1 KHORƐ́NTHI KHÚBHƐ́NƐ́N 7 - Ebrié New Testament 1996

Sɛphɛ́n le bhiephɛ́n ɔ́nmɔn bhwetɔ́

¹ Thénthé mɛn mán tɔ ábhwe khɛ́n lóhɛ́nthé ɔ́n tɛ hrɔ́ thu mɛn: Wú áyɔn salé lephan ole phɛ́n bhie?

² Lókhɛ́n ágbakhre abanban hɛ́nthé, áyɔn salé sɛ brɛ ɛpɛ hɛ bhia, ló bhie brɛ lɔ opɛ mɛ́n ca.

³ Áyɔn salé sɛ lɔ, júmán ali bhie nca júmán alí, tɛmɛ anní sé mɛ́n bhia; ló bhie lɔ, áyɔn salé júmán ali sɛ mia júmán alí, tɛmɛ anní sé mɛ́n ca. Áyɔn salé lephan brɛ hɛ jɔ yí énɛn, tɛmɛ ɛtɛ́ se.

⁴ Bhie le gɛ mɔ́nsi mɛɛ́n nbrɛn nánmí tho, lókhɛ́n mɛ́n ca nɔn agɛ mɔ́nsi mɛ́n nánmí tho, lóyábhɛ brɛ, sɛ lɔ le gɛ mɔ́nsi mɛɛ́n nbrɛn nánmí tho, lókhɛ́n mɛ́n bhia nɔn agɛ mɔ́nsi mɛ́n nánmí tho.

⁵ Bhie lɔ áleyɔn sa anmó mɛ́n phɔ nánmí lwɛlí mɛ́n ca, ló saji sɛ lɔ áleyɔn sa anmó mɛ́n phɔ nánmí lwɛlí mɛ́n bhia. Lókhɛ́n kasé elí yankanla hɛ́nthé, tɛmɛ hɔ́n mɛ́n osí ló ɔ́n wúsi khɔ́ la Yankan mwámwá, lókhɛ́n ole mɔ́n, ló lómánji tɛmɛ ɔ́n cu bhá sibrɛ ochɛ́sé Abhɔsɛ́mɔ́n ole sú hɔ́n wú lóka yábhɛ lókɔn khɛ́n ɔ́n ne hamwanhɛ́n ya.

⁶ Ábhwe lókɔn mɛɛ́n tɔ, áleli ábidí mɛɛ́n ha sé hɔ́n, lókhɛ́n áli áhá pán mɛɛ́n ha hɔ́n.

⁷ Mímí nbrɛn, mɛn pɔ salé néphan khúnbrɛn otɛ́ mɛn yí yábhɛ mɛɛn tɛ́, lókhɛ́n lephan brɛ ápɛ hɛ yí yábhɛ Yankan se hɛ: ápɛ lephan bɛn Yankan bha sé hɛ áyí lókɔn, lókhɛ́n lephan lójɔ, Yankan bha sé hɛ áyí nánkhɛ.

⁸ Ló thénthé, gbrekhúmán le grwanyá, mɛɛ́n kranmán hɔ́n lée áyɔn sa hɔ́n míbrɛ ɔ́n chré sa mɛn míbrɛ si mɛn khɔ chre.

⁹ Lókhɛ́n kasé ɔ́n ma le gɛ hɔ́n thɛ́n chré, tɛmɛ ɔ́n nɛ́ bháthó, áyɔn salé ɔ́n nɛ́ bháthó chré ló afuya fan ole tɛ́ hɔ́n.

¹⁰ Krethiɛnmán khɛ́n aphɛn mie, ápɛ ábidí bɛn mɛn mán sé wo, lókhɛ́n ábidí lókɔn ále chan mɛn yé, áli lo Hwánthe bidí, lónɔn ali sa: áleyɔn sa bhie ochán mɛ́n ca hwan féne.

