2 KHORƐ́NTHI KHÚBHƐ́NƐ́N 7 - Ebrié New Testament 1996

¹ Mɛn hɔnsɛ́nhɔn, lo hɛ́nthé nɔn Yankan tɔlé ánman tɛ́ áyí khúnbrɛn lókɔn. Ló áyí khúnbrɛn khɛ́n ábha chɛ́ lo nánmí le lo hɛ́nfan ɔ́nmɔn ká muswe hrómɛn, tɛmɛ lo chán lóphɔ féne. Áyɔn sa lo bhó lo mɛpɔ́bhá khúnbrɛn sé Yankan, ló lo yítɛ́ osakhɔ́ Yankan jí hrómɛn.

Áphɔ ehá Phɔ́lu

² Tɛmɛ ɔ́n phwan hɔ́n thɛ́n haphá kálé sé lo. Lo le tɛ lephan bɛn yíléle, lo le chɛ lephan lia, lo le li lephan dufle.

³ Ábhwe lókɔn mɛɛ́n tɔ, léli salé mɛɛ́n tɔ bhwe há hɔ́n tho. Mɛn phrɛ kranman hɔ́n lée lo pɔ hɔ́n banban. Lóhɛ́nthé, ákhú hrómɛn lɔ, ńmɛpɔ́bhá hrómɛn lɔ, álepɛ áyíbɛn ábha gɛ bhuri lo le hɔ́n ɔ́nmɔn.

⁴ Mɛn mo mɛn mwasrui khúnbrɛn tre hɔ́n tho, ló hɔ́n yítɛ́ élimán mɛn kábrɛ. Ágbrelí khúnbrɛn lókɔn lo gɛ, lóhrómɛn mɛn gɛlé ya, ló áphɔhá si mɛn thɛ́n hrómɛn.

⁵ Lóka lo di Masedwánɛn gotho lɔ lóyábhɛ brɛ, álepɛ áfíkhwá bhrií se lo, ágbrelí jekhali lo: lo le néphan nankhɛ ɔ́nmɔn lɔ ágbo, lókhɛ́n lo bha thɛ́nlí hrómɛn.

⁶ Lókhɛ́n néphan abha áphɔgbɔ́n hrómɛn, Yankan míbrɛ khɛ́n édɔnmán wo mɔ́n, mɛ́n míbrɛ nɔn ńdɔnman lo mɔ́n, lóka Thite bha gɛ lo.

⁷ Ló áleli sa Thite bha gɛ lo, lóhɛ́nthé nɔn áphɔ ehá lo, lókhɛ́n hɔ́n si ɔ́n khɔ dɔnmɛn mɔ́n mɛ́n júmánlí hrómɛn, mɛ́n nbrɛn ńnɛ lómɛ́n se lo ye. Lósi ɔ́n khɔ hɔ́n énɛn mɛn ɔ́n wú, hɔ́n phɔgbɔ́n ɔ́n gɛ, hɔ́n si ɔ́n khɔ bhraya hɔ́n énɛn ɔ́n do mɛn ká, ńnɛ lómɛ́n khúnbrɛn se lo ye. Lóhɛ́nthé nɔn achɛ áphɔ ehá mɛn kábrɛ.

⁸ Ló kasé áhrɔ́ lókɔn mɛn tɛ thu hɔ́n, áse hɔ́n áphɔgbɔ́n, mɛn-ɛ lóbhwe le khu mɛn phɔ. Lókhɛ́n lóbhwe akhu mɛn phɔ, lónɔn ali salé hɔ́n phɔgbɔ́n lókɔn ɔ́n gɛ mɛn hrɔ́ mɛn tɛ hɛ́nthé, áphɔgbɔ́n lókɔn, áli áphɔgbɔ́n bɛn ále mɔn khɛ́n áphu.

⁹ Ló thénthé áhrɔ́ lókɔn mɛn tɛ hɛ́nthé, áphɔ ehá mɛn. Ló – áleli sa áphɔgbɔ́n mɛn se hɔ́n hɛ́nthé, lókhɛ́n áphɔgbɔ́n lókɔn ɔ́n gɛ, áchɛ ɔ́n jrɛn hɔ́n yítɛ́. Yankan khɔ áphɔgbɔ́n lókɔn hromɛn li júmán, lóhɛ́nthé lo le tɛ hɔ́n yíléle bɛn áhrɔ́ lókɔn hromɛn.

