2 KHORƐ́NTHI KHÚBHƐ́NƐ́N 3 - Ebrié New Testament 1996

Akprɔbha pɔ́pɔ́ júmánmán

¹ Wú ábhwe lókɔn mɛn tɔ, élie salé lo énɛn lo chɛ́ hɔ́n do lo mwámwá? Ló wú lo lɔ, lo énɛn salé wo sé lo áhrɔ́ bɛn lo bhó bha sé hɔ́n, ló ɔ́n wúsi khɔ́ do lo mwámwá? Lée nka lo énɛn salé ɔ́n sé lo áhrɔ́ bɛn lo bhó ká phɔ, ló wo wúsi khɔ́ do lo mwámwá sa néphan fe yí abháne etɛ́?

² Lo ékɛ, hɔ́n nɔn ɔ́n ni áhrɔ́ wo lrɛ abha lo thɛ́n hrómɛn, ló áhrɔ́ lókɔn áyɔn sa lephan khúnbrɛn okán ló wo yé lóthé.

³ Ee, áli mímí salé, hɔ́n nɔn ɔ́n ni áhrɔ́ lókɔn Krisi lrɛ, ló lo nɔn lo bho bha se néphan. Lókhɛ́n áhrɔ́ lókɔn, wo le bho áhrɔ́-ndu lrɛ, Yankan khɛ́n ali ńmɛpɔ́bhá, mɛ́n Nánnánmi nɔn wo bho lrɛ áhrɔ́ lókɔn. Ló áhrɔ́ lókɔn, wo le lrɛ tre ńmú nphrá-nphrá tho, lókhɛ́n wo lrɛ ha néphan thɛ́n hrómɛn.

⁴ Lo mímíbhú lo bho tre Yankan tho Krisi hɛ́n hrómɛn, lóhɛ́nthé nɔn lo étɔ ábhwe yábhɛ lókɔn.

⁵ Ló áleli salé lo nbrɛn lo pɛ sɛ́npɛ́ lo gɛ lí júmán yábhɛ lókɔn. Lo sɛ́npɛ́ khúnbrɛn abha lo phɔ, khɛ́n ágɛ chɛ́ lo tɛ́ yí, áchan Yankan yé.

⁶ Yankan nɔn ase lo sɛ́npɛ́ salé lo lí júmán sé akprɔbha pɔ́pɔ́. Akprɔbha pɔ́pɔ́ lókɔn, áleli ábidí bɛn wo lrɛ ha áhrɔ́ hrómɛn, lókhɛ́n áli ábidí bɛn Nánnánmi nbrɛn lrɛ tre. Ábidí khɛ́n wo lrɛ ha áhrɔ́ mɛn, áli ábidí bɛn ádo ákhú sé lephan, lókhɛ́n Nánnánmi, mɛ́n-ɛ ńmɛpɔ́bhá nɔn anmó sé lephan.

⁷ Wo lrɛ ábidí hrɔ́ brɛ brɛ khúnbrɛn ha ńmú phrá-nphrá tho. Ló lóka lókɔn, Yankan nguhá thándi se néphan wu. Moyízi hɛ́nmɛn efí kránmɛn, ló Izraɛ khúbhɛ́nɛ́n le gɛ gbɛnɛ́n wui. Lókhɛ́n áyéfí lókɔn abha Moyízi hɛ́nmɛn, áli áyíbɛn ábha hɛ́n. Ló kasé ábidí lókɔn khɛ́n ali áyíbɛn ádo ákhú sé lephan, ásákhɔ ńguhá khóo hrómɛn bha,

⁸ élie salé ńguhá khɛ́n achan Nánnánmi hromɛn, áli ńguhá bɛn abanbrɛn áyí khúnbrɛn!

⁹ Ló kasé ábidí khɛ́n wo khɔ lóphɔ bhɔ néphan pɔn, áli áyí bɛn apɛ ńguhá bha lóhrómɛn, élie salé Ábhwe Bhwábhwá lókɔn wo khɔ lóphɔ swa néphan, áli áyíbɛn lónguhá abha lóhrómɛn, ábanbrɛn áyí khúnbrɛn.

¹⁰ Mímí nbrɛn, áyí khɛ́n lócí apɛ nguhá, ncɛ́n lónguhá lókɔn áphu, átɛsalé thénthé ápɛ áyíbɛn apɛ nguhá banbrɛn áyí lókɔn!

¹¹ Ló kasé áyí khɛ́n abha le tré mɔ́n, ápɛ nguhá, élie salé áyí khɛ́n ábha tré godo, lónguhá bha bánbrɛn áyí khúnbrɛn.

¹² Ábhwe lókɔn lo bho lo mwasrui tre lótho hɛ́nthé, áchɛ́se lo étɔ bhwe sɛ́npɛ́ mɛn.

¹³ Lo ékɛ, lo le tɛsa Moyízi abho ádɛgɔn phopho mrwɛn mɛ́n hɛ́nmɛn, ochɛ́sé Izraɛ khúbhɛ́nɛ́n ole wú áyéfí abha mɛ́n hɛ́nmɛn, khɛ́n ali áyéfí bɛn abha lé tré mɔ́n.

¹⁴ Wo le pɛ ábhweyɛ́n, ló ncɛ́n lókɔn nbrɛn khɛ́n wo étɔ bhwe, lóka wo ekán áhrɔ́ achan akprɔbha lɔ́lɔ́ hrómɛn, ádɛgɔn phopho lókɔn, ámrwɛn wo hɛ́nmɛn tre ntɔ́nyán. Ló ádɛgɔn lókɔn amrwɛn wo hɛ́nmɛn tre, Krisi míbrɛ nɔn ágɛ hɔ́n yɛn.

¹⁵ Ncɛ́n nbrɛn lɔ, lóka wo ekán Moyízi bidí, ádɛgɔn lókɔn abháne, ámrwɛn wo thɛ́n tre ntɔ́nyán.

¹⁶ Sa lósi Yankan hrɔ́ khɔ étɔ a: “Kasé lephan ɛsa hɛ́nmɛn nrwɛn Hwánthe, ádɛgɔn lókɔn áchán hɛ hɛ́nmɛn féne.”

¹⁷ Ló thénthé, lo Hwánthe lókɔn khɛ́n áhrɔ́ étɔ mɛ́n bhwe krɛn, ńni Nánnánmi, ló ási lo Hwánthe Nánnánmi bha, lóne ápɛ thɛ́nkhwálé.

¹⁸ Lo khúnbrɛn lókɔn khɛ́n wo le bho yí mrwɛn lo hɛ́nmɛn, lo phɔ nɔn néphan khɔ ewú lo Hwánthe nguhá. Lóhɛ́nthé Yankan jrɛn lo yítɛ́, ló lo lɔ, lo tɛsa lo Hwánthe. Lo sakhɔ mɛ́n nguhá dɔndɔn hromɛn, ló ńguhá khóo lókɔn ábanbrɛn ńguhá khúnbrɛn thénthé lo ka lóhrómɛn. Lo Hwánthe Nánnánmi yí atɛ, lónɔn ali lókɔn.