1 TESALONÍKHI KHÚBHƐ́NƐ́N 4 - Ebrié New Testament 1996

Áyítɛ́ khɛ́n ánimán Yankan

¹ Ló thénthé lo hɔnsɛ́nhɔn, lo phrɛ lie hɔ́n lósi ɔ́n ma khɔ́ tɛ́ yí pɔ́ Yankan mɛ. Ló mímí nbrɛn, lósi yábhɛ brɛtɛɛ nɔn ɔ́n khɔ hɔ́n etɛ́ yí. Ló thénthé lo Hwánthe hɛ́n hrómɛn, lo ékranmán hɔ́n, ló lo éla hɔ́n salé, tɛmɛ ɔ́n tɛ́ yí obhɔ́tho.

² Lo Hwánthe Jezwi hɛ́n hrómɛn, ɔ́n yɛn lóyí lo kranman hɔ́n lée ɔ́n tɛ́.

³ Ló nɛn Yankan yí apɔ o: lónɔn ali salé ɔ́n ní néphan bɛn apriman, khɛ́n wo khwɛn tre njɛ se Yankan, ló áyɔn salé ɔ́n chán ágbakhrelí phɔ féne.

⁴ Ló hɔ́n hrómɛn, lephan brɛ, hɛ si ɛkhɔ ɛtɛ́ yí hɛ bhia phɔ, tɛmɛ olí yíbɛn apriman, olí yíbɛn áchranmán hɛ́nmɛn,

⁵ ló áleli salé ɛ́bha yɔ́ hɛ bɛn nbrɛn kálé sé mɛnɔ́n phromɛn phromɛn, sa molamán khɛ́n ale yɛn Yankan.

⁶ Ábhwe lókɔn hromɛn, olépɛ lephan khɛ́n otɛ́ mɛ́n hɔnsɛ́n yí yan, ló saji olépɛ lephan khɛ́n obhó mɔ́n ká mɛ́n hɔnsɛ́n yí apɛ hromɛn. Ábhwe lókɔn, lo phrɛ tɔ se hɔ́n ye, ló lo phrɛ kranman hɔ́n salé tɛmɛ ɔ́n hámwanhɛ́n lóphɔ: ló néphan khɛ́n etɛ́ áyí yábhɛ lókɔn, lo Hwánthe bha tɛ́ yí dri wo phɔ.

⁷ Yankan ché ache lo, ńnɛn che lo lée lo bha lí gbakhre, lókhɛ́n ńche lo lée lo bha tɛ́ áyí atɛ créncré.

⁸ Lóhɛ́nthé lephan kasé ɛhɔ́n ábhwetɔ́ lókɔn fɔ́nká bu, áleli lephanmi nɔn ɛhɔ́n fɔ́nká bu, lókhɛ́n Yankan nɔn ɛhɔ́n fɔ́nká bu, ló Yankan lókɔn, mɛ́n nɔn ńni lephan esé hɔ́n Nánnánmi Créncré.

⁹ Áleli salé lo bhá tɛ́ hrɔ́ lo sé hɔ́n, ló ápɔ́ abha hɔ́n le hɔ́n hɔnsɛ́nhɔn ɔ́nmɔn thethé mímíbhú hrómɛn, lo bhá tɔ lóbhwe sé hɔ́n yé; lókhɛ́n Yankan nbrɛn nɔn ábha lie hɔ́n lósi ɔ́n ma khɔ́ pɔ́ hɔ́n bɛn nbrɛn.

¹⁰ Ló mímí nbrɛn, Masedwánɛn gotho, lósi ɔ́n khɔ tɛ yí hɔ́n hɔnsɛ́nhɔn khúnbrɛn phɔ, lónɔn ali lókɔn. Lóhɛ́nthé lo hɔnsɛ́nhɔn, lo éla hɔ́n, áyí lókɔn ɔ́n tɛ, tɛmɛ ɔ́n tɛ́ obhɔ́tho.

¹¹ Hɔ́n yítɛ́ hrómɛn, tɛmɛ ɔ́n tɛ́ khékhremɛn, ló ńthɛ́nkhwálé obhá hɔ́n le hɔ́n jɔn ɔ́nmɔn thethé, tɛmɛ ɔ́n ní júmán, ló ɔ́n gɛ hɔ́n nɛnlí sa lósi yábhɛ lo khɔ kranman hɔ́n.

¹² Kasé hɔ́n etɛ́ lóyábhɛ nɛn, ɔ́n ma chɛ́ néphan aleli krethiɛn bha ji hɔ́n, ló ɔ́n ma le khɔ́ néphan khúmɛ́n khúmɛ́n sá nɛn lí.

Hwánthe ka ábha sáji bhá

¹³ Hɔnsɛ́nhɔn, lo énɛn salé néphan akhu, wo phɔ ɔ́n yé ábhwe mímí, ló áphɔ olé gbɔn hɔ́n, sa néphan ale bho wo mwasrui tre Yankan tho.

¹⁴ Lo bhu mímí salé Jezwi khu, ló ńcu ma mɛpɔ́: lóyábhɛ brɛ, lo bhu mímí salé néphan abhu Yankan mímí khɛ́n akhu, Jezwi hɛ́n hrómɛn, Yankan bha chɛ́ wo bhá mɛpɔ́.

¹⁵ Ábhwe lókɔn khɛ́n thénthé lo étɔ sé hɔ́n yé, lo Hwánthe nɔn atɔ: lo khúnbrɛn khɛ́n lo bhá bhá mɛpɔ́ lóka lo Hwánthe bha sáji bhá, áleli lo nɔn lo bhá thwási khɛ́n ábha sé néphan akhu.

¹⁶ Áyí khɛ́n ebhá tɛ́, lónɔn ali lókɔn: óbha yé átɔ́ khrákhrá bɛn, Yankan-mranchɛ́wo bhrɔ́khó bha khánlé, Yankan mrakáta bha dɛn, ló lo Hwánthe bha chántho dithé, ló néphan abhu Krisi mímí khɛ́n akhu, wo nɔn wo bhá thwási chán khúnɔn mɛn fe,

¹⁷ lómánji, lo khúnbrɛn lókɔn khɛ́n lo bhá bhá mɛpɔ́ ábha di lóka lókɔn, lo le wo ɔ́nmɔn nɔn wo bhá khɔ́ mɔngú mɔngú hromɛn khwɛ́n lo ló átho, lo bhá ywɛnlí lo Hwánthe lóne, ló lo bhá bhá lo Hwánthe phɔ ákakhúnbrɛn.

¹⁸ Ló tɛmɛ ɔ́n mó ábhwetɔ́ lókɔn khwá hɔ́n bɛn nbrɛn thɛ́n lé.