KHOLƆ́SU KHÚBHƐ́NƐ́N 4 - Ebrié New Testament 1996

¹ Hwánthemánhɔn, ɔ́n tɛ́ áyí ayɔn le ló ayali ɔ́nmɔn sé hɔ́n gangánmán. Tɛmɛ odi hɔ́n mwanhɛ́n salé, átho lóne, hɔ́n lɔ ɔ́n pɛ hɔ́n Hwánthe bɛn bháne.

Áha bhwe

² Áyɔn sa ńmɛ́nbrɛlí hrómɛn, ɔ́n na Yankan ákakhúnbrɛn, hɔ́n Yankan khɛ́n hɔ́n éla sɛ́npɛ́ mɛn ɔn, ɔ́n khɔ́ lóphɔ bhraya, ló ɔ́n nɛ nansi.

³ Ɔ́n na Yankan sé lo lɔ, ló Yankan owúsi khɔ́ chɛ́ lo tɔ mɛ́n phɔ bhwe, lo tɔ Krisi bhwe ahrɔman tre áka bhwábhwá mɛn. Lóbhwe lókɔn ahrɔman hɛ́nthé nɔn, ncɛ́n wo ka mɛn khúthé.

⁴ Ɔ́n na Yankan sé mɛn, ló mɛn wúsi khɔ́ tɔ lóbhwe, ló néphan oyé lóthé mwámwá, sa lósi ayɔn se mɛn khɔ́ ntɔ a.

⁵ Ɔ́n tɛ́ yíbhwá ábhweyɛ́n mɛn sé néphan aleli krethiɛn, ákakhúnbrɛn hrómɛn ɔ́n tɛ́ áyí ayɔn.

⁶ Ácí khúnbrɛn ɔ́n tɔ bhwe bhwá onimán néphan, lósi tɛɛ okhɔ́ tɔ bhwe bhwá sé lephan khúnbrɛn ɔn, lóyí nɔn ɔ́n tɛ́.

Phɔ́lu néphan ébhi aphuji

⁷ Thichikhi ali lo hɔnsɛ́n bhwá, kɛ́n ali mɛn mɔ́ndɔ́nmánwo, agɛlé ya lo Hwánthe júmánlí hrómɛn ɔn, ánman tɔ mɛn phɔ bhwe khúnbrɛn sé hɔ́n yé.

⁸ Lo si lo khɔ chre, mɛɛ́n nbrɛn mɛn chɛ lée anman tɔ lóbhwe sé hɔ́n yé, ló ɔ́n gɛ thɛ́nkhwálé.

⁹ Onezimɛn bha éje, mɛ́n lɔ ńni lo hɔnsɛ́n bhwá, alí mɛ́nbrɛ ali hɔ́n khúbhɛ́ lephan. Ló áyí khúnbrɛn khɛ́n etɛ́ krɛn, wo bhá kan hɔ́n lóphɔ hwan.

¹⁰ Arisitakhi khɛ́n wo ka mɛn le mɛ́n ɔ́nmɔn khúthé ébhi hɔ́n, Banabási mɛ́n hɔnsɛ́n ali Mákhi lɔ ébhi hɔ́n. (Ophrɛ tɔ Mákhi phɔ bhwe se hɔ́n ye: kasé ńma hɔ́n yé, ɔ́n do-e mwámwá.)

¹¹ Jezwi óche Juthúsi lɔ ébhi hɔ́n. Wo néphan bhwaliá lókɔn ɔn, wo dɔn brɛ tɛɛ nɔn wo li Jwifunɛ́n ajrɛn wo yítɛ́, khɛ́n agɛ mɛn ɔ́nmɔn elí júmán sé Yankan Bhringbi khúbhɛ́; wo lókɔn, wo tɛ phɔ khóo khwa mɛn lé.

¹² Ephafrazi ali hɔ́n khúbhɛ́ lephan lɔ ébhi hɔ́n; ńni Jezwi-Krisi nɛnkhwɛ́nwo bɛn éla Yankan sɛ́npɛ́ mɛn sé hɔ́n ákakhúnbrɛn, sa ɔ́n gɛlé kpɛ́ɛ́n, ɔ́n tɛ́sa néphan gbóngbo, nánnánmi yítɛ́ hrómɛn, ɔ́n mraya kábrɛ ló ɔ́n tɛ́ Yankan yí apɔ.

¹³ Mɛ́n phɔ bhwe mɛɛ́n gɛ tɔ sé hɔ́n nɔn ali sa: anní júmán khrákhrá sé hɔ́n, anní júmán sé Laodise khúbhɛ́nɛ́n, saji anní júmán sé Hierapholisi khúbhɛ́nɛ́n lɔ.

¹⁴ Lwikhi ali lo jɔ phɔtɛ́wo bhwá, le Demási ɔ́nmɔn lɔ ébhi hɔ́n.

¹⁵ Lo ébhi hɔnsɛ́nhɔn abha Laodise khúbhɛ́, le Nɛnfa le Yankan-gbemán khúnbrɛn khɛ́n ábhurɛhɛ́n mɛ́n bháthó.

¹⁶ Lóka ɔ́n kan áhrɔ́ lókɔn phu, tɛmɛ ɔ́n chɛ́ wo kán áhrɔ́ lókɔn sé Yankan-gbemán abha Laodise khúbhɛ́ lɔ. Ló áhrɔ́ wo bhá chán Laodise khúbhɛ́ thu hɔ́n, tɛmɛ hɔ́n nbrɛn lɔ ɔ́n kán.

¹⁷ Ɔ́n kranmán Achipe lée: “Hwánthe júmán abho ha hɛ mɔ́n mɛn lée ɛlí ɔn, tɛmɛ ɛhámwanhɛ́n lí mwámwá símɛ́n.”

¹⁸ Mɛɛ́n nbrɛn mɔ́n nɔn mɛn mo nrɛ áhrɔ́ lókɔn: Phɔ́lu ébhi hɔ́n. – Odi hɔ́n mwanhɛ́n salé mɛn ma khúthéká gɔn. Ló tɛmɛ Yankan phɔlíman obhá hɔ́n khúnbrɛn phɔ.