2 KHORƐ́NTHI KHÚBHƐ́NƐ́N 8 - Ebrié New Testament 1996

Ɔ́n mó yí pɔ́ néphan wɛ́-nwɛ́

¹ Mɛn hɔnsɛ́nhɔn, lo énɛn salé ɔ́n yɛ́n lósi yábhɛ Yankan khɔ bho mɛ́n phɔlíman li júmán se Yankan-gbemán abha Masedwánɛn gotho.

² Lo hɔnsɛ́nhɔn abha Masedwánɛn gotho, wo bha áyíkhúphɔ khóo hrómɛn, lótɛ khɛ́n wo elí phɔhá. Wo li néphan bɛn abha ámián khrákhrá hrómɛn, lókhɛ́n wo khɔ lóhrómɛn bho yí pɔ Yankan ápɔ́ hrómɛn.

³ Mɛɛ́n kranmán hɔ́n salé, wo mɔ́n yí ahɔn lónɔn wo bho se lo, lókhɛ́n wo se ábhɔ́tho, ló áli áyíbɛn achan wo nbrɛn thɛ́n hrómɛn,

⁴ wo nbrɛn nɔn wo bha bhi lo, ló wo tɛ khekhremɛn salé ńmɔ́ndɔ́nman lókɔn lo ebhó lo sé Yankan-gbemán abha Jude gotho, tɛmɛ wo lɔ wo mɔ́n obhá lóhrómɛn.

⁵ Lo ebhú salé wo tɛ yí ábhɔ́tho: ló athwasi wo bho wo bɛn nbrɛn se lo Hwánthe, lómánji, Yankan jí hrómɛn, lólɔ wo cu bho wo bɛn nbrɛn sé lo.

⁶ Hɔ́n thethé áyí lókɔn wo ébɔn, Thite nɔn ali lephan alili bhɔ júmán lókɔn hɛ́n, lóhɛ́nthé lo krɛnmɛn lée, júmán lókɔn áli ápɔ́ júmán, tɛmɛ anno dɔnmán hɔ́n mɔ́n, ló ɔ́n ní ophú.

⁷ Áyí khúnbrɛn hrómɛn, hɔ́n nɔn ɔ́n thwasi ya krethiɛnmán hɛ́nmɛn: hɔ́n mímíbhú hrómɛn, hɔ́n Yankan bhwetɔ́ hrómɛn, hɔ́n bhweyɛ́n hrómɛn, hɔ́n júmánlí sɛ́npɛ́ hrómɛn, le hɔ́n pɔ́ ɔ́n pɔ́ lo. Lóhɛ́nthé júmán lókɔn ali ápɔ́ júmán, lóhrómɛn lo énɛn salé ɔ́n pɛ ápɔ́.

⁸ Mɛn nɛn ha ábidí nse hɔ́n: lókhɛ́n Yankan-gbemán abha Masedwánɛn gotho, wo si wo khɔ li júmán sɛ́npɛ́ mɛn, mɛɛ́n nɛn mɛn khɔ́ lóphɔ chɛ́ hɔ́n lɔ ɔ́n tɛ́ lóyábhɛ brɛ, ló néphan oyɛ́n salé hɔ́n lɔ, ápɔ́ ɔ́n pɛ se Yankan, áli ápɔ́ mímí.

⁹ Ɔ́n yɛn áphɔlíman lókɔn lo Hwánthe Jezwi-Krisi bho bha se lo: lócí ńphrɛ ni bhringbi, lókhɛ́n hɔ́n hɛ́nthé, ńhɔn mɛɛ́n nbrɛn jrɛn gbrewo, ochɛ́sé ɔ́n khɔ́ mɛ́n gbre hromɛn lí bhringbi.

¹⁰ Ábhwe lókɔn hromɛn, mɛn ékɛ mɛn mú nɔn ali salé: áyí khɛ́n npijɔn pá ɔ́n mɔhɛ́n hɔ́n etɛ́, áyí lókɔn áyɔn sa ɔ́n tɛ́ ophú. Ábhwe lókɔn hromɛn, hɔ́n nɔn ɔ́n thwási tɛ yí, saji hɔ́n nɔn ɔ́n ni néphan ɔ́n phrɛ do ábhwe lókɔn.

¹¹ Tɛmɛ ɔ́n khɔnmán phɔ tɛ́ áyí lókɔn ophú. Lósi khɛ́n ɔ́n khɔ bhu lóphɔ hɛ́nphe áphɔfa mɛn, tɛmɛ ɔ́n khɔ́ áphɔfa mɛn tɛ́ lóyí lókɔn ophú, ló hɔ́n mɔ́n yí ahɔn, lónɔn ɔ́n mó lí júmán lókɔn.

¹² Átɛsalé kasé ɛbhó yí sé Yankan áphɔhá mɛn, Yankan bha do lóyí lókɔn, lóthé nɔn ali salé, kasé hɛ mɔ́n yí ahɔn ɛbho ɛsé Yankan, Yankan bha lé tɔlé áyí hɛ mɔ́n le hɔn, lónɔn ɛbhó se.