¹¹ – Kasé bhie ɛyɔ hɛ ca ka, áleyɔn sa ɛphɛ́n sɛ nankhɛ, lókhɛ́n kasé ɛpɔ, tɛmɛ ɛgɛ hɛ ca ɔ́nmɔn nrwɛn, – ló saji sɛ lɔ áleyɔn sa ɛbhuri hɛ bhia.

¹² Thénthé agbemán nánkhɛ bhwe nɔn mɛn mán tɔ. (Ábhwe lókɔn áleli lo Hwánthe nɔn atɔ, lókhɛ́n mɛɛ́n bɛn nbrɛn nɔn mɛn tɔ), lónɔn ali sa: kasé sɛ li krethiɛn, lókhɛ́n mɛ́n bhia le li krethiɛn, lókhɛ́n bhie pɔ salé angɛ mɛ́n ca ɔ́nmɔn chré, áleyɔn sa sɛ owrɔ bhie lókɔn.

¹³ Lóyábhɛ brɛ, kasé bhie li krethiɛn, lókhɛ́n mɛ́n ca le li krethiɛn, lókhɛ́n sɛ pɔ salé angɛ mɛ́n bhia ɔ́nmɔn chré, áleyɔn sa bhie owrɔ sɛ lókɔn.

¹⁴ Ló mímí nbrɛn, sɛ khɛ́n ale bhu Jezwi mímí, mɛ́n bhia hɛ́nthé Yankan bha do-e, ló saji bhie khɛ́n ale bhu Jezwi mímí, mɛ́n lɔ, mɛ́n ca hɛ́nthé Yankan bha do-e. Lókhɛ́n kasé áleli lóyábhɛ nɛn, wo miɔn bha lí ńmiɔ́ bɛn ale yɛn Yankan, lókhɛ́n njɛ wo yɛn Yankan.

¹⁵ Ló kasé lephan khɛ́n ale bhu Yankan mímí, ánnɛn anyɔ́ mɛ́n bhia ká, tɛmɛ anyɔ́ nkɛ nká, ló saji kasé bhie khɛ́n ale bhu Yankan mímí, ánnɛn anyɔ́ mɛ́n ca nká, mɛ́n lɔ, tɛmɛ anyɔ́ nkɛ nká. Átɛsalé ábhwe lókɔn áleli ábidí se wo mɔ́nmɔn. Yankan énɛn salé ɔ́n má áthéji ńthɛ́nkhwálé hrómɛn.

¹⁶ Hɛ lókɔn khɛ́n ɛli krethiɛn bhie, kalósi ɛ́bha khɔ́ yɛ́n salé ɛ́bha do hɛ ca ká e? Ló hɛ lókɔn khɛ́n ɛli krethiɛn sɛ, hɛ lɔ, kalósi ɛ́bha khɔ́ yɛ́n salé ɛ́bha do hɛ bhia ká e?

Tɛmɛ ɔ́n tɛ́ yí osakhɔ́ Yankan sitó

¹⁷ Lephan brɛ áyɔn salé hɛ si khɛ́n lo Hwánthe tre hɛ lé, lóka Yankan che hɛ, tɛmɛ ɛya lóne. Lókɔn áli ábidí bɛn mɛɛ́n ha sé Yankan-gbemán khúnbrɛn.

¹⁸ Kasé lephan ɛjan khɛn phu lómánji khɛ́n Yankan che hɛ, áyí lókɔn ɛtɛ áli áyíbɛn alrɛ tre hɛ phɔ, ló áleyɔn sa ɛhɔ́n yɛn hɛ phɔ, saji kasé lephan ɛle jan khɛn lókhɛ́n Yankan che hɛ, ɛlé tɔlé sáán ɛ́lo jan khɛn.

¹⁹ Átɛsalé lephan kasé ɛjan khɛn lɔ, kasé ɛle jan khɛn lɔ, ále tɛ́ yíɛkɛ. Ábhwe ali bhwe nɔn ali salé lephan ɛji Yankan bidí.

²⁰ Lephan hɛ si ɛya lóka Yankan che hɛ, tɛmɛ ɛya lóne.

