2 PIƐ 2 - Ebrié New Testament 1996

Yíliemán kpakprámán

¹ Godo cí, bhwetɔ́trémán kpakprámán thándi aféchwe hromɛn; lóyábhɛ brɛ, thénthé lɔ yíliemán kpakprámán bha thándi hɔ́n thethé. Ló áyí khɛ́n wo bhá khwɛ́n bhá ápasá hrómɛn, lónɔn ali wo yí wo bhá lie néphan nkpakprá mɛn, le áyílie khɛ́n álɔ lephan nánnánmi, ló lo Hwánthe lókɔn khɛ́n aswa wo, wo bhá hɔ́n-ɛn fɔ́nká bu; ló muswe khɛ́n wo bhá do há wo bɛn nbrɛn tho, lónɔn ali wo liá wo bhá liá.

² Wo yí sáka sakatɛ́ hrómɛn, néphan búdúbúdú bha gɛ wo thá, ló wo si wo khɔ wo énɛnsi, lóhɛ́nthé néphan bha tɔ bhwe phromɛn phromɛn sé Ásitó ali ábhwe mímí sitó.

³ Wo jɛtɛn mɛhɛ́ngɛ́ hrómɛn, wo yíliemán kpakprámán lókɔn, wo bhá sakhɔ́ wo nkpakprá bhwetɔ́ hrómɛn do néphan jɛtɛn. Lókhɛ́n thénthé lephan ebhá bhɔ́ wo kwa, ńha mwanhɛ́n ya, ló ákhakpɛɛ́ muswe bha bhú wo tho, ló wo khúnbrɛn wo bhá liá!

⁴ Átɛsalé Yankan le yɔ bhwe phɔ Yankan-mranchɛ́mán khɛ́n atɛ ne, ló Yankan-mranchɛ́mán lókɔn khɛ́n atɛ ne, Yankan khwɛn wo fɔnkhwa dubhlékhu hromɛn, ńdia wo wraká, ló wo bhá lóne kábrɛ kábrɛ ábha sé ákwabhɔ́ cí.

⁵ Yankan le yɔ bhwe phɔ áthéjinɛ́n khɛ́n godo athwasi, khɛ́n ńtɛ ńdu mrwɛn néphan khɛ́n ali bhúrɛmán. Ló néphan khɛ́n Yankan swa, wo nɔn wo li Noe le néphan nankhɛ ákhwache. Ló Noe lókɔn, mɛ́n nɔn ńni lephan étɔ áyítɛ́ príman bhwe.

⁶ Sodɔmɛn khúbhɛ́ le Gomɔ khúbhɛ́, Yankan bhɔ wo pɔn, ló ńmo átɛn nɔ ákhúbhɛ́ mɔn lókɔn. Ló áyí lókɔn ńtɛ, élie bhúrɛmán lóyí khɛ́n atre ebhá wo tɛ́.

⁷ Yankan do Lɔ́thu ka, Lɔ́thu lókɔn ńni lephan bhwá, ló mɛ́n cí tho, néphan lókɔn wo yí sáka saka wo etɛ́, áchɛ́sé mɛ́n phɔ gbɔn.

⁸ Átɛsalé lephan bhwábhwá lókɔn khɛ́n abha wo thethé, ákakhúnbrɛn anwú áyíléle yábhɛ yábhɛ lókɔn néphan etɛ́, édri phɔ mɛ́n thɛ́n hrómɛn.

⁹ Lóhɛ́nthé lo Hwánthe yɛn lósi ánman khɔ́ swa néphan abha mɛ́n phɔ yɛn ásúwú hrómɛn, ló saji néphan khɛ́n etɛ́ yíléle ánman khwɛ́n wo tré bo ákwabhɔ́ cí, ló ánman tɛ́ yí dri wo phɔ.

¹⁰ Ló néphan khɛ́n wo thɛ́n yí phromɛn phromɛn énɛn, asakhɔ ńnánmí hrómɛn, lókhɛ́n wo bháne wo etɛ́ lóyí, lo Hwánthe bha tɛ́ yí dri wo phɔ. Néphan khɛ́n élie yí nkpakprá mɛn lókhɛ́n mɛn tɔ wo bhwe se hɔ́n ye, wo li néphan bɛn wo khɔnmán hɛ́nmɛn tɛ́ yí, ló wo fúmɛ́n, wo le pɛ ájí se átho néphan abha nguhá hrómɛn, lókhɛ́n wó tɔ bhwe phromɛn phromɛn sé nkɔn.

¹¹ Ló Yankan-mranchɛ́mán bhwá nbrɛn khɛ́n ali néphan apɛ sɛ́npɛ́, khɛ́n ákhɔnman brɛn yíliemán kpakprámán lókɔn, wo bɛn nbrɛn lɔ, lo Hwánthe hɛ́nmɛn, wo lé gɛ tɔ bhwe phromɛn phromɛn sé néphan lókɔn abha nguhá hrómɛn.

