2 PIƐ 3 - Ebrié New Testament 1996

Wo tɔlé lo Hwánthe bha sáji bhá

¹ Mɛn jɔn bhwá, mɛn hrɔ́ mɛn tɛ thu hɔ́n, ló esí ndɔn mɔn mɛn nɔn ali lókɔn. Ló áhrɔ́ mɔ́nmɔn lókɔn hromɛn, mɛɛ́n nɛn lósi mɛn khɔ́ hɔ́n nánnánmi hromɛn chɛ́ hɔ́n hɛ́nphebhú oli yíbɛn achan, ló mɛn tɛ́ ábhwe khúnbrɛn lókɔn odi hɔ́n mwanhɛ́n.

² Mɛɛ́n nɛn salé ábhwe khúnbrɛn khɛ́n lócí bhwetɔ́trémán créncré tɔ, tɛmɛ odi hɔ́n mwanhɛ́n, ńthé saji lo Hwánthe khɛ́n ali Dókáwo, mɛ́n bidí khɛ́n hɔ́n Krisi-mranchɛ́mán lie hɔ́n, ábidí lókɔn, tɛmɛ lóbhwe odi hɔ́n mwanhɛ́n.

³ Tɛmɛ ɔ́n yɛ́n salé ácí khɛ́n ábha phúji, ábha pɛ néphan khɛ́n ábha tɛ́ wo bɛn nbrɛn thɛ́n yí apɔ. Wo bhá ha hɔ́n lia

⁴ ló wo bhá tɔlé: “Wú ńnɛn phrɛ tɔlé mɛ́n man má? Ló thénthé bánne ńma ɛ? Lo themánhɔn khúnbrɛn khú phu, lótɛ khɛ́n áyí khúnbrɛn tre lómɔ́n le nta ɔ́nmɔn tɛɛ, sa lóka wo tɛ áthéji!”

⁵ Ábhwe khɛ́n wo wu bibi tɛ liali wo lónɔn ali salé: lócí Yankan tɔ bhwe, ló ńtɛ átho le áthé ɔ́nmɔn. Áyíta lókɔn ɔn, áchan ńdu hrómɛn, ló ńdu nɔn wo bho tɛ áyíta,

⁶ ló saji sithwámán khɛ́n godo Yankan lɔ wo, ńdu nɔn ńmo nɔ wo, lónɔn ali ńdu khóo lócí asi mrwɛn áthéji khúnbrɛn.

⁷ Lókhɛ́n átho le áthé ɔ́nmɔn lókɔn atre wo ewú, Yankan bhwetɔ́ míbrɛ lókɔn, lónɔn achɛ nɔn atre wo ewú. Yankan nɔn abo lókhúnbrɛn tre salé, cíbɛn, átɛn othɔ́n lókhúnbrɛn. Lóyábhɛ brɛ, átho le áthé ɔ́nmɔn lókɔn atre wo ewú, átre se ákwabhɔ́ cí, átre se lócí wo bhá lɔ bhúrɛmán khúnbrɛn phú.

⁸ Lókhɛ́n mɛn jɔn bhwá, ápɛ ábhwe bɛn bháne, ló ábhwe lókɔn áleyɔn sa olialí hɔ́n, lónɔn ali salé: lo Hwánthe yé, ácí míbrɛ, átɛsa ńpá akpɛn, ló ńpá akpɛn, átɛsa ácí míbrɛ.

⁹ Néphan fe bháne étɔlé lo Hwánthe mɛ́n bhwe ńphrɛ tɔtre, ále mɔ́n khɛ́n antɛ́ lóyí. Lókhɛ́n lo Hwánthe thɛ́n enɔ́n hɔ́n phɔ, átɛsalé mɛ́n, ńnɛn pɔ sa lephan brɛ oliá, lókhɛ́n ánnɛn salé néphan khúnbrɛn ochán wo yíléletɛ́ phɔ féne.

¹⁰ Lókhɛ́n lo Hwánthe cí ábha bhá, ábha tɛ́sa sídowo si akhɔ́ bhá. Lócí lókɔn lóka átho ebhá liá, átɔ́ khrákhrá bɛn bha dɛn, ló áyí khúnbrɛn khɛ́n ethɔ́ntɛn, ábha nɛ́n sa sawá ngbró, ló áyíta le áyí khúnbrɛn abha lóhrómɛn, ábha thɔ́n khóliɛ́.

