2 KHORƐ́NTHI KHÚBHƐ́NƐ́N 2 - Ebrié New Testament 1996

¹ Lóhɛ́nthé mɛn tɔ mɛn thɛ́n hrómɛn salé, mɛn man nɛ́n cu nó hɔ́n yéne lókhɛ́n mɛn tɛ́ áphɔgbɔ́n sé hɔ́n.

² Átɛsalé kasé mɛn tɛ́ áphɔgbɔ́n sé hɔ́n, hɔ́n hrómɛn abɛn nɔn abháne ábha sé mɛn áphɔhá? Hɔ́n nɔn ɔ́n ni néphan ábha gɛ sé mɛn áphɔhá!

³ Lóhɛ́nthé nɔn mɛn phrɛ tɛ hrɔ́ bɛn thu hɔ́n, ló mɛn kranman hɔ́n lée: mɛn nɛn pɔ sa mɛn má hɔ́n yé, lókhɛ́n néphan ábha gɛ sé mɛn áphɔhá, wo cu saya sé mɛn áphɔgbɔ́n. Mɛn yɛn salé lóka áphɔ ehá mɛn, hɔ́n khúnbrɛn lɔ áphɔ ehá hɔ́n.

⁴ Lóka yábhɛ lókɔn khɛ́n mɛn tɛ́ áhrɔ́ lókɔn thu hɔ́n, mɛn ma ábhwephé, áphɔgbɔ́n le hɛ́nduthɔ́n ɔ́nmɔn hrómɛn. Ló áleli salé mɛɛ́n nɛn mɛn chɛ́ áphɔ ogbɔn hɔ́n, lókhɛ́n mɛɛ́n nɛn mɛn chɛ́ hɔ́n yɛ́n salé mɛn pɔ hɔ́n.

Wo yɔ bhwe phɔ lephan ali pɔn

⁵ Kasé lephan bɛn chɛ mɛ́n jɔ gɛ áphɔgbɔ́n, áleli mɛn nɔn ńse mɛn áphɔgbɔ́n, lókhɛ́n hɔ́n khúnbrɛn nɔn ńse hɔ́n áphɔgbɔ́n, kasé áleli hɔ́n khúnbrɛn lɔ, lephan kpɛ́bɛn abha hɔ́n hrómɛn, wo bhwe nɔn mɛɛ́n tɔ.

⁶ Ló lephan lókɔn khɛ́n wo étɔ mɛ́n bhwe, ápasá yí khɛ́n atɛ dri phɔ, lópán ában.

⁷ Lóhɛ́nthé, thénthé áyɔn salé ɔ́n yɔ́ bhwe phɔ́-ɛ, ɔ́n se thɛ́nkhwálé, ló annɛ́n gɛ áphɔgbɔ́n mɛ́n thɛ́n hrómɛn.

⁸ Ló mɛɛ́n na hɔ́n, tɛmɛ ɔ́n chɛ́ anyɛ́n salé ńni lephan bɛn ɔ́n pɔ.

⁹ Ló ábhwe hɛ́nthé khɛ́n mɛn phrɛ tɛ hrɔ́ thu hɔ́n, lónɔn ali salé: mɛɛ́n nɛn mɛn sú hɔ́n wú, ló mɛn yɛ́n kasé mímí nbrɛn ɔ́n gɛlé ya mɛn bhwetɔ́ tho ákakhúnbrɛn.

¹⁰ Kasé lephan bɛn tɛ yí yan, lókhɛ́n ɔ́n yɔ lóbhwe phɔ-ɛ, mɛn lɔ mɛn yɔ phɔ-ɛ. Átɛsalé kasé mɛn yɔ bhwe phɔ – lephan Krisi hɛ́n hrómɛn, hɔ́n hɛ́nthé nɔn mɛn yɔ bhwe phɔ-ɛ, – ló kasé mímí nbrɛn ápɛ ábhwe bɛn bháne mɛɛ́n gɛ yɔ́phɔ́ lephan, ábhwe lókɔn thénthé,

¹¹ mɛn yɔ nkalé, ochɛ́sé Abhɔsɛ́mɔ́n ole wúsi khɔ́ bhó mɔ́n tré lo tho. Átɛsalé lo yɛn mɛ́n hɛ́nphe si ńkhɔ anmú.

Lóka Phɔ́lu bha Troási khúbhɛ́, ńthɛ́n eli

¹² Lóka mɛn di Troási khúbhɛ́, lókhɛ́n mɛɛ́n tɔ Krisi Bhwe Bhwábhwá sé néphan yé, mɛn yɛn salé lo Hwánthe tɛ mɛn júmán hɛ́nmɛn phwan haphá kalé lóne.

¹³ Lókhɛ́n lóka mɛn di lóne, lóyí atɛ áphɔgbɔ́n se mɛn, lónɔn ali salé mɛn nɛn gɛ lo hɔnsɛ́n Thite lóne. Lóhɛ́nthé mɛn sa wo mɔ́nsi ló mɛn yali si no Masedwánɛn gotho.

Ńmɔ́ndípha ógɛ Jezwi-Krisi hɛ́n hrómɛn

¹⁴ Tɛmɛ olá Yankan nansi. Átɛsalé ápasá lókɔn khɛ́n agɛ Krisi thá elí nfófo, Krisi mɔ́ndípha agɛ ńne tho, lóhɛ́nthé nɔn wo elí phɔhá. Ló Yankan nɔn ado lo ka wo gbe lókɔn hromɛn. Yankan nɔn achɛ lo lée lo tɔ Krisi phɔ Bhwe Bhwábhwá lókɔn atɛsa ńnɔ́ndu bɛn esɔ́n do ási khúnbrɛn.

¹⁵ Lo khúnbrɛn lókɔn, lo nɔn lo li ńnɔ́ndu bɛn khɛ́n Krisi bho ha npha se Yankan, ló lóphán do ási khúnbrɛn, ápi néphan wo swa hromɛn, le néphan alia hromɛn.

¹⁶ Ló ńnɔ́ndu lókɔn, néphan khɛ́n alia, wo yéne, áli áyíbɛn esɔ́n bwɛn, ló ágɛ wɛ́n lephan, lókhɛ́n néphan wo swa, wo yéne, áli áyíbɛn esɔ́nyɔ́n ló ásé lephan mɛpɔ́bhá. Ló abɛn nɔn ábha gɛ lí júmán yábhɛ lókɔn?

¹⁷ Lo le tɛsa néphan dɔnbɛn lókɔn khɛ́n ahɔn Yankan bhwe pɛ ébhuri jɛ do jɛtɛn. Lo ékɛ, lo li néphan bɛn Yankan bho mɛ́n júmán ha lo mɔ́n mɛn, lóhɛ́nthé Krisi hɛ́n hrómɛn, Yankan hɛ́nmɛn, lo étɔ ábhwe mímí sé néphan oyé.