2 KHORƐ́NTHI KHÚBHƐ́NƐ́N 4 - Ebrié New Testament 1996

Apan khɛ́n nánnánmi jayí bha lóhrómɛn

¹ Yankan yɔn banban, lónɔn achɛ ńmo júmán lókɔn ha lo mɔ́n mɛn, lóhɛ́nthé lo phɔ bha lé gbɔn.

² Áyí ali hɛ́ndɛ yí khɛ́n lo hrɔman tɛ, thénthé lo khwɛn lókhúnbrɛn fɔnkhwa bu. Lónɔn ali sa: lo lé khrɛ lephan, saji lo le hɔ́n Yankan bhwetɔ́ jrɛn áyí nánkhɛ, lókhɛ́n ábhwe mímí hrómɛn, Yankan hɛ́nmɛn, lo etɛ́ khékhremɛn tɛ́ yí opɔ́ lephan khúnbrɛn mɛ.

³ Ló kasé Ábhwe Bhwábhwá lókɔn lo étɔ, néphan fe le gɛ yé lóthé, wo néphan lókɔn, wo li néphan bɛn alia wo yíléletɛ́ hrómɛn.

⁴ Ábhwe Bhwábhwá lókɔn lo étɔ, néphan lókɔn le bhú mímí, átɛsalé áthéji Yankan phromɛn phromɛn wo éla, áphu wo bhweyɛ́n, áchɛ́se wo lé gɛ wú áyéfí khɛ́n Ábhwe Bhwábhwá bho thandi, ali Krisi nguhá phɔ bhwe, Krisi lókɔn khɛ́n ali Yankan mɛ́n bɛn nbrɛn.

⁵ Áleli lo bɛn nbrɛn hɛ́nthé nɔn lo étɔ Yankan bhwe, lókhɛ́n Jezwi-Krisi ali lo Hwánthe, mɛ́n phɔ bhwe nɔn lo étɔ, ló mɛ́n hɛ́nthé nɔn lo li hɔ́n júmánmán.

⁶ Yankan lókɔn khɛ́n lócí atɔlé: “Tɛmɛ áyé ofí ká dubhlékhu hromɛn!” mɛ́n Yankan míbrɛ nɔn ńmo áyéfí ka lo thɛ́n hrómɛn, ló lo yɛ́n salé Yankan nguhá lókɔn lo ewú, lóbrɛ nɔn abha Krisi hɛ́nmɛn efí.

⁷ Lo nɔn lo li apan wo bho aji than, lókhɛ́n wo khwɛn ajayí ali nánnánmi jayí ha lóhrómɛn, ochɛ́sé néphan oyɛ́n salé ńsɛ́npɛ́ khɛ́n wo bho tɛ áyí yábhɛ lókɔn, áchan Yankan yé, lée ále chan lo yé.

⁸ Ákakhúnbrɛn lo bha áyíkhúphɔ hromɛn, lókhɛ́n áleli sa áyí brɛn lo mɔ́n, lo bha dandan hromɛn, lókhɛ́n áleli sa lo phɔ bha gbɔn,

⁹ wo élri lo gbre lókhɛ́n Yankan le yɔ lo kalé, wo hɔn lo ku halé áyítathé, lókhɛ́n wo le gɛ wɛn lo.

¹⁰ Ákakhúnbrɛn Jezwi khú bha lo nánmí hrómɛn, lónɔn élie salé mímí nbrɛn mɛ́n mɛpɔ́bhá lɔ bha lo nánmí hrómɛn.

¹¹ Lo mɛpɔ́bhá hrómɛn, ákakhúnbrɛn Jezwi hɛ́nthé lo bha ákhú hrómɛn, ochɛ́sé néphan okhɔ́ lo phɔ nánmí hrómɛn wú salé mímí nbrɛn Jezwi bha mɛpɔ́.

¹² Lóthé nɔn ali salé ákhú bha lo phɔ elí júmán, lókhɛ́n ńmɛpɔ́bhá lɔ bha hɔ́n phɔ elí júmán.

¹³ Yankan hrɔ́ étɔlé: “Mɛn mu Yankan mímí lóhɛ́nthé nɔn mɛɛ́n tɔ Yankan bhwe sé néphan yé.” Lo lɔ lo bhu Yankan mímí yábhɛ nɛn, lóhɛ́nthé nɔn lo étɔ Ábhwe Bhwábhwá lókɔn.

¹⁴ Lo yɛn salé Yankan chɛ lo Hwánthe Jezwi chan khúnɔn mɛn fe, saji lo yɛn salé lo lɔ ánman chɛ́ lo chán khúnɔn mɛn fe, sa lósi ńkhɔ chɛ Jezwi chan khúnɔn mɛn fe, ló ánman do lo le hɔ́n ɔ́nmɔn há phɔ nó Jezwi hɛ́nmɛn.

¹⁵ Hɔ́n hɛ́nthé nɔn áyí khúnbrɛn lókɔn tɛ. Lóka khɛ́n áphɔlíman hromɛn Yankan bha swa néphan thúbhɔ háne, ábha chɛ́sé néphan búdúbúdú bha lá Yankan nansi, ló wo bhá bhó nguhá se.

Lo bha mɛpɔ́ mímíbhú hrómɛn

¹⁶ Lóhɛ́nthé lo phɔ bha lé gbɔn bhrɔ́ɔ́. Kasé lo nánmí abha lo phɔ, mɛ́n sɛ́npɛ́ ephú, Yankan éjrɛn lo nánnánmi abha lo phɔ ácí brɛ brɛ khúnbrɛn hrómɛn.

¹⁷ Áyíkhúphɔ chɛ́chɛ́ bhri lókɔn thénthé lo gɛ, áli áyíbɛn ábha hɛ́n gbraa, lókhɛ́n áyíkhúphɔ lókɔn lónɔn ábha do nguhá khóo bɛn álephú sé lo, ló ńguhá lókɔn ábha bánbrɛn áyíkhúphɔ thénthé lo égɛ.

¹⁸ Átɛsalé lo yí lo ehámwanhɛ́n lóphɔ, áleli áyí néphan ewú, lókhɛ́n áli áyí néphan le wú. Átɛsalé áyí khɛ́n néphan ewú, áli áyíbɛn ábha hɛ́n gbraa, lókhɛ́n áyí néphan le wú, áli áyí bɛn ábha tré godo.