2 KHORƐ́NTHI KHÚBHƐ́NƐ́N 9 - Ebrié New Testament 1996

Ńmɔ́ndɔ́nman yí khɛ́n wo ebhó lo sé lo hɔnsɛ́nhɔn

¹ Áyí lókɔn khɛ́n wo ebhó thu Yankan-gbemán abha Jeruzalɛ́mɛn khúbhɛ́, lósi adi, ále nɛn salé mɛn tɛ́ lóphɔ hrɔ́ thu hɔ́n.

² Mɛn yɛn salé hɔ́n énɛn ɔ́n dɔnmán lo mɔ́n ábhwe lókɔn hromɛn, lóhɛ́nthé Masedwánɛn gotho, mɛn nri hɔ́n hwa néphan khúnbrɛn hɛ́nmɛn. Mɛn kranman wo lée: “Lo hɔnsɛ́nhɔn abha Akayi gotho, achan npijɔn pá-áan, wo bhraya wo énɛn wo dɔnmán lo mɔ́n.” Hɔ́n júmán si ɔ́n khɔ li áphɔhá mɛn, wo hromɛn, áse néphan búdúbúdú sɛ́npɛ́.

³ Lóhɛ́nthé nɔn mɛn chɛ néphan lókɔn ali lo hɔnsɛ́nhɔn olo gɛ hɔ́n, ochɛ́sé ńmɔ́ndɔ́nman lókɔn hɛ́nthé, ábhwe bhwá lo tɔ hɔ́n phɔ, olelí nkpakprá bhwe. Lósi mɛn khɔ tɔ hɔ́n phɔ bhwe se néphan abha Masedwánɛn gotho, tɛmɛ ɔ́n há mwanhɛ́n ya ábhwe lókɔn hɛ́nthé.

⁴ Ló, hɔnsɛ́nhɔn abha Masedwánɛn gotho, lóka wo bhá gɛ mɛn ɔ́nmɔn ló hɔ́n yé, lókhɛ́n wo bhá wú salé ɔ́n ka bɔn yí, ábha lí hɛ́ndɛ sé mɛn, átɛsalé mɛn phrɛ mo mɛn mwasrui khúnbrɛn tre hɔ́n tho. Lókhɛ́n mɛɛ́n kranmán hɔ́n, hɔ́n nbrɛn lɔ ábha lí hɛ́ndɛ sé hɔ́n!

⁵ Lóhɛ́nthé, áyɔn salé lo hɔnsɛ́nhɔn lókɔn othwási ló hɔ́n yé khɛ́n osé mɛn, ló áyí khɛ́n ɔ́n tɔtre salé ɔ́n ma bɔn, tɛmɛ lókhúnbrɛn obhurɛhɛ́n tré lókhɛ́n mɛn má. Lóyábhɛ nɛn ábha chɛ́ néphan yɛ́n salé áyí lókɔn hɔ́n ébɔn, áli áyíbɛn achan hɔ́n nbrɛn thɛ́n hrómɛn, lée nka áleli lephan bɛn nɔn esí hɔ́n ha ádwasan mɛn.

⁶ Tɛmɛ odi hɔ́n mwanhɛ́n salé lephan khɛ́n akhwɛn nyámí kpɛɛ́ éha mɛ́n gɔn, lephan lókɔn, mɛ́n lɔ ńyámí kpɛɛ́ nɔn ánman bwan, ló lephan khɛ́n ábha khwɛ́n nyámí búdúbúdú lo ha mɛ́n gɔn, lephan lókɔn mɛ́n lɔ, ńyámí búdúbúdú nɔn ánman bwan.

⁷ Lephan brɛ, hɛ thɛ́n hrómɛn, hɛ si ɛkhɔ bhu hɛ́nphe, lóne nɔn ɛkhɔ́ bhó yí sé Yankan, lókhɛ́n ole lí áphɔgbɔ́n hrómɛn, saji ole tɛ́sa lephan bɛn nɔn esí hɛ ha. Átɛsalé lephan khɛ́n ebhó yí sé Yankan áphɔhá mɛn, lephan lókɔn mɛ́n nɔn ńni lephan Yankan pɔ.

⁸ Yankan bha gɛ sé hɔ́n ndubhɔ́ yábhɛ yábhɛ khúnbrɛn ábha bánbrɛn áyí emián hɔ́n, ló ákakhúnbrɛn áyí emián hɔ́n ɔ́n ma gɛ, ɔ́n ma gɛ yí ábha cu bhɔ́tho, lónɔn ɔ́n ma bhó tɛ́ yíbhwá sé néphan.

⁹ Lóhɛ́nthé Yankan hrɔ́ étɔlé: “Ankhɔ́ ápɔ́ hrómɛn mó yí thúbhɔ sé gbremán, ló mɛ́n pɔ́ ńpɛ, átre lóne godo.”

¹⁰ Yankan lókɔn khɛ́n ábhó nyámí sé lephan ha mɛ́n gɔn, lókhɛ́n ásé lephan nɛnlí, mɛ́n míbrɛ nɔn ánman sé hɔ́n nyámí ɔ́n ma bhó ha hɔ́n gɔn, ló mɛ́n nɔn ánman chɛ́ nyámí lókɔn bha lé thándi tho. Lóyábhɛ brɛ, mɛ́n nɔn ánman chɛ́ hɔ́n pɔ́ abha hɔ́n thɛ́n hrómɛn, ábha sómí búdúbúdú.

¹¹ Yankan bha chɛ́ hɔ́n ní bhringbi ákakhúnbrɛn, ló hɔ́n yítɛ́ khúnbrɛn hrómɛn, ɔ́n ma pɛ ápɔ́ sé néphan. Ló áyí lókɔn ɔ́n mo se lo, lókhɛ́n lo ebhá bhó lo sé krethiɛnmán abha Jeruzalɛ́mɛn, lóhɛ́nthé néphan búdúbúdú bha khɔ́ lóphɔ lá Yankan nansi.

¹² Ló hɔ́n júmán lókɔn hɔ́n elí, áleli salé hɔ́n édɔnmán Yankan-gbemán mɔ́n, lópán áphu, lókhɛ́n áli júmán bɛn echɛ́ néphan búdúbúdú khɔ́ lóhrómɛn lá Yankan nansi.

¹³ Hɔ́n júmán lókɔn ɔ́n ni, lónɔn ábha chɛ́ wo yɛ́n hɔ́n néphan yábhɛ ɔ́n ni, hɔ́n si ɔ́n khɔ hɔ́n éji Krisi Bhwe Bhwábhwá lókɔn, lókhɛ́n hɔ́n ebhó lóphɔ bhwe tɔ sé néphan oyé, ábha chɛ́ krethiɛnmán abha Jeruzalɛ́mɛn, wo bhá bhó nguhá sé Yankan. Lómánji, hɔ́n si ɔ́n khɔ bho hɔ́n jɛtɛn pɔ wo ńthɛ́n bhwá mɛn, saji lósi ɔ́n khɔ bho jɛtɛn pɔ hɔ́n jɔn krethiɛnmán nánkhɛ ńthɛ́n bhwá mɛn, ábha chɛ́ wo lɔ, wo bhá bhó nguhá sé Yankan.

¹⁴ Áphɔlíman khóo lókɔn Yankan bho se hɔ́n, lóhɛ́nthé áchɛ́se wo pɔ hɔ́n, ló wo bhá la Yankan sé hɔ́n.

¹⁵ Tɛmɛ olá Yankan nansi, mɛ́n ndubhɔ́ khóo lókɔn ńmo se lo hɛ́nthé!