²¹ Kasé ɛli gangánwo lóka Yankan che hɛ, lóbhwe lókɔn ole tɛ́ gbrelí sé hɛ. Lókhɛ́n kasé ɛ́gɛ tɛ́ yíbɛn swa hɛ nbrɛn, tɛmɛ ɛtɛ́ lóyí lókɔn.

²² Lókhɛ́n kasé lephan ɛli gangánwo lóka lo Hwánthe che hɛ, hɛ lephan lókɔn, ɛli lephan bɛn lo Hwánthe swa hɛ yɛn ńne hrómɛn. Lóyábhɛ brɛ, kasé lephan ɛli líhɛ lóka Hwánthe che hɛ, tɛmɛ odi hɛ mwanhɛ́n salé thénthé ɛli Krisi gangánwo.

²³ Yankan bho mɛ́n jɛtɛn phɛ hɔ́n, lóhɛ́nthé áleyɔn sa ɔ́n jrɛn néphanmiɔn gangánmán.

²⁴ Yankan hɛ́nmɛn, mɛn hɔnsɛ́nhɔn, lephan brɛ hɛ si ɛya lóka wo che hɛ, tɛmɛ ɛya lóne.

Gbrekhúmán, gbrekhúyá le grwanyá

²⁵ Thénthé wo ebhá tɔ gbrekhúmán le gbrekhúyá ɔ́nmɔn bhwe; lo Hwánthe le se mɛn ábidí bɛn ábhwe lókɔn phɔ, lókhɛ́n mɛɛ́n nbrɛn hɛ́nphe mɛn mu, lóbhwe nɔn mɛn mán tɔ, ló mɛn ni lephan bɛn, lo Hwánthe nfɛkhuwú hrómɛn, ógɛ bhú mɛn mímí.

²⁶ Áyíkhúphɔ lókɔn thénthé lo bha lóhrómɛn, lóhɛ́nthé mɛn mú salé lephan hɛ si ɛya, tɛmɛ ɛya lóne.

²⁷ Kasé ɛphɛn bhie, ɛlé tɔlé ɛtɛ́ khékhremɛn wrɔ hɛ bhia, kasé ɛli gbrekhúwo, hɛ lɔ ɛlé tɔlé ɛtɛ́ khékhremɛn phɛ́n bhie.

²⁸ Lókhɛ́n kasé ɛphɛn bhie, lókɔn áleli ńne ɛtɛ, ló kasé bhiebhri ephɛ́n sɛ, lókɔn áleli ńne ńtɛ. Lókhɛ́n néphan aphɛn mie, ápɛ áyíkhúphɔ búdúbúdú sé wo, wo bháthólɛ́ hrómɛn, ló mɛɛ́n nɛn salé mɛn khwɛ́n hɔ́n yɛn áyíkhúphɔ yábhɛ lókɔn hromɛn.

²⁹ Mɛn hɔnsɛ́nhɔn, mɛn bhwe mɛɛ́n nɛn mɛn tɔ, lónɔn ali salé: ácí akha bháne ále thubhɔ, ló achan ncɛ́n élo, áyɔn sa néphan aphɛn mie, tɛmɛ wo tɛ́ yí sa néphan ale phɛn mie,

³⁰ ló néphan ethɔ́n hɛ́ndu, tɛmɛ wo tɛ́ yí sa néphan áphɔ le gbɔn, néphan ephília, tɛmɛ wo tɛ́ yí sa néphan alepɛ áphɔhá, néphan khɛ́n abho jɛtɛn ephɛ́ yí, wo lɔ, tɛmɛ wo tɛ́ yí sa néphan ale gɛ áyí wo bho jɛtɛn lo phɛ,

³¹ néphan apɛ áthéji yí, wo lɔ tɛmɛ wo tɛ́ yí sa néphan áthéji yí bhwe le jan wo thɛ́n. Átɛsalé áthéji lókɔn atre lo ewú, áli áyíbɛn abha le tré mɔ́n.

