2 KHORƐ́NTHI KHÚBHƐ́NƐ́N 11 - Ebrié New Testament 1996

Phɔ́lu le Krisi-mranchɛ́mán kpakprámán

¹ Mɛn si mɛn khɔ mɛn tɛ́ yí, kasé hɔ́n ewú salé ekhɔ́ fantɛ́wo lɔ, tɛmɛ ɔ́n yɔ́ kálé! Ee, áyɔn sa ɔ́n yɔ́ kálé!

² Ɔ́n ni néphan bɛn hɔ́n ephé mɛn phɔ, sa lósi ɔ́n khɔ hɔ́n ephé Yankan phɔ. Ló ɔ́n tɛsa bhiebhri bɛn áphɔ chan khɛ́n aka yɛn sɛ, lókhɛ́n mɛn dɔn mɛ́n se sɛ míbrɛ ali Krisi.

³ Ńthɛ́n elí mɛn salé hɔ́n hɛ́nphebhú bha khrɛ, ló ɔ́n ma chán Krisi phɔ féne sa lósi du khɔ nkpakprá mɛn khrɛ Ɛve.

⁴ Áyí mɛn wú hɔ́n phɔ, lónɔn ali salé hɔ́n-ɛ, kasé néphan khúnbrɛn pán ebhá hɔ́n yé, ɔ́n dɛn do wo áphɔhá mɛn. Ló kasé wo bhwe wo étɔ Jezwi phɔ, le mɛn ékɛ mɛɛ́n tɔ sé hɔ́n khɛ́n áleli brɛ lɔ, hɔ́n-ɛ ɔ́n mú wo mímí, ló ɔ́n dɛn do nánnánmi wo tɔ lóphɔ bhwe se hɔ́n ye, lókhɛ́n nánnánmi lókɔn, áleli Nánnánmi ɔ́n khɔ mɛn phɔ gɛ. Saji ɔ́n dɛn do ábhwe wo sranman, lókhɛ́n ábhwe lókɔn, ló le Ábhwe Bhwábhwá lo tɔ se hɔ́n ye, áleli brɛ.

⁵ Lókhɛ́n néphan lókɔn hɔ́n éche Krisi-mranchɛ́mán khónkhó, wo le ka mɛn tho míbrɛ!

⁶ Ló kasé mɛn nɛ́n yɛ́n bhwetɔ́ mwámwá, áleli salé mɛn nɛn pɛ bhweyɛ́n: ló ali ábhweyɛ́n, áyí khúnbrɛn hrómɛn, lo tɔ bhwe dithé se hɔ́n ye.

⁷ Lóka mɛn ma mɛɛ́n tɔ Yankan Bhwe Bhwábhwá sé hɔ́n yé, mɛn nɛn mi hɔ́n yíɛkɛ. Mɛn hɔn mɛɛ́n nbrɛn mathé, ló ɔ́n wúsi khɔ́ jrɛn néphan khónkhó. Ló áyí lókɔn mɛn tɛ, wú áli ne?

⁸ Lóka mɛn ma hɔ́n thethé mɛn ní júmán, Yankan-gbemán nánkhɛ nɔn abho wo jɛtɛn sɔn mɛn pɛn. Ógɛ tɔlé mɛn phiɔ wo mɔ́n mɛn, lónɔn achɛse mɛn gɛ dɔnman hɔ́n mɔ́n.

⁹ Lóka mɛn ma hɔ́n thethé, mɛn mián hrómɛn, álepɛ lephan mɛn dɔncrɛ khɛ́n ase mɛn jɛtɛn. Néphan adɔnman mɛn mɔ́n, wo nɔn wo li lo hɔnsɛ́nhɔn achan Masedwánɛn gotho bha, áyí khúnbrɛn emián mɛn, wo se mɛn phu. Lócí mɛn nɛn dɔncrɛ hɔ́n, ló thénthé lɔ mɛn man nɛ́n dɔncrɛ hɔ́n.

¹⁰ Mɛɛ́n kranmán hɔ́n lée, Krisi bhwe mímí abha mɛn thɛ́n hrómɛn hɛ́nthé, Akayi gotho khúnbrɛn, álepɛ lephan ábha gɛ chɛ́ mɛn témélé mɛn mɛ́nfú hrómɛn.

