1 KHORƐ́NTHI KHÚBHƐ́NƐ́N 2 - Ebrié New Testament 1996

Krisi khɛ́n wo chɛ ha áyábhletre phɔ, mɛ́n phɔ bhwetɔ́

¹ Mɛn hɔnsɛ́nhɔn, lóka lókɔn khɛ́n mɛn no hɔ́n yéne mɛɛ́n tɔ Yankan bhwe mímí ahrɔman tre sé hɔ́n yé, áleli yandran khóo bɛn hromɛn mɛn khɔ ntɔ bhwe, saji áleli ábhweyɛ́n khóo bɛn hromɛn mɛn khɔ ntɔ bhwe se hɔ́n ye.

² Lóka lókɔn khɛ́n mɛn ma hɔ́n thethé, mɛn nɛn pɔ sa mɛn yé ábhwe nankhɛ, kasé áleli Jezwi-Krisi míbrɛ lókɔn khɛ́n wo chɛ ha yábhletre phɔ, mɛ́n phɔ bhwe pán.

³ Lóka lókɔn khɛ́n mɛn no hɔ́n yéne, mɛn nɛn pɛ sɛ́npɛ́ bhrií bha mɛn phɔ, mɛn sókhú, mɛɛ́n fa lókhɛ́n mɛn no gɛ hɔ́n,

⁴ ló mɛn yílie hromɛn le mɛn bhwetɔ́ hrómɛn, áleli míthébhɔ́ wrɛ́ ali áthéji bhweyɛ́n khóo hrómɛn nɔn mɛn khɔ ntɔ bhwe se hɔ́n ye, lókhɛ́n mɛn bhwetɔ́ hrómɛn, Yankan Nánnánmi sɛ́npɛ́ li júmán thándi se néphan wu.

⁵ Lóhɛ́nthé, hɔ́n mímíbhú ɔ́n gɛ, áleli yíbɛn atre áthéji bhweyɛ́n tho, lókhɛ́n áli yíbɛn atre Yankan sɛ́npɛ́ tho.

Yankan bhweyɛ́n

⁶ Néphan khɛ́n nánnánmi hromɛn ale cu li ńmiɔ́ chɛ́-nchɛ́ npɔhɔ́n, ábhwe bhwábhwá lókɔn mɛɛ́n tɔ, lóhrómɛn ápɛ ábhweyɛ́n sé wo. Ábhweyɛ́n lókɔn khɛ́n mɛɛ́n tɔ lóbhwe, áleli áthéji bhweyɛ́n, saji áleli ńsɛ́npɛ́ phromɛn bhweyɛ́n, átɛsalé ńsɛ́npɛ́ phromɛn lókɔn khɛ́n éyalí áthéji, áli ńsɛ́npɛ́ bɛn cíbɛn lóbhwe bha phú.

⁷ Lókhɛ́n ábhweyɛ́n lókɔn mɛɛ́n tɔ lóbhwe, áli Yankan bhweyɛ́n ahrɔman tre, áli ábhweyɛ́n bɛn wo hɔn hrɔman áthéjinɛ́n hɛ́nmɛn. Ábhweyɛ́n lókɔn, lóka wo ka tɛ áthéji, lónɔn Yankan thwasi bho tre lo lé, ló ankhɔ́ lóphɔ do lo ká mɛ́n nguhá hrómɛn.

⁸ Néphan khónkhó khúnbrɛn khɛ́n apɛ áthéji, wo hromɛn álepɛ lephan míbrɛ agɛ ábhweyɛ́n lókɔn. Kasé wo gɛ ábhweyɛ́n lókɔn, ka wo bha le hɔ́n lo Hwánthe chɛ́ há áyábhletre phɔ, lo Hwánthe lókɔn khɛ́n ali lephan abho Yankan nguhá thándi se néphan wu.

⁹ Lóhɛ́nthé Yankan hrɔ́ étɔlé: “Ápɛ áyíbɛn bháne, áka pɛ lephan awu, ápɛ áyíbɛn bháne, áka pɛ lephan aye lóbhwe, ápɛ áyíbɛn bháne, áka pɛ lephan abhu lóphɔ hɛ́nphe, ló áyí lókɔn, néphan apɔ Yankan, wo nɔn Yankan bho tre wo lé.”

¹⁰ Lókhɛ́n ábhweyɛ́n lókɔn ahrɔman tre, lo nɔn lo li néphan Yankan khɔ Nánnánmi phɔ bho lie lo. Átɛsalé Nánnánmi nɔn ali lephan ágɛ franmán ábhwe khúnbrɛn thándi tho, Yankan bɛn brɛn thɛ́n hrómɛn bhwe ahrɔman tre lɔ, ángɛ franman thándi tho.

¹¹ Lephanmi lókɔn Yankan tɛ, mɛɛ́n nbrɛn nánnánmi abha mɛ́n phɔ nɔn ágɛ yɛ́n mɛ́n phɔ bhwe khúnbrɛn phú. Lóyábhɛ brɛ, Yankan Nánnánmi míbrɛ nɔn ágɛ yɛ́n Yankan phɔ bhwe khúnbrɛn phú.

¹² Nánnánmi yábhɛ lókɔn lo gɛ, áleli áthéji nánnánmi, lókhɛ́n áli Nánnánmi bɛn achan Yankan yé, ló Nánnánmi lókɔn mɛ́n nɔn ánman chɛ́ lo yɛ́n Yankan yí khúnbrɛn abho se lo.

¹³ Áyí lókɔn Yankan bho se lo, lóphɔ bhwe nɔn lo étɔ sé néphan oyé, ló áleli ábhwetɔ́ bɛn achan áthéji bhweyɛ́n hrómɛn, lókhɛ́n áli ábhwetɔ́ bɛn achan Yankan Nánnánmi yé. Ábhwe mímí lókɔn achan Nánnánmi yé, lóbhwe nɔn lo étɔ sé néphan apɛ Nánnánmi.

¹⁴ Lephan khɛ́n alepɛ Yankan Nánnánmi, anman nɛ́n gɛ do ábhwe mímí achan Yankan Nánnánmi yé: lephan lókɔn mɛ́n yéne, ábhwe mímí lókɔn, áli ábhwe bɛn alepɛ thé, áli ábhwe bɛn ánnɛn gɛ yé lóthé, átɛsalé Nánnánmi míbrɛ nɔn ágɛ chɛ́ lephanmi yɛ́n ábhwe khúnbrɛn thé.

¹⁵ Lókhɛ́n lephan apɛ Yankan Nánnánmi, ángɛ yɛ́n ábhwe khúnbrɛn phú, lókhɛ́n mɛ́n-ɛ álepɛ lephan ágɛ yɛ́n mɛ́n lephan yábhɛ ńni.

¹⁶ Lóhɛ́nthé Yankan hrɔ́ étɔlé: “Abɛn yɛn Hwánthe hɛ́nphe ebhú? Abɛn gɛ tɔ bhwe ha Hwánthe?” Lókhɛ́n lo-ɛ lo yɛn Krisi hɛ́nphe ebhú.