2 KHORƐ́NTHI KHÚBHƐ́NƐ́N 10 - Ebrié New Testament 1996

Phɔ́lu étɔlé mɛ́n ni Krisi-mranchɛ́wo

¹ Mɛn Phɔ́lu, mɛɛ́n nbrɛn nɔn mɛɛ́n tɔ ábhwe lókɔn sé hɔ́n - mɛn lókɔn khɛ́n néphan bháne étɔlé lóka mɛn ma hɔ́n thethé, mɛɛ́n khúphɔ, lókhɛ́n lóka mɛn ma thwethwemɛn, ló-ɛ mɛn mɛ́n khɔnmán hɔ́n phɔ. Krisi thɛ́nbhwá apɛ le mɛ́n lephan bhwá ńni hɛ́nthé, mɛɛ́n na hɔ́n:

² lóka khɛ́n mɛn mán má hɔ́n yé, ɔ́n ne chɛ́ mɛn khɛ́n mɛn ní lephanle hɔ́n phɔ. Ló mímí nbrɛn, néphan khɛ́n abháne étɔlé lo khɔ áthéji nánmí hrómɛn lo elí júmán, néphan lókɔn, lóka mɛn mán má hɔ́n yé, mɛn mán tɛ́ yí dri wo phɔ.

³ Áli mímí salé lo bha áthéji, lókhɛ́n áleli áthéji sɛ́npɛ́ nɔn lo bho lo ekú tha.

⁴ Lo dúgba khɛ́n lo bho lo ekú tha, áleli áthéji dúgba, Yankan dúgba apɛ sɛ́npɛ́, lónɔn lo bho lo élɔ lo mɛsawo sɛ́npɛ́. Néphan bhwe atɔ nkpakprá mɛn tre, lo bhá hɔ́n lókhúnbrɛn lɔ.

⁵ Néphan yí khúnbrɛn atɛ tre mɛ́nfú mɛn, lókhɛ́n lóyí lókɔn le dɛn lo yɛ́n Yankan, lo bhá hɔ́n lókhúnbrɛn lɔ. Lo etɛ́ khékhremɛn chɛ́ néphan obhú hɛ́nphe, ló wo ji Krisi.

⁶ Lóka khɛ́n ɔ́n ma ji bhwe ábha símɛ́n, lóka lókɔn lo bhá hámwanhɛ́n ya, ló néphan khúnbrɛn khɛ́n ále ji bhwe, lo bhá tɛ́ yí dri wo phɔ.

⁷ Hɔ́n ewú yí phɛ́khɔ́ tho. Wú hɔ́n hrómɛn ápɛ lephan bɛn ebhú salé mɛ́n ni Krisi lephan? Ló kasé ápɛ lephan ebhú lóyábhɛ nɛn, áyɔn. Lókhɛ́n lephan lókɔn tɛmɛ ancu mú hɛ́nphe mwámwá ló anyɛ́n salé: lo lɔ, lo li Krisi néphan sa mɛ́n a.

⁸ Ló kasé lo Hwánthe sɛ́npɛ́ lókɔn ase lo, mɛn phrɛ mo fumɛ́n lɔ, ále gɛ tɛ́ mɛn hɛ́ndɛ, átɛsalé ńsɛ́npɛ́ lókɔn lo gɛ, áli sɛ́npɛ́ bɛn lo bhá bhó dɔnmán hɔ́n mɔ́n, lókhɛ́n áleli sa lo bhá bhó wɛ́n hɔ́n.

⁹ Ɔ́n ne bhú salé áhrɔ́ mɛn nɔn mɛɛ́n nɛn mɛn khɔ́ tɔ bhwe fo hɔ́n.

¹⁰ Néphan fe bháne étɔlé: “Lóka Phɔ́lu khɔ áhrɔ́ mɛn étɔ bhwe, mɛ́n bhwe ántɔ, átɛ́ ábhwe khrákhrá, áli ábhwe apɛ sɛ́npɛ́, lókhɛ́n lóka ńma lo thethé, antɛ́ yí sa lephan bɛn alepɛ sɛ́npɛ́, ló mɛ́n bhwetɔ́ le jan thɛ́n.”

¹¹ Ló néphan khɛ́n étɔ bhwe yábhɛ lókɔn, tɛmɛ wo yɛ́n salé, lo bhwe lo lrɛ ha lo hrɔ́ hrómɛn, lóka lo bha thwethwemɛn le lo yí si lo khɔ lo etɛ́, lóka lo bha hɔ́n thethé, ló ndɔn mɔ́nmɔn áli brɛ.

¹² Néphan khɛ́n ebhú salé wo banbrɛn néphan khúnbrɛn, lo le tɔlé lo bhá gɛ wo ɔ́nmɔn priman, saji lo le tɔlé lo bhá gɛ wo ɔ́nmɔn swan. Lóka wo ya wo bɛn nbrɛn hrómɛn wo ebhú salé wo nɔn wo li néphan mímí aphu, ló wo saya wo ebhó wo bɛn nbrɛn yítɛ́ thwelí bhwe tɔ, wo néphan lókɔn wo hɛ́nphe lɔ.

¹³ Lo bhwetɔ́ hrómɛn, lo bha lé fúmɛ́n bhurika, lókhɛ́n júmán lókɔn Yankan bho ha lo mɔ́n mɛn, lóhrómɛn nɔn lo bhá ya fúmɛ́n; ló júmán khɛ́n lo bhá ya hɔ́n thethé lí, lóbhwe lɔ bha lo júmán hrómɛn.

¹⁴ Yankan si atɔlé lo lí júmán di, lo bha lé brɛn lóne hɛ́n, ló hɔ́n lɔ ɔ́n ma lóhrómɛn, lóhɛ́nthé nɔn lo li júmán di hɔ́n yé, ló lo tɔ Krisi phɔ Bhwe Bhwábhwá se hɔ́n ye.

¹⁵ Lóhɛ́nthé, Yankan si atɔlé lo lí júmán di, lo bha lé brɛn lóne hɛ́n, lo le ya néphan nankhɛ júmán ali tho lo efúmɛ́n. Lókhɛ́n lo ebhú salé hɔ́n mímíbhú bha gɛlé, ló ábha sé lo sɛ́npɛ́ lo bhá lí júmán ló hɛ́nmɛn hɔ́n hrómɛn, ló Yankan si atɔlé lo lí júmán di, lóne nɔn lo bhá ya ákakhúnbrɛn.

¹⁶ Lóhɛ́nthé lo bhá ló ákhúbhɛ́ abha hɔ́n mánji, ló lo bhá tɔ Ábhwe Bhwábhwá lókɔn sé néphan oyé. Lókhɛ́n néphan nankhɛ júmán aya wo bɛn nbrɛn gɔn li, lo bha lé ya lótho fúmɛ́n.

¹⁷ Lóhɛ́nthé Yankan hrɔ́ étɔlé: “Lephan kasé ɛ́nɛn ɛfúmɛ́n, tɛmɛ ɛya lo Hwánthe júmán ali tho fúmɛ́n.”

¹⁸ Lephan khɛ́n ebhó áhwalri sé mɛ́n bɛn nbrɛn, léli mɛ́n nɔn mɛ́n bhwe élimán Yankan, lókhɛ́n lephan Yankan bɛn nbrɛn élri hwa, mɛ́n nɔn mɛ́n bhwe élimán Yankan.