EFƐ́ZI KHÚBHƐ́NƐ́N 6 - Ebrié New Testament 1996

Ńmiɔ́ le wo themánhɔn ɔ́nmɔn thethé bhwe

¹ Ńmiɔ́, ɔ́n ji hɔ́n themánhɔn. Ájí lókɔn, áli yíbɛn énɛn salé ɔ́n tɛ́ Hwánthe hɛ́nmɛn, saji áli áyíbɛn apriman, ló áyɔn salé ɔ́n tɛ́.

² “Ɛji hɛ the le hɛ man ɔ́nmɔn”, ábidí athwasi nɔn ali lókɔn, ló ápɛ ábhwe obhɔli phɔ tɔtre lóphɔ:

³ “Ló ochɛ́sé áphɔ okhwá hɛ lé, ló ɛbhá mɛpɔ́ omɔ́n, áyíta lókɔn tho.”

⁴ Ló hɔ́n, nthemánhɔn, ɔ́n ne tɛ́ thɛ́nyan ká hɔ́n miɔn hromɛn. Lókhɛ́n ɔ́n gbɛ wo khɔ́ ásitó le ábhweyɛ́n achan Hwánthe yé.

Gangánmán le wo hwánthemánhɔn

⁵ Gangánmán, ákhúsó mɛn ɔ́n ji hɔ́n hwánthemánhɔn abha krɛn théji, ló ɔ́n fa wo hɛ́nmɛn hɔ́n thɛ́nbhwá mɛn, sa Krisi hɛ́nmɛn nɛn hɔ́n ékhwɛn a.

⁶ Ole lí wo hɛ́nmɛn pán ɔ́n tɛ́ yí yábhɛ lókɔn, lóka wo mɛbhí bha hɔ́n phɔ, ló hɔ́n yítɛ́ okhwá wo hɛ́nmɛn lé. Khɛ́n hɔ́n thɛ́n khúnbrɛn hrómɛn, tɛmɛ ɔ́n tɛ́ Yankan thɛ́n yí apɔ, sa néphan ali Krisi gangánmán.

⁷ Ɔ́n ní júmán ali gangánmán júmán alí hɔ́n thɛ́nbhwá khúnbrɛn hrómɛn, sa néphan ékhwɛn Hwánthe bɛn nbrɛn hɛ́nmɛn nɛn, khɛ́n ole tɛ́sa lóka hɔ́n ékhwɛn néphanmiɔn hɛ́nmɛn nɛn si akhɔ́ tɛ́ a.

⁸ Tɛmɛ odi hɔ́n mwanhɛ́n salé, lephan brɛ brɛ khúnbrɛn, gangánwo ɛli o, líhɛ ɛli o, lephan hɛ yíbhwá ɛtɛ́ ɔn, lópɛnsɔ́n nɔn ɛbhá gɛ Hwánthe yé.

⁹ Hɔ́n khɛ́n ɔ́n ni hwánthemánhɔn, hɔ́n lɔ ɔ́n tɛ́ lóyí yábhɛ brɛ sé hɔ́n gangánmán, ɔ́n ne gbrɛ wo ádwasan mɛn. Tɛmɛ odi hɔ́n mwanhɛ́n salé hɔ́n le hɔ́n gangánmán ɔ́nmɔn, ɔ́n pɛ Hwánthe míbrɛ bha átho, mɛ́n ánnɛn só lephan hɛ́nmɛn mɔ́kwa, hɛ lephan yábhɛ ɛli hɛ́nthé.

Ngbu khɛ́n Yankan sé néphan

¹⁰ Khɛ́n lómánji, áyɔn sa Hwánthe sɛ́npɛ́ khóo hrómɛn, ɔ́n nɛn hɔ́n phɔkhɔ́nman hɔ́n le mɛ́n ɔ́nmɔn brɛlí hrómɛn.

¹¹ Ɔ́n khwɛ́n Yankan ngbu khúnbrɛn bhá, ló ɔ́n wúsi khɔ́ gɛlé kpɛ́ɛ́n ya logbo hɛ́nmɛn, mɛ́n lephan ánkhrɛ hɛ́nthé.

¹² Átɛsalé léli lo le néphanmiɔn ɔ́nmɔn nɔn lo bhá kútha. Néphan khɛ́n lo bhá gɛ wo ɔ́nmɔn kútha nɔn ali, nánnánmimán sɛ́npɛ́mán néne abha átho, le wo themánhɔn, le átho dubhlékhu bhro bribri hromɛn mringbilímán bhúrɛmán abha átho bháthó.

