1 KHORƐ́NTHI KHÚBHƐ́NƐ́N 9 - Ebrié New Testament 1996

Lephan ali Krisi-mranchɛ́wo, mɛ́n yí ángɛ tɛ́, le mɛ́n júmán ángɛ ní

¹ Wú mɛn-ɛ mɛn nɛn ni líhɛ? Wú mɛn-ɛ mɛn nɛn ni Krisi-mranchɛ́wo? Wú mɛn-ɛ mɛn nɛn wu Jezwi ali lo Hwánthe mɛn mɛbhí mɛn? Mɛn júmán mɛn ni se lo Hwánthe, wú léli hɔ́n nɔn ɔ́n ni lómí aso?

² Ló kasé néphan nankhɛ le bhú salé mɛn ni Krisi-mranchɛ́wo, hɔ́n-ɛ ɔ́n gɛ yɛ́n salé mímí nbrɛn mɛn ni Krisi-mranchɛ́wo. Lo Hwánthe phɔ lókɔn ɔ́n ma, lónɔn élie néphan salé mímí nbrɛn, mɛn lɔ mɛn ni Krisi-mranchɛ́wo.

³ Ló néphan lókɔn khɛ́n abha mánji élrɛ mɛn bhwe, mɛɛ́n mi wo lée:

⁴ mɛn júmán mɛn ní, wú mɛn-ɛ áleyɔn salé néphan osé mɛn lóphɔ nɛn mɛn ní, lóphɔ ndu mɛn nán?

⁵ Wú mɛn-ɛ mɛn nɛn gɛ mɔ́nsi mɛn phɛ́n bhie ali krethiɛn, ló mɛn do-e ká phɔ ɔ́nmɔn khali sa lósi Krisi-mranchɛ́mán khúnbrɛn khɔ etɛ́, sa lósi lo Hwánthe mɛ́n hɔnsɛ́nhɔn le Piɛ ɔ́nmɔn khɔ etɛ́?

⁶ Ló mɛn le Banabási ɔ́nmɔn ɔn, wú lo mɔn tɛɛ nɔn lo bhá lí júmán gbɛ lo bɛn nbrɛn?

⁷ Wú cíbɛn ɔ́n phrɛ ye salé ngbuwo abha ngbu hromɛn, mɛ́n nbrɛn ánsaya phɛ́ mɛ́n phɔ yí? Ló abɛn nɔn ábha ha kóko mɛ́n gɔn, lókhɛ́n anman nɛ́n kɔ́ní? Saji abɛn nɔn ali gbankhran-bówo, lókhɛ́n anman nɛ́n nán mɛ́n nbranmán yɛ́ndu?

⁸ Áthéji yí wo ewú, lónɔn mɛn mó thweli bhwe tɔ sé hɔ́n, lókhɛ́n wú ábidí le phrɛ tɔ ábhwe khúnbrɛn lókɔn?

⁹ Moyízi bidí étɔlé: “Ndwa khɛ́n ɛhɔn elí júmán hɛ gɔn, ɛle bhó ábhɛ́ gɛ mɛ́n mɛ́n phúsi.” Thénthé ógɛ bhi lée, wú ndwa bhwe nɔn éjan Yankan thɛ́n,

¹⁰ lée nka lo bhwe nɔn Yankan étɔ? Mímí nbrɛn, lo nɔn wo lrɛ ábhwe lókɔn se lo. Átɛsalé lephan khɛ́n éha nyámí, le lephan khɛ́n ébwan nyámí, wo mɔ́nmɔn wo elí júmán wo mwasrui hromɛn salé ńyámí lókɔn wo ébwan, lephan brɛ ogɛ mɛ́n ékɛ lóhrómɛn.

¹¹ Ńyámí lókɔn wo bho ha hɔ́n thɛ́n hrómɛn, áli nánnánmi nyámí, ló kasé ńnánmí hrómɛn lo esá hɔ́n áyíbɛn ali ńnɛn le ńdu, kalósi akhɔ tɛ khɛ́n lóbhwe lókɔn ácu tán hɔ́n hɛ́nmɛn npɔ e?

