KHOLƆ́SU KHÚBHƐ́NƐ́N 2 - Ebrié New Testament 1996

¹ Mɛɛ́n nɛn mɛn chɛ́ hɔ́n yɛ́n salé átha khɛ́n mɛn kú sé hɔ́n, áli átha bɛn ékhɔnman, mɛn kú lótha lókɔn sé wo khɛ́n wo bha Laodise khúbhɛ́, le wo khúnbrɛn khɛ́n wo le ka yɛn mɛn,

² ochɛ́sé wo thɛ́n okhwálé, wo bhá sibrɛ ápɔ́ hrómɛn, ló wo pɛ ábhweyɛ́n. Lónɔn wo bhá yɛ́n Yankan bhwethé ahrɔman tre. Ábhwe lókɔn, lónɔn ali Krisi mɛ́n bɛn nbrɛn:

³ ló Krisi lókɔn, mɛ́n yéne nɔn ajayí khúnbrɛn ali ábhweyɛ́n khóo, le áyíyɛ́n achan Yankan yé hrɔ́man tre.

⁴ Kasé mɛn khɔ nɛn mɛɛ́n tɔ bhwe sé hɔ́n, mɛn nɛn pɔ salé lephan bɛn okhɔ́ mɛ́n míthé líman mɛn tɔ bhwe bɛn khrɛ hɔ́n hɛ́nthé.

⁵ Kasé mɛn nɛn ma hɔ́n phɔ ńnánmí mɛn, nánnánmi mɛn-ɛ mɛn ma hɔ́n thethé, ló hɔ́n khúnbrɛn si ɔ́n khɔ gɛlé chre Krisi mímíbhú hrómɛn ɔn, áchɛ áphɔ ehá mɛn kábrɛ.

Ńmɛpɔ́bhá asimɛ́n khɛ́n lo gɛ Krisi phɔ

⁶ Lónian mɛn khɛ́n ɔ́n do Jezwi-Krisi sa hɔ́n Hwánthe ɔn, tɛmɛ ɔ́n nɛnsi khɔ́ mɛ́n yítɛ́ tho:

⁷ Ɔ́n gɛlé chré mɛ́n hrómɛn, ló hɔ́n mɛpɔ́bhá khúnbrɛn otré mɛ́n tho. Ácí khúnbrɛn hrómɛn, hɔ́n mímíbhú ogɛlé, sa lósi wo khɔ lie hɔ́n, ló ɔ́n ná Yankan nansi áphɔhá mɛn.

⁸ Tɛmɛ ɔ́n hámwanhɛ́n ya, ló néphan ole khɔ́ wo míthébhɔ́ wrɛ́ chɛ́chɛ́ alepɛ bhweyɛ́n lóhrómɛn tɔ bhwe khrɛ hɔ́n, wo bhwetɔ́ lókɔn khɛ́n ali ńkpakprá bhwe, achan néphanmiɔn sɛ́npɛ́ nɛ́bhɔ́ bhwetɔ́ wrɛ́ hrómɛn, lókhɛ́n ale chan Jezwi-Krisi yé.

⁹ Áyí khúnbrɛn abha Yankan phɔ, ásimɛ́n Jezwi-Krisi hromɛn,

¹⁰ ló hɔ́n le Jezwi-Krisi ɔ́nmɔn brɛ lókɔn ɔ́n ni, áchɛ́se hɔ́n lɔ ɔ́n gɛ lóyí khúnbrɛn simɛ́n. Jezwi-Krisi lókɔn, mɛ́n mɔ́n srɛn athemánhɔn le nánnánmi sɛ́npɛ́mánhɔn khúnbrɛn.

¹¹ Hɔ́n le mɛ́n ɔ́nmɔn brɛ lókɔn ɔ́n ni, áchɛ wo jan hɔ́n khɛn. Áleli néphanmiɔn si yábhɛ akhɔ́ jan khɛn, lókhɛ́n áli Krisi ékɛ yábhɛ, lóthé nɔn ali salé wo swa hɔ́n yɛn hɔ́n ne nánmí hrómɛn.

¹² Mímí nbrɛn, lóka wo ha hɔ́n nduhɛ́n, átɛsalé wo mrwɛn hɔ́n le Krisi ɔ́nmɔn, ló ɔ́n gɛ nkɛ ɔ́nmɔn chan khúnɔn mɛn lɔ fe, lósi akhɔ tɛ ɔn, Yankan sɛ́npɛ́ khɛ́n achɛ Jezwi-Krisi chan ákhúnɔn mɛn fe ɔn, ɔ́n mu mímí hɛ́nthé.

