EFƐ́ZI KHÚBHƐ́NƐ́N 3 - Ebrié New Testament 1996

Phɔ́lu júmán ebhá lí sé néphan aleli Jwifunɛ́n

¹ Lóhɛ́nthé nɔn mɛn Phɔ́lu khɛ́n wo ka mɛn khúthé Jezwi-Krisi hɛ́n hrómɛn, hɔ́n khɛ́n ɔ́n ne li Jwifunɛ́n, hɔ́n nɔn mɛɛ́n na Yankan sé hɔ́n.

² Júmán Yankan khɔ mɛ́n yíbhwátɛ́ hrómɛn chɛ mɛn lée mɛn ní sé hɔ́n, ka ɔ́n ye lóbhwe tɛɛ.

³ Yankan phwan lóbhwe se mɛn, sa mɛn yɛ́n mɛ́n yí ńha tre kpɔ́thé anmán tɛ́. (Thénthé tɛɛ mɛn nrɛ lóbhwe fe ha hrɔ́ lókɔn mɛn tre

⁴ ló, ochɛ́sé lóka hɔ́n ekán, ɔ́n khɔ́ lóhrómɛn yɛ́n Krisi phɔ bhwe ahrɔman tre.)

⁵ Godo cí, wo le phwan lóbhwe se néphan, khɛ́n thénthé Yankan khɔ mɛ́n Nánnánmi hromɛn phwan lóbhwe se mɛ́n Krisi-mranchɛ́mán le mɛ́n bhwetɔ́trémán créncré ɔ́nmɔn.

⁶ Ábhwe ahrɔman tre nɔn ali salé: ochɛ néphan aleli Jwifunɛ́n lɔ gɛ ajayí lókɔn ali Ábhwe Bhwábhwá Yankan bho tre mɛ́n hwannɛ́n lé, sa wo khúnbrɛn wo bhá ágbe brɛ hromɛn, ló ábhwe Yankan khɔ Jezwi-Krisi phɔ tɔtre ɔn, wo lɔ, olí wo ékɛ.

⁷ Yankan pɔ́ hrómɛn nɔn, mɛn khɔ mɛɛ́n khwɛn Ábhwe Bhwábhwá hɛ́nmɛn nɛn. Ló mɛ́n sɛ́npɛ́ hrómɛn nɔn ńkhɔ mɛ́n yíbhwátɛ́ hrómɛn chɛ mɛn gɛ áyí lókɔn.

⁸ Mɛn ni lephan bhrií bha krethiɛnmán hrómɛn, lótɛ khɛ́n áphɔlíman mɛn, Yankan chɛ mɛn sa mɛn tɔ Ábhwe Bhwábhwá ali Krisi jayí sé néphan aleli Jwifunɛ́n.

⁹ Mɛn chɛ́ néphan oyɛ́n Yankan yí ahrɔman tre ebhá tɛ́. Lócí-áan, Yankan ali áyí khúnbrɛn tɛ́wo, hɔn lóyí hrɔman tre.

¹⁰ Ló ochɛ́sé thénthé, Yankan-gbemán hɛ́n hrómɛn, néphan ali athemánhɔn, le átho sɛ́npɛ́mán okhɔ́ áyítɛ́ yábhɛ yábhɛ khúnbrɛn hrómɛn yɛ́n Yankan bhweyɛ́n.

¹¹ Lósi yábhɛ a, Yankan khɔ lo Hwánthe Jezwi-Krisi phɔ tɛ, mɛ́n yí khúnbrɛn ńhamwanhɛ́n tre anmán tɛ́ e.

¹² Lo le mɛ́n ɔ́nmɔn lo li brɛ, mɛ́n bhú lo ebhui mímí hrómɛn nɔn, lo khɔ gɛ mɔ́nsi lo Yankan hɛ́nmɛn, ńmwasrui mɛn.

¹³ Lóhɛ́nthé nɔn, mɛɛ́n kranmán hɔ́n salé, áphɔ olé gbɔn hɔ́n, mɛn gbre khɛ́n mɛn ní sé hɔ́n hɛ́nthé: lógbrelí lókɔn áli nguhá khóo.

Krisi mɛ́n pɔ́

¹⁴ Lóhɛ́nthé, mɛn mɔ́ ntráhɛ́nlé Nthe hɛ́nmɛn,

¹⁵ mɛ́n nɔn ansé mándonɛ́n brɛ brɛ khúnbrɛn, wo khɛ́n wo bha átho, le wo wo bha áthéji ɔ́nmɔn hɛ́n, ńhɛ́n mímí ayɔn se wo lí.

¹⁶ Mɛɛ́n na Yankan salé, ankhɔ́ mɛ́n nguhá khóo hrómɛn chɛ́ hɔ́n khɔnmán phɔ, ɔ́n gɛ sɛ́npɛ́ achan mɛ́n Nánnánmi yé bhá hɔ́n hrómɛn,

¹⁷ ochɛ́sé mímíbhú hrómɛn, Krisi ochré hɔ́n thɛ́n hrómɛn. Mɛɛ́n na Yankan salé ɔ́n gɛlé kpɛ́ɛ́n chré ápɔ́ hrómɛn

¹⁸ ló hɔ́n le Yankan-gbemán khúnbrɛn ɔ́nmɔn, ɔ́n wúsi khɔ́ yɛ́n Krisi pɔ́ si akhɔ thubhɔ, ajwan, aban nkhóo, alo tho.

¹⁹ Krisi pɔ́, kasé yɛ́n olé gɛ yɛ́n símɛ́n cɛ́ɛ́ phú lɔ - hɔ́n-ɛ, ɔ́n yɛ́n mɛ́n pɔ́ – ochɛ́ hɔ́n yɛ́n áyí khúnbrɛn khɛ́n asimɛ́n bha Yankan hromɛn.

²⁰ Ńguhá ogɛ Yankan agɛ mɔ́nsi atɛ́ yí bánbrɛn lókhɛ́n lo esá, le lókhɛ́n lo ebhú lóphɔ hɛ́nphe ɔ́nmɔn, khɔ́ sɛ́npɛ́ elí júmán lo hromɛn,

²¹ tɛmɛ angɛ nguhá, Yankan-gbemán hrómɛn le Jezwi-Krisi hɛ́n hrómɛn, ácí khúnbrɛn le godo! Amɛn.