1 TESALONÍKHI KHÚBHƐ́NƐ́N 2 - Ebrié New Testament 1996

Phɔ́lu júmán ali Tesaloníkhi khúbhɛ́

¹ Lo hɔnsɛ́nhɔn, hɔ́n nbrɛn lɔ ɔ́n yɛn salé: áleli wɛ́-nwɛ́ mɛn nɔn lo lo hɔ́n yéne.

² Ɔ́n yɛn salé lócí, Filíphu khúbhɛ́nɛ́n phrɛ ta lo, wo phrɛ tɛ lo yíléle, lómánji khɛ́n lo lo gɛ hɔ́n Tesaloníkhi khúbhɛ́. Lóne néphan gɛ lo ɔ́nmɔn éswan, lótɛ khɛ́n Yankan se lo sɛ́npɛ́ lo gɛ tɔ Ábhwe Bhwábhwá lókɔn se hɔ́n ye. Ló Ábhwe Bhwábhwá lókɔn, áli áyíbɛn achan Yankan yé.

³ Ábhwe lókɔn lo bho bha se hɔ́n, ále chan áphɔkhrɛ yítɛ́ hrómɛn, saji ále chan hɛ́nphebhú phromɛn hromɛn, ló ábhwe lókɔn hromɛn, lo le tɔlé lo khrɛ lephan.

⁴ Lókhɛ́n lóbhwe khúnbrɛn lókɔn hromɛn, Yankan bhwe apɔ salé lo tɔ, lónɔn lo étɔ. Lókhɛ́n Yankan yɛn salé lo li néphan ógɛ bhó Ábhwe Bhwábhwá lókɔn há lo mɔ́n mɛn. Lo júmánlí hrómɛn, áleli néphan nɔn lo énɛn lo tɛ́ yí pɔ́ mɛ, lókhɛ́n lo énɛn lo tɛ́ yí pɔ́ Yankan mɛ. Ló Yankan nɔn ali lephan ayɛn lo thɛ́n hrómɛn bhwe khúnbrɛn.

⁵ Ɔ́n yɛn salé lóka lo bha hɔ́n yéne, lo le tɔ bhwe míthé wrɛ́ mɛn pán bia hɔ́n, lo bhwetɔ́ hrómɛn álepɛ jɛtɛn mɛhɛ́ngɛ́, Yankan li lo ndalefɛ.

⁶ Lo le nɛn salé néphan obhó áhwalri sé lo, hɔ́n khɛ́n lo le hɔ́n ɔ́nmɔn lo elí júmán lɔ, saji néphan nankhɛ lɔ;

⁷ Krisi-mranchɛ́mán lókɔn lo li, ágɛ chɛ́ lo sá hɔ́n yí ádwasan mɛn. Lókhɛ́n léliló, lóka lo bha hɔ́n yéne, lo tɛ yí ńthɛ́n pɛ́tɛ mɛn, lo tɛ yí sa bhie bɛn ehá mɛ́n miɔn mwanhɛ́n.

⁸ Lo pɔ́ lo pɔ hɔ́n hɛ́nthé, áyí lo hamwanhɛ́n ya lo énɛn lo bhó sé hɔ́n, áleli Ábhwe Bhwábhwá lókɔn achan Yankan yé lómíbrɛ pán, lókhɛ́n lo bɛn nbrɛn mɛpɔ́bhá lɔ, lo bhá bhó káne sé hɔ́n. Átɛsalé ɔ́n ni néphan bɛn lo pɔ hɔ́n banban!

⁹ Mímí nbrɛn lo hɔnsɛ́nhɔn, lo júmánlí hrómɛn, áyí si akhɔ dri lo phɔ, tɛmɛ lóbhwe odi hɔ́n mwanhɛ́n: lo li júmán ńcrɔ́n le mréci, lóhɛ́nthé lo bha lé gɛ bhi hɔ́n yíɛkɛ lóka lo étɔ Ábhwe Bhwábhwá lókɔn achan Yankan yé sé hɔ́n yé.

¹⁰ Ábhwe lókɔn hromɛn, hɔ́n lɔ ɔ́n ni lo phɔ ndalefɛ, ló Yankan lɔ li lo phɔ ndalefɛ: lóthé nɔn ali salé hɔ́n khúnbrɛn khɛ́n ɔ́n mu Yankan mímí, lo yí si lo khɔ tɛ hɔ́n phɔ, áli yíbɛn achan, apriman, ló álepɛ áphɔkhrɛ lóhrómɛn.