¹² Ló kasé néphan nankhɛ gɛ mɔ́nsi ábhi hɔ́n mɔ́ndɔ́nman yábhɛ lókɔn, lo mɔ́nsi lo gɛ hɔ́n tho ábanbrɛn wo ékɛ. Lókhɛ́n áyí yábhɛ lókɔn, cíbɛn lo ka sa hɔ́n. Lo nbrɛn lo dɛn do áyíkhúphɔ yábhɛ yábhɛ khúnbrɛn lókɔn ha lo tho, ochɛ́sé olépɛ áyíbɛn olɔ júmán lókɔn ali Krisi phɔ Bhwe Bhwábhwá lo étɔ sé néphan oyé.

¹³ Ɔ́n yɛn salé néphan abha Yankan-khúthé elí júmán, wo lɔ Yankan-nkhú nɔn ágbɛ wo, saji néphan khɛ́n élo ha npha sé ápasá ńphaha túprán hɛ́nmɛn, wo lɔ áyí wo bho wo éha npha, lónɔn ali wo nɛnlí.

¹⁴ Lóyábhɛ brɛ, lo Hwánthe nbrɛn phrɛ kranman lo lée, néphan khɛ́n étɔ Ábhwe Bhwábhwá lókɔn, wo lɔ, lóphɔ nɔn wo bhá khɔ́ gɛ wo nɛnlí.

¹⁵ Ló áyí khúnbrɛn lókɔn ali mɔ́ndɔ́nman mɛɛ́n gɛ mi hɔ́n, mɛn nɛn mi hɔ́n yíɛkɛ, saji léli lóhɛ́nthé nɔn mɛn tɛ́ áhrɔ́ lókɔn thu hɔ́n, ló ɔ́n mó lóyí lókɔn sé mɛn. Ábhwe Bhwábhwá lókɔn mɛɛ́n tɔ sé hɔ́n yé, lókhɛ́n mɛn nɛ́n do yíɛkɛ, áli áyíbɛn élimán mɛn, ló kasé áko bhwá nbrɛn mɛn khú lɔ, mɛn nɛn pɔ salé lephan bɛn ohɔ́n lónguhá lókɔn yɛn mɛn tho!

¹⁶ Ábhwe Bhwábhwá lókɔn mɛɛ́n tɔ sé néphan, lóhɛ́nthé mɛn nɛn gɛ mɔ́nsi mɛn fúmɛ́n. Áli júmán bɛn wo bho ha mɛn mɔ́n mɛn. Lóhɛ́nthé kasé khɛ́n mɛn nɛ́n dɛn tɔ Ábhwe Bhwábhwá lókɔn sé néphan yé, tɛmɛ muswe obhɔ́ mɛn.

¹⁷ Kasé áli mɛɛ́n nbrɛn mɛn do júmán lókɔn, ló áyɔn salé wo sɔ́n mɛn lópɛn, lókhɛ́n léliló, lókɔn áli júmán bɛn wo bho ha mɛn mɔ́n mɛn.

¹⁸ Ló bí pɛnsɔ́n yábhɛ mɛn mán gɛ lóhrómɛn? Mɛn pɛnsɔ́n mɛn mán gɛ, lónɔn ali áphɔlíman mɛn gɛ salé mɛn tɔ Ábhwe Bhwábhwá lókɔn sé néphan oyé, ló mɛn nɛ́n do wo yíɛkɛ, mɛn nɛ́n mi wo mɔ́ndɔ́nman ali mɛn nkpɔmanwo pɛnsɔ́n.

¹⁹ Mɛn ni líhɛ, ló mɛn nɛn ni lephan bɛn gangánwo. Lótɛ khɛ́n mɛn hɔn mɛɛ́n nbrɛn jrɛn gangánwo se néphan khúnbrɛn, ló mɛn wúsi khɔ́ gɛ néphan búdúbúdú.