¹³ Lóhɛ́nthé, ɔ́n khwɛ́n Yankan tha ngbu khúnbrɛn pɛ, thénthé ka lókɔn hromɛn. Lónɔn lóka ácí phromɛn bha bhá, hɔ́n mɔ́n oká mɛsawo tho. Ló ochɛ́sé lóka hɔ́n mɔ́n ka mɛsawo tho, hɔ́n si ɔ́n ya, ɔ́n gɛlé ya kpɛ́ɛ́n.

¹⁴ Tɛmɛ ɔ́n mraya: ábhwe mímí olí hɔ́n kpakpa ɔ́n mɔ́n thé, ló áyíyálitɛ́ olí hɔ́n kpónkpó ntráliɛ́ ɔ́n sɔ́.

¹⁵ Ɔ́n tɔ Ábhwe Bhwábhwá, ali thɛ́nkhwálé bhwe sɛ́npɛ́ mɛn, lónɔn olí hɔ́n ngbawa obhá hɔ́n nta.

¹⁶ Ácí khúnbrɛn, ɔ́n hɔ́n mímíbhú pɛ, lónɔn olí hɔ́n sasá. Ló Abhɔsɛ́mɔ́n, mɛ́n tɛn khɔ́n khúnbrɛn khɛ́n ńku anmá, ábha gba yɛn.

¹⁷ Áswa oswa hɔ́n ɔn, ɔ́n dɛn do, lónɔn olí hɔ́n donɛn kpró, ló Yankan bhwetɔ́ olí khókhríyan Nánnánmi bho se hɔ́n.

¹⁸ Yankanla mɛn nɔn ɔ́n khɔ́ tɛ́ lóyí khúnbrɛn lókɔn, ɔ́n mi Yankan mɔ́ndɔ́nman. Áyí khúnbrɛn hrómɛn ɔ́n na Yankan, ló Nánnánmi oyalí hɔ́n. Ákakhúnbrɛn, ayɔn sa ɔ́n há hɔ́n bɛn nbrɛn mwanhɛ́n, ló ɔ́n gɛlé ya. Ló tɛmɛ ɔ́n na Yankan sé Yankan-gbemán khúnbrɛn.

¹⁹ Ɔ́n na Yankan sé mɛn lɔ, ló ochɛ́sé lóka mɛn mán tɔ bhwe, Yankan olie mɛn lóncan yábhɛ énɛn lée mɛn nɛ, mɛn tɔ bhwe sɛ́npɛ́ mɛn, ló mɛn chɛ́ oyɛ́n Ábhwe Bhwábhwá thé ahrɔman tre.

²⁰ Mɛn ni Ábhwe Bhwábhwá nkpɔmanwo-ɛ, khɛ́n thénthé mɛn ma khúthéká gɔn. Tɛmɛ ɔ́n na Yankan, ló ochɛ́sé mɛn tɔ Ábhwe Bhwábhwá lókɔn sɛ́npɛ́ mɛn, sa lósi énɛn salé mɛn khɔ́ tɔ a.

Phɔ́lu néphan ébhi aphuji

²¹ Thichikhi ali lo hɔnsɛ́n bhwá, le lo mɔ́ndɔ́nmánwo agɛlé ya lo Hwánthe júmánlí hrómɛn, mɛ́n nɔn ánman tɔ mɛn phɔ bhwe khúnbrɛn sé hɔ́n yé, ló ɔ́n yɛ́n mɛn si mɛn khɔ chre.

²² Mɛn nɔn mɛn hahɛ́n chɛ nkɛ salé, anman tɔ lo phɔ bhwe sé hɔ́n, ɔ́n yɛ́n lósi lo khɔ chre, ló hɔ́n thɛ́n hrómɛn, ɔ́n gɛ áphɔkhɔ́nman.

²³ Tɛmɛ Nthe Yankan le Hwánthe Jezwi-Krisi ɔ́nmɔn osé hɔnsɛ́nhɔn khúnbrɛn, ńthɛ́nkhwálé, ápɔ́ le mímíbhú.

²⁴ Ápɔ́ khɛ́n ali áyíbɛn óle gɛ tɛ́ lɔ, néphan khúnbrɛn khɛ́n apɔ lo Hwánthe Jezwi-Krisi yábhɛ nɛn, tɛmɛ Yankan phɔlíman obhá wo khúnbrɛn phɔ.