1 PIƐ 5 - Ebrié New Testament 1996

Tɛmɛ ɔ́n há Yankan gbankhran mwanhɛ́n

¹ Thénthé néphan ali mrɔ́khómán Yankan-gbemán hrómɛn, wo phɔ bhwe nɔn mɛn mán tɔ. Mɛn lɔ mɛn ni bhrɔ́khó Yankan-gbemán hrómɛn, ló Krisi mɛ́n yí akhuiphɔ, mɛn ni lóndalefɛlíwo, ló ńguhá lókɔn khɛ́n Yankan ebhá bhó lie néphan, mɛn lɔ mɛn gɛ lóphɛ́nta. Ló mrɔ́khómán lókɔn nɛn lóyí mɛɛ́n nɛn lée wo tɛ́:

² ló ńgbankhran lókɔn khɛ́n Yankan khwɛn ha hɔ́n mɔ́n mɛn, tɛmɛ ɔ́n há wo mwanhɛ́n sa gbankhran-bówo si akhɔ́ bo mɛ́n gbankhran. Ɔ́n mó thɛ́nbhwá mɛn bo ńgbankhran lókɔn sa lósi Yankan khɔ pɔ, ló ɔ́n ne tɛ́ yí ńthɛ́n léle mɛn. Tɛmɛ ɔ́n ní hɔ́n júmán, ló léli jɛtɛn ɔ́n ma gɛ hɛ́nthé, lókhɛ́n ɔ́n khɔ́ thɛ́nbhwá mɛn lí júmán.

³ Néphan khɛ́n wo khwɛn ha hɔ́n mɔ́n mɛn hɔ́n ébo, ɔ́n ne pháya wo tho ádwasan mɛn, ló tɛmɛ ńgbankhran owú hɔ́n yí si ɔ́n khɔ hɔ́n etɛ́, lo wo lɔ wo tɛ́.

⁴ Ló lóka ńgbankhran-bómán wo The bha thándi, ánman sé hɔ́n nguhá kpró lókɔn khɛ́n ali áyíbɛn atre efí ákakhúnbrɛn.

⁵ Lóyábhɛ brɛ, ńmiɔ́-nsɛ tɛmɛ ɔ́n ji mrɔ́khómán, ló hɔ́n khúnbrɛn ɔ́n ní nfɛkhumán, ochɛ́sé ɔ́n ní júmán sé hɔ́n bɛn nbrɛn. Ló Yankan hrɔ́ étɔlé: “Yankan gɛ néphan efúmɛ́n ɔ́nmɔn éswan, lókhɛ́n anmó thɛ́nbhwá mɛn tɛ́ yí sé nfɛkhumán.”

⁶ Lóka mɛ́n cí ńmo tre bha sí, tɛmɛ ɔ́n hɔ́n hɔ́n bɛn nbrɛn bháthé Yankan sɛ́npɛ́wo hɛ́nmɛn, ló ochɛ́sé mɛ́n, ankhwɛ́n hɔ́n jetho.

⁷ Tɛmɛ ɔ́n khwɛ́n hɔ́n thɛ́nlí khúnbrɛn bha há mɛ́n tho, átɛsalé mɛ́n nɔn ńni lephan ehá hɔ́n mwanhɛ́n.

⁸ Tɛmɛ ɔ́n hámwanhɛ́n, ló ɔ́n mraya! Átɛsalé hɔ́n mɛsawo ali logbo éjekhalí hɔ́n sa gbangɔsɔ́bhrɛ bɛn ethɔ́n, ló ánnɛn lephan bɛn anhɔ́n tha.

⁹ Tɛmɛ ɔ́n gɛlé ya hɔ́n mímíbhú hrómɛn, ló ɔ́n gɛ ɔ́nmɔn swan, tɛmɛ ɔ́n yɛ́n salé hɔ́n hɔnsɛ́nhɔn khɛ́n achranmanlé pi áthéji khúnbrɛn, wo lɔ wo bha lóyíkhúphɔ brɛ lókɔn hromɛn.

¹⁰ Lókhɛ́n lóka áyí bha khú hɔ́n phɔ ácí kpɛ́bɛn hromɛn, Yankan khɛ́n apɛ áphɔlíman khúnbrɛn, lókhɛ́n ache hɔ́n salé ɔ́n ma ká mɛ́n nguhá álephú hrómɛn lóka ɔ́n ma Krisi phɔ ɔn, Yankan lókɔn, mɛ́n bɛn nbrɛn ánman chɛ́ ɔ́n ma yɔ́n bhɔ́tho, mɛ́n bɛn nbrɛn ánman khɔnmán hɔ́n phɔ, ló ánman khwɛ́n hɔ́n ya ási agɛlé.

¹¹ Yankan lókɔn, tɛmɛ ńsɛ́npɛ́ olí mɛ́n ékɛ ákakhúnbrɛn! Amɛn.

Piɛ krethiɛnmán ébhi aphuji

¹² Silási nɔn adɔnman mɛn mɔ́n mɛn tɛ áhrɔ́ bhri lókɔn mɛɛ́n thu hɔ́n. Silási lókɔn, mɛn mo-e tɛ mɛn hɔnsɛ́n bɛn agɛlé ya mɛn phɔ. Mɛɛ́n nɛn mɛn khɔnmán hɔ́n phɔ, ló mɛn chɛ́ hɔ́n yɛ́n salé áyí khɛ́n óche Yankan phɔlíman, lónɔn ali lókɔn, ló tɛmɛ ɔ́n gɛlé ya lóhrómɛn.

¹³ Yankan-gbemán abha Babilɔ́nɛn khúbhɛ́, khɛ́n ali néphan bɛn Yankan san wo sa hɔ́n, wo lɔ wo ébhi hɔ́n. Mákhi ali mɛn mi, mɛ́n lɔ ánmi hɔ́n.

¹⁴ Tɛmɛ ɔ́n mɔ́ hɔ́n bɛn nbrɛn yí ápɔ́ hrómɛn. Ló hɔ́n khúnbrɛn lókɔn khɛ́n ɔ́n ni Jezwi-Krisi néphan, tɛmɛ ńthɛ́nkhwálé obhá hɔ́n phɔ.