1 KHORƐ́NTHI KHÚBHƐ́NƐ́N 4 - Ebrié New Testament 1996

Krisi-mranchɛ́mán

¹ Tɛmɛ ɔ́n gbɛnɛ́n wú lo sa néphan ali Krisi nɛnkhwɛ́nmán, sa néphan bɛn Yankan bho mɛ́n bhwe mímí ahrɔman tre ha wo mɔ́n mɛn.

² Ló lephan khɛ́n wo hɔn júmán ha mɛ́n mɔ́n mɛn, áyí míbrɛ wo ébhi lée antɛ́, lónɔn ali salé angɛlé ya.

³ Ló kasé elí hɔ́n khɛ́n hɔ́n ebhɔ́ mɛn kwa lɔ, saji kasé elí áthéjinɛ́n khɛ́n ebhɔ́ mɛn kwa lɔ, mɛn, áleli mɛn bhwe. Lókhɛ́n mɛn, mɛn nɛ́n mɔ mɛɛ́n nbrɛn kwa.

⁴ Mɛn, ábhwe lókɔn ále jan mɛn thɛ́n, lókhɛ́n áleli salé mɛn phɔ chan ábhwe lókɔn hromɛn. Lo Hwánthe nbrɛn nɔn ali lephan ebhɔ́ mɛn kwa.

⁵ Lóhɛ́nthé áleyɔn sa ɔ́n phrɛ bhɔ́ lephan kwa lókhɛ́n odi ákwabhɔ́ cí. Ákwabhɔ́ khɛ́n ábha phúji kábrɛ, lónɔn ali ákwa wo bhá bhɔ́, lóka lo Hwánthe bha sáji bhá. Lóka lókɔn, áyí khúnbrɛn ahrɔman bha dubhlékhu hromɛn, ánman hɔ́n lókhúnbrɛn phwan ká ngbémɛn, ló ábhwe ahrɔman bha néphan thɛ́n hrómɛn, ánman hɔ́n phwan ká tho. Lóka lókɔn lephan brɛ, hɛ yí ɛtɛ, ápɛ hɛ hwalri Yankan bha bhó sé hɛ.

⁶ Lóka mɛɛ́n tɔ bhwe, mɛn nu mɛn le Apolɔ́su ɔ́nmɔn hɛ́n tɔ bhwe, ló ochɛ́sé ábhwe lókɔn, ɔ́n yé lóthé mwámwá. Mɛn pɔ salé ɔ́n khɔ́ lo yítɛ́ hrómɛn yé yandran bhwe étɔ. Yandran étɔlé: “Ábidí bhwe atɔtre, tɛmɛ ɛya lótho.” Áleyɔn sa ɔ́n mó lephan bɛn hɛ́n pɛ fúmɛ́n, lókhɛ́n ɔ́n sa lephan lójɔ mɛ.

⁷ Abɛn nɔn achɛ hɛ li lephan khó? Áyí khúnbrɛn lókɔn ɛpɛ, wú áleli Yankan sé hɛ? Kasé áli ábhwe mímí, ńthé bítɛ khɛ́n ɛfúmɛ́n ɛ? Ló áyí lókɔn ɛpɛ, wú áleli áyíbɛn wo bho se hɛ wɛ́-nwɛ́?

⁸ Thénthé áyí khúnbrɛn khɛ́n hɔ́n énɛn, wo bho se hɔ́n phu! Ló ɔ́n ni bhringbi! Ɔ́n jrɛn ńmringbilímán, lókhɛ́n lo-ɛ lo le li bhringbi. Lókhɛ́n mɛn pɔ salé ɔ́n ní bhringbi mímí nbrɛn, ló lo lɔ, lo gɛ hɔ́n ɔ́nmɔn lí bhringbi.

⁹ Lo khúnbrɛn lókɔn khɛ́n lo li Krisi-mranchɛ́mán, mɛn mú salé néphan hromɛn, Yankan khwɛn lo sa phuji: lo tɛsa néphan bɛn wo khwɛn wo élo wɛ́n ápasá khúnbrɛn hɛ́nmɛn, lo tɛsa áyíbɛn néphan khúnbrɛn gbaya éwan, Yankan-mranchɛ́mán lɔ éwan lo, lókhɛ́n áthéjinɛ́n lɔ éwan lo.

¹⁰ Krisi hɛ́nthé lo jrɛn fantɛ́mán, lókhɛ́n hɔ́n-ɛ, ɔ́n ni bhweyɛ́nmán; Krisi hɛ́nthé lo-ɛ lo le pɛ sɛ́npɛ́, lókhɛ́n hɔ́n-ɛ, ɔ́n ni néphan apɛ sɛ́npɛ́; Krisi hɛ́nthé lo-ɛ wo éha lo lia, lókhɛ́n hɔ́n-ɛ, wo éji hɔ́n.

