1 TESALONÍKHI KHÚBHƐ́NƐ́N 5 - Ebrié New Testament 1996

¹ Lo hɔnsɛ́nhɔn, áleli salé lo bhá tɛ́ hrɔ́ lo sé hɔ́n, ló áyí khɛ́n ebhá tɛ́, lo bhá tɔ lóphɔ bhwe sé hɔ́n yé, ló lo bhá tɔ lóka le lócí lóyí ebhá tɛ́.

² Hɔ́n bɛn nbrɛn ɔ́n yɛn salé lo Hwánthe cí ábha sáji bhá, lócí lókɔn ábha ká nta mɛn, ábha tɛ́sa sídowo si ákhɔ́ bhá mréci.

³ Lóka néphan bha tɔlé: “Thénthé lo phɔ khwalé, ló lo bha ńthɛ́nkhwálé hrómɛn”, lóka lókɔn nɔn muswe khóo bɛn bha jángba bhú wo tho, ló álepɛ lephan ábha gɛ wá féne – ábha tɛ́sa bhie ethí lábhɛ, lókhɛ́n áhó jangba etɛ́.

⁴ Lo hɔnsɛ́nhɔn, ɔ́n ni néphan bɛn ale bha dubhlékhu hromɛn, lóhɛ́nthé ácí lókɔn wo étɔ lóbhwe, abha le ká hɔ́n nta mɛn sa lósi sídowo khɔ́ ká lephan nta mɛn.

⁵ Ló mímí nbrɛn, hɔ́n khúnbrɛn lókɔn, ɔ́n ni miɔ́ bɛn abha áyéfí hrómɛn, ɔ́n ni miɔ́ bɛn abha ńcrɔ́n cí hrómɛn. Lo le li mréci hromɛn miɔ́, saji lo le li dubhlékhu hromɛn miɔ́.

⁶ Lóhɛ́nthé, áleyɔn sa lo láná, sa nánmán dɔnbɛn lókɔn, lókhɛ́n áyɔn salé lo ká mɛlé chré bo, ló lo le lí yíkhólímán.

⁷ Átɛsalé mréci nɔn ali áka obhó láná, ló mréci nɔn néphan nán ndɛ ákú wo.

⁸ Lókhɛ́n lo, lo li miɔ́ bɛn abha ńcrɔ́n cí hrómɛn, ló áleyɔn salé lo lí yíkhólímán. Ló kpónkpó ntráliɛ́ lókɔn khɛ́n lo bhá bhó sɔ́ mrwɛn lo thɛ́n mɛ́n kútha, lónɔn ali mímíbhú le ápɔ́, ló kpónkpó kpró lókɔn khɛ́n lo bhá bhó bhú hɛ́n, lónɔn ali Yankan swá ábha swa lo, mímíbhú hrómɛn.

⁹ Ló mímí nbrɛn, Yankan le tɔlé mɛ́n thɛ́nyan obhá lo tho ákakhúnbrɛn, lókhɛ́n mɛ́n nkɛé mɛ́n man swa lo, lo Hwánthe Jezwi-Krisi hɛ́n hrómɛn.

¹⁰ Ló Krisi lókɔn, mɛ́n nɔn ńkhu se lo, ló ochɛ́sé kasé lo khu lɔ, kasé lo bha mɛpɔ́ lɔ, lo gɛ ɔ́nmɔn bha mɛpɔ́, lóka ánman sáji má.

¹¹ Lóhɛ́nthé, tɛmɛ ɔ́n khɔnmán hɔ́n bɛn nbrɛn phɔ, ló ɔ́n dɔnmán hɔ́n bɛn nbrɛn mɔ́n, sa hɔ́n yí si ɔ́n khɔ bháne ɔ́n tɛ́.

Ábhwetɔ́ aphuji, Phɔ́lu néphan ébhi aphuji

¹² Mɛn hɔnsɛ́nhɔn, lo ékranmán hɔ́n, tɛmɛ ɔ́n mó ájí sé néphan abha hɔ́n thethé elí júmán, néphan lókɔn, wo nɔn wo li krethiɛnmán éyalí hɔ́n, wo nɔn wo li krethiɛnmán élie hɔ́n yí Yankan-gbemán hrómɛn.