²⁰ Lóka mɛn ní júmán Jwifunɛ́n hrómɛn, mɛn hɔn mɛɛ́n nbrɛn jrɛn Jwifu lephan, ló mɛn wúsi khɔ́ do Jwifunɛ́n sé Yankan. Mɛɛ́n nbrɛn mɛn nɛn ma Moyízi bidí hrómɛn, lókhɛ́n lóka mɛn le néphan abha ábidí hrómɛn ɔ́nmɔn lo elí júmán, mɛn tɛ́ yí sa lephan abha ábidí hrómɛn, ló mɛn wúsi khɔ́ do néphan éji ábidí sé Yankan.

²¹ Lóyábhɛ brɛ, lóka mɛn ní júmán néphan ale yɛn Moyízi bidí thethé, mɛn nɛ́n dɛn hɔ́n Moyízi bidí nká wo bhwetɔ́ hrómɛn, ló mɛn lɔ mɛn tɛ́ yí sa wo si wo khɔ́ tɛ́ yí, ló mɛn wúsi khɔ́ do wo sé Yankan. Lókhɛ́n áleli salé mɛn nɛ́n ji Yankan bidí, mɛn ni lephan bɛn abha Krisi bidí hrómɛn.

²² Lóka mɛn ma néphan khɛ́n wo mímíbhú enán hrómɛn, mɛn lɔ mɛn tɛ́ yí sa lephan mɛ́n mímíbhú enán, ló mɛn wúsi khɔ́ do wo sé Yankan. Lóhɛ́nthé, áyí khúnbrɛn hrómɛn, mɛn yɔ mɛɛ́n nbrɛn kalé se lephan khúnbrɛn, lónɔn wo hromɛn, mɛn mán tɛ́ khékhremɛn do néphan fe sé Yankan.

²³ Ábhwe Bhwábhwá hɛ́nthé nɔn mɛn tɛ́ áyí khúnbrɛn lókɔn, ló mɛn lɔ mɛn gɛ lómwá abha lóhrómɛn.

²⁴ Hɔ́n khúnbrɛn ɔ́n yɛn salé kasé wo elémɛ́n wá, néphan khúnbrɛn nɔn ágrɛ wá lo, lókhɛ́n lephan ewá brɛn néphan khúnbrɛn, mɛ́n míbrɛ nɔn ángɛ yí. Tɛmɛ hɔ́n lɔ ɔ́n wá lóyábhɛ nɛn, ló ɔ́n gɛ mɔ́ndípha pɛnsɔ́n.

²⁵ Néphan khúnbrɛn khɛ́n échwɛ lósi okhɔ́ wá, ápɛ ábidí khrákhrá sé wo, ló wo ji ábidí lókɔn, ńbi kpró wo bhá gɛ hɛ́nthé, akpró lókɔn ali áyíbɛn abha le tré mɔ́n. Lo krethiɛnmán lo lɔ, lo tɛsa néphan lókɔn khɛ́n elémɛ́n wá, lo bha áwá bidí khrákhrá hrómɛn, ochɛ́sé lo lɔ, lo gɛ mɔ́ndípha pɛnsɔ́n ali áyíbɛn ábha tré godo.

²⁶ Lóhɛ́nthé mɛn wá lókɔn mɛn wá, mɛn nɛn wá búbrumɛn, ló ádi lókɔn mɛn kú, mɛn nɛ́n kú yókho phɛ́khɔ́ tho.

²⁷ Mɛn tɛ́ yí khú mɛn nánmí phɔ, mɛn mo mɔ́n tre mɛn nánmí tho, ló ánnɛn gɛ tɛ́ mɛ́n yí ńpɔ. Mɛn nɛn pɔ salé lóka mɛn tɔ Ábhwe Bhwábhwá lókɔn se néphan ye, lókhɛ́n lómánji mɛn-ɛ wo tranmán mɛn.