2 KHORƐ́NTHI KHÚBHƐ́NƐ́N 6 - Ebrié New Testament 1996

¹ Lo nɔn lo li néphan agɛ Yankan ɔ́nmɔn elí júmán, lóhɛ́nthé lo ékranmán hɔ́n lée Yankan phɔlíman lókɔn abho se hɔ́n, ɔ́n ne yɔ́ká oliá.

² Áhrɔ́ hrómɛn Yankan étɔlé: “Lóka mɛɛ́n gɛ wú hɛ nfɛkhu, mɛn wu hɛ nfɛkhu, ácí khɛ́n ali ácí mɛɛ́n gɛ swa hɛ, mɛn dɔnman hɛ mɔ́n.” Ló mɛɛ́n kranmán hɔ́n! ncɛ́n nɔn ali ácí Yankan bho ewú néphan nfɛkhu, ncɛ́n nɔn ali ácí Yankan bho édo néphan ká.

³ Néphan bhwe phromɛn phromɛn ábha tɔ lɔ lo phɔ hɛ́nthé, lo júmán hrómɛn, lo le tɛ yíbɛn khɛ́n ali áyíléle.

⁴ Lókhɛ́n lo khɔ lo yítɛ́ khúnbrɛn hrómɛn lie néphan salé lo li Yankan júmánmán. Lo khɔ thɛ́nnɔ́n hrómɛn li júmán, áyíkhúphɔ hromɛn, dandan le ábhwephé ɔ́nmɔn hrómɛn.

⁵ Wo chrwa lo, wo khwɛn lo ha khúthé, ápasá tɛ lo gbwɛyí, lo li júmán áyí brɛn lo mɔ́n, lo kɔ ná, lo la ko.

⁶ Lo khɔ lo yítɛ́ hrómɛn lie néphan khúnbrɛn salé lo li Yankan júmánmán lo thɛ́n chánchan hromɛn, lo bhweyɛ́n hrómɛn, lo thɛ́nnɔ́n hrómɛn, lo thɛ́nbhwá hrómɛn, Nánnánmi Créncré hrómɛn, lo pɔ́ hrómɛn,

⁷ lo bhwe mímítɔ́ hrómɛn le Yankan sɛ́npɛ́ hrómɛn. Lókhúnbrɛn hrómɛn, áyítɛ́ apriman nɔn ali dúgba abha lo liémɔn le lo mránkhu.

⁸ Néphan fe éha lo ngu, lókhɛ́n fe élɔ lo phɔ, néphan dɔnbɛn etá lo, lókhɛ́n fe élri lo hwa. Wo nkɛé lo elítan, lókhɛ́n njɛ ábhwe mímí nɔn lo étɔ,

⁹ lo tɛsa néphan ole yɛn, lókhɛ́n njɛ néphan khúnbrɛn yɛn lo phu, lo tɛsa néphan akhu, lókhɛ́n hɔ́n ewú, lo bha mɛpɔ́ ntɔ́nyán. Wo etɛ́ yí dri lo phɔ, lókhɛ́n wo lé gɛ wɛ́n lo,

¹⁰ wo echɛ́ lo phɔ gbɔn, lókhɛ́n ácí khúnbrɛn lo bha áphɔhá hrómɛn, lo tɛsa néphan ágbre ehɔ́n, lókhɛ́n néphan búdúbúdú khɔ lo phɔ li bhringbi, lo tɛsa néphan alepɛ yíɛkɛ, lókhɛ́n mímí nbrɛn, lo pɛ áyí khúnbrɛn simɛ́n.

¹¹ Khorɛ́nthi khúbhɛ́nɛ́n, lo phwan lo bhwethé khúnbrɛn se hɔ́n ye, lo phwan lo thɛ́n haphá kalé se hɔ́n.

¹² Léli lo nɔn lo hɔn lo thɛ́n hrómɛn bhwe hrɔman hɔ́n, lókhɛ́n hɔ́n nɔn ɔ́n hɔn hɔ́n thɛ́n hrómɛn bhwe hrɔman lo.

¹³ Mɛɛ́n tɔ bhwe ha hɔ́n sa mɛn miɔn: lo si lo khɔ pɔ hɔ́n, hɔ́n lɔ tɛmɛ ɔ́n pɔ́ lo yábhɛ nɛn, tɛmɛ ɔ́n phwan hɔ́n thɛ́n haphá kálé sé lo.

Áleyɔn sa ɔ́n gɛ néphan ále la Yankan ɔ́nmɔn thóbhɛ́

¹⁴ Ɔ́n ne gɛ néphan ále la Yankan ɔ́nmɔn nɛnsi, néphan yábhɛ lókɔn wo le li agbemán bɛn ayɔn se hɔ́n. Áyíbhwá le áyíléle ɔ́nmɔn lé gɛ bhá sibrɛ. Áyéfí le dubhlékhu ɔ́nmɔn lé gɛ bhá sibrɛ.

¹⁵ Krisi le logbo ɔ́nmɔn lé gɛ lí mɛ́nbrɛ. Lephan abhú Yankan mímí le lephan ále bhú Yankan mímí, wo mɛ́n lé gɛ lí brɛ.

¹⁶ Yankan-nkhú le ńfan ɔ́nmɔn lé gɛ bhá sibrɛ. Átɛsalé Yankan lókɔn abha mɛpɔ́, lo nɔn lo li mɛ́n nkhú. Mɛɛ́n bɛn nbrɛn ńphrɛ tɔlé: “Mɛn mán chré wo thethé, ló mɛn mán gɛ wo ɔ́nmɔn nɛnsi, mɛn mán ní wo Yankan, ló wo bhá lí mɛn néphan.”

¹⁷ Lóhɛ́nthé lo Hwánthe étɔlé: “Néphan lókɔn, tɛmɛ ɔ́n chán wo phɔ féne, ɔ́n ne ló wo phɔ. Áyí lóphɔ le chan, ɔ́n ne ló lóphɔ, ló mɛɛ́n nbrɛn mɛn mán do hɔ́n má mɛn phɔ.

¹⁸ Lo Hwánthe sɛ́npɛ́wo étɔlé: Mɛn mán ní hɔ́n The ló ɔ́n ma lí mɛn miɔnsɛ le mɛn miɔnmie.”