EFƐ́ZI KHÚBHƐ́NƐ́N 4 - Ebrié New Testament 1996

Áphɔ nánmí khúnbrɛn si akhɔ bha sibrɛ

¹ Mɛn a, wo ka mɛn khúthé, Hwánthe hɛ́nmɛn nɛn mɛɛ́n khwɛn hɛ́nthé: mɛɛ́n na hɔ́n, tɛmɛ ɔ́n tɛ́ yí sa lósi Yankan khɔ pɔ, lóka ńche hɔ́n.

² Ácí khúnbrɛn ɔ́n ní nfɛkhumán, ɔ́n tɛ́ pɛ́tɛ, ló ɔ́n pɛ thɛ́nnɔ́n. Ló ápɔ́ hrómɛn, ɔ́n dɔnmán hɔ́n bɛn nbrɛn mɔ́n.

³ Brɛlí khɛ́n Nánnánmi bhó sé néphan, ɔ́n tɛ́ khékhremɛn ɔ́n hɔ́n pɛ ńthɛ́nkhwálé hrómɛn, ńthɛ́nkhwálé lókɔn khɛ́n abhɔ hɔ́n le hɔ́n jɔn ɔ́nmɔn há sibrɛ.

⁴ Ápɛ áphɔ nánmí brɛ khókhókhó, ló ápɛ Nánnánmi brɛ khókhókhó, sa ápɛ ńmwasrui brɛ khókhókhó khɛ́n Yankan che hɔ́n lée ɔ́n ma ká lóhrómɛn a.

⁵ Ápɛ Hwánthe brɛ khókhókhó, mímíbhú brɛ khókhókhó, ńduhɛ́nhá brɛ khókhókhó,

⁶ ápɛ Yankan brɛ khókhókhó, ali néphan khúnbrɛn wo The. Mɛ́n mɔ́n srɛn lephan khúnbrɛn, ankhɔ́ lephan khúnbrɛn phɔ tɛ́ yí, ló ńma lephan khúnbrɛn phɔ.

⁷ Lo hromɛn lephan brɛ pɛ mɛ́n yí ose ká njɛ, ápriman khɔ Krisi ékɛ asé lephan.

⁸ Sa ló Yankan hrɔ́ étɔ a: “Lóka ńpha no tho mɛn-áan, ńkhwɛn khúthékámán ɔ́nmɔn no, ló ńtɛ ápɔ́yí se néphan.”

⁹ Bíyí li lée “ńpha no tho ɛ?” Lóthé nɔn ali salé ńphrɛ dithé no áyítathé jwan mɛn-áan.

¹⁰ Lephan adithé, mɛ́n brɛ nɔn ńni lephan apha lo tho mɛn-áan, ló ochɛ́sé anpí si khúnbrɛn.

¹¹ Ńmo yí ka jɛ́ njɛ se lephan brɛ brɛ: ńchɛ néphan fe li Krisi-mranchɛ́mán, dɔnbɛn li bhwetɔ́trémán, dɔnbɛn li Ábhwe Bhwábhwá nkpɔmanmán, dɔnbɛn li Phasitɛmán, ló dɔnbɛn lɔ li yíliemán.

¹² Ńtɛ lóyí lókɔn sa owúsi khɔ́ lie Yankan-gbemán bhwe, wo khwɛn néphan hɛ́nmɛn nɛn, sa krethiɛnmán si akhɔ́ tɛ́ a, ochɛ́ Yankan-gbemán opɛ mímíbhú thúbhɔ háne ɔ́nmɔn lo.

¹³ Kábrɛ kábrɛ, lo khúnbrɛn lo pɛ mímíbhú brɛ, lo wú lósi okhɔ́ yɛ́n Yankan Mi, lo lí néphan gbóngbo lóhrómɛn, ló lo tɛ́sa Krisi si akhɔ tɛ.

¹⁴ Lónɔn lo bha lé cu lí ńmiɔ́ ephɛ́ phuu, khɛ́n néphan khɔ́ wo yílie yábhɛ yábhɛ hromɛn chɛ́ wo tɛ́ dandan, áyílie lókɔn khɛ́n néphan ákhrɛ néphan chɛ pi ási khúnbrɛn, ló ábia nkɔn hɛ́n áyílie yábhɛ yábhɛ hromɛn.

¹⁵ Khɛ́n kasé ápɔ́ hrómɛn lo étɔ bhwe mímí, lo bhá tɛ́ nkhóo áyí khúnbrɛn hrómɛn lo gɛ Krisi ali Athe.

¹⁶ Mɛ́n nɔn, mɛ́n phɔlíman hromɛn, ankhwɛ́n mɛ́n hwannɛ́n khúnbrɛn mɔha sibrɛ, ochɛ́sé wo lí brɛ, sa lephan phɔ ngrɛmɛ́n si akhɔ bhɔha sibrɛ, lo tɛ́ áphɔ nánmí nbrɛn oyɔ́n phú krethiɛnmán yé lɔ, lóbrɛ tɛɛ. Lóka wo thethé wo epɔ́ wo bɛn nbrɛn ɔn, wo gbe lɔ nɛnsi ló hɛ́nmɛn.

