1 TESALONÍKHI KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Lo khɛ́n lo tɛ áhrɔ́ lókɔn, lo nɔn wo li Phɔ́lu, Silási le Thimote. Lo tɛ áhrɔ́ lókɔn se Yankan-gbemán abha Tesaloníkhi khúbhɛ́, ló Yankan-gbemán lókɔn, wo nɔn wo li Yankan ali Nthe le lo Hwánthe Jezwi-Krisi ɔ́nmɔn néphan: Tɛmɛ áphɔlíman le ńthɛ́nkhwálé ogɛ hɔ́n.

Tesaloníkhi khúbhɛ́nɛ́n, wo yítɛ́ le wo mímíbhú

² Ákakhúnbrɛn lo elá Yankan nansi sé hɔ́n khúnbrɛn, ló lo yankanla hromɛn, lo étɔ hɔ́n phɔ bhwe sé Yankan.

³ Átɛsalé lo The Yankan hɛ́nmɛn, hɔ́n si ɔ́n khɔ tɛ yí, lóbhwe édi lo mwanhɛ́n, lósi ɔ́n khɔ li júmán mímíbhú hrómɛn, lósi hɔ́n pɔ́ hrómɛn, ɔ́n khɔ li júmán khékhremɛn, ló hɔ́n mwasrui khɛ́n ɔ́n mo tre lo Hwánthe Jezwi-Krisi tho, áli áyíbɛn agɛlé tre.

⁴ Lo hɔnsɛ́nhɔn, lo yɛn salé Yankan pɔ hɔ́n, ló ńsan hɔ́n salé ɔ́n ní mɛ́n néphan.

⁵ Ábhwe Bhwábhwá lókɔn lo bho bha se hɔ́n, áleli lo bhwetɔ́ hrómɛn pán, lókhɛ́n áli ńsɛ́npɛ́ le Nánnánmi Créncré mɔ́ndɔ́nman hromɛn. Lókhɛ́n lo thɛ́n khúnbrɛn hrómɛn, lo yɛn salé ábhwe lókɔn, áli ábhwe mímí. Ɔ́n yɛn lósi lo khɔ tɛ yí hɔ́n thethé lóka lo bha hɔ́n yéne, ló hɔ́n mwá hɛ́nthé nɔn lo tɛ áyí khúnbrɛn lókɔn.

⁶ Lo yí si lo khɔ tɛ, lo Hwánthe yí si akhɔ tɛ, hɔ́n lɔ tɛmɛ ɔ́n tɛ́ lóyábhɛ brɛ. Ɔ́n gɛ áyíkhúphɔ búdúbúdú, lótɛ khɛ́n ɔ́n khɔ lóhrómɛn gɛ Yankan bhwetɔ́ ali áphɔhá achan Nánnánmi Créncré hrómɛn.

⁷ Lóhɛ́nthé Masedwánɛn le Akayi ɔ́nmɔn gotho, Yankan-gbemán hrómɛn, hɔ́n nɔn ɔ́n ni néphan lephan khúnbrɛn ebhó hɔ́n thwelí bhwe tɔ.

⁸ Lo Hwánthe bhwetɔ́ lókɔn achan hɔ́n yéne, áleli Masedwánɛn le Akayi ɔ́nmɔn gotho brɛ pán ádi, lókhɛ́n hɔ́n mímíbhú ɔ́n mo tre Yankan tho, lóbhwe lehɛ́n pi si khúnbrɛn, ló álepɛ ábhwe bɛn khɛ́n lo gɛ tɔ káne.

⁹ Hɔ́n si ɔ́n khɔ do lo lóka lo di hɔ́n yéne, hɔ́n si ɔ́n khɔ chan ńmo yítɛ́ phɔ féne lo gɛ Yankan, néphan khúnbrɛn étɔ lóbhwe. Yankan lókɔn khɛ́n hɔ́n elí mɛ́n júmán, mɛ́n nɔn ńni Yankan mímí abha mɛpɔ́.

¹⁰ Ló ɔ́n chre hɔ́n ébo mɛ́n Bhi ochán tho bhá, mɛ́n Bhi Jezwi lókɔn khɛ́n ńchɛ chan khúnɔn mɛn fe. Ló Yankan kwabhɔ́ lókɔn abha hɛ́nmɛn ebhá, mɛ́n nɔn ńni lephan ebhá swa lo yɛn lóhrómɛn.