³² Mɛn pɔ salé ɔ́n chán ńthɛ́nlí hrómɛn féne. Lephan khɛ́n ali gbrekhúwo, lo Hwánthe júmán bhwe jɛn thɛ́n, átɛsalé ńni lephan énɛn otɛ́ yí pɔ́ lo Hwánthe mɛ,

³³ lókhɛ́n lephan aphɛn bhie, ńni lephan áthéji yí élimɛn, átɛsalé ánnɛn antɛ́ yí olimán mɛ́n bhia,

³⁴ ló lephan lókɔn ńni lephan aya nta mɔn. Bhie ali gbrekhúya, bhie ali bhiebhri aka yɛn sɛ, mɛ́n lókɔn, lo Hwánthe júmán bhwe nɔn ájɛn thɛ́n, átɛsalé ánnɛn anmó mɛɛ́n bɛn brɛn sé lo Hwánthe júmán. Lókhɛ́n bhie aphɛn sɛ, mɛ́n áthéji yí nɔn álimɛn, átɛsalé ánnɛn antɛ́ yí olimán mɛ́n ca.

³⁵ Hɔ́n mɔ́ndɔ́nman hɛ́nthé nɔn achɛse mɛɛ́n tɔ ábhwe lókɔn, áleli salé mɛn nkɛ́é ɔ́n ne phɛ́n mie. Lókhɛ́n mɛn pɔ salé ɔ́n tɛ́ áyí apriman, ɔ́n tɛ́ áyí lóphɔ chan, ló ɔ́n mó hɔ́n nbrɛn sé lo Hwánthe júmán, ɔ́n ne bhu mwanhɛ́n nánkhɛ.

³⁶ Ló kasé sɛ dɔn bhiebhri mɛ́n, lókhɛ́n bhie le ka lo bháthó, lóka yábhɛ lókɔn: kasé sɛ pɔ bhiebhri lókɔn banban, lókhɛ́n anman nɛ́n gɛ hɔ́n thɛ́n chré, áyɔn salé wo mɔ́nmɔn wo phɛ́n sa lósi sɛ khɔ pɔ. Lókɔn áleli ńne se wo.

³⁷ Lókhɛ́n kasé sɛ ebhú hɛ́nphe salé mɛ́n man nɛ́n gɛ phɛ́n bhiebhri lókɔn, lókhɛ́n ńya mɛ́n bhwetɔ́ tho, ló kasé ńnɛn gɛ phɛn bhiebhri lókɔn, ló lɔ ále tɛ́ yíɛkɛ.

³⁸ Lóhɛ́nthé ábhwetɔ́ ndɔn mɔn lókɔn hromɛn, sɛ khɛ́n adɛn ephɛ́n bhiebhri ńdɔn mɛ́n, mɛ́n yí ńtɛ áyɔn. Lókhɛ́n sɛ khɛ́n ale dɛn phɛn bhiebhri ńdɔn mɛ́n, mɛ́n lɔ mɛ́n yí ńtɛ áyɔn.

³⁹ Bhie aphɛn sɛ, lóka khúnbrɛn khɛ́n mɛ́n ca ma mɛpɔ́, ńni bhie bɛn ale ka mɛ́n bɛn nbrɛn lé, lókhɛ́n kasé mɛ́n ca khu, bhie lókɔn ńgɛ mɔ́nsi anphɛ́n sɛ nankhɛ mɛ́n thɛ́n pɔ, lókhɛ́n áyɔn salé lóphɛ́n lókɔn, olí áphɛ́n bɛn osakhɔ́ krethiɛnmán yítɛ́ hrómɛn.

⁴⁰ Lókhɛ́n bhie lókɔn, kasé mɛ́n míbrɛ anchré, áli áphɔhá khóo se. Lókhɛ́n ábhwe lókɔn mɛɛ́n tɔ, mɛn míbrɛ thɛ́n hrómɛn bhwe nɔn mɛn tɔ. Ló mɛn mú salé mɛn lɔ, Yankan Nánnánmi bha mɛn phɔ.