1 KHORƐ́NTHI KHÚBHƐ́NƐ́N 6 - Ebrié New Testament 1996

Krethiɛnmán ya wo hromɛn ébhɔlíkɔn sé wo bɛn nbrɛn

¹ Kasé hɔ́n thethé, lephan bɛn le mɛ́n jɔ ɔ́nmɔn épɛgbo, áleyɔn sa anmó mɛ́n bhwe no sé kwabhɔ́mán ali néphan ale yɛn Yankan, lókhɛ́n áyɔn sa anhɔ́n mɛ́n bhwe nó Yankan-gbemán hɛ́nmɛn.

² Wú ɔ́n ne yɛn salé Yankan-gbemán nɔn ábha bhɔ́ áthéjinɛ́n khúnbrɛn kwa? Ló kasé mímí nbrɛn hɔ́n nɔn ɔ́n ni néphan ábha bhɔ́ áthéjinɛ́n khúnbrɛn kwa, ló kalósi akhɔ tɛ khɛ́n ábhwe bhrií lókɔn atre, ɔ́n ne gɛ bhɔ́ lókwa e?

³ Wú ɔ́n ne yɛn salé lo nɔn lo bhá bhɔ́ Yankan-mranchɛ́mán khúnbrɛn kwa? Ló kalósi akhɔ tɛ khɛ́n ábhwe ali áthéji bhwe, lo bha lé gɛ bhɔ́ lókwa e?

⁴ Ló kasé ábhwe yábhɛ lókɔn ábha hɔ́n thethé, wú ɔ́n ma che néphan ale bha Yankan-gbemán hrómɛn obha bhɔ́ kwa sé hɔ́n?

⁵ Ábhwe lókɔn áli hɛ́ndɛ se hɔ́n. Ló wú hɔ́n hrómɛn álepɛ bhweyɛ́nwo bɛn khɛ́n kasé ágbo bha krethiɛnmán thethé, ágɛ bhɔ́ kwa sé hɔ́n?

⁶ Ló wú áyɔn sa lephan ali krethiɛn, anmɔlíkɔn sé mɛ́n jɔ kwabhɔ́mán ale yɛn Yankan hɛ́nmɛn?

⁷ Hɔ́n hrómɛn, néphan bháne ébhɔlíkɔn sé wo jɔn krethiɛnmán, áyí yábhɛ lókɔn hɔ́n etɛ́, élie salé hɔ́n yítɛ́ ále khɔ krethiɛnmán sitó. Ló bítɛ khɛ́n kasé lephan tɛ hɔ́n yí yan, ɔ́n ne gɛ yɔ́ lóbhwe ká? Ló bítɛ khɛ́n ɔ́n ne pɔ salé néphan osi hɔ́n sído?

⁸ Lókhɛ́n hɔ́n-ɛ, ɔ́n ya hɔ́n hrómɛn hɔ́n etɛ́ yí phromɛn phromɛn, ló hɔ́n ési sído! Ló áyí yábhɛ lókɔn, hɔ́n hɔnsɛ́nhɔn phɔ nɔn ɔ́n mo hɔ́n etɛ́!

⁹ Wú ɔ́n ne yɛn salé néphan etɛ́ yí phromɛn phromɛn lókɔn, wo bha le ló Yankan Bhringbi khúbhɛ́? Ɔ́n ne khrɛ hɔ́n bɛn nbrɛn: álepɛ gbakhrewo, moláwo, néphan éche wo jɔn miáhɔn, saji ńsɛ aya wo jɔn nsɛ hrómɛn elí gbakhre,

¹⁰ sídomán, néphan wo jɔn yí nɔ́n wo mɛ, ńdɛkruímán, néphan álrɛ wo jɔn bhwe le néphan ákhrɛ wo jɔn, wo néphan khúnbrɛn lókɔn, wo hromɛn álepɛ lephan brɛ ábha ló Yankan Bhringbi khúbhɛ́.

