2 TESALONÍKHI KHÚBHƐ́NƐ́N, 3 - Ebrié New Testament 1996

Tɛmɛ ɔ́n na Yankan sé lo

¹ Hɔnsɛ́nhɔn, tɛmɛ ɔ́n na Yankan sé lo, ló ochɛ́sé lo Hwánthe bhwetɔ́ odi ási khúnbrɛn, ló néphan khúnbrɛn oji ábhwe lókɔn, sa lósi lóyí khɔ tɛ hɔ́n thethé.

² Tɛmɛ ɔ́n na Yankan ló Yankan oswa lo yɛn néphan phromɛn phromɛn ali bhúrɛmán mɔ́n mɛn. Átɛsalé áleli lephan khúnbrɛn nɔn adɛn bhu Yankan mímí.

³ Lókhɛ́n lo Hwánthe li lephan alí mɛ́nbrɛ. Mɛ́n nbrɛn ánman khɔnmán hɔ́n phɔ, ló anman nɛ́n dɛn Abhúrɛwo mɔ́n ogalí hɔ́n.

⁴ Ló lo Hwánthe hɛ́n hrómɛn, lo bho lo mímíbhú tre hɔ́n tho: ńchɛ lo yɛn salé ábhwe lókɔn khɛ́n lo tɔ se hɔ́n ye, thénthé hɔ́n etɛ́ lóyí, ló hɔ́n ma tɛ́ lóyí ló hɛ́nmɛn.

⁵ Tɛmɛ lo Hwánthe osa hɔ́n thɛ́n tré Yankan pɔ́ tho, ansa hɔ́n thɛ́n tré ńthɛ́nnɔ́n tho, ńthɛ́nnɔ́n lókɔn khɛ́n Krisi ebhó sé néphan.

Áyɔn salé olí júmán

⁶ Hɔnsɛ́nhɔn, lo Hwánthe Jezwi-Krisi hɛ́n hrómɛn, lo ékranmán hɔ́n salé: lo hɔnsɛ́nhɔn khɛ́n abha ánán hrómɛn, khɛ́n ále dɛn ji ábhwetɔ́ lo bho se hɔ́n, tɛmɛ ɔ́n chán wo phɔ féne.

⁷ Hɔ́n bɛn nbrɛn ɔ́n yɛn lósi ɔ́n ma khɔ́ tɛ́ yí khɔ́ lo bhwetɔ́ tho. Átɛsalé lóka lo bha hɔ́n yé, lo le li nánmán.

⁸ Lo le khɔ khúmɛ́n khúmɛ́n sa nɛn li, lókhɛ́n lo li júmán áyí khu lo phɔ, lo li júmán ńcrɔ́n le mréci, ló ochɛ́sé hɔ́n hrómɛn, olépɛ lephan brɛ odo lo pɛ.

⁹ Lo yí lókɔn lo tɛ, áleli salé lo le gɛ mɔ́nsi lo bhi hɔ́n mɔ́ndɔ́nman, lókhɛ́n lo pɔ salé lo tɛ́ yíbɛn se ɔ́n wú, ló hɔ́n lɔ ɔ́n má ɔ́n tɛ́ lóyábhɛ brɛ.

¹⁰ Ló mímí nbrɛn, lóka lo bha hɔ́n yé, lo kranman hɔ́n lée: “Lephan kasé ɛle pɔ júmánlí, áleyɔn salé ɛlí nɛn lɔ.”

¹¹ Kasé lo khɔ nɛn lo étɔ bhwe sé hɔ́n, átɛsalé lo ye bhwe bɛn hɔ́n phɔ, lónɔn ali salé hɔ́n hrómɛn, néphan fe le pɔ salé átɛ́ yíɛkɛ. Wo yí wo tɛ́, lónɔn ali salé wo wá ká néphan nankhɛ bhwetɔ́ hrómɛn.

¹² Néphan lókɔn hɛ́nthé, lo Hwánthe Jezwi-Krisi hɛ́n hrómɛn, lo ékranmán hɔ́n lée: tɛmɛ ákakhúnbrɛn wo lí júmán, ló wo lí wo bɛn nbrɛn mɔ́n mɛn nɛn.

¹³ Lókhɛ́n hɔ́n lókɔn ɔ́n ni lo hɔnsɛ́nhɔn, áyíbhwátɛ́ hrómɛn, hɔ́n phɔ olé gbɔn.

¹⁴ Kasé lephan ɛ́le ji ábhwe lókɔn lo étɔ sé hɔ́n áhrɔ́ lókɔn hromɛn, tɛmɛ ɔ́n hɛ mwanhɛ́n, ɔ́n ne ló mɛ́n phɔ, ló ochɛ́sé hɛ́ndɛ okɛ mɛ.

¹⁵ Lókhɛ́n ɔ́n ne bho-e tɛ́ hɔ́n mɛsawo, tɛmɛ ɔ́n tɔ bhwe se sa lephan ali hɔ́n hɔnsɛ́n.

Phɔ́lu ébhi néphan, ló anmɔ́ nkɔn ndu

¹⁶ Tɛmɛ lo hwánthe khɛ́n asé néphan thɛ́nkhwálé mɛ́n bɛn nbrɛn ansé hɔ́n thɛ́nkhwálé ákakhúnbrɛn, ló ansé hɔ́n thɛ́nkhwálé áyí khúnbrɛn hrómɛn. Tɛmɛ lo Hwánthe ogɛ hɔ́n khúnbrɛn ɔ́nmɔn chré.

¹⁷ Mɛɛ́n bɛn nbrɛn mɔ́n nɔn mɛn mo nrɛ ábhwe lókɔn: Phɔ́lu ébhi néphan. – Nɛn lósi mɛn khɔ́ trɛ mɛn hrɔ́ tré; nɛn lósi mɛn khɔ́ tɛ́ mɛn hrɔ́.

¹⁸ Tɛmɛ lo Hwánthe Jezwi-Krisi phɔlíman obhá hɔ́n khúnbrɛn phɔ.