KHOLƆ́SU KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Mɛn Phɔ́lu khɛ́n Yankan pɔ sa mɛn ní Jezwi-Krisi-mranchɛ́wo ɔn, mɛn le hɔnsɛ́n Thimote ɔ́nmɔn nɔn otɛ áhrɔ́ lókɔn.

² Hɔ́n khɛ́n ɔ́n ni Yankan-gbemán abha Kholɔ́su khúbhɛ́, ɔ́n ni lo hɔnsɛ́nhɔn alí mɛ́nbrɛ, abha Krisi phɔ: Tɛmɛ lo The Yankan osé hɔ́n áphɔlíman le ńthɛ́nkhwálé.

Phɔ́lu elá Yankan nansi

³ Ácí khúnbrɛn ka lo éla Yankan sé hɔ́n, lo lá Yankan nansi, mɛ́n nɔn ńni lo Hwánthe Jezwi-Krisi mɛ́n The.

⁴ Mímí nbrɛn, hɔ́n mímíbhú ɔ́n pɛ se Jezwi-Krisi le ápɔ́ ɔ́n pɛ se Yankan-gbemán, wo tɔ lóbhwe se lo ye.

⁵ Áyí Yankan bho tre hɔ́n lé átho, khɛ́n ɔ́n mo hɔ́n mwasrui tre lótho, Ábhwe Bhwábhwá ali ábhwe mímí ka adi hɔ́n yé, wo chɛ hɔ́n phrɛ yɛn lómwasrui asé lephan.

⁶ Ábhwe Bhwábhwá epí si khúnbrɛn, ló lóndubhɔ́ do áthéji, sa lósi akhɔ tɛ hɔ́n thethé, achan lócí brɛ khɛ́n otɔ Yankan phɔlíman bhwe se hɔ́n, ɔ́n yɛn lóndubhɔ́ lókɔn nbrɛn.

⁷ Ephafrazi abha lo phɔ elí júmán, mɛ́n nɔn ńnie hɔ́n lóbhwe lókɔn. Lo nɔn lo chɛ anní júmán, ńni Krisi nɛnkhwɛ́nwo bɛn agɛlé ya.

⁸ Ápɔ́ khɛ́n Nánnánmi bho se hɔ́n, ńtɔ lóbhwe se lo ye.

⁹ Lóhɛ́nthé nɔn achan lócí tɛɛ wo tɔ hɔ́n bhwe se lo ye ɔn, ákakhúnbrɛn lo éla Yankan sé hɔ́n. Lo, ékranmán Yankan lée mɛ́n thɛ́npɔ́ hrómɛn, ansé hɔ́n mɛ́n hɛ́nphebhú le ábhweyɛ́n Nánnánmi.

¹⁰ Lónɔn ábha chɛ́ hɔ́n tɛ́ áyí Hwánthe pɔ, ló ácí khúnbrɛn ɔ́n ma tɛ́ áyí álimɛn. Ɔ́n ma tɛ́ áyíbhwá yábhɛ yábhɛ khúnbrɛn, ló hɔ́n Yankanyɛ́n lɔ bha ló hɛ́nmɛn.

¹¹ Lo ébhi Yankan sa anchɛ́ mɛ́n nguhá sɛ́npɛ́ okhɔnmán hɔ́n phɔ, ochɛ́sé áyí khúnbrɛn hrómɛn, ɔ́n pɛ thɛ́nnɔ́n.

¹² Tɛmɛ ɔ́n khɔ́ áphɔhá hrómɛn lá Nthe Yankan nansi: átɛsalé áyí khɛ́n ńmo tre mɛ́n hwannɛ́n lé bhringbi khúbhɛ́ abha áyéfí hrómɛn ɔn, áyí lókɔn, hɔ́n lɔ ɔ́n ma lóhrómɛn.

¹³ Ńkhwɛn lo yɛn dubhlékhu sɛ́npɛ́ mɔ́n mɛn, ló mɛ́n Bhi khɛ́n ńpɔ, ńkhwɛn lo ha nkɛ bhringbi khúbhɛ́ hrómɛn,

¹⁴ ló mɛ́n Bhi lókɔn, ńkhɔ nkɛ phɔ swa lo yɛn áyíléletɛ́ hrómɛn, ló wo yɔ lo ne phɔ́ lo.

Krisi lephan ali, le mɛ́n júmán ńni

¹⁵ Yankan khɛ́n ali lephan óle gɛ wú mɛbhí mɛn, Krisi khɛ́n wo ewú, mɛ́n nɔn ńni lephan akhɔ nkɛ. Ló Krisi lókɔn, mɛ́n nɔn ńni kɔ́kɔ́ yípɔ asrɛn áyí khúnbrɛn Yankan tɛ.

¹⁶ Mɛ́n phɔ nɔn Yankan khɔ tɛ áyí khúnbrɛn abha átho le ló abha áthéji, ali áyí lo ewú mɛbhí mɛn, le ló óle wú, nánnánmi sɛ́npɛ́mánhɔn, wo khɛ́n wo mɔ́n srɛn áyí khúnbrɛn, néphan ali athemánhɔn le ńsɛ́npɛ́mán lɔ. Mɛ́n phɔ nɔn Yankan khɔ tɛ lóyí khúnbrɛn lókɔn, saji mɛ́n hɛ́nthé nɔn ńtɛ lóyí khúnbrɛn lókɔn.