¹¹ Néphan fe abha hɔ́n hrómɛn, wo yí wo etɛ́ nɔn ali lókɔn. Lókhɛ́n hɔ́n khɛ́n wo cho hɔ́n ne yɛn hɔ́n phɔ, ɔ́n ni néphan bɛn wo khwɛn hɔ́n tre njɛ se Yankan. Lo Hwánthe Jezwi-Krisi hɛ́n hrómɛn, le Yankan Nánnánmi hromɛn, wo tɛ hɔ́n príman Yankan hɛ́nmɛn.

Tɛmɛ ɔ́n mó hɔ́n phɔ nánmí ha Hwánthe ngu

¹² Hɔ́n hrómɛn, néphan fe bháne étɔlé: “Mɛn, mɛn gɛ mɔ́nsi mɛn tɛ́ mɛn yí mɛn pɔ.” Mímí, lókhɛ́n áleli áyí khúnbrɛn nɔn ayɔn se hɔ́n. Mɛn lɔ mɛ́n gɛ tɔlé: “Mɛn, mɛn gɛ mɔ́nsi mɛn tɛ́ mɛn yí mɛn pɔ”, lókhɛ́n mɛn man nɛ́n dɛn yɔ́ mɛɛ́n nbrɛn nkalé sé áyíbɛn ohɔ́n mɛn jrɛn mɛ́n gangánwo.

¹³ Ɔ́n máne hɔ́n étɔlé: “Wo tɛ ńnɛn se álábhɛ, ló saji wo tɛ álábhɛ se ńnɛn.” Lókɔn áli ábhwe mímí, lókhɛ́n lóyí ndɔn mɔn lókɔn, cíbɛn Yankan bha lɔ lókhúnbrɛn. Lo nánmí lókɔn, áleyɔn sa lo bhó lí ágbakhre, lókhɛ́n áyɔn sa lo bhó lí júmán sé lo Hwánthe, ló lo Hwánthe lɔ obhó mɔ́n tré lo nánmí tho.

¹⁴ Yankan chɛ lo Hwánthe chan khúnɔn mɛn fe, ló lo lɔ, mɛ́n sɛ́npɛ́ hrómɛn, ánman chɛ́ lo chán ákhúnɔn mɛn fe.

¹⁵ Wú ɔ́n ne yɛn salé hɔ́n nánmí lókɔn áli Krisi nánmí phɛ́nta bɛn, ló wú áyɔn salé mɛn hɔ́n Krisi nánmí phɛ́nta bɛn jrɛn gbakhreya nánmí? Lókɔn áli áyíbɛn óle gɛ tɛ́!

¹⁶ Wú ɔ́n ne yɛn salé lephan kasé ɛbho hɛ phɔ nánmí ka gbakhreya phɔ, lephan lókɔn hɛ le gbakhreya ɔ́nmɔn hɔ́n nánmí li brɛ? Yankan hrɔ́ étɔlé: “Néphan mɔn lókɔn, wo jrɛn lephan míbrɛ.”

¹⁷ Lókhɛ́n kasé lephan ɛbho hɛ nbrɛn ka lo Hwánthe phɔ, lephan lókɔn, nánnánmi hromɛn hɛ le lo Hwánthe ɔ́nmɔn ɔ́n jrɛn lephan míbrɛ.

¹⁸ Tɛmɛ ɔ́n chán ágbakhre yítɛ́ phɔ féne! Átɛsalé ńne nánkhɛ khúnbrɛn lókɔn néphan etɛ́, áli ńne bɛn ále galí wo nánmí, lókhɛ́n kasé lephan ɛlí gbakhre, ɛli lephan bɛn ɛtɛ́ ne sé hɛ phɔ nánmí.

¹⁹ Wú ɔ́n ne yɛn salé hɔ́n phɔ nánmí lókɔn, áli ńkhú bɛn wo than se Nánnánmi Créncré, ló Nánnánmi Créncré lókɔn, áli áyí bɛn abha hɔ́n phɔ, áli áyíbɛn Yankan bho se hɔ́n? Ɔ́n ni néphan bɛn ɔ́n ne ka hɔ́n bɛn brɛn lé:

²⁰ Yankan bho mɛ́n jɛtɛn phɛ hɔ́n. Lóhɛ́nthé áyɔn salé ɔ́n mó hɔ́n nánmí lí júmán ha Yankan ngu.