¹³ Yankan júmán wo elí hɛ́nthé, áyɔn salé ɔ́n mó ájí le ápɔ́ ɔ́nmɔn lie wo hɔ́n yítɛ́ hrómɛn, ló tɛmɛ ńthɛ́nkhwálé obhá hɔ́n le hɔ́n jɔn ɔ́nmɔn thethé.

¹⁴ Lo hɔnsɛ́nhɔn, lo ékranmán hɔ́n: ɔ́n ha yíkhúphɔmán abha hɔ́n hrómɛn, khwíthámán abha hɔ́n hrómɛn, ɔ́n khɔnmán wo phɔ, néphan enán, ɔ́n dɔnmán wo mɔ́n, ló tɛmɛ hɔ́n thɛ́n onɔ́n néphan khúnbrɛn phɔ.

¹⁵ Ɔ́n hámwanhɛ́n, ló hɔ́n hrómɛn olépɛ lephan obhó ne sɔ́n mɛ́n jɔ pɛn, lókhɛ́n ákakhúnbrɛn, tɛmɛ ɔ́n tɛ́ yíbhwá sé hɔ́n bɛn nbrɛn, ló ɔ́n tɛ́ yíbhwá sé néphan khúnbrɛn.

¹⁶ Tɛmɛ áphɔ ohá hɔ́n ácí khúnbrɛn,

¹⁷ ló ákakhúnbrɛn ɔ́n na Yankan,

¹⁸ hɔ́n yítɛ́ khúnbrɛn hrómɛn, áyɔn salé ɔ́n ná Yankan nansi. Ló hɔ́n krethiɛn ɔ́n ni, áyí Yankan énɛn salé ɔ́n tɛ́, lónɔn ali lókɔn.

¹⁹ Ɛlé gɛ Nánnánmi Créncré ɔ́nmɔn swan,

²⁰ ábhwe achan Yankan yé, ɛle hɔ́n fɔ́nká bu,

²¹ tɛmɛ ɛwɛsɛ́ áyí khúnbrɛn wú mwámwá: ló lóhrómɛn, ɛbhó ló ayɔn,

²² ló tɛmɛ ɛchán áyíléle yábhɛ yábhɛ khúnbrɛn phɔ féne.

²³ Tɛmɛ Yankan khɛ́n esé néphan thɛ́nkhwálé ochɛ́ hɔ́n ní mɛ́n míbrɛ néphan; ló anwú hɔ́n phɔ nánmí khúnbrɛn, hɔ́n nánnánmi, hɔ́n hɛ́nfan, le hɔ́n phɔ khúnbrɛn, ló olépɛ yí bhrií lóphɔ lóka lo Hwánthe Jezwi-Krisi bha sáji bhá.

²⁴ Yankan lókɔn khɛ́n éche hɔ́n bhá mɛ́n phɔ, mɛ́n nɔn ánman tɛ́ lóyí khúnbrɛn lókɔn sé hɔ́n, átɛsalé mɛ́n, ńni lephan alí mɛ́nbrɛ.

²⁵ Hɔnsɛ́nhɔn hɔ́n lɔ, tɛmɛ ɔ́n na Yankan sé lo.

²⁶ Ápɔ́ hrómɛn, tɛmɛ ɔ́n dɔn hɔ́n hɔnsɛ́n krethiɛnmán khúnbrɛn mɛ́n.

²⁷ Lo Hwánthe hɛ́n hrómɛn mɛɛ́n na hɔ́n: áyɔn salé ɔ́n kán áhrɔ́ lókɔn sé lo hɔnsɛ́nhɔn khúnbrɛn oyé.

²⁸ Ló tɛmɛ lo Hwánthe Jezwi-Krisi phɔlíman obhá hɔ́n khúnbrɛn phɔ.