EFƐ́ZI KHÚBHƐ́NƐ́N 5 - Ebrié New Testament 1996

Tɛmɛ obhá áyéfí hrómɛn

¹ Thénthé hɔ́n nɔn ɔ́n ni miɔ́ Yankan pɔ, tɛmɛ ɔ́n tɛ́ yí okhɔ́ mɛ́n yí si ankhɔ́ tɛ́.

² Ɔ́n nɛnsi khɔ́ ápɔ́ hrómɛn, sa Krisi si akhɔ tɛ, ńpɔ lo, ló lo hɛ́nthé ńkhu. Ló mɛ́n khú lókɔn, ákhɔ sa ńphaha yíbɛn esɔ́n yɔ́n, apɔ Yankan mɛ.

³ Ɔ́n ni Yankan-gbemán hrómɛn néphan, lóhɛ́nthé áleyɔn sa hɔ́n thethé, otɔ ágbakhrelí, ńphromɛn yítɛ́ yábhɛ yábhɛ le ńmɛnɔ́n bhwe ɔ́nmɔn.

⁴ Áleyɔn sa ábhwe léle bɛn ochán hɔ́n míthé thándi, ɔ́n ne lɛ ágbwɛ ncan, le ńcan phromɛn phromɛn aleli áphɔkhwálé ncan, ali ncan krɔ. Khɛ́n hɔ́n can ɔ́n gɛ lɛ nɔn ali Yankan nansilá ncan.

⁵ Áyɔn se ɔ́n yɛ́n mwámwá salé: gbakhrewo, lephan áphɔ le chan, le yíphéphɔ́wo (átɛsalé áyíphéphɔ lɔ li mola yíbɛn) brɛ bha le ló Krisi le Yankan ɔ́nmɔn Bhringbi khúbhɛ́ hrómɛn bhrɔ́ɔ́.

⁶ Lephan brɛ ole khɔ́ mɛ́n míthé líman líman mɛn khrɛ hɔ́n: lóyítɛ́ yábhɛ lókɔn nɔn áchɛ́ Yankan do thɛ́nyan sé néphan ále ji.

⁷ Ɔ́n ne gɛ néphan yábhɛ lókɔnhɔn ɔ́nmɔn thóbhɛ́.

⁸ Lócí ɔ́n ma dubhlékhu hromɛn, khɛ́n thénthé ɔ́n ma áyéfí hrómɛn, hɔ́n le Hwánthe ɔ́nmɔn brɛ ɔ́n ni hɛ́nthé. Lóhɛ́nthé, áyɔn sa ɔ́n tɛ́ yí sa néphan abha áyéfí hrómɛn yí atɛ́.

⁹ Átɛsalé áyí ógɛ áyéfí hrómɛn nɔn ali áyíbhwátɛ́ dɔndɔn, áyíyálitɛ́, le ábhwe mɛ́nbrɛntɔ́.

¹⁰ Ɔ́n tɛ́ khékhremɛn, ló ɔ́n yɛ́n áyí khɛ́n ágɛ pɔ́ Hwánthe mɛ.

¹¹ Áyí lókɔn khɛ́n ále tɛ́ yíɛkɛ sé lephan, néphan abha dubhlékhu hromɛn etɛ́ lóyí, ɔ́n ne gɛ wo ɔ́nmɔn thóbhɛ́, khɛ́n ɔ́n hɔ́n lóbhwe ká nphrámɛn.

¹² (Átɛsalé néphan lókɔnhɔn yí áhrɔman tɛ́ kpɔ́thé ɔn, átɛ́ hɛ́ndɛ.)

¹³ Khɛ́n lóka lóyí khúnbrɛn lókɔn phwan ká áyéfí hrómɛn, lóka lókɔn nɔn, oyɛ́n lóyí si akhɔ ha tre,

¹⁴ mímí nbrɛn, áyí khúnbrɛn tɛɛ aphwan ka nphrámɛn ɔn, ájrɛn áyéfí, lóhɛ́nthé nɔn wo tɔ sa : “Hɛ khɛ́n ńná ka hɛ ɔn, tɛmɛ ɛchán ńná mɛn fe, tɛmɛ ɛchán mɔngumán thethé fe, ló Krisi bha chɛ́ áyé ofí sé hɛ.”

¹⁵ Lóhɛ́nthé, hɔ́n si ɔ́n khɔ́ tɛ́ yí, ɔ́n há lóphɔ mwanhɛ́n. Ole tɛ́sa néphan ale yɛn bhwe ékɛ etɛ́, khɛ́n okhɔ́ bhweyɛ́nmán ékɛ.

¹⁶ Ácí ɔn ma lóhrómɛn ɔn, áli ácí phromɛn, lóhɛ́nthé ácí brɛ brɛ lo bha lóhrómɛn, áyɔn se lo tɛ́ yíbhwá.

