2 KHORƐ́NTHI KHÚBHƐ́NƐ́N 12 - Ebrié New Testament 1996

Lóka áyí lɛ Phɔ́lu mɛ, ló Hwánthe phwan ábhwethé se ńye

¹ Ló kasé khɛ́n ńmɛ́nfú li yíbɛn aleyɔn lɔ, mɛn-ɛ áyɔn salé mɛn fúmɛ́n. Ló thénthé áyí si akhɔ lɛ mɛn mɛ, le lósi Hwánthe khɔ phwan ábhwethé se mɛn ye ɔn, mɛn mán kan hɔ́n lóphɔ hwan.

² Ńpá áwɔ́-bhwelí abha hɛn hromɛn, mɛn yɛn krethiɛn bɛn Yankan do lo átho, ló ńdi átho khúbhɛ́ aphuji. (Lókhɛ́n lephan lókɔn, khɔ mímí nbrɛn wo do-e lo tho o, khɔ áyíbɛn pán lɛ mɛ ńwu o, ló-ɛ mɛn nɛn yɛn, Yankan míbrɛ nɔn ayɛn lókhúnbrɛn.)

³ Ee mímí nbrɛn, lephan lókɔn, mɛn yɛn salé wo do-e lo pharadi (lókhɛ́n mɛn cu mɛɛ́n kranmán hɔ́n npɔ, lephan lókɔn, khɔ mímí nbrɛn wo do-e lo tho o, khɔ áyíbɛn pán lɛ mɛ ńwu o, Yankan míbrɛ nɔn ayɛn),

⁴ ló krethiɛn lókɔn ábhwe ńye lóne, áli ábhwe bɛn óle gɛ khɔ́ míthé mɛn tɔ, saji ńye ábhwe wo le se lephanmi mɔ́nsi otɔ.

⁵ Ló lephan lókɔn mɛ́n hɛ́nthé mɛɛ́n gɛ fúmɛ́n – lókhɛ́n mɛn man nɛ́n fúmɛ́n sé mɛɛ́n bɛn nbrɛn, kasé mɛɛ́n gɛ fúmɛ́n, mɛn mán fúmɛ́n sé mɛn sɛ́npɛ́ mɛn nɛn pɛ.

⁶ Kasé mɛɛ́n tɔlé mɛn fúmɛ́n, néphan bha tɔlé mɛn hɛ́nphe lɔ, átɛsalé ábhwe mɛn mán tɔ, ábha lí ábhwe mímí. Lókhɛ́n áyí lókɔn alɛ mɛn mɛ, léli lónɔn mɛn mán mó fúmɛ́n. Mɛn nɛn pɔ salé néphan opɛ hɛ́nphebhú khóo bɛn mɛn phɔ. Mɛn yí mɛɛ́n nɛn nɔn ali sa mɛn yí si mɛn khɔ mɛn tɛ́, le mɛn bhwe si mɛn khɔ mɛɛ́n tɔ, lóne nɔn néphan okhɔ́ bhɔ́ mɛn kwa.

⁷ Áyí lókɔn alɛ mɛn mɛ, áli yíbɛn ágɛ chɛ́ mɛn fúmɛ́n, lóhɛ́nthé Yankan hɔn ńthó bɛn ka mɛn nánmí hrómɛn édɔn mɛn, ló mɛn nɛn wúsi khɔ́ fúmɛ́n. Ńthó lókɔn elí júmán sa Abhɔsɛ́mɔ́n-mranchɛ́wo bɛn abha mɛn phɔ échrwa mɛn, ló mɛn nɛn wúsi khɔ́ fúmɛ́n.

⁸ Áyíkhúphɔ lókɔn, lóhɛ́nthé mɛn mɔ ntráhɛ́nlé na lo Hwánthe ńdɔn bhwaliá, ló mɛn mi nkɛ lée anhɔ́n áyíkhúphɔ lókɔn yɛn mɛn phɔ.

⁹ Lókhɛ́n lo Hwánthe kranman mɛn lée: “Áphɔlíman lókɔn mɛn se hɛ, áyí khúnbrɛn khɛ́n emián hɛ, ábha lóhrómɛn. Átɛsalé lóka ɛlepɛ phɔ, lónɔn mɛn mó mɛn sɛ́npɛ́ ní júmán kránmɛn sé hɛ.” Lóhɛ́nthé áphɔ ehá mɛn salé tɛmɛ mɛn fúmɛ́n mɛn sɛ́npɛ́ mɛn nɛn pɛ hɛ́nthé, ochɛ́sé Krisi obhó mɛ́n sɛ́npɛ́ bo mɛn.

¹⁰ Krisi hɛ́nthé áphɔ ehá mɛn, lóka khɛ́n mɛn nɛn pɛ sɛ́npɛ́, lóka wo etá mɛn, lóka wo etɛ́ yí dri mɛn phɔ, lóka wo élri mɛn gbre, lóka wo etɛ́ mɛn dandan. Átɛsalé mɛn, lóka mɛn nɛn pɛ phɔ, lónɔn mɛɛ́n khɔnman.

Phɔ́lu etɛ́ dandan Khorɛ́nthi khúbhɛ́nɛ́n hɛ́nthé

¹¹ Mɛn bhwe lókɔn mɛɛ́n tɔ, etɛ́sa lephan mɛ́n hɛ́nphe lɔ, lókhɛ́n hɔ́n nɔn ɔ́n chɛ mɛn. Átɛsalé hɔ́n nɔn ɔ́n ni néphan ágɛ tɔ mɛn phɔ bhwe bhwá sé ápasá oyé, khɛ́n ɔ́n ne tɔ. Lókhɛ́n kasé mɛn nɛn ni yíɛkɛ lɔ, wo néphan lókɔn khɛ́n hɔ́n éche wo Krisi-mranchɛ́mán khónkhó, wo le ka mɛn tho míbrɛ.

