1 KHORƐ́NTHI KHÚBHƐ́NƐ́N 16 - Ebrié New Testament 1996

Áyí wo ébɔn lo sé lo hɔnsɛ́nhɔn

¹ Thénthé ábhwe lo ebhá tɔ, lónɔn ali áyí wo ébɔn lo sé Yankan-gbemán abha Jeruzalɛ́mɛn. Ábhwe mɛn tɔ se Yankan-gbemán abha Galáthi gotho, hɔ́n lɔ tɛmɛ ɔ́n tɛ́ lóyí yábhɛ brɛ.

² Dimánsi khúnbrɛn, lephan brɛ, hɛ mɔ́n yí ahɔn, tɛmɛ ɛbhó ká njɛ, ɛbhó bo tré, ochɛ́sé lóka mɛn mán di hɔ́n yé, olé cu ya bɔn yí npɔhɔ́n.

³ Lóka mɛn mán má hɔ́n yé, áyí khɛ́n ɔ́n bɔn tre, mɛn mán tɛ́ hrɔ́ nká lóphɔ, mɛn mán khwɛ́n sé hɔ́n néphan hɔ́n nbrɛn ɔ́n ma sán, ló wo bhá khwɛ́n ló Jeruzalɛ́mɛn.

⁴ Lókhɛ́n kasé énɛn salé mɛn lɔ mɛn no, ló mɛn mán gɛ wo ɔ́nmɔn no.

Phɔ́lu yí dɔndɔn ebhá tɛ́

⁵ Lóka mɛn mán má hɔ́n yé, mɛn mán sakhɔ́ Masedwánɛn gotho lókhɛ́n mɛn mán di hɔ́n yé. (Áyɔn salé mɛn sakhɔ́ Masedwánɛn gotho).

⁶ Lóka lókɔn, mɛn mán gɛ hɔ́n ɔ́nmɔn chré ábha mɔ́n kpɛ́bɛn, ló ási khúnbrɛn mɛn mán khali no, ɔ́n ma dɔnmán mɛn mɔ́n, mɛn nó lóne. Átɛsalé lóka lókɔn, áli áka bɛn ágba di.

⁷ Mɛn pɔ salé mɛn wú hɔ́n lókhɛ́n abha lé tɛ́sa lephan abhuri ehɛ́n lókhɛ́n elɛ́ wú néphan. Kasé lo Hwánthe dɛn, mɛn mú salé mán gɛ hɔ́n ɔ́nmɔn chré ábha mɔ́n kpɛ́bɛn.

⁸ Lókhɛ́n mɛɛ́n nɛn mɛn jran chré krɛn Efɛ́zi khúbhɛ́ odi lóka wo bhá lí Pantekɔ́thi fɛ́thi.

⁹ Átɛsalé áphɔlíman hromɛn, mɛn gɛ júmán khóo bɛn ákhúbhɛ́ lókɔn hromɛn, lókhɛ́n néphan búdúbúdú gɛ mɛn ɔ́nmɔn éswan.

¹⁰ Lóka Thimote bha di hɔ́n yé, tɛmɛ ɔ́n do-e mwámwá. Átɛsalé mɛ́n lɔ anní júmán sé lo Hwánthe sa mɛn a.

¹¹ Olépɛ lephan osɛ mɛ. Lókhɛ́n tɛmɛ ɔ́n dɔnmɛn mɔ́n ńthɛ́nkhwálé hrómɛn, lóka ánkhali ní júmán, ló ansáji man gɛ mɛn. Mɛn chre mɛɛ́n bo-e, mɛ́n le lo hɔnsɛ́nhɔn abha mɛ́n phɔ.

¹² Thénthé, ló ali lo hɔnsɛ́n Apolɔ́su phɔ bhwe, mɛɛ́n nbrɛn mɛn krɛnmɛn lée anno wú hɔ́n, mɛ́n le lo hɔnsɛ́nhɔn nankhɛ ɔ́nmɔn. Lókhɛ́n ábhwe lókɔn ále khwɛ hɛ́nmɛnlé. Lókhɛ́n lóka ánman gɛ mɔ́nsi, ánman má hɔ́n yé.

Ábhwetɔ́ aphuji le Phɔ́lu néphan ébhi aphuji

¹³ Tɛmɛ ɔ́n hámwanhɛ́n ya, tɛmɛ hɔ́n mímíbhú ogɛlé, tɛmɛ hɔ́n thɛ́n ogɛlé, tɛmɛ ɔ́n khɔnmán phɔ.

¹⁴ Tɛmɛ ɔ́n tɛ́ yí khúnbrɛn ápɔ́ hrómɛn.

¹⁵ Ɔ́n yɛn salé Stefanasi bháthónɛ́n nɔn ali néphan alili bho wo nbrɛn se Krisi Akayi gotho. Wo li néphan bɛn elí júmán sé Yankan-gbemán. Mɛɛ́n kranmán hɔ́n, mɛn hɔnsɛ́nhɔn,

¹⁶ néphan yábhɛ lókɔn wo bhwe wo étɔ, tɛmɛ ɔ́n yé, wo le néphan khúnbrɛn abha wo phɔ elí júmán.

¹⁷ Lóka Stefanasi, Fɔthunathusi le Akayikúsi ɔ́nmɔn bhá gɛ lo, áliman mɛn kábrɛ. Lóka ɔ́n ne bhɛ́ne, wo nɔn wo hɔn mɛn pɛ.

¹⁸ Wo chɛ mɛn thɛ́n khwalé, sa lósi hɔ́n lɔ, wo khɔ chɛ hɔ́n thɛ́n khwalé. Ló néphan yábhɛ lókɔn, áyɔn salé ɔ́n há wo mwanhɛ́n mwámwá.

¹⁹ Yankan-gbemán khúnbrɛn abha Azi gotho ébhi hɔ́n mwámwá. Lo Hwánthe hɛ́n hrómɛn, Akhilási le Prisila ɔ́nmɔn lɔ ébhi hɔ́n, wo le Yankan-gbemán khúnbrɛn khɛ́n ábhurɛhɛ́n wo bháthó.

²⁰ Lo hɔnsɛ́nhɔn khúnbrɛn abha krɛn ébhi hɔ́n. Ápɔ́ hrómɛn tɛmɛ ɔ́n mɔ́ hɔ́n bɛn nbrɛn yí.

²¹ Mɛn Phɔ́lu nbrɛn nɔn mɛn mo mɔ́n nrɛ ábhwetɔ́ lókɔn: Mɛɛ́n mi hɔ́n khúnbrɛn.

²² Lephan kasé ɛle pɔ lo Hwánthe, tɛmɛ muswe obhɔ́ hɛ! Marana tha – Lo Hwánthe, tɛmɛ ɛbhá!

²³ Tɛmɛ lo Hwánthe Jezwi phɔlíman obhá hɔ́n phɔ.

²⁴ Mɛn pɔ hɔ́n khúnbrɛn Jezwi-Krisi hɛ́n hrómɛn.