¹⁷ Lóhɛ́nthé ɔ́n ne bhó hɔ́n bɛn nbrɛn tɛ́sa gbwɛmán, lókhɛ́n tɛmɛ ɔ́n tɛ́ khékhremɛn, ló ɔ́n yɛ́n lósi a, Hwánthe énɛn lée ɔ́n khɔ́ tɛ́ yí.

¹⁸ Ɔ́n ne yɔ́ hɔ́n bɛn nbrɛn kálé sé ńdɛ, átɛsalé ńdɛ chɛ́ lephan tɛ́ yíléle, khɛ́n tɛmɛ Nánnánmi obhá hɔ́n phɔ.

¹⁹ Ɔ́n khɔ́ Sómu nanmɛ le ńnánmɛ nankhɛ ɔ́nmɔn hrómɛn ha hɔ́n bɛn nbrɛn, ɔ́n khó nánmɛ nankhɛ le Sómu nanmɛ ɔ́nmɔn sé Hwánthe, ló ɔ́n nri nkɛ hwa hɔ́n thɛ́n khúnbrɛn hrómɛn.

²⁰ Ákakhúnbrɛn le áyí khúnbrɛn hrómɛn, lo Hwánthe Jezwi-Krisi hɛ́n hrómɛn, ɔ́n ná Nthe Yankan nansi.

Ńmie le wo cahɔn

²¹ Ɔ́n yé hɔ́n jɔn mɛ́n bhwe, ájí ɔ́n pɛ se Krisi hɛ́nthé.

²² Ńmie, ɔ́n ji hɔ́n cahɔn, sa lósi ɔ́n khɔ hɔ́n éji Hwánthe.

²³ Átɛsalé bhie, mɛ́n ca nɔn atre lé, sa Krisi tre Yankan-gbemán lé a. Ló Krisi bɛn nbrɛn nɔn ali Yankan-gbemán Dókáwo, Yankan-gbemán lókɔn khɛ́n ali mɛ́n phɔ nánmí.

²⁴ Lóhɛ́nthé áyɔn salé ńmie oji wo cahɔn, ló áyɔn salé Yankan-gbemán lɔ oji Krisi.

²⁵ Ńsɛ, ɔ́n pɔ́ hɔ́n bhiahɔn, sa Krisi si akhɔ pɔ Yankan-gbemán, khɛ́n abho mɛ́n mɛpɔ́bhá se nkɔn.

²⁶ Ló ochɛ́sé, lóka ńkhɔ ńdu le ábhwetɔ́ ɔ́nmɔn hrómɛn tɛ nkɔn phɔ chan ɔn, nkɔn lí néphan bɛn ógɛ khwɛ́n wo sé Yankan.

²⁷ Lónɔn ábha chɛ́sé Yankan-gbemán lókɔn agɛ nguhá, othándi mɛ́n hɛ́nmɛn, áphɔ chánchan hromɛn, wo le pɛ nkrɔ bhrií le áyíléle nánkhɛ bhrií ɔ́nmɔn wo phɔ, wo tɛ́ créncré, ló olépɛ ábhwe phromɛn bɛn wo phɔ.

²⁸ Áyɔn salé ńsɛ opɔ́ wo bhiahɔn, sa lósi wo khɔ pɔ wo nbrɛn nánmí. Kasé lephan ɛpɔ hɛ bhia, átɛsa ɛpɔ hɛ bɛn nbrɛn.

²⁹ Átɛsalé álepɛ lephan ása mɛ́n bɛn nbrɛn nánmí mɛ. Ńnɛn nɔn ansé nkɛ lí, áncɔ nkɛ tɛ́, sa Krisi si ákhɔ́ tɛ́ Yankan-gbemán phɔ,

³⁰ mɛ́n nánmí phɔ néphan lo li hɛ́nthé.

³¹ Sa lósi Yankan hrɔ́ khɔ étɔ a: “Lóhɛ́nthé nɔn sɛ bha chán mɛ́n the le mɛ́n man ɔ́nmɔn phɔ féne, ánmán mó mɛ́n phɔ ká mɛ́n bhia phɔ, ló wo mɔ́nmɔn wo bhá lí nánmí brɛ.”

³² Áyí abha ábhwe lókɔn thé, áthúbhɔ. Krisi le Yankan-gbemán ɔ́nmɔn thethé bhwe abháne hɛ́nthé nɔn achɛ mɛɛ́n nɛ ncan yábhɛ lókɔn.

³³ Lóbhwe brɛ nɔn ali salé: hɔ́n hrómɛn lephan brɛ opɔ́ mɛ́n bhia sa lósi ńkhɔ pɔ mɛ́n bɛn nbrɛn, ló áyɔn salé bhie lɔ oji mɛ́n ca.