1 KHORƐ́NTHI KHÚBHƐ́NƐ́N 3 - Ebrié New Testament 1996

Yankan júmánmán

¹ Mɛn hɔnsɛ́nhɔn, mímí nbrɛn, lóka lókɔn khɛ́n mɛn no mɛɛ́n tɔ Yankan bhwe sé hɔ́n yé, léli salé ɔ́n pɛ Yankan Nánnánmi, lókhɛ́n mɛn tɔ bhwe se hɔ́n ye sa néphan bɛn ali ńnánmí hrómɛn néphan, mɛn tɔ bhwe se hɔ́n sa néphan bɛn ali ńmiɔ́ chɛ́-nchɛ́ mímíbhú hrómɛn.

² Lóka yábhɛ lókɔn ndwa yɛ́ndu nɔn mɛn phrɛ mo gbɛ hɔ́n, lókhɛ́n áleli ńnɛn bhwá ali néphan gbóngbo nɛn alí, átɛsalé lóka lókɔn, ɔ́n ka di lósi ɔ́n gɛ lí nɛn yábhɛ lókɔn, ló saji thénthé nbrɛn lɔ, ógɛ tɔlé ɔ́n ka di lósi ɔ́n gɛ lí nɛn yábhɛ lókɔn.

³ Átɛsalé hɔ́n etɛ́ yí sa áthéjinɛ́n si ákhɔ́ tɛ́ yí. Hɔ́n hrómɛn, hɔ́n jɔn yí enɔ́n hɔ́n mɛ, ló ɔ́n ya hɔ́n hrómɛn hɔ́n épɛgbo, áyí yábhɛ lókɔn hɔ́n etɛ́, wú ále gɛ lie néphan salé ɔ́n ma áthéji yítɛ́ hrómɛn ntɔ́nyán?

⁴ Hɔ́n hrómɛn lephan lókɔn chánfe, mɛ́n nkɛé: “Mɛn-ɛ Phɔ́lu yé mɛn ma”, lephan lójɔ chánfe, mɛ́n nkɛé: “Mɛn-ɛ Apolɔ́su yé mɛn ma”, ló áyí yábhɛ lókɔn hɔ́n etɛ́, wú ále khɔ́ áthéjinɛ́n si ákhɔ́ tɛ́ yí?

⁵ Yán abɛn li Apolɔ́su ɛ? ló abɛn nɔn ali Phɔ́lu ɛ? Lo khúnbrɛn lo li Yankan nɛnkhwɛ́nmán, ló lo phɔ nɔn ɔ́n khɔ gɛ mímíbhú. Lo brɛ brɛ khúnbrɛn lókɔn, lephan brɛ hɛ júmán khɛ́n lo Hwánthe se hɛ, lónɔn ɛ́bha lí.

⁶ Lókhɛ́n ńyámí lókɔn, mɛn nɔn mɛn ha, ló Apolɔ́su nɔn ali lephan ehá ndu nyámí hɛ́n, lókhɛ́n Yankan nɔn achɛ ńyámí lókɔn ále thandi.

⁷ Lephan khɛ́n aha nyámí, le lephan khɛ́n ekhɔ́ ndu há nyámí hɛ́n, léli lónɔn apɛ bhwe: lókhɛ́n Yankan nɔn ali áyí khúnbrɛn ló hɛ́n, átɛsalé mɛ́n nɔn anchɛ́ nyámí lé thándi.

⁸ Lephan khɛ́n aha nyámí le lephan khɛ́n ehá ndu nyámí hɛ́n, wo mɔ́nmɔn wo li brɛ. Lephan brɛ, hɛ júmán si ɛkhɔ li, lóne nɔn Yankan bha khɔ́ sɔ́n hɛ pɛn.

⁹ Átɛsalé lo khúnbrɛn lókɔn, lo li júmánmán abha ágbe míbrɛ hromɛn elí júmán sé Yankan, ló hɔ́n nɔn ɔ́n ni Yankan gɔn lo bha lóhrómɛn lo elí júmán. Saji hɔ́n nɔn ɔ́n ni Yankan-nkhú bɛn wo than tre.

¹⁰ Yankan phɔlíman ase mɛn, lóhrómɛn nɔn mɛn khɔ ni júmán hɔ́n thethé, ló mɛn ni júmán sa mɛnanwo khóo bɛn ayɛ́n nkhú thán, ló mɛn di nkhú lé mɛn thán, lókhɛ́n ńkhú lókɔn mɛn dilé ya, thénthé lephan nankhɛ nɔn aya lótho ethán ɔ́nmɔn lo. Lókhɛ́n lephan brɛ, hɛ si ɛkhɔ ɛthán ńkhú lókɔn, áyɔn sa ɛhá lóphɔ mwanhɛ́n.