¹³ Lócí hɔ́n ne hɛ́nthé ɔ́n khu nánnánmi hromɛn, saji wo le jan hɔ́n khɛn hɛ́nthé, ɔ́n ni néphan ale yɛn Yankan. Khɛ́n thénthé Yankan khɔ Krisi phɔ chɛ hɔ́n cu bha mɛpɔ́, ló ńyɔ lo ne khúnbrɛn phɔ́ lo.

¹⁴ Ápɛn phromɛn abha lo phɔ, khɛ́n ásí lo ha lo tɛ́ yí ɔn, ńhɔn yɛn lo tho, ńhɔn chɛ ha áyábhletre phɔ, ló ńphu nɔ.

¹⁵ Nánnánmi phromɛnhɔn abha átho sɛ́npɛ́ apɛ, le wo dwasan ɔ́nmɔn ɔn, Yankan khɔ mɛ́n Bhi yábhletre phɔ chui lókhúnbrɛn yɛn, mɛ́n Bhi mɔ́n ka wo dɔndɔn tho, ló nkɛ khwɛn wo tihwɛlé sa khúthékámán se ápasá éwan.

¹⁶ Hɔ́n nɛn hɔ́n elí, le hɔ́n ndɛ hɔ́n enán, pɛ pɔ́pɔ́ alɛ jí óji, le saba yítɛ́ óji ɔ́nmɔn, ɔ́n ne chɛ́ néphan okhɔ́ lóphɔ tɔ bhwe sé hɔ́n.

¹⁷ Lókhúnbrɛn lókɔn áli áyí atre ebhá lónánphɔ. Lókhɛ́n ló ali mímí nɔn ali Krisi.

¹⁸ Lephan akhɔ́ nánmí wrɛ́ mɛn tɛ́ yí lie salé mɛ́n tɛ́ nfɛkhu, ála Yankan-mranchɛ́mán dɔndɔn, áyí álɛ́ lephan mɛ, lónɔn ali mɛ́n bhwe khrákhrá, ɔ́n ne se mɔ́nsi anmɔ́ hɔ́n pɔn, lephan yábhɛ lókɔn, anní nkhó, áyí wrɛ́ nɔn antɛ́ nánmí mɛn,

¹⁹ Krisi khɛ́n ali athe, ńnɛn mo mɛ́n nbrɛn ka nkɛ phɔ. Néphan khúnbrɛn tɛɛ agɛ Krisi ɔ́nmɔn librɛ, Krisi phɔlíman hromɛn nɔn wo gɛ áphɔkhɔ́nman. Wo le nkɛ ɔ́nmɔn wo librɛ kpɛ́ɛ́n, sa áphɔ nánmí kpɔ́kprɔmɛ́n si akhɔ́ bhrɛ wo jɔn pɛ, agɛlé, átɛ́ nkhóo, sa Yankan si akhɔ pɔ.

Lósi okhɔ gɛ Krisi ɔ́nmɔn khú, khɛ́n ócu gɛ ɔ́nmɔn bhá mɛpɔ́

²⁰ Ɔ́n gɛ Krisi ɔ́nmɔn khu, ló oswa hɔ́n yɛn áthéji nánmí yítɛ́ hrómɛn. Ló bítɛ khɛ́n ɔ́n cu hɔ́n etɛ́ yí sa néphan ali áthéji néphan ɛ? Bítɛ hɔ́n édɛn sé óha ábidí yábhɛ yábhɛ sé hɔ́n npɔ ɛ?

²¹ “Ɔ́n ne bhó yí lókɔn”, “Ɔ́n ne lí yí yábhɛ lókɔn”, “Ɔ́n ne pá lóyí lókɔn pɛ”?

²² Lóyíhɔn lókɔn, cíbɛn ebhá liá. Néphan aha lóbidíhɔn lókɔn, wo nɔn wo lie yí yábhɛ lókɔn.

²³ Khankhan mímí, ákhɔ yíbɛn apɛ bhweyɛ́n lóhrómɛn, átɛsa yankanla yíbɛn, lephan pɔ khɛ́n antɛ́, ápɛ nfɛkhu yítɛ́ lóhrómɛn, ló élie salé oléha nánmí bhwa. Lótɛ khɛ́n álepɛ áyíbhwá bɛn abha lóhrómɛn, lókhúnbrɛn lókɔn áchɛ́ lephan tɛ́ áyí anɔ́n nánmí mɛ.