2 KHORƐ́NTHI KHÚBHƐ́NƐ́N 13 - Ebrié New Testament 1996

Phɔ́lu néphan éha le mɛ́n néphan ánmi aphuji

¹ Ló kasé cíbɛn mɛn cu di hɔ́n yé, ló esí ńdɔn bhwaliá nɔn ali lókɔn. Ló, sa lósi Yankan hrɔ́ khɔ étɔlé: “Kasé wo ebhó bhwe dɔn lephan, lókhɛ́n néphan awu lóyí, wo li lephan mɔn le bhwaliá, ábhwe lókɔn áli mímí.”

² Néphan khɛ́n lócí aphrɛ tɛ ne, le néphan nankhɛ khúnbrɛn, ápɛ ábhwe bháne mɛn mán tɔ sé wo; ábhwe lókɔn mɛn phrɛ tɔ se hɔ́n ye, lóka mɛn ma hɔ́n yé ńdɔn mɔn hrómɛn, lókhɛ́n ncɛ́n lókɔn mɛn ma thwethwemɛn lɔ, mɛn cu mɛɛ́n kranmán hɔ́n: lóka mɛn mán di hɔ́n yé, álepɛ lephan mɛn mán yɔ́ bhwe phɔ́.

³ Ɔ́n ni néphan bɛn hɔ́n énɛn ɔ́n sú mɛn wú, kasé mímí nbrɛn Krisi khɔ mɛn phɔ étɔ bhwe lɔ ɔ́n wú, lókhɛ́n Krisi lókɔn hɔ́n phɔ ńnɛn ni nánwo, ńni lephan bɛn apɛ sɛ́npɛ́ hɔ́n thethé.

⁴ Mímí Krisi le pɛ sɛ́npɛ́, lóhɛ́nthé nɔn wo hɔn-ɛn chɛ ha áyábhletre phɔ, lókhɛ́n thénthé, Krisi bha mɛpɔ́ Yankan sɛ́npɛ́ hrómɛn. Lóyábhɛ brɛ, lo lɔ, lóka lo bha Krisi phɔ, lo li néphan bɛn alepɛ sɛ́npɛ́. Lókhɛ́n lo le hɔ́n ɔ́nmɔn si okhɔ lo énɛnsi, Yankan sɛ́npɛ́ hrómɛn, lo le Krisi ɔ́nmɔn obha mɛpɔ́.

⁵ Tɛmɛ ɔ́n sú hɔ́n nbrɛn wú, ló ɔ́n wɛsɛ́ hɔ́n nbrɛn wú mwámwá, kasé ɔ́n ma mɛpɔ́ mímíbhú hrómɛn. Wú ɔ́n yɛn salé Jezwi-Krisi bha hɔ́n phɔ? Kasé ɔ́n ne yɛn lóyábhɛ nɛn, ló-ɛ, ɔ́n ni néphan bɛn ɔ́n halé ásúwú hrómɛn.

⁶ Mɛn mu sa ɔ́n ma yɛ́n salé lóka wo su lo wu, lo gɛlé ya ásúwú hrómɛn.

⁷ Lo éla Yankan sé hɔ́n, ló ɔ́n ne tɛ́ yíléle, lókhɛ́n áleli sa néphan bha wú salé lo-ɛ lo gɛlé ya ásúwú hrómɛn, lókhɛ́n kasé lo halé lɔ, hɔ́n-ɛ tɛmɛ ɔ́n tɛ́ yíbhwá.

⁸ Lo lé gɛ tɛ́ yíbɛn khɛ́n álɔ Yankan bhwe mímí. Áyí khɛ́n lo gɛ tɛ́, lónɔn ali salé lo bhá lí júmán dɔnmán ábhwe mímí mɔ́n.

⁹ Lo-ɛ lóka lo le pɛ sɛ́npɛ́, lónɔn áphɔ há lo, lókhɛ́n hɔ́n-ɛ ɔ́n pɛ sɛ́npɛ́. Lóhɛ́nthé lo éla Yankan sé hɔ́n, ló hɔ́n yítɛ́ oyɔ́n bhɔ́tho.

¹⁰ Lóka mɛn ma thwethwemɛn, áyí hɛ́nthé khɛ́n mɛn tɛ áhrɔ́ lókɔn thu hɔ́n, lónɔn ali salé: lóka mɛn mán di hɔ́n ntakhú, mɛn nɛn pɔ sa mɛn mó lo Hwánthe sɛ́npɛ́ ase mɛn tɛ́ yí dri hɔ́n phɔ ádwasan mɛn, átɛsalé ńsɛ́npɛ́ lókɔn áli ńsɛ́npɛ́ bɛn obhó gbɛ néphan abha hɔ́n gbe hrómɛn, lé nka áleli ńsɛ́npɛ́ bɛn obhó lɔ wo.

¹¹ Thénthé, mɛn hɔnsɛ́nhɔn, tɛmɛ Yankan ogɛ hɔ́n ɔ́nmɔn chré! Tɛmɛ ɔ́n ní néphan bhwá, ɔ́n khɔnmán hɔ́n bɛn nbrɛn phɔ, ɔ́n pɔlí phɔ, ɔ́n tɛ́ yí ńthɛ́nkhwálé mɛn, ló Yankan khɛ́n apɛ ápɔ́ le ńthɛ́nkhwálé bha bhá hɔ́n khúnbrɛn phɔ.

¹² Ápɔ́ hrómɛn tɛmɛ ɔ́n mɔ́ hɔ́n bɛn nbrɛn yí. Yankan-gbemán khúnbrɛn abha krɛn ébhi hɔ́n.

¹³ Tɛmɛ lo Hwánthe Jezwi-Krisi phɔlíman, Yankan pɔ́ le Nánnánmi Créncré mɛ́nbrɛlí obhá hɔ́n khúnbrɛn phɔ.