2 PIƐ 1 - Ebrié New Testament 1996

Piɛ ébhi néphan

¹ Mɛn hɛ́n li Simɔn Piɛ, mɛn nɔn mɛn tɛ áhrɔ́ lókɔn, mɛn ni Jezwi-Krisi nɛnkhwɛ́nwo, ló saji mɛn ni Krisi-mranchɛ́wo. Mɛn tɛ áhrɔ́ lókɔn se néphan khúnbrɛn agɛ mímíbhú khóo sa ló ékɛ yábhɛ lo gɛ. Mímíbhú lókɔn, áchan Yankan le Jezwi-Krisi lo Dókáwo ɔ́nmɔn júmán bhwá ali hromɛn:

² Tɛmɛ Yankan osé hɔ́n áphɔlíman le ńthɛ́nkhwálé ɔ́nmɔn othúbhɔ, ló Yankan si ɔ́n ma khɔ́ yɛ́n, le Jezwi ali lo Hwánthe ɔ́nmɔn si ɔ́n ma khɔ́ yɛ́n, lóphɔ nɔn Yankan bha khɔ́ bhó ndubhɔ́ khúnbrɛn lókɔn sé hɔ́n.

Yankan si akhɔ éche néphan, Yankan si akhɔ esán néphan

³ Yankan sɛ́npɛ́ ase lo Hwánthe, lónɔn ase lo áyí khúnbrɛn emián lo, lo mɛpɔ́bhá hrómɛn, lóka lo bha Yankan phɔ. Ló mɛ́n sɛ́npɛ́ lókɔn, lónɔn ase lo mɛpɔ́bhá, ló ádo lo bha ka mɛ́n nguhá le mɛ́n yíbhwátɛ́ ɔ́nmɔm hrómɛn.

⁴ Ábhwe khúnbrɛn lókɔn lóthé nɔn ali salé, lo khɛ́n lo li mímíbhúmán, Yankan bha sé lo ndubhɔ́ khóo lókɔn khɛ́n ńphrɛ tɔ lóbhwe tre lo lé. Ló ńdubhɔ́ lókɔn, lónɔn ali áyíbɛn ábha chɛ́ hɔ́n chán áthéji mɛnɔ́n phromɛn phromɛn phɔ féne, ló Yankan bha sé lo sɛ́npɛ́ lo bhá tɛ́ yí sa mɛ́n nbrɛn si ankhɔ́ tɛ́ yí.

⁵ Lóhɛ́nthé tɛmɛ ɔ́n tɛ́ khékhremɛn ló ɔ́n mó hɔ́n yíbhwátɛ́ ká hɔ́n mímíbhú phɔ, ló saji ɔ́n mó hɔ́n yíbhwátɛ́ ká hɔ́n Yankan yɛ́n phɔ.

⁶ Tɛmɛ ɔ́n mó hɔ́n Yankan yɛ́n ká hɔ́n khékhremɛn yítɛ́ phɔ, ɔ́n mó hɔ́n khékhremɛn yítɛ́ ká hɔ́n thɛ́nnɔ́n phɔ, ló tɛmɛ ɔ́n mó hɔ́n thɛ́nnɔ́n ká hɔ́n Yankan ɔ́n ma wá gbali phɔ.

⁷ Ló lómánji lóka ɔ́n ma wá gbalí Yankan, áyí ɔ́n ma bhó ká lóphɔ, lónɔn ali ńfɛkhuwú abha hɔnsɛ́nhɔn thethé, ló ńfɛkhuwú lókɔn, áyí ɔ́n ma bhó ká lóphɔ, lónɔn ali ápɔ́.

⁸ Áyíbhwá khɛ́n Yankan énɛn salé ɔ́n ma tɛ́ nɔn ali lókɔn. Ló áyíbhwá khúnbrɛn lókɔn, kasé ɔ́n gɛ áthúbhɔ, ábha sé hɔ́n sɛ́npɛ́, ló ábha chɛ́ hɔ́n yɛ́n lo Hwánthe Jezwi-Krisi bhɔ́tho.

⁹ Lókhɛ́n kasé lephan ɛle gɛ áyíbhwá khúnbrɛn lókɔn, ɛli lephan bɛn hɛ bhweyɛ́n cha, ɛtɛsa mɛphuwo bɛn, ló élialí hɛ salé hɛ ne khɛ́n lócí ɛtɛ, wo cho yɛn hɛ phɔ.