¹¹ Ló bítɛ khɛ́n mɛɛ́n tɔ ábhwe yábhɛ lókɔn? Wú ábhwe lókɔn mɛɛ́n tɔ, élie salé mɛn nɛn pɔ hɔ́n? Yankan yɛn salé mɛn pɔ hɔ́n!

¹² Mɛn phrɛ tɔlé mɛn man nɛ́n mi hɔ́n yíɛkɛ, ábhwe lókɔn mɛn tɔ, mɛn hɔn pɛ kpɛ́ɛ́n, ochɛ́sé néphan dɔnbɛn lókɔn khɛ́n étɔlé wo li Krisi-mranchɛ́mán, wo le wúsi khɔ́ fúmɛ́n, ló wo le gɛ tɔlé wo lɔ wo elí júmán sa lósi yábhɛ lo khɔ lo elí júmán.

¹³ Néphan lókɔn, wo li Krisi-mranchɛ́mán kpakprámán khɛ́n elí nkpakprá wo júmán hrómɛn, ló wo etɛ́ yí lie néphan salé wo nɔn wo li Krisi-mranchɛ́mán mímí.

¹⁴ Lókɔn áleli hɛ́nmɛntán bhwe, Abhɔsɛ́mɔ́n nbrɛn lɔ gɛ hɔ́n mɛ́n nbrɛn jrɛn Yankan-mranchɛ́wo abha áyéfí hrómɛn.

¹⁵ Ló áleli hɛ́nmɛntán bhwe, kasé Abhɔsɛ́mɔ́n hwannɛ́n khwɛn wo nbrɛn jrɛn Yankan júmánmán, Yankan lókɔn, ńni lephan apriman. Lóka ábha di lómɛ́n, wo yí wo tɛ, wo bhá gɛ lópɛnsɔ́n.

Phɔ́lu yíkhúphɔ agɛ mɛ́n júmán hrómɛn

¹⁶ Mɛn cu mɛɛ́n kranmán hɔ́n: olépɛ lephan obhú salé ńfan etɛ́ mɛn. Lókhɛ́n kasé mímí nbrɛn hɔ́n ebhú salé ńfan etɛ́ mɛn, ló tɛmɛ ɔ́n do mɛn sa fantɛ́wo, ochɛ́sé mɛn lɔ, mɛn wúsi khɔ́ fúmɛ́n kpɛ́bɛn.

¹⁷ Ló mímí nbrɛn, ábhwe lókɔn thénthé mɛn mán tɔ, áleli lo Hwánthe nɔn achɛ mɛn. Lóka khɛ́n mɛn mú salé mɛɛ́n gɛ fúmɛ́n, mɛn lɔ mɛn tɛsa lephan hɛ́nphe lɔ.

¹⁸ Lónian mɛn khɛ́n ápɛ néphan búdúbúdú bháne efúmɛ́n áthéji yí phɔ, áyɔn salé mɛn lɔ mɛn fúmɛ́n.

¹⁹ Hɔ́n lókɔn ɔ́n ni bhweyɛ́nmán khónkhó, lótɛ khɛ́n ɔ́n dɛn do fantɛ́mán ka phɔ!

²⁰ Wú ɔ́n pɔ salé wo tɛ́ hɔ́n yí sa ńgangánmán, wo khrɛ hɔ́n, wo bia hɔ́n, wo lí nkhó hɔ́n phɔ, ló wo bhra hɔ́n ngbaphrá hɛ́nmɛn?

²¹ Ábhwe lókɔn etɛ́ mɛn hɛ́ndɛ: átɛsalé lo le li néphan ágɛ tɛ́ áyí yábhɛ lókɔn! Lókhɛ́n kasé ápɛ lephan ábha gɛ fúmɛ́n áyíbɛn phɔ, – mɛn lɔ mɛɛ́n gɛ fúmɛ́n yábhɛ nɛn – lókhɛ́n ábhwe lókɔn mɛɛ́n tɔ, etɛ́sa lephan ńfan etɛ́.

²² Ló kasé wo li Ebrenɛ́n? Mɛn lɔ mɛn ni Ebre lephan. Kasé wo li Izraɛ khúbhɛ́nɛ́n? Mɛn lɔ mɛn ni Izraɛ yípɔ. Kasé wo li Ábrahámɛn jímiɔn? Mɛn lɔ mɛn ni Ábrahámɛn jibhi.