Ńmɛpɔ́bhá pɔ́pɔ́ abha Krisi hromɛn

¹⁷ Ábhwe mɛɛ́n tɔ le ábhwe mɛɛ́n nɛn mɛn chɛ́ hɔ́n yɛ́n gbée Hwánthe hɛ́n hrómɛn nɔn ali salé: ɔ́n ne tɛ́ yí sa néphan ale yɛn Yankan yí yábhɛ atɛ́, khɛ́n wo hɛ́nphebhú wrɛ́ alepɛ bhweyɛ́n lóhrómɛn éyalí wo.

¹⁸ Wo bhweyɛ́n lɔ. Ńmɛpɔ́bhá khɛ́n Yankan esé néphan, wo le bha lóhrómɛn, wo bhweyɛ́n wo le pɛ, le wo thɛ́n ákhɔnmán wo hɛ́nthé.

¹⁹ Hɛ́ndɛ bhrií le bha wo mɛ, áyíléletɛ́ hrómɛn tɛɛ nɔn wo bha, ló ágbakhre yí krɔ́-nkrɔ hromɛn nɔn wo bha ákakhúnbrɛn wo élo.

²⁰ Léli lósi yábhɛ wo khɔ lie hɔ́n Krisi bhwe nɔn ali lókɔn!

²¹ Ophrɛ tɔ mɛ́n phɔ bhwe se hɔ́n ye, ápriman khɔ ábhwe mímí ogɛ Jezwi yé.

²² Mɛ́n phɔ nɔn okhɔ lie hɔ́n lée ɔ́n yɔ́ hɔ́n godo yítɛ́ ká. Lócí ɔ́n yɛn hɔ́n néphan yábhɛ ɔ́n phrɛ li, áyí mɛnɔ́n khrɛ hɔ́n, ló álɔ hɔ́n.

²³ Áyɔn sa hɔ́n thɛ́n le hɔ́n nánnánmi ɔ́nmɔn ojrɛn.

²⁴ Ɔ́n jrɛn néphan pɔ́-npɔ́ otɛ́sa Yankan si akhɔ pɔ, khɛ́n ábhwe mímí chɛ wo yali, wo tɛ créncré.

²⁵ Lóhɛ́nthé nɔn, ɔ́n ne chí bhwe npɔhɔ́n! Hɔ́n hrómɛn, áyɔn sa lephan brɛ otɔ bhwe mɛ́nbrɛ sé mɛ́n jɔ, átɛsalé lo bhɔha li brɛ bha ágbe míbrɛ hromɛn.

²⁶ Kasé hɔ́n édo thɛ́nyan lɔ, ɔ́n hámwanhɛ́n, ló ɔ́n ne tɛ́ ne lóhrómɛn, ɔ́n ne do thɛ́nyan kábrɛ kábrɛ ácɛ́nmɛ osɔ́ ha.

²⁷ Ɔ́n ne sé logbo mɔ́nsi khɛ́n mɛ́n mɔ́n oká hɔ́n tho.

²⁸ Lephan khɛ́n esí sído, annɛ́n cu si sído npɔhɔ́n, áyɔn sa anní júmán, ló angɛ mɛ́n bɛn nbrɛn hɛ́n thethé nɛn ní, angɛ yí, ló anmó dɔnmán gbremán mɔ́n.

²⁹ Ábhwetɔ́ phromɛn ole chán hɔ́n míthé thándi, ábhwe ayɔn khɛ́n ágɛ dɔnmán néphan nánkhɛ mɔ́n, khɛ́n ágɛ chɛ́ wo mímíbhú thúbhɔ háne nɔn ɔ́n tɔ, ɔ́n tɔ ábhwe khɛ́n ágɛ chɛ́ wo gɛ áyí a wo énɛn, khɛ́n ágɛ tɛ́ yíbhwá sé wo khɛ́n wo eyé hɔ́n bhwe.

³⁰ Ɔ́n ne tɛ́ áphɔ ogbɔn Yankan Nánnánmi Créncré, mímí nbrɛn, Nánnánmi lókɔn abha hɔ́n phɔ nɔn ali Yankan yí abho trɛ hɔ́n tre, lónɔn élie lée ácí ka ábha sí, Yankan bha swa lo yɛn lo ne khúnbrɛn hrómɛn.

³¹ Tɛmɛ ɔ́n chán ábhwe hromɛnhá, áyí átɛ́ thɛ́nyan le ńthɛ́nyandó khúnbrɛn hrómɛn féne. Ágbo, ábhwelrɛ le abhurɛ yítɛ́ khúnbrɛn ɔ́nmɔn ochán hɔ́n thethé féne.

³² Lókhɛ́n áyɔn salé ápɔ́ le áyíbhwátɛ́ ɔ́nmɔn hrómɛn ɔ́n ní néphan bhwá sé hɔ́n bɛn nbrɛn, ɔ́n pɔ́ hɔ́n bɛn nbrɛn, ló tɛmɛ ɔ́n yɔ́ ne phɔ́ hɔ́n bɛn nbrɛn, sa lósi Krisi hɛ́n hrómɛn Yankan lɔ khɔ yɔ ne phɔ hɔ́n.