¹¹ Ló áyí khúnbrɛn lókɔn atre wo ewú, átɛn bha thɔ́n lókhúnbrɛn lɔ phú. Lóhɛ́nthé, hɔ́n yítɛ́ hrómɛn, áyɔn salé ɔ́n há hɔ́n phɔ mwanhɛ́n! Áyɔn salé hɔ́n yítɛ́ otɛ́ créncré, ló ɔ́n wá gbalí Yankan,

¹² lóka ɔ́n ma chré bo Yankan cí ábha bhá, tɛmɛ ɔ́n tɛ́ khékhremɛn ló ácí lókɔn obhá gbraa – lócí lókɔn nɔn átɛn bha thɔ́n átho khóliɛ́. Lóka lókɔn nɔn áyí khúnbrɛn abha átho, ábha thɔ́ntɛn, ló ábha nɛ́n átɛn hromɛn sa sawá ngbró.

¹³ Lókhɛ́n Yankan phrɛ tɔlé mɛ́n man tɛ́ átho pɔ́pɔ́ le áthéji pɔ́pɔ́, lóne nɔn ali ási khɛ́n áyítɛ́ príman bha bhá, ló áyítɛ́ príman lókɔn, lónɔn ali áyí lo chre lo ébo.

¹⁴ Lókhɛ́n mɛn jɔn bhwá, lóka lo chre lo ébo ácí lókɔn, tɛmɛ ɔ́n tɛ́ khékhremɛn ló hɔ́n phɔ ochán, ló Yankan hɛ́nmɛn olépɛ ábhwe bhrií hɔ́n phɔ, ló hɔ́n le Yankan ɔ́nmɔn thethé onɔ́n.

¹⁵ Lo Hwánthe li lephan apɛ thɛ́nnɔ́n, ló áyɔn salé ɔ́n gbɛnɛ́n wú mɛ́n thɛ́nnɔ́n lókɔn khɛ́n ali áyíbɛn Yankan bha khɔ́ lóphɔ swa hɔ́n sa lo a. Lo hɔnsɛ́n Phɔ́lu ali lephan lo pɔ, Yankan se ábhweyɛ́n, ló mɛ́n lɔ ńphrɛ tɔ ábhwe lókɔn se hɔ́n ye mɛ́n hrɔ́ dɔndɔn ńtɛ hromɛn.

¹⁶ Ló Phɔ́lu mɛ́n hrɔ́ khúnbrɛn ńtɛ, lóhrómɛn ńtɔ ábhwe lókɔn. Mɛ́n hrɔ́ ńtɛ, lóhrómɛn ápɛ ábhwe fe ékhɔnman olé gɛ yé lóthé. Ló néphan fe khɛ́n ale yɛn bhwe, khɛ́n wo nánnánmi le gɛlé, wo hɔn ábhwetɔ́ lókɔn jrɛn sa lósi Yankan hrɔ́ hrómɛn, ási fe wo hɔn ábhwetɔ́ jrɛn. Ló néphan khɛ́n etɛ́ áyí yábhɛ lókɔn, wo echɛ́ wo nánnánmi liá.

¹⁷ Lókhɛ́n hɔ́n, mɛn jɔn bhwá, ábhwe lókɔn thénthé wo tɔ lóthé se hɔ́n ye. Tɛmɛ ɔ́n hámwanhɛ́n, ló néphan khɛ́n etɛ́ yí phromɛn phromɛn, wo lé khrɛ hɔ́n, ló hɔ́n si lókɔn khɛ́n thénthé ɔ́n gɛlé ya, ɔ́n ne chán lóne féne.

¹⁸ Lókhɛ́n lo Hwánthe Jezwi-Krisi ali lo Dókáwo, mɛ́n phɔlíman le mɛ́n bhweyɛ́n lókɔn khɛ́n ńmo se lo, lóhrómɛn ɔ́n nɛnsi ló hɛ́nmɛn ákakhúnbrɛn. Tɛmɛ ńguhá ogɛ Jezwi-Krisi, thénthé le ákakhúnbrɛn! Amɛn.