2 TESALONÍKHI KHÚBHƐ́NƐ́N, 1 - Ebrié New Testament 1996

Phɔ́lu ébhi néphan

¹ Lo khɛ́n lo tɛ áhrɔ́ lókɔn, lo nɔn lo li Phɔ́lu, Silási le Thimote. Lo tɛ áhrɔ́ lókɔn se Yankan-gbemán abha Tesaloníkhi khúbhɛ́, ló Yankan-gbemán lókɔn, wo nɔn wo li Yankan ali lo The le lo Hwánthe Jezwi-Krisi ɔ́nmɔn néphan:

² Tɛmɛ Yankan ali lo The, le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Ákwa wo bha bhɔ́, lóka Krisi bha sáji bhá

³ Hɔnsɛ́nhɔn, hɔ́n hɛ́nthé, áyɔn salé ákakhúnbrɛn lo lá Yankan nansi. Ló áyɔn salé lo tɛ́ áyí yábhɛ lókɔn, átɛsalé hɔ́n mímíbhú ethúbhɔ, ló hɔ́n brɛ brɛ khúnbrɛn, ápɔ́ khɛ́n ɔ́n pɛ se néphan nankhɛ, áli ápɔ́ bɛn ebhɔ́tho.

⁴ Lóhɛ́nthé Yankan-gbemán hrómɛn lo efúmɛ́n hɔ́n yítɛ́ phɔ, hɔ́n si ɔ́n khɔ gɛlé ya khɛ́n hɔ́n ebhú mímí ágbrelí le áyíkhúphɔ khúnbrɛn ɔ́nmɔn hrómɛn.

⁵ Áyí khúnbrɛn lókɔn atɛ, élie lo salé Yankan kwabhɔ́ ápriman, lónɔn ali salé hɔ́n khúnbrɛn lókɔn khɛ́n thénthé ɔ́n gɛ ágbrelí, ɔ́n ni néphan bɛn ógɛ do hɔ́n ká Yankan Bhringbi khúbhɛ́. Ló Yankan Bhringbi khúbhɛ́ lókɔn, lóhɛ́nthé nɔn áyí ekhú hɔ́n phɔ.

⁶ Mímí nbrɛn, Yankan bha tɛ́ áyí apriman sé néphan: ánman mó áyíkhúphɔ sé néphan echɛ́ áyí khú hɔ́n phɔ.

⁷ Ló ánman sé hɔ́n thɛ́nkhwálé, hɔ́n khɛ́n áyí ekhú hɔ́n phɔ le lo lɔ. Lóyí khúnbrɛn lókɔn bha tɛ́, lóka lo Hwánthe Jezwi bha chántho thándi, mɛ́n le mɛ́n Yankan-mranchɛ́mán sɛ́npɛ́mán abha mɛ́n phɔ.

⁸ Ánman sakhɔ́ átɛn khóo ethɔ́n hrómɛn má, néphan khɛ́n ale yɛn Yankan, lókhɛ́n ále dɛn ji lo Hwánthe Jezwi Bhwe Bhwábhwá, ánman tɛ́ yí dri wo phɔ.

⁹ Áyí ánman tɛ́ dri wo phɔ, lónɔn ali salé wo bhá liá ábha sé godo, wo bha lé bhá lo Hwánthe phɔ, wo bha lé bhá mɛ́n nguhá sɛ́npɛ́ hrómɛn.

¹⁰ Lóka ánman sáji má, lócí lókɔn, néphan khúnbrɛn khɛ́n ali mɛ́n néphan wo bhá bhó ájí se, ló néphan khúnbrɛn khɛ́n abhui mímí, wo bhá do-e mwámwá. Ló néphan khúnbrɛn lókɔn, hɔ́n lɔ ɔ́n ma bhá wo hromɛn, átɛsalé ábhwe khɛ́n lo tɔ se hɔ́n ye, ɔ́n mu mímí.

¹¹ Lóhɛ́nthé ákakhúnbrɛn lo éla Yankan sé hɔ́n. Lo ébhi Yankan salé ńmɛpɔ́bhá lókɔn khɛ́n lóhɛ́nthé ńche hɔ́n ma mɛ́n phɔ, mɛ́n bɛn nbrɛn anmó sé hɔ́n. Lo ébhi salé mɛ́n sɛ́npɛ́ hrómɛn áyí khúnbrɛn khɛ́n hɔ́n énɛn, ansé hɔ́n. Tɛmɛ anchɛ́ hɔ́n tɛ́ áyíbhwá, ló hɔ́n mímíbhú júmán lókɔn hɔ́n elí, mɛ́n nbrɛn anchɛ́ opriman.

¹² Lóyábhɛ nɛn, ɔ́n ma ji lo Hwánthe Jezwi hɛ́n ali, ló mɛ́n lɔ ánman ji hɔ́n. Áphɔlíman khɛ́n achan Yankan le lo Hwánthe Jezwi-Krisi ɔ́nmɔn yé, lóyí ebhá tɛ́ nɔn ali lókɔn.