KHOLƆ́SU KHÚBHƐ́NƐ́N 3 - Ebrié New Testament 1996

¹ Hɔ́n le Krisi ɔ́nmɔn nɔn ɔ́n chan khúnɔn mɛn fe bha mɛpɔ́, lóhɛ́nthé, ɔ́n nɛn áyí abha átho, átho ali ási Krisi chre Yankan liémɔn si.

² Ɔ́n tɛ́ khékhremɛn nɛn áyí abha átho, ɔ́n ne nɛn áthéji yí.

³ Átɛsa ɔ́n khu, ló hɔ́n mɛpɔ́bhá khɔ Krisi phɔ hrɔman tre Yankan yé.

⁴ Krisi nɔn ali hɔ́n mɛpɔ́bhá mímí, mɛ́n ka ánman má, hɔ́n lɔ, ɔ́n ma thándi, ló ɔ́n ma gɛ ɔ́nmɔn bhá mɛ́n nguhá hrómɛn.

Ńmɛpɔ́bhá lɔ́lɔ́ le ńmɛpɔ́bhá pɔ́pɔ́

⁵ Áthéji yí khúnbrɛn abha hɔ́n phɔ ali: ágbakhrelí, áyítɛ́ phromɛn phromɛn, ńnánmí yí énɛn, áyí phromɛn ánimán lephan, le áyí phéphɔ ɔ́nmɔn (áyí phéphɔ lɔ tɛsa ńmola yí).

⁶ Lóyíléletɛ́ yábhɛ lókɔnhɔn hɛ́nthé Yankan bha do thɛ́nyan sé néphan abha lé dɛn ji.

⁷ Lóka hɔ́n etɛ́ lóyí yábhɛ lókɔn, ńne sɛ́npɛ́ srɛn hɔ́n.

⁸ Thénthé ɔ́n yɔ́ lóyí lókɔnhɔn khwá, lónɔn ali: ńthɛ́nyandó, ńthɛ́nyan le abhurɛ yítɛ́ ɔ́nmɔn. Ábhwe phromɛn brɛ ole chán hɔ́n míthé thándi.

⁹ Ɔ́n ne chí bhwe há hɔ́n bɛn nbrɛn tho, átɛsalé ɔ́n yɔ hɔ́n yítɛ́ nɔ́nɔ́ khwalé, ló hɔ́n nányé si akhɔ ha ɔn,

¹⁰ ájrɛn pɔ́pɔ́: átɛsa lephan pɔ́pɔ́ ékɛ a, ló ákakhúnbrɛn ákhɔ sa Yankan atɛ yí khúnbrɛn, ochɛ́sé anyɛ́n Yankan sí mwámwá.

¹¹ Ló áchɛ́se thénthé álepɛ néphan ali Jwifunɛ́n, khɛ́n dɔnbɛn-ɛ le li Jwifunɛ́n, dɔnbɛn olí néphan ajan khɛn, khɛ́n dɔnbɛn-ɛ olí néphan ale jan khɛn, dɔnbɛn olí néphan ayɛn bhwe, khɛ́n dɔnbɛn-ɛ olí gbwɛmán, dɔnbɛn olí gangánmán, khɛ́n dɔnbɛn-ɛ oli líhɛ, lée Krisi nɔn ali áyí khúnbrɛn, ló ńma lo khúnbrɛn phɔ.

¹² Ɔ́n ni Yankan-gbemán; néphan Yankan pɔ, Yankan san hɔ́n tre sa, ɔ́n ní mɛ́n néphan. Lóhɛ́nthé áyɔn sa ɔ́n tɛ́ yí ápɔ́ mɛ, ali nfɛkhu yítɛ́, áyíbhwátɛ́, pɛtɛtɛ́, ńthɛ́nnrwɛn, le ńthɛ́nnɔ́n ɔ́nmɔn.

¹³ Tɛmɛ ɔ́n dɔnmán hɔ́n bɛn nbrɛn mɔ́n, ló ɔ́n yɔ́ ne phɔ́ hɔ́n bɛn brɛn, lóka khúnbrɛn khɛ́n ɔ́n ma tɛ́ yíbɛn yan hɔ́n jɔn phɔ, lókhɛ́n énɛn salé lephan obhɔlíkɔn sé mɛ́n jɔ áyí nkɛ tɛ yan mɛ́n phɔ hɛ́nthé. Tɛmɛ ɔ́n yɔ́ ne phɔ́ hɔ́n bɛn nbrɛn sa lósi Hwánthe khɔ yɔ hɔ́n ne phɔ hɔ́n.