¹⁰ Átɛsalé áphɔgbɔ́n khɛ́n achan Yankan yé, áli áyíbɛn áchɛ́ lephan yítɛ́ jrɛn, ló Yankan swa lephan, ló áphɔgbɔ́n yábhɛ lókɔn lóbhwe le gɛ khú lephan phɔ. Lókhɛ́n áphɔgbɔ́n achan áthéji, áli áphɔgbɔ́n bɛn ádo ákhú sé lephan.

¹¹ Tɛmɛ ɔ́n wú lósi yábhɛ Yankan khɔ hɔ́n phɔgbɔ́n hrómɛn li júmán se hɔ́n. Áphɔgbɔ́n lókɔn ɔ́n gɛ, áchɛ ɔ́n jrɛn néphan mímí, lónɔn achɛse hɔ́n étalí bhwe do hɔ́n bɛn nbrɛn ká. Ɔ́n tɛ yí se mɛn wu salé, ábhwe khúnbrɛn lókɔn, ɔ́n ne bha lóhrómɛn. Lónɔn ali hɔ́n thɛ́nyan hɔ́n édo ábhwe lókɔn hɛ́nthé, hɔ́n thɛ́n elí hɔ́n ábhwe lókɔn hɛ́nthé, lónɔn ali hɔ́n nɛ́n hɔ́n énɛn mɛn ɔ́n wú. Saji ábhwe lókɔn abha, ɔ́n hɔ́n lóbhwe pɛ, ló lephan khɛ́n atɛ mɛn yí yan, hɔ́n nbrɛn, ɔ́n do lóbhwe pɛ, ló ɔ́n tɛ yí dri phɔ.

¹² Ló kasé mɛn tɛ hrɔ́ lókɔn thu hɔ́n, áleli lephan lókɔn atɛ yí yan mɛ́n hɛ́nthé, saji áleli lephan khɛ́n wo tɛ yí yan mɛ́n hɛ́nthé nɔn mɛn tɛ hrɔ́ lókɔn, lókhɛ́n énɛn salé, Yankan hɛ́nmɛn, ɔ́n yɛ́n lósi yábhɛ ɔ́n khɔ bho hɔ́n thɛ́n tre lo tho.

¹³ Hɔ́n yí si ɔ́n khɔ tɛ, áchɛ́se lo thɛ́n khwalé. Ló áleli salé lo thɛ́n khwalé lópán áphu, lókhɛ́n lo cu gɛ áphɔhá khóo bɛn lo thɛ́n hrómɛn, lóka lo wu salé ɔ́n dɔnman Thite mɔ́n, ló ńgɛ áphɔhá.

¹⁴ Mɛn phrɛ tɔ hɔ́n phɔ bhwe bhwábhwá se Thite ye, ló hɔ́n lɔ, ɔ́n ne chɛ hɛ́ndɛ ka mɛn mɛ. Lósi yábhɛ brɛ khɛ́n ákakhúnbrɛn lo étɔ ábhwe mímí sé hɔ́n, lóyábhɛ brɛ, lóka lo lri hɔ́n hwa Thite hɛ́nmɛn, ábhwe lókɔn lo tɔ áli mímí.

¹⁵ Lóka Thite wu salé ɔ́n dɛn ji mɛ́n bhwe ńsránman, lókhɛ́n ɔ́n dɛn do-e mwámwá ákhúsó hrómɛn, ló áyí khúnbrɛn hɔ́n etɛ́, hɔ́n phɔ éfa, lóyábhɛ lókɔn áchɛ́se mɛ́n pɔ́ ńpɔ hɔ́n ábhɔ́tho.

¹⁶ Áphɔ ehá mɛn salé, áyí khúnbrɛn hrómɛn, thénthé mɛɛ́n gɛ mó mɛn mwasrui tré hɔ́n tho.