1 KHORƐ́NTHI KHÚBHƐ́NƐ́N 8 - Ebrié New Testament 1996

Ńnán wo bho ha npha se ńfan

¹ Thénthé ábhwe lo ebhá tɔ, lónɔn ali ńnán khɛ́n néphan ebhó ha npha sé ńfan: Ee mímí nbrɛn “Lo khúnbrɛn lo pɛ ábhweyɛ́n”, sa lósi ɔ́n khɔ hɔ́n étɔ a. Lókhɛ́n ábhweyɛ́n yábhɛ lókɔn, áchɛ́ lephan fúmɛ́n, ápɔ́ nɔn ali áyí áchɛ́ lephan mímíbhú gɛlé.

² Lephan khɛ́n ebhú salé mɛ́n yɛn bhwe banban, lephan lókɔn ńka yɛn bhwe di lósi oyɛ́n bhwe di.

³ Lókhɛ́n lephan apɔ Yankan, ńni lephan bɛn Yankan yɛn.

⁴ Ábhwe lo ebhá tɔ lónɔn ali sa: wú áse mɔ́nsi salé krethiɛnmán otha ńnán khɛ́n wo bho ha npha se ńfan? Lo yɛn salé áthéji krɛn, ńfan le li yíɛkɛ, lókhɛ́n lo yɛn salé Yankan míbrɛ nɔn abháne.

⁵ Ló kasé ápɛ áyíbɛn bháne óche ńfan, khɔ átho o, khɔ áthéji krɛn o, – ló mímí nbrɛn, wo étɔlé ápɛ “ńfan” búdúbúdú le “Hwánthemánhɔn” búdúbúdú bháne, -

⁶ lókhɛ́n lo-ɛ, Yankan míbrɛ nɔn lo yɛn salé abháne, mɛ́n nɔn ńni lo The atɛ áyí khúnbrɛn, ló mɛ́n hɛ́nthé nɔn lo bha mɛpɔ́; ló saji lo yɛn salé ápɛ lo Hwánthe míbrɛ abháne, mɛ́n nɔn ńni Jezwi-Krisi, mɛ́n phɔ nɔn Yankan khɔ tɛ áyí khúnbrɛn, ló mɛ́n phɔ nɔn lo khɔ bha mɛpɔ́.

⁷ Lókhɛ́n ábhwe mímí lókɔn, néphan khúnbrɛn le yɛn. Néphan fe khɛ́n abha ńmo yítɛ́ hrómɛn atrɛ wo, thénthé nbrɛn lɔ, kasé wo elí nɛn yábhɛ lókɔn, wo cu bhú mwanhɛ́n salé ńnɛn lókɔn áli ńnɛn bɛn wo hɛn se ńfan. Wo li néphan bɛn wo nánnánmi esókhú, ló wo ebhú salé ńnɛn lókɔn wo li, áli muswe sé wo.

⁸ Ńnɛn lókɔn lo elí, léli lónɔn ábha hɔ́n lo tígbalí Yankan phɔ: kasé lo le li nɛn lɔ, ále gɛ tɛ́ yíɛkɛ sé lo, saji kasé lo elí nɛn lɔ, lo bha lé gɛ yíɛkɛ lóhrómɛn.

⁹ Lókhɛ́n, tɛmɛ ɔ́n hámwanhɛ́n, ló hɔ́n yítɛ́ ole chɛ́ néphan wo mímíbhú le gɛlé, wo hálé ńne hrómɛn.

¹⁰ Ló mímí, kasé lephan khɛ́n mɛ́n nánnánmi ephɛ́, anwú hɛ lókɔn ɛli lephan ɛpɛ “ábhweyɛ́n”, ɛchre ńfan khúthé ɛlí nɛn, lóyí yábhɛ lókɔn ɛtɛ́, wú abha le se sɛ́npɛ́, mɛ́n lɔ anno ní nɛn wo bho ha npha se ńfan?

¹¹ Ló lephan lókɔn khɛ́n mɛ́n mímíbhú ephɛ́, ali hɛ hɔnsɛ́n bɛn mɛ́n hɛ́nthé Krisi bha khu, lephan yábhɛ lókɔn kasé hɛ bhweyɛ́n bha chɛ anniá, wú áyɔn?

¹² Kasé ɛtɛ́ ne sé hɛ hɔnsɛ́n khɛ́n mɛ́n mímíbhú le gɛlé, lókhɛ́n ɛchɛ́ áyí khú mɛ́n nánnánmi phɔ, átɛsalé Krisi bɛn nbrɛn nɔn ɛtɛ́ ne se.

¹³ Lóhɛ́nthé, kasé ńnɛn li áyíbɛn ábha chɛ́ mɛn hɔnsɛ́n hálé ńne hromɛn, ló áleyɔn sa mɛn cu tha ńnán wo bho ha npha se ńfan, ochɛ́sé mɛn hɔnsɛ́n ole hálé ńne hromɛn.