áhrɔ́ lókɔn, Jezwi-Krisi hɛ́nthé, mɛn ma ákhúthéká gɔn, saji áhrɔ́ lókɔn lo hɔnsɛ́n Thimote lɔ mɔ́n bha lóhrómɛn. Filemɔn, lo tɛ áhrɔ́ lókɔn se hɛ, hɛ nɔn ɛli lo jɔ le lo júmán hrómɛn lephan,

² saji lo tɛ áhrɔ́ lókɔn se Yankan-gbemán khúnbrɛn khɛ́n ábhurɛhɛ́n hɛ bháthó hrómɛn, lómánji lo tɛ áhrɔ́ lókɔn se lo hɔnmia óche Aphiá le Achipe ali lephan lo le mɛ́n ɔ́nmɔn lo bha júmán brɛ lókɔn hromɛn.

³ Ló tɛmɛ Yankan ali lo The, le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Filemɔn mɛ́n pɔ́ le mɛ́n mímíbhú ńpɛ

⁴ Ákakhúnbrɛn, lóka mɛɛ́n na Yankan, hɛ bhwe di mɛn mwanhɛ́n, ló mɛn ná Yankan nansi.

⁵ Átɛsalé hɛ pɔ́ ɛpɔ́ néphan ali Yankan-gbemán, le hɛ mímíbhú ɛpɛ se lo Hwánthe Jezwi, wo tɔ lóbhwe se mɛn ye.

⁶ Mɛn Yankan mɛɛ́n na, lónɔn ali salé, ápɔ́ lókɔn abha lo le hɛ ɔ́nmɔn thethé mímíbhú hrómɛn, ochɛ́sé lo yɛ́n ndubhɔ́ khúnbrɛn lo khɔ Krisi phɔ gɛ lo mɛpɔ́bhá hrómɛn.

⁷ Mɛn hɔnsɛ́n, ápɔ́ lókɔn ɛpɛ se néphan, áse mɛn áphɔhá le ńthɛ́nkhwálé! Ɛchɛ áphɔhá ka Yankan-gbemán khúnbrɛn hrómɛn.

Phɔ́lu étɔ bhwe do Onezimɛn ká

⁸ Krisi hɛ́n hrómɛn, mɛn gɛ mɔ́nsi mɛn chɛ́ hɛ tɛ́ áyí ayɔn salé ɛtɛ́,

⁹ lókhɛ́n léli lóyábhɛ, mɛn-ɛ ápɔ́ hrómɛn nɔn mɛn khɔ mɛn má hɛ nta tho. Mɛn tɛ́ di hɛ mwanhɛ́n salé mɛn Phɔ́lu nbrɛn nɔn mɛn tɛ áhrɔ́ lókɔn, thénthé si adi, mɛn thi, lókhɛ́n ló akhɔnman banban nɔn ali salé Jezwi-Krisi hɛ́nthé, mɛn ma khúthéká gɔn ntɔ́nyán.

¹⁰ Onezimɛn hɛ́nthé, mɛn má hɛ nta tho. Ákhúthéká gɔn lókɔn mɛn ma, ńjrɛn mɛn bhi Jezwi-Krisi hɛ́n hrómɛn.

¹¹ Lócí ńnɛn ni yíɛkɛ se hɛ, lókhɛ́n thénthé, ńyɔn se mɛn le hɛ ɔ́nmɔn.

¹² Thénthé mɛn cu mɛn hɔ́n-ɛn thu hɛ, ńni lephan bɛn mɛn mo mɛn thɛ́n khúnbrɛn tre mɛ́n tho.

¹³ Mɛn pɔ salé mɛɛ́n do-e chré mɛn phɔ krɛn, lóka khúnbrɛn khɛ́n mɛn ma khúthéká gɔn, Ábhwe Bhwábhwá lókɔn mɛɛ́n tɔ hɛ́nthé, ochɛ́sé andɔnmán mɛn mɔ́n, sa hɛ si ɛkhɔ dɔnman mɛn mɔ́n.

¹⁴ Lókhɛ́n mɛn nɛn pɔ salé mɛn sí hɛ ha ɛdɔnmán mɛn mɔ́n ádwasan mɛn, mɛɛ́n nɛn salé ɛdɔnmán mɛn mɔ́n hɛ thɛ́npɔ́ hrómɛn.

¹⁵ Lóyí hɛ́nthé khɛ́n Onezimɛn chan hɛ phɔ féne ácí kpɛ́bɛn hromɛn lo lé gɛ yɛ́n, lókhɛ́n achan ncɛ́n élo, ánman gɛ hɛ ɔ́nmɔn chré ákakhúnbrɛn.

¹⁶ Thénthé ńnɛn cu ni gangánwo npɔhɔ́n, ńbanbrɛn gangánwo; ńni lo hɔnsɛ́n bɛn lo pɔ Hwánthe hɛ́n hrómɛn. Ńni lephan bɛn mɛn pɔ, saji hɛ lɔ, ńni lephan bɛn ɛpɔ banban. Ńni lo hɔnsɛ́n ńnánmí hrómɛn, lókhɛ́n ńcu ni lo hɔnsɛ́n lo Hwánthe hɛ́n hrómɛn.

¹⁷ Lókhɛ́n kasé ɛbhú salé mɛn ni hɛ gbe hrómɛn lephan, tɛmɛ ɛdɛn do-e sa lósi ɛ́bha khɔ́ do mɛn bɛn nbrɛn.

¹⁸ Kasé ńtɛ hɛ yíbɛn yan, kasé hɛ pɛn bɛn bha mɛ́n tho, tɛmɛ ɛbhú lópɛn tré mɛn lé.

¹⁹ Mɛɛ́n nbrɛn nɔn mɛn mo mɔ́n nrɛ ábhwetɔ́ lókɔn tre salé: Mɛn Phɔ́lu, mɛn mán sɔ́n hɛ ápɛn lókɔn. (Lókhɛ́n mɛn man nɛ́n tɛ́ di hɛ mwanhɛ́n salé mɛn phrɛ do hɛ ka.)

²⁰ Lóhɛ́nthé mɛn hɔnsɛ́n, mɛɛ́n na hɛ, lo Hwánthe hɛ́n hrómɛn tɛmɛ ɛwú mɛn nfɛkhu. Tɛmɛ ɛkhwá mɛn thɛ́n lé Krisi hɛ́n hrómɛn.

²¹ Lóka mɛn tɛ́ hrɔ́ lókɔn, mɛn yɛn salé áyí khúnbrɛn mɛn mán mi hɛ, ɛ́bha tɛ́ sé mɛn, saji mɛn yɛn salé ɛ́bha tɛ́ bhɔ́tho.

²² Tɛmɛ ɛphrɛ sí ka háne tɛ́ mɛn lási tré. Mɛn mú salé Yankan bha yé hɔ́n la tɔ́, ló ánman chɛ́ mɛn sáji man gɛ hɔ́n.

Phɔ́lu néphan ébhi aphuji

²³ Ephafrazi ébhi hɛ, mɛn le mɛ́n ɔ́nmɔn nɔn obha khúthéká gɔn Jezwi-Krisi hɛ́nthé.

²⁴ Néphan ali mɛn jɔn júmánmán gbemán khúnbrɛn abha krɛn ébhi hɛ: Mákhi, Arisitakhi, Demási le Lwikhi.

²⁵ Tɛmɛ Hwánthe Jezwi-Krisi phɔlíman obhá hɔ́n khúnbrɛn phɔ.