²³ Kasé wo li Krisi nɛnkhwɛ́nmán? Ló thénthé mɛn mán tɔ bhwe sa lephan alepɛ hɛ́nphe: mímí, mɛn ni Krisi nɛnkhwɛ́nwo brɛn wo khúnbrɛn. Saji mɛn ni júmán brɛn wo khúnbrɛn, wo ka mɛn khúthé brɛn wo, wo bhra mɛn mɛ́ brɛn wo, mɛn júmánlí hrómɛn, ncɛ́n mɛn nká ákhú mɛ́n, npi mɛn nká ákhú mɛ́n.

²⁴ Jwifunɛ́n-óthemánhɔn bhra mɛn mɛ́ áphɛn le áwɔ́-bhrɔ ácí brɛ, ló okan lóyábhɛ nɛn ńdɔn mwannán.

²⁵ Rɔ́mɛn khúbhɛ́nɛ́n-óthemánhɔn bhra mɛn mɛ́ ńdɔn bhwaliá, ló cíbɛn Jwifunɛ́n ku mú dia mɛn, ákhakpɛɛ́ wo wɛ́n mɛn, méli bhu mɛn du ńdɔn bhwaliá, ló cíbɛn lóka méli bhu du, mɛn ma ńdu hrómɛn ńcrɔ́n le mréci.

²⁶ Lóka mɛɛ́n khali ní júmán, áyí dɔndɔn mɛn wu lónɔn ali lókɔn: lóka ńdu esí lókhɛ́n ádubhɛ ébie hɛ́n bithe, mɛn ma dandan hromɛn. Lóka mɛn ma khokhrohamán thethé, mɛn ma dandan hromɛn. Lóka mɛn ma mɛn khúbhɛ́nɛ́n Jwifunɛ́n thethé, mɛn ma dandan hromɛn. Lóka mɛn ma ńthekhunɛ́n thethé, mɛn ma dandan hromɛn. Lóka mɛɛ́n mri ákhúbhɛ́ dɔndɔn di, mɛn ma dandan hromɛn. Lóka mɛn ma ánánkhuthé mɛɛ́n no, mɛn ma dandan hromɛn. Lóka mɛn ma gwe tho, mɛn ma dandan hromɛn. Lóka mɛn ma lo hɔnsɛ́nhɔn kpakprámán thethé, mɛn ma dandan hromɛn.

²⁷ Mɛn ni júmán khékhremɛn, áyíkhúphɔ hromɛn. Ákáfe mɛn kɔ́ná kábrɛ kábrɛ áyé lɛ́, mɛn ma áko le ńdukro ɔ́nmɔn hrómɛn, ákáfe mɛn nɛ́n ní nɛn. Lóka ágba édi, ágba ehɔ́n mɛn, ádɛgɔn emián mɛn.

²⁸ Mɛn yí mɛ́n akhu mɛn phɔ ɔn, óle gɛ tɔ lóbhwe. Ácí khúnbrɛn Yankan-gbemán bhwe elí mɛn thɛ́n.

²⁹ Kasé lephan bɛn enán mɛ́n yítɛ́ hrómɛn, átɛsa mɛn nɔn mɛn nán, kasé lephan ehálé ńne hrómɛn, átɛ́ áphɔgbɔ́n sé mɛn.

³⁰ Ló kasé énɛn salé mɛn fúmɛ́n, mɛn sɛ́npɛ́ mɛn nɛn pɛ, lóphɔ mɛ́n nɔn mɛn mán fú.

³¹ Yankan lókɔn ali lo Hwánthe Jezwi mɛ́n The, – ńyɛn salé mɛn bhwe lókɔn mɛɛ́n tɔ mɛn nɛn nitan – ló tɛmɛ ńdubhɔ́ ogɛ Yankan ákakhúnbrɛn!

³² Lóka mɛn ma Damási khúbhɛ́, bhringbi óche Aretasi, mɛ́n hɛ́nmɛn lephan khwɛn ngbumán ya khúmɛ́n si khúnbrɛn okhɔ́ ká ákhúbhɛ́ hrómɛn, ló kasé wo wu mɛn, wo hɔ́n mɛn bha se.

³³ Lókhɛ́n krethiɛnmán hɔn mɛn ka ákrwɛbhɛ́ hrómɛn, ló finɛ́trɛn bɛn wo jan abha ńphá hrómɛn, wo hɔn mɛn khɔ lóne dithé, ló mɛn sakhɔ ńphá mánji nwa féne.