¹¹ Ɔ́n yɛn salé lósi lo khɔ gɛ hɔ́n brɛ brɛ khúnbrɛn ɔ́nmɔn tɛ yí, átɛsa ńmiɔ́-óthe si akhɔ́ gɛ mɛ́n miɔn ɔ́nmɔn tɛ́ yí.

¹² Lónɔn ali salé lo tɔ bhwe khɔnman hɔ́n phɔ, lo tɔ bhwe khwa hɔ́n thɛ́n lé, ló lo tɔ bhwe ha hɔ́n salé tɛmɛ ɔ́n tɛ́ yí opɔ́ Yankan mɛ. Yankan lókɔn, mɛ́n nɔn ńche hɔ́n ma mɛ́n phɔ salé anmó mɛ́n Bhringbi khúbhɛ́ le mɛ́n nguhá ɔ́nmɔn sé hɔ́n.

¹³ Ló ácu pɛ ábhwe nankhɛ lóhɛ́nthé ákakhúnbrɛn lo elá Yankan nansi: Lóka khɛ́n lo bho Yankan bhwe bha se hɔ́n, ɔ́n dɛn ye ábhwe lókɔn, ló ɔ́n dɛn do, ló ábhwe lókɔn, áleli lephanmi bhwetɔ́, lókhɛ́n áli Yankan bhwetɔ́ mímí nbrɛn. Átɛsalé hɔ́n khɛ́n ɔ́n mu mímí, Yankan bha hɔ́n phɔ elí júmán.

¹⁴ Hɔnsɛ́nhɔn, áyí wo tɛ hɔ́n, lónɔn wo bho tɛ Yankan-gbemán abha Jude gotho, wo lókɔn khɛ́n wo li Yankan néphan abhu Jezwi-Krisi mímí. Ágbrelí lókɔn ɔ́n gɛ, áchan hɔ́n nbrɛn khúbhɛ́nɛ́n yéne, sa lósi lócí wo lɔ, Jwifunɛ́n khɔ lri wo lógbre yábhɛ brɛ.

¹⁵ Wo Jwifunɛ́n lókɔn, wo nɔn wo wɛn lo Hwánthe Jezwi le bhwetɔ́trémán khúnbrɛn athwasi, saji lo lɔ wo lri lo lógbre yábhɛ brɛ. Wo yí wo etɛ́, ále pɔ Yankan mɛ, ló wo sa néphan khúnbrɛn mɛ!

¹⁶ Wo li néphan bɛn, ale pɔ salé lo tɔ Ábhwe Bhwábhwá lókɔn sé néphan aleli Jwifunɛ́n, Ábhwe Bhwábhwá lókɔn khɛ́n ali áyíbɛn ágɛ swa wo. Áyí yábhɛ lókɔn wo etɛ́, áchɛ́se wo ne khúnbrɛn wo tɛ adi ncɛ́n, thénthé ásimɛ́n. Lókhɛ́n ló aphu, Yankan thɛ́nyan bha wo tho.

Phɔ́lu énɛn awú Tesaloníkhi khúbhɛ́nɛ́n

¹⁷ Hɔnsɛ́nhɔn, lo-ɛ, lóka lo bha thwethwemɛn ácí kpɛ́bɛn hromɛn – lóka lókɔn mímí nbrɛn lo bha thwethwemɛn ńnánmí hrómɛn -, lókhɛ́n lo thɛ́n hrómɛn, lo le bha thwethwemɛn, átɛsalé lóka khúnbrɛn lókɔn, hɔ́n bhwe édi lo mwanhɛ́n, hɔ́n ekhú lo mwa, ló lo énɛn lo wú hɔ́n.

¹⁸ Lo énɛn lo sáji lo gɛ hɔ́n. Mɛn Phɔ́lu nbrɛn lɔ, mɛn tɛ nɛn li ndɔn mɔn, lókhɛ́n Abhɔsɛ́mɔ́n le dɛn lo ló hɔ́n yé.

¹⁹ Hɔ́n míbrɛ pán nɔn ɔ́n ni néphan lo bho lo mwasrui tre hɔ́n tho, áleli néphan nankhɛ, hɔ́n nɔn ɔ́n ni lo phɔhá le lo mɔ́ndípha ali áyí lo bhá bhó fúmɛ́n lo Hwánthe Jezwi hɛ́nmɛn, lóka ánman sáji má.

²⁰ Ee, mímí nbrɛn, hɔ́n nɔn ɔ́n ni néphan lo bho lo efúmɛ́n, hɔ́n nɔn ɔ́n ni lo phɔhá!