¹¹ Ncɛ́n cí lókɔn khɛ́n wo étɔ bhwe, lo bha áko hromɛn, lo bha ńdukro hromɛn ntɔ́nyán, ádɛgɔn thwɛ lo phɔ phu, wo échrwa lo, ló lo etɛ́ dandan jekhali.

¹² Lo li néphan bɛn lo lí júmán khékhremɛn lókhɛ́n lo gɛ nɛn lí. Wo ephiámɔ́n sé lo, lótɛ khɛ́n lo-ɛ, lo ebhɔ́ wo ndu, wo élri lo gbre, lótɛ khɛ́n lo gɛlé ya.

¹³ Néphan khɛ́n élrɛ lo bhwe, lo-ɛ lo étɔ bhwe sé wo ńthɛ́nkhwálé mɛn. Áthéji lókɔn, lo jrɛn ńbie ofi wo élo khwábu, ncɛ́n lókɔn nbrɛn khɛ́n wo étɔ bhwe lɔ, lo jrɛn néphan phromɛn áthéjinɛ́n hɛ́nmɛn.

¹⁴ Áhrɔ́ lókɔn mɛn tɛ́ thu hɔ́n, áleli salé mɛɛ́n nɛn mɛn chɛ́ hɛ́ndɛ oká hɔ́n mɛ, lókhɛ́n mɛn hrɔ́ mɛn tɛ, lóthé nɔn ali salé mɛɛ́n nɛn mɛn khɔ́ lóphɔ tɔ bhwe ha hɔ́n, lónian mɛn khɛ́n ɔ́n ni mɛn miɔn mɛn pɔ hɛ́nthé.

¹⁵ Hɔ́n yíliemán khúnbrɛn ɔ́n pɛ Jezwi-Krisi hɛ́n hrómɛn, kasé akpɛn akpɛn wo li lɔ, wo khúnbrɛn lókɔn, wo bha lé gɛ lí hɔ́n themánhɔn, lephan míbrɛ nɔn ali hɔ́n the: átɛsalé Krisi hɛ́n hrómɛn, mɛn nɔn mɛn ni hɔ́n the, Ábhwe Bhwábhwá lókɔn mɛɛ́n tɔ sé hɔ́n yé hɛ́nthé.

¹⁶ Lóhɛ́nthé mɛɛ́n na hɔ́n, hɔ́n yítɛ́ hrómɛn tɛmɛ ɔ́n mó mɛn mɔ́n.

¹⁷ Lóhɛ́nthé nɔn mɛn chɛ Thimote olo gɛ hɔ́n. Yípɔ lókɔn, ńni mɛn bhi bɛn mɛn pɔ khɛ́n agɛlé ya lo Hwánthe hɛ́n hrómɛn. Mɛn si mɛn khɔ ni júmán Jezwi-Krisi hɛ́n hrómɛn, lósi mɛn khɔ nie néphan yí, ási khúnbrɛn mɛn sakhɔ ni júmán Yankan-gbemán khúnbrɛn hrómɛn, ánman tɛ́ lóbhwe di hɔ́n mwanhɛ́n.

¹⁸ Néphan fe ebhú salé, mɛn man nɛ́n gɛ sáji man wú hɔ́n, lóhɛ́nthé wo étɔ bhwe fúmɛ́n.

¹⁹ Lókhɛ́n kasé lo Hwánthe dɛn, mɛn cí mɛn mán má, ále lo sikhɔn. Lóka lókɔn, néphan khɛ́n édi mɔ́n thɛ́n, áleli wo bhwe wo étɔ pán mɛn mán yé, lókhɛ́n mɛɛ́n nbrɛn mɛn mán wú wo yí yábhɛ wo bhá gɛ tɛ́!

²⁰ Átɛsalé Yankan Bhringbi khúbhɛ́ lókɔn wo étɔ lóbhwe, áleli míthébhɔ́, lókhɛ́n áli áyíbɛn apɛ sɛ́npɛ́.

²¹ Ló ábhwe ndɔn mɔn lókɔn hromɛn ɔn, lóbɛn nɔn ɔ́n pɔ ɛ? Wú ɔ́n pɔ salé mɛn mó ábhɛ́ man mra hɔ́n, lé nka mɛn man gɛ hɔ́n, ápɔ́ le ńthɛ́nkhwálé ɔ́nmɔn hrómɛn?