2 KHORƐ́NTHI KHÚBHƐ́NƐ́N 5 - Ebrié New Testament 1996

¹ Lo yɛn salé ádɛgɔn-nkhú lókɔn lo bha lóhrómɛn – ali lo phɔ nánmí – lóka wo bhá ca khwá, átho lóne Yankan bha sé lo nkhú bɛn lo bhá chré lóhrómɛn, ńkhú bɛn mɛ́n nbrɛn ńthan, ali ńkhú bɛn ábha tré lóne godo.

² Lóka lo bha áthéji nánmí hrómɛn ntɔ́nyán, áyí ekhú lo phɔ, ló lo épan kranmɛn, lo énɛn átho nánmí obha ká lo phɔ.

³ Lo énɛn salé ńnánmí pɔ́pɔ́ obha mrwɛn lo, ló lo lé ya ndígban.

⁴ Lóka lo bha áthéji dɛgɔn-nkhú hrómɛn, lo bha áyíkhúphɔ hromɛn, lókhɛ́n áleli sa lo bhá chán áthéji nánmí hrómɛn féne, lókhɛ́n lo yí lo énɛn, lónɔn ali sa átho nánmí obha mrwɛn lo, ló ochɛ́sé ńmɛpɔ́bhá ohɔ́n lo nánmí jrɛn, lo nánmí lókɔn khɛ́n ali áyíbɛn cíbɛn ábha khú.

⁵ Yankan nbrɛn nɔn atɛ lo salé lo jrɛn yábhɛ nɛn, ló ńmo mɛ́n Nánnánmi se lo, lónɔn ali áyí ńníli tɛ thwasi, ló élie lo salé mɛ́n mwá lókɔn ńmo tre lo lé, ánman tɛ́ lóyí khúnbrɛn símɛ́n sé lo.

⁶ Ló ákakhúnbrɛn lo phɔ bha lé gbɔn. Lo yɛn salé, lóka lo bha mɛpɔ́ ńnánmí hrómɛn ntɔ́nyán, élie salé lo le ka gbali lo Hwánthe bháthó.

⁷ – Mímíbhú hrómɛn nɔn lo khɔ lo énɛnsi, khɛ́n áleli lo mɛbhí yí ewú hɛ́nthé.

⁸ Lo phɔ bha lé gbɔn, lo énɛn lo chán ńnánmí hrómɛn féne, ló lo lo gɛ lo Hwánthe ɔ́nmɔn chré.

⁹ Lókhɛ́n lo yí lo énɛn, lónɔn ali sa, lo tɛ́ yí opɔ́ lo Hwánthe mɛ, lóka lo bha mɛpɔ́ ńnánmí hrómɛn, le lóka lo bhá chán ńnánmí hrómɛn féne.

¹⁰ Átɛsalé lo khúnbrɛn lo bhá ya Krisi kwabhɔ́ hɛ́nmɛn, ló ánman mɔ́ lo kwa, lephan brɛ hɛ yí ɛtɛ lóka ɛbha mɛpɔ́, khɔ ńmwá o, khɔ ńne o, ɛ́bha gɛ lópɛnsɔ́n.

Lo khɔ Krisi phɔ gɛ Yankan ɔ́nmɔn nrwɛn

¹¹ Lo, lo yɛn lósi okhɔ́ só lo Hwánthe. Lóhɛ́nthé lo ékranmán néphan khúnbrɛn lée, lo bhwe lókɔn lo étɔ áli ábhwe mímí. Yankan yɛn lo phɔ bhwe khúnbrɛn phu, ló mɛn mú salé hɔ́n lɔ, hɔ́n thɛ́n hrómɛn ɔ́n yɛn mɛn lephan yábhɛ mɛn ni.

¹² Léli salé lo etɛ́ khékhremɛn, ló ɔ́n wúsi khɔ́ do lo mwámwá. Léliló, lo yí lo énɛn lo tɛ́, lónɔn ali sa lo yítɛ́ hrómɛn, lo bhá chɛ́ hɔ́n hɛ́nmɛn chranman, ló ɔ́n ma lri lo hwa. Lóyábhɛ nɛn ábha chɛ́sé ɔ́n ma gɛ tɔ bhwe sé néphan efúmɛ́n wo mɛbhí yí ewú lephan phɔ, lókhɛ́n lóyí lókɔn, áleli áyíbɛn achan lephan thɛ́n hrómɛn.

¹³ Kasé mímí nbrɛn ńfan etɛ́ lo, Yankan hɛ́nthé nɔn ńfan etɛ́ lo, lókhɛ́n kasé ńfan le tɛ lo, hɔ́n hɛ́nthé nɔn ńfan le tɛ lo.

¹⁴ Krisi pɔ́ apɔ lo, lósɛ́npɛ́ ésrɛn lo, lo khúnbrɛn lókɔn khɛ́n lo yɛn salé kasé lephan míbrɛ khu se ápasá, átɛsalé lephan khúnbrɛn nɔn akhu.

¹⁵ Krisi khu se lephan khúnbrɛn, ochɛ́sé néphan khɛ́n abha mɛpɔ́, wo lé cu bhá mɛpɔ́ sé wo bɛn nbrɛn, lókhɛ́n wo bhá mɛpɔ́ sé Krisi. Átɛsalé wo hɛ́nthé nɔn Krisi khu, ló Yankan hɔn-ɛn chan khúnɔn mɛn fe.

¹⁶ Achan ncɛ́n élo, lo bha lé cu bhɔ́ lephanmi kwa áthéji nánmi hrómɛn. Kasé khɛ́n lócí lo phrɛ bhɔ Krisi kwa áthéji nánmi hrómɛn, thénthé lo bha lé cu bhɔ́ Krisi kwa yábhɛ nɛn npɔhɔ́n.

¹⁷ Lephan kasé ɛbha Krisi phɔ, hɛ lephan lókɔn ɛjrɛn lephan pɔ́pɔ́. Áyí lɔ́lɔ́ bhá hɛn, ló thénthé áyí pɔ́pɔ́ nɔn athandi.

¹⁸ Áyí khúnbrɛn lókɔn Yankan nɔn atɛ se lo. Mɛ́n nɔn ńkhɔ Krisi phɔ gɛ lo ɔ́nmɔn nrwɛn, ló ńmo júmán ha lo mɔ́n mɛn salé lo do néphan nankhɛ lɔ obha gɛ ɔ́nmɔn nrwɛn.

¹⁹ Lo bhwe lo étɔ sé néphan oyé, lónɔn ali salé Yankan khɔ Krisi phɔ gɛ néphan khúnbrɛn ɔ́nmɔn nrwɛn. Yankan yɔ wo ne phɔ́ wo, ló mɛ́n nkɛé lo tɔ Ábhwe Bhwábhwá lókɔn sé néphan khúnbrɛn oyé.

²⁰ Krisi hɛ́n hrómɛn nɔn lo khɔ lo étɔ bhwe sé hɔ́n, ló lo phɔ nɔn Yankan khɔ elúkhwɛ́ che hɔ́n. Krisi hɛ́n hrómɛn, lo éla hɔ́n, tɛmɛ ɔ́n gɛ Yankan ɔ́nmɔn nrwɛn.

²¹ Krisi li lephan bɛn mɛ́n phɔ, álepɛ ne, lókhɛ́n Yankan hɔn lo ne nɔnkwá the, ochɛ́sé lóka lo bha Krisi phɔ, lo yítɛ́ oprimán Yankan hɛ́nmɛn.