¹² Áyí khɛ́n élie salé mímí nbrɛn mɛn ni Krisi-mranchɛ́wo, lóyí lókɔn áli áyíbɛn wo ya hɔ́n thethé tɛ ńthɛ́nnɔ́n mɛn: lónɔn ali hɛ́nmɛntányí le áphɔgóyí atɛ bha hɛn.

¹³ Ló kalósi mɛn khɔ tɛ hɔ́n yí yan brɛn Yankan-gbemán khúnbrɛn e? Wú hɔ́n jɛtɛn mɛn nɛn do ni hɛ́nthé? Lókhɛ́n kasé mímí nbrɛn mɛn tɛ hɔ́n yí yan, tɛmɛ ɔ́n yɔ́phɔ́ mɛn.

¹⁴ Mɛn hamwanhɛ́n sa mɛɛ́n no wú hɔ́n, ló kasé cíbɛn mɛn cu di hɔ́n yé, ló esí ndɔn bhwaliá nɔn ali lókɔn, lókhɛ́n áleli sa mɛn mán do hɔ́n jɛtɛn ní. Léli hɔ́n jɛtɛn mɛɛ́n nɛn, lókhɛ́n hɔ́n nbrɛn nɔn mɛɛ́n nɛn. Ee mímí, áleli ńmiɔ́ nɔn álí júmán gbɛ wo the le wo man ɔ́nmɔn, lókhɛ́n wo the le wo man ɔ́nmɔn nɔn álí júmán gbɛ wo.

¹⁵ Hɔ́n mɔ́ndɔ́nman hɛ́nthé, mɛɛ́n gɛ hɔ́n mɛn yí khúnbrɛn nɔ, mɛɛ́n gɛ hɔ́n mɛɛ́n nbrɛn sɔ́n pɛn áphɔhá mɛn. Ló ápɔ́ khóo lókɔn mɛn pɔ hɔ́n, ló wú hɔ́n-ɛ ɔ́n ma lé gɛ pɔ́ mɛn yábhɛ nɛn?

¹⁶ Mímí, ɔ́n gɛ yɛ́n salé álepɛ cí mɛn do hɔ́n jɛtɛn ni. Lókhɛ́n néphan fe bha tɔlé, mɛn máne mɛɛ́n khrɛ néphan ló ábhwe lókɔn hromɛn, mɛn khɔ nkpakprá mɛn mɛɛ́n khrɛ hɔ́n, lókhɛ́n ɔ́n ne wú lóbrɛ.

¹⁷ Ló néphan khɛ́n mɛn máne mɛn chɛ́ nó hɔ́n yé, wú cíbɛn mɛn khɔ wo phɔ do hɔ́n jɛtɛn ni?

¹⁸ Mɛn kranman Thite lée annó hɔ́n yé, ló lephan lókɔn khɛ́n mɛn do ka mɛ́n phɔ ebhá, ńni krethiɛn bɛn ɔ́n yɛn mwámwá. Wú ɔ́n ma tɔlé Thite do hɔ́n jɛtɛn li? Ló mɛn le Thite ɔ́nmɔn, lo si lo khɔ tɛ yí, wú ále librɛ? Lo si lo khɔ nɛnsi, wú ále librɛ?

¹⁹ Achan lóka lókɔn ebhá, wú hɔ́n ebhú salé lo ya hɔ́n hɛ́nmɛn lo étalí bhwe do lo nbrɛn ká? Lókhɛ́n léliló! Yankan hɛ́nmɛn, Krisi phɔ lo bha hɛ́nthé, lónɔn achɛ lo étɔ bhwe sé hɔ́n yé, ló lo jɔn bhwá, áyí khúnbrɛn lókɔn lo etɛ́, áli mɔ́ndɔ́nman se hɔ́n.

²⁰ Etɛ́ mɛn khwíthá salé, lóka mɛn mán di hɔ́n yé, kpɛnɛn khén hɔ́n yítɛ́ ole pɔ́ mɛn mɛ, ló hɔ́n lɔ, kpɛnɛn khɛ́n mɛn yítɛ́ ole pɔ́ hɔ́n mɛ. Etɛ́ mɛn khwíthá salé lóka mɛn mán di hɔ́n yé, kpɛnɛn khɛ́n mɛn gɛ hɔ́n ágbo, ńmɛnɔ́n, ńthɛ́nyan, gɔngɔnsá, lephan bhwe lrɛ, ńmɛ́nfú, ákrékú, átha le ádi ɔ́nmɔn hrómɛn.

²¹ Etɛ́ mɛn khwíthá salé lóka mɛn mán di hɔ́n yé, áyíléle khɛ́n lócí ɔ́n phrɛ tɛ ɔn, ɔ́n cu tɛ́ lóyábhɛ brɛ, lóka lókɔn Yankan bha chɛ́ hɔ́n phɔ hɛ́ndɛ ká mɛn mɛ. Etɛ́ mɛn khwíthá salé lóka lókɔn, mɛn mán thɔ́n hɛ́ndu sé néphan khúnbrɛn lócí aphrɛ tɛ ne, lókhɛ́n acu bha wo neyítɛ́ hrómɛn élo, néphan khɛ́n ale chan wo gbakhre yítɛ́ le wo yí sáka sakatɛ́ phɔ féne.