¹⁰ Lóhɛ́nthé mɛn hɔnsɛ́nhɔn, tɛmɛ ɔ́n cu tɛ́ khékhremɛn, ló Yankan ché lókɔn ache hɔ́n, le Yankan sán lókɔn asan hɔ́n, olí áyíbɛn atre ákakhúnbrɛn. Ló kasé hɔ́n etɛ́ áyí yábhɛ lókɔn, ɔ́n ma le hálé ńne hrómɛn.

¹¹ Lóyábhɛ nɛn, wo bhá sé hɔ́n mɔ́nsi ló ɔ́n ma ká Yankan Bhringbi khúbhɛ́ ali lo Hwánthe le lo Dókáwo Jezwi-Krisi ékɛ, khɛ́n ali áyí atre lóne godo.

¹² Lóyí khúnbrɛn lókɔn hɛ́nthé nɔn ákakhúnbrɛn, mɛɛ́n tɛ́ lóbhwe di hɔ́n mwanhɛ́n, lókhɛ́n léli salé ɔ́n ka ye ábhwe khúnbrɛn lókɔn áli ábhwe bɛn ɔ́n phrɛ ye, ló ɔ́n gɛlé ya ábhwe mímí hrómɛn.

¹³ Lókhɛ́n ábhwe lókɔn, áyɔn salé mɛn mɛpɔ́bhá hrómɛn, ákakhúnbrɛn mɛn tɛ́ di hɔ́n mwanhɛ́n, ló ɔ́n mraya.

¹⁴ Mɛn yɛn salé ákhakpɛɛ́, mɛn mán chán mɛn nánmí hrómɛn féne, sa lósi lo Hwánthe Jezwi-Krisi khɔ bho lie mɛn.

¹⁵ Ábhwe khúnbrɛn lókɔn, lóka mɛn mán khú, mɛn yɛn lósi mɛn mán khɔ́ tɛ́ khékhremɛn tɛ́ di hɔ́n mwanhɛ́n ákakhúnbrɛn.

Néphan khɛ́n awu Krisi nguhá

¹⁶ Ló mímí nbrɛn, lóka lo Hwánthe Jezwi-Krisi bha sáji bhá mɛ́n sɛ́npɛ́ hrómɛn, lóka lo étɔ lóbhwe lókɔn sé hɔ́n yé, lo le ya ńnɛ́bhɔ́ bhwetɔ́ tho, lo le ya néphanmiɔn hɛ́nphe ebhú tho tɔ bhwe: átɛsalé lo nbrɛn lo bho lo mɛbhí wu mɛ́n sɛ́npɛ́.

¹⁷ Lóka khɛ́n lo The Yankan bho ájí le ńguhá se lo Hwánthe Jezwi-Krisi, lo lɔ lo bha lómɛ́n. Lóka ńma mɛ́n nguhá khóo hrómɛn, Yankan ékrɛnmɛn lée: “Lephan lókɔn mɛ́n nɔn ńni mɛn Mi mɛn pɔ, ló mɛ́n tho nɔn mɛn mo mɛn thɛ́n khúnbrɛn tre.”

¹⁸ Lóka khɛ́n lo le mɛ́n ɔ́nmɔn lo bha ábhóbhó créncré tho, lo bɛn nbrɛn lo ye átɔ́ lókɔn achantho dɛn bha.

¹⁹ Lóbhwe khúnbrɛn lókɔn hɛ́nthé, lo bho lo mwasrui khúnbrɛn tre bhwetɔ́trémán bhwetɔ́ tho. Ló ábhwe lókɔn tɛmɛ ɔ́n há lóphɔ mwanhɛ́n, átɛsalé ábhwe lókɔn áli khanniɛn bɛn abha dubhlékhu hromɛn efí, ló ábha fí kábrɛ kábrɛ ábha sé ncíkhwɛ, ábha di lóka ńcíkhwɛ pɛmwe bha fí thándi hɔ́n thɛ́n hrómɛn.

²⁰ Lómánji, ábhwetɔ́ khúnbrɛn lókɔn, énɛn salé ɔ́n yé lóthé, lónɔn ali sa: ábhwe khúnbrɛn khɛ́n bhwetɔ́trémán tɔ abha Yankan hrɔ́ hrómɛn, álepɛ lephan khɛ́n mɛ́n bɛn nbrɛn ánman gɛ nɛ lóthé sé néphan yé.

²¹ Átɛsalé bhwetɔ́trémán bhwetɔ́ khúnbrɛn hrómɛn, álepɛ ábhwe brɛ achan lephanmi thɛ́npɔ́ hrómɛn, átɛsalé Nánnánmi Créncré nbrɛn nɔn éyalí néphanmiɔn, lónɔn wó gɛ tɔ ábhwe achan Yankan yé.