¹¹ Átɛsalé Yankan nbrɛn nɔn aphrɛ san Jezwi-Krisi tre, salé mɛ́n míbrɛ nɔn anní ńkhú lókɔn wo dilé ya wo ethán, ló abha lé pɛ ńkhú nánkhɛ wo bhá cu dilé thán npɔhɔ́n.

¹² Ló ńkhú lókɔn khɛ́n wo dilé ya wo ethán, ápɛ néphan fe ábha bhó ńcí, jɛtɛn phopho, ábhú ali ńdubhú mwámwá, thán ńkhú lókɔn, lókhɛ́n ápɛ néphan fe ábha bhó áyá, ánánkhu le ńdɛ-nbi ɔ́nmɔn thán ńkhú lókɔn.

¹³ Lókhɛ́n ákwabhɔ́ cí, lónɔn wo ebhá wú lephan brɛ, hɛ júmán si ɛkhɔ li. Átɛsalé lócí lókɔn átɛn ali Yankan kwabhɔ́ tɛn, ábha thándi, ló átɛn lókɔn lónɔn ebhá hɔ́n lephan brɛ brɛ júmán khúnbrɛn ali thándi sé néphan wú. Átɛn lókɔn, lónɔn ali áyí wo ebhá bhó jan júmán khúnbrɛn mánji, lónɔn ebhá lie lephan brɛ, hɛ júmán si ɛkhɔ li.

¹⁴ Ló kasé lephan hɛ júmán ɛli, lókhɛ́n átɛn le thɔn hɛ júmán lɔ, hɛ lephan lókɔn Yankan bha sɔ́n hɛ pɛn.

¹⁵ Lókhɛ́n kasé lephan átɛn thɔn hɛ júmán lɔ, hɛ lephan lókɔn, átɛsalé hɛ pɛnsɔ́n lia. Lókhɛ́n hɛ nbrɛn-ɛ wo bhá swa hɛ, ló ɛtɛsa lephan wo hɔn chan átɛn hromɛn thandi.

¹⁶ Wú ɔ́n ne yɛn salé hɔ́n nɔn ɔ́n ni Yankan-nkhú, ló Yankan Nánnánmi bha hɔ́n phɔ?

¹⁷ Lóhɛ́nthé kasé lephan ɛlɔ Yankan-nkhú, hɛ lɔ Yankan bha lɔ hɛ. Átɛsalé Yankan-nkhú li áyíbɛn atɛ créncré, ló hɔ́n nɔn ɔ́n ni Yankan-nkhú lókɔn wo étɔ lóbhwe.

¹⁸ Ɔ́n ne khrɛ hɔ́n bɛn nbrɛn. Kasé hɔ́n hrómɛn lephan bɛn ebhú salé mɛ́n ni bhweyɛ́nwo áthéjinɛ́n hrómɛn, tɛmɛ anhɔ́n mɛɛ́n nbrɛn jrɛn dɔdɔwo lókhɛ́n ánman gɛ ní bhweyɛ́nwo ali bhweyɛ́nwo mímí.

¹⁹ Átɛsalé áyí khɛ́n áthéjinɛ́n ewú salé ali ábhweyɛ́n, áyí lókɔn, áli áyíbɛn Yankan hɛ́nmɛn álepɛ thé. Lóhɛ́nthé Yankan hrɔ́ étɔlé: “Yankan khwɛn bhweyɛ́nmán wo bhweyɛ́n hrómɛn.”

²⁰ Ló Yankan hrɔ́ cu étɔlé: “Hwánthe yɛn salé bhweyɛ́nwo mɛ́n hɛ́nphe anmú, ále gɛ tɛ́ yíɛkɛ.”

²¹ Lóhɛ́nthé áleyɔn sa ɔ́n mó lephanmi hɛ́n pɛ fúmɛ́n. Átɛsalé áyí khúnbrɛn lókɔn, áli hɔ́n ékɛ:

²² Phɔ́lu, Apolɔ́su le Piɛ, áthéji pasá nbrɛn, ńmɛpɔ́bhá le ákhú, ncɛ́n le npi, lóyí khúnbrɛn lókɔn, áli hɔ́n ékɛ;

²³ lókhɛ́n hɔ́n khúnbrɛn lókɔn, ɔ́n ni Krisi néphan, ló Krisi lɔ li Yankan mɔ́n mɛn lephan.