1 TESALONÍKHI KHÚBHƐ́NƐ́N 3 - Ebrié New Testament 1996

¹ Lómánji, lóka lo yɛn salé lo bha lé gɛ cu chré mɔ́n npɔhɔ́n, lóhɛ́nthé lo nkɛé lo ánchán lo bhá chré Atɛ́nɛn khúbhɛ́,

² lóka lókɔn nɔn lo chɛ lo hɔnsɛ́n Thimote olo gɛ hɔ́n, mɛ́n nɔn ńni lephan lo le mɛ́n ɔ́nmɔn lo elí júmán sé Yankan, lóka lo étɔ Krisi Bhwe Bhwábhwá lókɔn sé néphan yé. Lo chɛ annó hɔ́n yéne, ankhɔnmán hɔ́n phɔ, ló andɔnmán hɔ́n mɔ́n hɔ́n júmánlí hrómɛn,

³ ochɛ́sé hɔ́n hrómɛn, olépɛ lephan khɛ́n ágbrelí lókɔn lo gɛ, ose áphɔgbɔ́n. Hɔ́n nbrɛn ɔ́n yɛn salé ágbrelí lókɔn lo gɛ, áli Yankan thɛ́n yí apɔ.

⁴ Lóka lo bha hɔ́n phɔ, lo phrɛ kranman hɔ́n salé, cíbɛn wo bhá lri lo gbre; ló hɔ́n lɔ ɔ́n yɛn salé ábhwe lókɔn lo tɔ, lóyí nɔn thénthé etɛ́.

⁵ Lóhɛ́nthé, lóka mɛn yɛn salé mɛn man nɛ́n gɛ chré mɔ́n npɔhɔ́n, lónɔn mɛn chɛ Thimote olo wú hɔ́n júmán si ɔ́n khɔ hɔ́n elí mímíbhú hrómɛn. Lóka lókɔn, mɛn mu salé logbo bha sú hɔ́n wú, ló lo júmán khúnbrɛn lókɔn lo li se hɔ́n, ábha liá.

⁶ Thénthé Thimote saji bha gɛ lo, ló ábhwe khɛ́n ńmo man se lo ɔn, áli ábhwe bhwábhwá. Hɔ́n mímíbhú le hɔ́n pɔ́ ɔ́n pɛ hɔ́n júmánlí hrómɛn, lóbhwe nɔn ńtɔ se lo ye. Ńkránman lo lée, ákakhúnbrɛn lo bhwe édi hɔ́n mwanhɛ́n, ló hɔ́n énɛn ɔ́n wú lo, sa lósi lo lɔ lo khɔ lo énɛn lo wú hɔ́n a.

⁷ Lo gbrelí khúnbrɛn hrómɛn, le lo yíkhúphɔ khúnbrɛn hrómɛn, lo hɔnsɛ́nhɔn, hɔ́n phɔ thénthé lo thɛ́n khwalé, hɔ́n mímíbhú nɔn achɛ lo thɛ́n khwalé,

⁸ thénthé lo yɛn salé ɔ́n gɛlé ya lo Hwánthe phɔ, ló áli áphɔhá sé lo.

⁹ Hɔ́n hɛ́nthé lo gɛ lá Yankan nansi, lo élɛ nansi áphɔhá khɛ́n mɛ́n hɛ́nmɛn lo gɛ hɔ́n phɔ hɛ́nthé.

¹⁰ Ńcrɔ́n le mréci, lo ébhi Yankan lo thɛ́n khúnbrɛn hrómɛn salé anchɛ́ lo lo wú hɔ́n, lo di hɔ́n ntakhú, ló ochɛ́sé hɔ́n mímíbhú hrómɛn, áyí khɛ́n emián hɔ́n, lo dɔnmán hɔ́n mɔ́n.

¹¹ Tɛmɛ Yankan bɛn nbrɛn ali lo The, le lo Hwánthe Jezwi ohá mwanhɛ́n tɛ́ ásitó ká lo lé, ochɛ́sé lo gɛ di hɔ́n ntakhú, ló lo wú hɔ́n!

¹² Tɛmɛ lo Hwánthe ochɛ́sé ápɔ́ abha hɔ́n bɛn nbrɛn thethé le ápɔ́ ɔ́n pɛ se néphan khúnbrɛn, lópɔ́ lókɔn othúbhɔ, ló otɛ́sa lo pɔ́ yábhɛ si lo khɔ pɔ hɔ́n.

¹³ Lo The Yankan hɛ́nmɛn, kasé hɔ́n etɛ́ lóyábhɛ nɛn, lo Hwánthe bha khɔnmán hɔ́n phɔ, hɔ́n yítɛ́ bha priman, ló ɔ́n ma lí néphan bɛn wo khwɛn hɔ́n tre njɛ se Yankan, lóka lo Hwánthe le mɛ́n gbemán khúnbrɛn ɔ́nmɔn bha sáji bhá.