¹³ Áleli salé mɛɛ́n nɛn mɛn chɛ́ néphan nankhɛ phɔ okhwálé, ló mɛn hɔ́n nɔnkwá élwa the hɔ́n. Léliló, lónian mɛn khɛ́n thénthé hɔ́n mɔ́n mɛn yɔn, áyɔn salé néphan khɛ́n emián, ɔ́n dɔnmán wo mɔ́n.

¹⁴ Lóyábhɛ nɛn ábha chɛ́sé lóka hɔ́n emián lókhɛ́n wo mɔ́n mɛn yɔn, wo lɔ wo dɔnmán hɔ́n mɔ́n. Ochɛ́sé hɔ́n yí ɔ́n tɛ se wo, le wo yí wo bhá tɛ́ sé hɔ́n, lódɔn mɔ́nmɔn opriman.

¹⁵ Lóhɛ́nthé Yankan hrɔ́ étɔlé: “Ńnɛn lókɔn óche mánɛn, lephan khɛ́n égba ló búdúbúdú bhurɛhɛ́n mɛ́n lɔ anman nɛ́n gɛ yí mɔ́tho, saji lephan khɛ́n égba lókpɛɛ́ bhurɛhɛ́n, mɛ́n lɔ anman nɛ́n mián.”

Thite le mɛ́n gbemán

¹⁶ Lo elá Yankan nansi, átɛsalé mɛ́n nɔn ńchɛ ábhwe lókɔn elí Thite thɛ́n, sa lósi akhɔ elí lo khúnbrɛn thɛ́n a.

¹⁷ Lo bhwe lo bhi Thite, ńdɛn, ló ábhwe lókɔn eli thɛ́n, ló mɛ́n nbrɛn nɔn ńdɛn lée mɛ́n man nó hɔ́n yé.

¹⁸ Lephan lo san ka Thite phɔ ebhá, mɛ́n nɔn ńni lo hɔnsɛ́n lókɔn ali lephan alehɛ́n pi Yankan-gbemán khúnbrɛn hrómɛn, mɛ́n Bhwe Bhwábhwá lókɔn ántɔ sɛ́npɛ́ mɛn hɛ́nthé.

¹⁹ Lómánji, lephan lókɔn Yankan-gbemán khúnbrɛn nɔn asɛn sa áyí lókɔn wo ébɔn, lóka lo bhá bhó lo, mɛ́n lɔ anmá lo hromɛn. Ló áyí lókɔn lo ébɔn, áli áyíbɛn lo bhá khɔ́ lóphɔ bhó nguhá sé lo Hwánthe, saji lónɔn ábha chɛ́ néphan yɛ́n salé lo hɔnsɛ́nhɔn lókɔn abha ámián hrómɛn, lo lɔ lo énɛn lo dɔnmán wo mɔ́n.

²⁰ Áyí lókɔn wo ébɔn, lo ehámwanhɛ́n lóphɔ kábrɛ, lónɔn néphan bha lé wúsi khɔ́ sɔmɛ́n háne tɔ bhwe phromɛn phromɛn sé lo.

²¹ Áyíbhwá nɔn lo énɛn lo tɛ́, ló áleli lo Hwánthe míbrɛ hɛ́nmɛn pán, lókhɛ́n néphanmiɔn hɛ́nmɛn lɔ.

²² Ló néphan lókɔn ebhá, lo chɛ lo hɔnsɛ́n oká wo phɔ. Lo hɔnsɛ́n lókɔn ńni lephan bɛn lo su wu áyí khúnbrɛn hrómɛn, lókhɛ́n ńni lephan agɛlé ya ákakhúnbrɛn. Ló mɛ́n mwasrui ńmo tre hɔ́n tho hɛ́nthé, ńni lephan bɛn énɛn odɔnmán hɔ́n mɔ́n.

²³ Tɛmɛ odi hɔ́n mwanhɛ́n salé Thite nɔn ali lephan abha mɛn phɔ, ló mɛn le mɛ́n ɔ́nmɔn nɔn lo elí júmán sé hɔ́n. Krethiɛnmán lókɔn agɛ Thite ɔ́nmɔn ebhá, wo li néphan bɛn Yankan-gbemán dɔndɔn san ha mɛ́n phɔ, ló wo khɔ wo júmánlí hrómɛn wo ebhó nguhá sé Krisi.

²⁴ Ló néphan lókɔn ebhá, tɛmɛ ɔ́n tɛ́ yí lie wo salé ɔ́n pɔ wo. Ló Yankan-gbemán dɔndɔn khɛ́n achɛ wo ebhá, lóka wo bhá yé salé ɔ́n do wo mwámwá, wo bhá yɛ́n salé, lo mɛ́n lo efú hɔ́n phɔ, áli ábhwe mímí.