¹² Lókhɛ́n yíliemán kpakprámán lókɔn, wo, áyí tɛɛ aka wo hɛ́nmɛn, lónɔn wo tɛ́, wo tɛsa ńbranmán abha bithe khɛ́n ehó miɔ́, okhwɛ́n wo, ló owɛ́n wo. Wo, kasé ábhwe khɛ́n wo lé yé lóthé, lónɔn wo tɔ bhwe phromɛn phromɛn se. Ló wo néphan lókɔn, wo bhá wɛ́n wo sa lósi okhɔ́ wɛ́n nbranmán abha bithe.

¹³ Ló wo yíliemán kpakprámán lókɔn, wo yí khɛ́n wo etɛ́ khú néphan phɔ, lóyí yábhɛ brɛ nɔn Yankan bha bhó sɔ́n wo pɛn. Wo-ɛ ńcrɔ́n mɛn gbée nɔn wo tɛ́ wo nánmí yí énɛn. Lóka hɔ́n elí nɛn khɛ́n wo bha lómɛ́n, átɛ́ néphan hɛ́ndɛ, ló ále limán wo. Lóka khɛ́n wo bha hɔ́n hrómɛn, lóka lókɔn wo tɛ́ yí yábhɛ yábhɛ khrɛ néphan.

¹⁴ Wo mɛbhí, ńmie gbakhreyá phɔ nɔn atre; wo kasé wo etɛ́ ne, ále yrɛ wo. Ló néphan khɛ́n wo nánnánmi enán, wo do nkɔn lo ká ńne hrómɛn. Jɛtɛn mɛhɛ́ngɛ́ bha wo thɛ́n hrómɛn, ló Yankan phiamɔ́n sé wo!

¹⁵ Wo chan ásitó ayali hromɛn féne, ló wo eliábu; Balamɛn sitó akhɔ lónɔn wo lɔ wo ekhɔ́. Balamɛn lókɔn, mɛ́n nɔn ńni Bɔsɔ mi, ló jɛtɛn ánman gɛ hɛ́nthé antɛ́ yíléle;

¹⁶ ló mɛ́n bhwe ńnɛn ji hɛ́nthé Yankan gbrɛ. Mímí nbrɛn, frímú bhie khɛ́n ńmɛ́n phúsi, bho lephanmi tɔ́ étɔ bhwe, ló bhwetɔ́tréwo lókɔn atɛsa lephan ńfan etɛ́, mɛ́n yí phromɛn phromɛn antɛ́, ájran ya.

¹⁷ Ló wo yíliemán kpakprámán lókɔn, wo tɛsa ádubhɛ khɛ́n aman, ló wo tɛsa yankan abhie ya tho khɛ́n ádúgran da ɔ́nmɔn élo; ási Yankan se wo, lónɔn ali dubhlékhu bhro khóo hrómɛn.

¹⁸ Wo li néphan bɛn wó tɔ bhwe phromɛn phromɛn mɛ́nfú mɛn, wo khɔ áthéji mɛnɔ́n hrómɛn wo ékhrɛ néphan, ló néphan khɛ́n wo ékhrɛ, wo li néphan khɛ́n alili chan áphɔkhrɛ yítɛ́ hrómɛn féne.

¹⁹ Wo kranman néphan lókɔn lée wo bhá sé nkɔn áfíkhwá, lókhɛ́n njɛ wo bɛn nbrɛn nɔn wo li áyínéne gangánmán, ló áyínéne lókɔn, lónɔn ebhá do ákhú sé wo – átɛsalé lephan brɛ, ɛli gangánwo se áyí khɛ́n apɛ hɛ.

²⁰ Ló mímí nbrɛn, néphan khɛ́n ayɛn lo Hwánthe Jezwi-Krisi ali Adókáwo, lókhɛ́n achan áthéji yínéne phɔ féne, ló kasé lómánji wo cu yɔ wo bɛn nbrɛn kalé se áthéji yínéne khúnbrɛn lókɔn, wo si thénthé wo bhá ya, ábha yan brɛn ásithwá ékɛ.

²¹ Ló néphan lókɔn, kasé wo le yɛn áyítɛ́ príman sitó lɔ, áyɔn brɛn lóka wo bhá yɛ́n ásitó lókɔn ali ábidí créncré Yankan bho se wo, lókhɛ́n wo bhá chán lóphɔ wá féne.

²² Ló néphan lókɔn, wo yí atɛ wo nɔn ali ábhwe bɛn yandran étɔ. Ló ábhwe lókɔn nɔn ali salé: “Gba cu saji lo elí ńnɛn khɛ́n mɛ́n bɛn nbrɛn ńkɔ khwa”, ló: “Gbróko khɛ́n wo go ndu, ńcu wa no ka ńpabhí hrómɛn.”