¹⁷ Ńmáne khɛ́n áse áyí khúnbrɛn, mɛ́n phɔ nɔn áyí khúnbrɛn otɛ khɔ gɛlé tre wo si.

¹⁸ Mɛ́n nɔn ńni Yankan-gbemán khúnbrɛn wo hɛ́n, mɛ́n yé nɔn ńmɛpɔ́bhá bhɔhɛ́n, ńni kɔ́kɔ́ yípɔ, ló mɛ́n nɔn ńni lephan athwasi chan khúnɔn mɛn fe bha mɛpɔ́, áchɛ́se ńthwási áyí khúnbrɛn hrómɛn.

¹⁹ Átɛsalé Yankan pɔ sa mɛ́n nbrɛn mɛ́n chré mɛ́n Bhi hromɛn.

²⁰ Lóbrɛ tɛɛ, ńkhɔ mɛ́n Bhi phɔ chɛ áyí khúnbrɛn ńtɛ gɛ ɔ́nmɔn nrwɛn. Yankan khɔ mɛ́n Bhi khú hrómɛn chɛ lo gɛ thɛ́nkhwálé, ló ńchɛ áyí khúnbrɛn abha áthéji le ló abha átho gɛ ɔ́nmɔn nrwɛn.

²¹ Lócí ɔ́n ne bha Yankan phɔ, hɔ́n mwanhɛ́nbhu phromɛn phromɛn, le hɔ́n yíléletɛ́ hɛ́nthé, ɔ́n jrɛn mɛ́n mɛsamán.

²² Lókhɛ́n thénthé mɛ́n Bhi khú akhu mɛ́n nánmí mɛn hɛ́nthé, Yankan chɛ ɔ́n gɛ ɔ́nmɔn nrwɛn, ochɛ́sé lóka ɔ́n thándi ya mɛ́n hɛ́nmɛn, ɔ́n ní néphan atɛ créncré, néphan áphɔ chan, le néphan wo phɔ le pɛ áyíléle bhrií.

²³ Lótɛ khɛ́n, áyɔn se ɔ́n pɛ mímíbhú, ló ɔ́n gɛlé kpɛ́ɛ́n chré. Achan lóka wo tɔ Ábhwe Bhwábhwá se hɔ́n ye, ńmwasrui khɛ́n ɔ́n pɛ, ɔ́n ne yɔ lómwasrui lókɔn kalé. Ábhwe Bhwábhwá lókɔn, lónɔn wo tɔ se néphan khúnbrɛn abha áthéji, ló mɛn Phɔ́lu, lóbhwe Bhwábhwá lókɔn nɔn mɛɛ́n khwɛn lóhɛ́nmɛn nɛn.

Phɔ́lu júmán ebhá lí sé Yankan-gbemán

²⁴ Thénthé ágbre khɛ́n mɛn ní hɔ́n hɛ́nthé, etɛ́ phɔhá sé mɛn. Ágbre khɛ́n Krisi le gɛ li se Yankan-gbemán, ali mɛ́n phɔ nánmí, mɛn nɔn mɛn ní lógbre lókɔn nánmí mɛn tré lóphɛ́n mɛ́n.

²⁵ Mɛn jrɛn lephan ékhwɛn Yankan-gbemán hɛ́nmɛn nɛn, sa lósi Yankan khɔ hɔn lójúmán ha mɛn mɔ́n mɛn, salé mɛn ní sé hɔ́n a: ńchɛ mɛn salé mɛn tɔ mɛ́n phɔ bhwe khúnbrɛn sé hɔ́n yé,

²⁶ lóthé nɔn ali salé ábhwe khɛ́n lócí ńhɔn hrɔman néphanmiɔn khúnbrɛn hɛ́nmɛn ɔn, thénthé néphan ali mɛ́n néphan, ńhɔn phwan ka nkɔn hɛ́nmɛn.

²⁷ Átɛsalé áyí ali mɛ́n bhringbi yí, ali áyí ayɔn khɛ́n ńhɔn hrɔman tre ɔn, Yankan énɛn achɛ́ aféchwe khúnbrɛn oyɛ́n. Ábhwe lókɔn, lónɔn ali salé: Krisi bha hɔ́n phɔ, ló ánkranmán hɔ́n lée ɔ́n ma khɔ́ mɛ́n phɔ ká Yankan nguhá hrómɛn.

²⁸ Lóhɛ́nthé lo étɔ Krisi phɔ bhwe sé néphan khúnbrɛn, ló lo khɔ ábhweyɛ́n hrómɛn lo éha wo brɛ brɛ khúnbrɛn, lo élie wo brɛ brɛ khúnbrɛn yí, ochɛ́sé wo jrɛn néphan gbóngbo Krisi ɔ́nmɔn brɛlí hrómɛn.

²⁹ Lóhɛ́nthé nɔn mɛn ní júmán, ló Krisi sɛ́npɛ́ ase mɛn khɛ́n abha mɛn phɔ elí júmán, lósɛ́npɛ́ nɔn mɛn mo mɛn kútha.