¹⁴ Khɛ́n áyí énɛn lée ɔ́n tɛ́ nɔn ali ápɔ́ ɔ́n ma pɛ, ápɔ́, nɔn ábha bhɔ hɔ́n ha sibrɛ kpɛ́ɛ́n.

¹⁵ Tɛmɛ Krisi oyalí hɔ́n thɛ́n, átɛsa Yankan san hɔ́n sa, anchɛ́ hɔ́n khúnbrɛn ɔ́n mɔha bhá ágbe brɛ hromɛn, ló ɔ́n tɛ́sa ńnánmí brɛ, ló ɔ́n nɛ nansi.

¹⁶ Tɛmɛ Krisi bhwetɔ́ le mɛ́n yíbhwátɛ́ obhá hɔ́n hrómɛn. Ɔ́n nie hɔ́n bɛn nbrɛn bhwe, ló ɔ́n ha hɔ́n bɛn nbrɛn ábhweyɛ́n hrómɛn. Ɔ́n khó nánmɛ hɔ́n thɛ́n khúnbrɛn hrómɛn lri Yankan hwa, ɔ́n khó Sómu nanmɛ le ńnánmɛ khɛ́n Nánnánmi nbrɛn lie hɔ́n.

¹⁷ Áyí khúnbrɛn tɛɛ ɔ́n ma tɛ́, le ábhwe khúnbrɛn tɛɛ ɔ́n ma tɔ ɔn, tɛmɛ ɔ́n tɛ́ lóyí khúnbrɛn lókɔn khɔ́ Hwánthe Jezwi hɛ́n hrómɛn, ló ɔ́n khɔ́ mɛ́n hɛ́n hrómɛn lá Nthe Yankan nansi.

Ńmɛpɔ́bhá pɔ́pɔ́ hrómɛn si okhɔ́ nɛnsi

¹⁸ Ńmie, ɔ́n ji hɔ́n cahɔn, ló áyí lókɔn, Hwánthe hɛ́nmɛn ayɔn sa ɔ́n tɛ́.

¹⁹ Ńsɛ, ɔ́n pɔ́ hɔ́n bhiahɔn, ló ɔ́n ne ha thɛ́nyan wo phɔ.

²⁰ Ńmiɔ́, áyí khúnbrɛn hrómɛn, tɛmɛ ɔ́n ji hɔ́n themánhɔn, ló áyí lókɔn, ápɔ Hwánthe mɛ, ló ánnɛn salé ɔ́n tɛ́.

²¹ Nthemánhɔn, ɔ́n ne tɛ́ thɛ́nyan ká hɔ́n miɔn hromɛn, khɛ́n ochɛ́sé wo gɛ áphɔgbɔ́n.

²² Gangánmán, ɔ́n ji hɔ́n hwánthemánhɔn abha áthéji krɛn, ole lí lóka wo ékpra hɔ́n pán khɛ́n ɔ́n tɛ́ lóyí, ló hɔ́n bhwe okhwá wo hɛ́nmɛn lé. Khɛ́n ɔ́n ji wo ńthɛ́nbhwá mɛn, ájí ɔ́n pɛ se Hwánthe hɛ́nthé.

²³ Júmán khúnbrɛn tɛɛ hɔ́n elí, ɔ́n ní hɔ́n thɛ́n khúnbrɛn mɛn, sa Hwánthe hɔ́n elí lójúmán se a. Khɛ́n ole le tɛ́sa lóka hɔ́n elí júmán sé néphanmiɔn ékɛ si ɔ́n khɔ́ tɛ́.

²⁴ Tɛmɛ odi hɔ́n mwanhɛ́n salé, Hwánthe bha sɔ́n hɔ́n lóphɔ pɛn: ló ajayí khɛ́n ńmo tre mɛ́n hwannɛ́n lé, hɔ́n lɔ ɔ́n ma gɛ. Átɛsalé Hwánthe mímí khɛ́n ali lephan hɔ́n elí júmán se ɔn, mɛ́n nɔn ńni Krisi.

²⁵ Khɛ́n lephan atɛ ne, mɛ́n ne yábhɛ ńtɛ, lópɛnsɔ́n nɔn ánman gɛ, átɛsalé Yankan le sómɛ bhɔ́ kwa, hɛ lephan yábhɛ ɛli hɛ́nthé.