1 KHORƐ́NTHI KHÚBHƐ́NƐ́N 5 - Ebrié New Testament 1996

Néphan elí gbakhre Yankan-gbemán hrómɛn

¹ Néphan khúnbrɛn étɔlé hɔ́n thethé ápɛ ágbakhre yítɛ́, lókhɛ́n hɔ́n gbakhre yábhɛ lókɔn hɔ́n elí, néphan nbrɛn khɛ́n ale yɛn Yankan lɔ, wo hromɛn oka wu áyí yábhɛ lókɔn: néphan bháne étɔlé hɔ́n hrómɛn lephan bɛn bho mɛɛ́n nbrɛn mɛ́n the mia phɛn!

² Ábhwe yábhɛ lókɔn aban tɛ nɛn, lótɛ khɛ́n ɔ́n ya hɔ́n hrómɛn hɔ́n efúmɛ́n! Lókhɛ́n áyɔn salé áphɔ ogbɔn hɔ́n khúnbrɛn, ló lephan khɛ́n atɛ áyí yábhɛ lókɔn, énɛn salé ɔ́n trɛnmɛn yɛn hɔ́n gbe hrómɛn.

^3-4 Kasé khɛ́n ńnánmí hrómɛn mɛn ma thwethwemɛn, nánnánmi hromɛn mɛn gbali hɔ́n phɔ. Lo Hwánthe Jezwi hɛ́n hrómɛn, lephan khɛ́n atɛ áyí phromɛn yábhɛ lókɔn, mɛn ma thwethwemɛn, lótɛ khɛ́n mɛn mɔ mɛ́n kwa phu sa lephan abha hɔ́n thethé. Lóka ɔ́n ma bhurɛhɛ́n, lókhɛ́n nánnánmi hromɛn mɛn mán má hɔ́n phɔ, lóka lókɔn, lo Hwánthe Jezwi sɛ́npɛ́ bha bhá lo thethé.

⁵ Lephan lókɔn, tɛmɛ ɔ́n hɔ́n-ɛn sé Abhɔsɛ́mɔ́n, ló mɛ́n nánmí lókɔn ali ńne nánmí, áyɔn sa wo hɔ́n lɔ, ochɛ́sé lóka lo Hwánthe bha sáji bhá, oswa mɛ́n nánnánmi yɛn ńne hrómɛn.

⁶ Áleyɔn sa ɔ́n fúmɛ́n! Yandran bɛn étɔlé: “Mányan bhrií tɛɛ chɛ́ nbɛdɛ khúnbrɛn yán phú.”

⁷ Mányan lɔ́lɔ́ lókɔn ali ńne mányan abha hɔ́n phɔ, tɛmɛ ɔ́n mó yɛn, ló hɔ́n phɔ khúnbrɛn bha chán. Ɔ́n ma tɛ́sa nbɛdɛ pɔ́pɔ́ alepɛ mányan lóhrómɛn. Ló mímí nbrɛn, mɛn yɛn salé hɔ́n nɔn ɔ́n ni nbɛdɛ pɔ́pɔ́. Átɛsalé lo Phákhe fɛ́thi bhɔhɛ́n kábrɛ, lósi akhɔ tɛ ɔn, wo hɔn Krisi ha npha sa lo fɛ́thi gbankhran.

⁸ Ló thénthé tɛmɛ lo lí lo Phákhe fɛ́thi, lókhɛ́n lo kpánhɔn lo bhá bhó lí fɛ́thi lókɔn, áleli kpánhɔn bɛn mányan lɔ́lɔ́ bha lóhrómɛn, mányan lɔ́lɔ́ lókɔn, lónɔn ali ńne le ágbakhre ɔ́nmɔn yítɛ́, lókhɛ́n lo kpánhɔn lo bhá bhó lí lo fɛ́thi, áli kpánhɔn bɛn alepɛ mányan lóhrómɛn, kpánhɔn lókɔn lónɔn ali ńthɛ́nbhwá le ábhwe mímí.

⁹ Áhrɔ́ lókɔn mɛn tɛ thu hɔ́n, lóhrómɛn mɛn kranman hɔ́n lée néphan elí gbakhre, ɔ́n ne gɛ wo ɔ́nmɔn khɔ.

¹⁰ Lókhɛ́n mɛn bhwe lókɔn mɛɛ́n tɔ, áleli néphan élamo bhwe mɛɛ́n tɔ, wo molamán lókɔn, godo-áan wo li néphan bɛn abha ágbakhre yítɛ́, ńmɛnɔ́n, sídosí, le ńmo yítɛ́ ɔ́nmɔn hrómɛn. Néphan yábhɛ lókɔn, kasé hɔ́n ekpá wo ká, énɛn salé ɔ́n chán áthéji hromɛn féne!

¹¹ Lókhɛ́n mɛn bhwe mɛɛ́n nɛn mɛn tɔ, lónɔn ali salé lephan khɛ́n étɔlé mɛ́n ni lo hɔnsɛ́n, lókhɛ́n acu bha ágbakhrelí, ńmɛnɔ́n le ńmola ɔ́nmɔn hrómɛn, lephan lókɔn khɛ́n aya élrɛ néphan bhwe, enán ndɛ, ési sído, lephan yábhɛ lókɔn, áleyɔn sa ɔ́n gɛ ɔ́nmɔn sɔ́mɔ́n lí nɛn.

^12-13 Néphan khɛ́n ale bha Yankan-gbemán hrómɛn, áleli mɛn nɔn mɛn mán mɔ́ wo kwa. Yankan nbrɛn bha bhɔ́ wo kwa. Lókhɛ́n néphan abha hɔ́n gbe hrómɛn, wú áleli hɔ́n nɔn ɔ́n ma bhɔ́ wo kwa? Lóhɛ́nthé Yankan hrɔ́ étɔlé: “Tɛmɛ ɔ́n tranmán abhúrɛwo yɛn hɔ́n thethé.”